¡Se xochital nikan taltikpak!

Jiova senkis kiajchiuas nochi tein amo kuali tein Satanás kiixualtijtok. Jiova kiixpejpenak Jesús maj yejua tekiuajti semanauak taltikpak. Keman Jesús tekiuajtitos, nikan taltikpak mochiuas se xochital (Daniel 7:13, 14; Lucas 23:43, NM).

Tein tikitatij kinextia tein Jiova motenkaua kichiuas:

• ONKAS TEL MIAK TAKUAL: “Nikan taltikpak yekmelauj moteltachiuas; Dios, yejuatsin toDios, techtatiochiuis”. “Onkas tel miak tatet nikan taltikpak; uan imin kuapan tepemej onkas okachi miak.” (Salmo 67:6; 72:16.)

• AMO ONKAS NETEUILISMEJ: “Xiualakan, uan xikitakan tein Jiova kichiua, keniuj kitalia nikan taltikpak tachiualismej tein se kimoujkaita. Kitamia neteuilismej hasta kampa tami taltikpak” (Salmo 46:8, 9).

• TALTIKPAKNEMINIJ TEIN AMO YOLKUALMEJ AMO NEMISKEJOK: “Porin tein ika mokauaj kichiuaskej tein amo kuali, ixpoliuiskej [...]. Uan amo uejkauaok, tein amo yolkuali amo nemisok; uan yekmelauj tikixtemos kampa yetoya uan amo moajsisok” (Salmo 37:9, 10).

• 

  AMO ONKAS KOKOLISMEJ, TEKOKOJKAYOT NIONO MIKILIS: “Itech nejon tonalmej imin ixtololouan ixpopoyomej tapouiskej, uan imin nakasuan tein amo takakij tapouiskej. Itech nejon tonalmej koxoj ajkotsikuinis ijkon kemej kichiua masat, uan inenepil tein amo ueli tajtoua yolpakkatsajtsis” (Isaías 35:5, 6).

  “Totajtsin Dios iniuan yetinemis [...]. Uan Totajtsin kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya.” (Apocalipsis 21:3, 4.)

Satanás uan iamokuali ejekauan takajkayauaj. Jiova amo keman ijkon kichiua. Nochi tein motenkaua ijkon kichiuas (Lucas 1:36, 37). Jiova mitsontasojta uan kineki xionnemi itech Xochital tein yejuatsin kichiuati. Yejika, xikonintemo itaixpantijkauan Jiova, uan yejuan mitsonmachtiskej kualtsitsin tamachtilismej tein kipia iTajtol Dios. Komo tikonchiua itech moonnemilis tein tionmomachtia, tionkisas itech takajkayaualis, itech chikotaneltokalis uan itech mijmikiloyot. Satepan, no mitsonkixtiliskej tajtakol uan mikilis. Kemej Jesús kijtoj: “Nankajsikamattiyaskej de ne Tajtoltsin ten yek melauj. Uan [...] yejua ne namechtojtomatiuj” (Juan 8:32).