Amokuali ejekamej xolopijtij keman kijtouaj ke mikemej yoltokej

Biblia kijtoua ke Satanás “kinkajkayaujtinemi nochi in taltikpakuanij” (Apocalipsis 12:9). Satanás uan iamokuali ejekauan amo kinekij maj tikneltokakan iTajtol Dios, Biblia. Kitemouaj keniuj kichiuaskej maj taltikpakneminij kineltokakan, ke ijkuak aksa momikilia teisa kisa uan youi nemiti kampa moajsij espíritus. Maj tikitakan keniuj takajkayauaj.

Taneltokalis tein amo melauak

Miak taneltokalismej tamachtiaj, ke taltikpaknenkej kipia teisa tein kisa satepan keman momikilia uan nemiti kampa moajsij espíritus. Kijtouaj ke se inakayo miki, sayoj ke se teisa tein kisa amo keman miki.

Sayoj ke iTajtol Dios amo yejua nejon tamachtia. Se neskayot, keman kichijchiujkej Adán, Biblia kijtoua: “Uan Jiova Dios peuak kichijchiua takat ika talnex uan kiyekapichilij ijyot tein kitemaka nemilis, uan takat mochiuak se taltikpaknenkej” (Génesis 2:7). Kemej tikitaj, Adán amo teyi kitalilijkej tein ueliskia nemiskia satepan keman momikiliskia.

Biblia kijtoua ke ijkuak aksa momikilia, amo kisa teisa tein kisentoka nemi, uan yejika amo ueliok teijtakoua oso tepaleuia. Maj tikitakan tein kijtoua Biblia:

• “Taltikpaknenkej akin tajtakoua... yejua momikilis.” (Ezequiel 18:4.)

• “[Taltikpaknenkej] mokepa itech tal; uan ijkuak, yekmelauj poliui itanemililuan.” (Salmo 146:4.)

Okseki textos kinextiaj ke ijkon kemej miki se tapial no ijkon momikilia taltikpaknenkej (Eclesiastés 3:19, 20). Tein momikilijkejya amo kimatijok nionteyi (Eclesiastés 9:5, 10). Ijkoni yej, keman se taltikpaknenkej momikilia, amo kisa teisa tein kisentoka nemi.

Xikonixtajtolti nochi Biblia uan ompa amo keman tikonajsis ke mikemej youij nemitij okseko. Tamachtilis ke ijkuak aksa momikilia kisa teisa uan nemiti kampa moajsij espíritus, amo ixnesi itech Biblia. Nejon tamachtilis ualeua imakopa Satanás uan iamokuali ejekauan. Jiova kitauelita nochi xolopijyot tein motamachtia itech taneltokalismej tein amo melauak (Proverbios 6:16-19; 1 Timoteo 4:1, 2).

Naual akin tajtoua imiuan espíritus

Satanás no kinkui naualmej tein tajtouaj imiuan espíritus uan ika kinpojpoloua taltikpakneminij. Tel miakej taltikpakneminij, uan no naual akin tajtoua imiuan espíritus, moluiaj ke tajtolmej tein kiseliaj ualeua imin makopa imin espíritus mikemej. Sayoj ke, kemej Biblia tamachtia, nejon amo ueli mochiua (Eclesiastés 9:5, 6, 10).

Komo amo, ¿akonimej imin makopa ualeua nejon tajtolmej? ¡Imin makopa yejuan amokuali ejekamej! Yejuan ueli kiitaj aksa keman yoltok, kiyekitaj keniuj tajtouaya, keniuj katka ineketsalis, tein kichiuak uan tein kimatia. Yejika amo ouij kinkisa mochiuaskej kemej katkaj akin momikilijkejya (1 Samuel 28:3-19).

Tetapouilis tein amo melauak

Satanás no takajkayaua kemej moajsij mikemej keman kichiua maj motetapoui tein amo melauak. Nejin takajkayaualis kichiua maj miakej amo kikakikanok tamachtilis tein melauak tein ualeua itech Biblia (2 Timoteo 4:4).

Itech altepet África, motelijtoua ke kinitanij yoltokej akin momikilijkejya. Sayoj ke amo keman moijtoua ke kinitanij ompa achka kampa nemiaj, ta kinitaj kansaika tel uejka. Sayoj ke, xionmotajtani: ‘Komo aksa ueliskia nemiskia oksepa, ¿yaskia okseko uejka kampa amo nemij ichankauan oso itasojikniuan?’.

