Tanojnots 67

Josafat takuaujtamatik iuan Jiova

¿TIKMATI akonimej nejin takamej uan toni kichiuaj? Youij tateuitij, uan takamej tein youij taixpan mokuikatijtokej. Acha timotajtania: ‘¿Keyej tein mokuikatiaj amo kipiaj espadas uan lanzas tein ika moteuiskej?’ Tikitatij.

Josafat (Jehosafat) kinixyekanaya ome kalyetouanij israelitas. Katkaj iuampoyuan Jezabel uan tekiuaj Acab tein kinixyekanaya majtakti kalyetouanij. Sayoj ika Josafat katka se kuali tekiuaj, ijkon kemej katka ipopaj, Asa (Asá). Yejika miak xiujmej kipiayaj se kuali nemilis ome kalyetouanij.

Sayoj ika mochiuak teisa tein kinimojmoujtij israelitas. Seki tanauatianij kiiluijkej Josafat: ‘Mitsteuikij tel miakej tateuianij tein kayomej Moab, Ammón uan tepet Seír’. Miakej israelitas mosentilijkej Jerusalén uan ompa kitemojkej inepaleuil Jiova. Yajkej templo, uan ompa Josafat kichiuak se netataujtil: ‘Jiova toDios, amo nikmati toni nikchiuas. Amo uelis tikintaniskej tel miakej tateuianij. Xitechpaleui’.

Jiova kikakik, uan kichiuak maj se itekitikauj kiniluiani israelitas: ‘Neteuil amo namoaxka, ta iaxka Dios. Amo moneki namoteuiskej. Sayoj xitachiakan, uan xikitakan keniuj namechmakixtia Jiova’.

Yejika mostika kualkan Josafat kiniluij israelitas: ‘¡Xitakuaujtamatikan iuan Jiova!’ Ompa, kintalij mokuikatianij imin ixpan tateuianij, uan ijkon kemej nejnentiayaj, mokuikatijtiayaj uan ika kiueyichiuayaj Jiova. ¿Tikmati toni mochiuak keman ajsitiayajya kampa moteuiskiaj? Jiova kichiuak maj yejuasaj moteuianij taixnamikinij. ¡Uan keman israelitas ajsikej, nochin tateuianij taixnamikinij momijmiktijkajya!

¿Melauj ika Josafat katka tamatkej ijkuak takuaujtamatik iuan Dios? Komo no ijkon tikchiuaj, tiknextiskej tamatilis.

1 Reyes 22:41-53; 2 Crónicas 20:1-30.