¿Amo tikonpiaok tekit? Itech Biblia tikonajsis tein uelis mitsonpaleuis
Komo amo tikonpiaok tekit uelis kichiuas amo xikonpiaok tomin. No uelis kichiuas xikonpia kuejmolmej iuan mochankauan uan xa hasta amo kuali tionmomachilis. ¿Toni uelis mitsonpaleuis? Xikonita seki taman tein Biblia tamachtia tein nochipa uelis techpaleuis.
Xikonilui aksa keniuj tionmomachilia.
Tein Biblia kijtoua: “Akin yekmelauj kuali iuan timouikaj nochipa techtasojta” (Proverbios 17:17).
Komo amo tikonpiaok tekit xa uelis tiontayokoyas, tionkualanis, amo tikonmatis toni tikonchiuas uan xa hasta tikonmachilis ke amo teyi kuali tikonchiua. Sayoj ke komo tikintapouia mochankauan oso akin iniuan tionmouika keniuj tionmomachilia, nejon mitsonpaleuis xionyolseujto. Yejuan xa no mitsonyolmajxitiskej toni uelis tikonchiuas para tikonajsis okse tekit.
Amo xionmoteltekipacho.
Tein Biblia kijtoua: “Maj amo keman namechtekipacho tein mostika panos, porin mostika no namechtekipachos okseki taman” (Mateo 6:34).
Biblia techiluia maj achto kuali tikixtalikan toni tikchiuaskej (Proverbios 21:5). Sayoj ke no techiluia maj amo timoteltekipachokan ika tein uelis panos satepan. Maj sayoj titanemilikan itech tein panotos sejse tonal, porin kemansa sayoj timoteltekipachouaj uan amo yekmelauj panoua tein tiknemiliayaj ke panoskia.
Biblia no kijtoua okseki taman tein no uelis techpaleuis maj amo timoteltekipachokan. Komo tikonneki okachi tikonmatis, xikonlero tamachtilis “¿Keniuj uelis tionyolseuis keman semi tionmotekipachos?”.
Xikonpata kemej tikonkui motomin.
Tein Biblia kijtoua: “Nikmati tein amo miakej kimatij: keniuj se yolpakis […] keman se kitelpias uan keman amo teyi se kipias” (Filipenses 4:12).
Xikonita keniuj axkan uelis tionnemis ika amo miak tomin. Xa monekis amo tikonkouas miak taman para amo tikontamis nochi motomin. Uan no xikonita keniuj amo tionmotauikaltis komo amo moneki (Proverbios 22:7).
Komo tikonneki tikonitas okseki taman tein mitsonpaleuis maj amo mitsonouijmaka tionnemis ika amo miak tomin, xikonita tamachtilis “Keniuj uelis kuali tinemiskej maski amo techajsisok tomin”.
Kuali xikonkui motiempo.
Tein Biblia kijtoua: “Xiknextikan ke nantamatinij […] uan kuali xikuikan namotiempo” (Colosenses 4:5).
Maski amo ixyetos horas tein monekis titekitis, xikonnemili toni tikonchiuas para kuali tikonkuis motiempo. Nejon mitsonpaleuis maj kuali ixyeto toni tikonchiuas uan no kuali tionmomachilis.
Xikonpata tein monekis.
Tein Biblia kijtoua: “Akin chikauak tekiti kiselia tein kuali” (Proverbios 14:23).
Xionmochikaua tikonchiuas tein yeski tekit, maski achto xa amo tikonchiuaya. Amo xikonixtopeua se tekit sayoj porin amo tikonuelita oso amo semi miak tomin tikontani.
Amo xionmosenkaua.
Tein Biblia kijtoua: “Kualkan xiktoka semilla, uan amo ximomaseui hasta tiotak; porin amo tikmati katiyejua ixuas” (Eclesiastés 11:6).
Xikonsentoka xikontemo tekit. Xikinilui mochankauan, akin tikinixmati, akin iniuan tiontekitia uan movecinos ke tikontemojtok tekit. No xikonita kampa kitaliaj ke kitemouaj aksa maj tekiti oso xionyoui kampa tepaleuiaj maj se kiajsi tekit. No uelis tikontemos páginas itech internet kampa ixnesi ke kitemojtokej maj aksa tekiti. Xa monekis miakkan tionyas oso tikontemakas miak amamej para uelis tikonajsis se tekit.