Timosentiliaj ika Zoom

Itech miak altepemej, tekiuanij tanauatijkej maj amo timonetechokan uan maj amo timosentilikan. Tiitaixpantijkauan Jehová tiknekij tikintakamatiskej, sayoj ke tiknekij tiksentokaskej timosentiliskej kemej amo timomauaskej. Yejua ika, itech nechikolmej tikuitokej Zoom para timosentiliskej.

Tokniuan Oloch Taojtokaltianij kijtojkej ke uelis mokuis tomin tein motemaka, para maj mokoua Zoom uan ijkon uelis tiksentokaskej timonechikoskej. Nejin semi kinpaleuijtok tokniuan itech nechikol akin amo ueliaj kiixtauayaj Zoom porin tel patiyoj, yetok itech 15 oso 20 doláres oso hasta okachi. Achto, nejin tokniuan kikuiaj okseki taman tein amo monekia kiixtauaskej, uan amo nochin ueliaj kalakiaj oso amo semi kualtiaya. Sayoj ke axkan nochin nechikolmej tein kikuij Zoom tein kiixtaujtok inechikol Jehová okachi miakej uelij kalakij itech nechikol uan amo kokotoni. Hasta axkan, panoua 65,000 nechikolmej tein moajsij itech panoua 170 altepemej kikuij nejin Zoom.

Nechikol Kairagi, ompa Manado (tein moajsi itech xolal Célebes Septentrional, ompa Indonesia), amo kikuikok Zoom tein amo moixtaua uan peuak kikui tein kiixtaua inechikol Jehová. Tokniuj Hadi Santoso kijtoua: “Hasta tokniuan akin amo semi kimatiliaj kikuiskej teposmej, amo ouij kinkisa kalakiskej itech nechikolmej uan okachiok porin amo moneki kakalaktoskej miakpa”.

Tokniuj Léster Jijón tekoneuj, tayekankej itech nechikol Guayacanes Oeste, ompa Guayaquil (Ecuador), kijtoj: “Kemej tokniuan amo kipiaj miak tomin, itech miak nechikolmej amo ueliskiaj kiixtauaskiaj Zoom uan amo no ueliskiaj nochin kalakiskiaj itech nechikol. Axkan, ueli tikalakij itech Zoom tein kiixtaujtok inechikol Jehová uan nejon tapaleuia maj miakej kalakikan. Yejua ika uelis tikinyoleuaskej akin tiknekiskej”.

Tokniuj Johnson Mwanza, akin poui itech nechikol Norte Ngwerere, tein yetok itech xolal Lusaka (Zambia), kijkuiloj: “Miakpa, miakej tokniuan techiluianij: ‘Zoom tein kiixtaua inechikol Jehová amo sayoj techpaleuia maj tikmachilikan ke iniuan tietokej tokniuan, ta no ke Jehová techtasojta’”.

Tomin tein kitemakaj para tapaleuiskej keman mochiua se tetsauit yejua tein kikuitokej para kikouaskej Zoom. Nochi nejin tomin yejua tein tiktemakaj para titapaleuiskej maj mosentoka motanojnotsa. Miakej tapaleuiaj ika tomin uan kitemakaj itech donate.jw.org. Miak tasojkamatik porin nantapaleuiaj ika namotomin tein no ika tikinpaleuiaj akin kipanouaj se tetsauit (2 Corintios 8:14).