Uan no, ¿amo uelis eski ke akin kiitakej sayoj ijkuitik kemej akin momikilijya? Se neskayot, ome taneltokanij tein tanojnotstinemiaj itech se xolalkonet, kiitakej ke se takat xiuejya kintojtokak seki horas. Keman kitajtanijkej keyej kintojtokaya, kimatkej ke nejon takat moluiaya ke semej tanojnotsanij katka ikniuj tein momikilijkaya seki xiujmej achto. Tein melauj, nejon takat mopolojtoya, sayoj ke amo kineltokaya ke mopolojtoya. ¡Xionmonemili tein satepan kintapouij itasojikniuan uan tein ompa nemij!

Tajtachialis, takochitalis uan tajtolis

Tejuatsin xa tikonkakini ke sekin taltikpakneminij kiitanij, kikakinij oso kikochitanij teisa. Uan akin kipanoua nejon, nochipa kimojmoujtia. Marein, akin nemia África occidental, nochipa kikakia ke iueyinan tein momikilijkaya kinotsaya youak. Kemej motelmoujtiaya, Marein tsajtsia chikauak uan kinijxitiaya nochin ichankauan. Satepan kuatapoloj.

Axkan, komo mikemej yekmelauj yoltoskiaj, ¿kinimojmoujtiskiaj imin chankauan? ¿Melauj ke amo? Nochi nejon tachiualismej tein teijtakouaj ualeuaj imin makopa amokuali ejekamej.

Sayoj ke, ¿keniuj moneki tikitaskej tajtolmej tein pane tepaleuiaj uan teyolchikauaj? Se neskayot, Gbassay, tein nemia Sierra Leona, mokokouaya uan kikochitak ke ipopaj kimonextilij maski mikkaya. Yejua kiiluij maj kiontekiskia ixiujyo se kuouit, maj kimaxakualoskia uan maj tayiskia. Amo ueliskia tajtos iuan aksa achto ke kichiuaskia nejon. Nejon siuat kichiuak nochi tein kiiluijkaj uan pajtik.

Okse siuat kijtoj ke inamik akin momikilijkaya kimonextilij youak. Kijtoj ke tel kualtsin moitaya uan kuali takentoya.

Nejon tajtolmej uan tajtachialismej tein nesi tel kuali uan tapaleuiaj, ¿ualeuaj imako Dios? Amo, amo ualeuaj imako Dios. Jiova yejuatsin “Dios tein kijtoua tein melauak” (Salmo 31:5). Amo keman techkajkayauaskia, ta sayoj amokuali ejekamej kichiuaj nejon.

Sayoj ke, ¿moajsij amokuali ejekamej tein yolkualmej? ¡Amo! Maski iksa xa nesi ke tapaleuiaj, nochin amo yolkualmej. Keman Amokuali tajtoj iuan Eva, moitaya majya kualtakat (Génesis 3:1). Sayoj ke, ¿toni kipanok Eva satepan keman kikakik tein kiiluij uan kichiuak? Momikilij.

Amo se kimoujkaita maj se aksa tein amo yolkuali, maj nesi ke tel kualtakat imiuan oksekin tein kineki kinkajkayauas oso kinijtakos. Kemej moijtoua: “Aksa uelis nesis kualtakat sayoj ke iyolo amo ueli se kiita”. Uan iTajtol Dios kijtoua ke “amokuali Satanás motekitiltijtinemi ijkon kemej eskia se ángel [...] ten kualkui tanextsin de Dios” (2 Corintios 11:14).

Dios amo kinimatiltiaok teisa taltikpakneminij ika takochitalis, tajtachialis niono tajtolis tein ualeua imin makopa espíritus. Yejuatsin kinixyekana uan kinimachtia taltikpakneminij ika Biblia, uan nejon tepaleuia maj se kichiua “miak tataman den kuali tekit” (2 Timoteo 3:17).

Yejika, keman Jiova technejmachtia katiyejua itakajkayaualis Satanás, kichiua porin techtasojta. Kimattok ke amokuali ejekamej tetauelitaj uan tamouililmej.