Tamachtilis 7
Keniuj timotokiskej iuan Dios ika netataujtilis
¿Keyej motelneki maj mojmostaj tikchiuakan netataujtilis? (1)
¿Akoni moneki maj tiktataujtikan uan keniuj? (2, 3)
¿Toni uelis se tajtanis itech netataujtilmej? (4)
¿Kemanian uelis tikchiuas netataujtilis? (5, 6)
¿Kikaki Dios nochin netataujtilmej? (7)
1. Se kichiuas netataujtilis kijtosneki se tajtos iuan Dios ika yolyemanilis. Moneki maj timotatataujtilikan iuan Dios mojmostaj. Komo tikchiuaj, okachi timotokiskej iuan Dios kemej se totasojikniuj tein tikteltasojtaj. Maski Jiova tel ueyichiujkej uan kipia chikaujkauelilis, kikaki tonetataujtiluan. ¿Mojmostaj timotatataujtilia iuan Dios? (Salmo 65:2; 1 Tesalonicenses 5:17.)
2. Netataujtilis no ika se taueyichiua. Yejika moneki maj tiktataujtikan sayoj Jiova Dios. Keman Jesús yetoya nikan Taltikpak, amo kitataujtiaya akiyeski, ta sayoj iPopaj. Tejuan no ijkon moneki maj tikchiuakan (Mateo 4:10; 6:9). Sayoj ika moneki maj nochipa tikchiuakan netataujtilis itokaykopa Jesús. Ijkon tiknextiskej ika tikpoujkaitaj tanauatil tein kipia uan titakuaujtamatij itech itaxtauil tein ika techmakixtia (Juan 14:6; 1 Juan 2:1, 2).
3. Keman timotatataujtiliskej iuan Dios, tein tikiluiskej moneki maj kisa itech toyolo. Maj amo tikijtokan yejua uan yejuasaj sayoj tein tikelnamiktokej, niono maj tikixtajtoltikan itech se amaixtajkuilol tein kipia netataujtilmej (Mateo 6:7, 8). Uelis tikchiuaskej netataujtilis ika poujkaitalis kemej tietoskej, keman yeski uan kampa yeski. Dios no kikaki netataujtilmej tein tikchiuaj itech toyolosaj (1 Samuel 1:12, 13). No moneki maj tikchiuakan tonetataujtiluan kampa taseltijkan (Marcos 1:35).
4. ¿Toni uelis titajtanis itech netataujtilmej? Nochi tein uelis mitspaleuis ximochiua xiitasojikniuj Dios (Filipenses 4:6, 7). Netataujtilis tein Jesús kitemakak kemej se neskayot, kinextia ika moneki timotatataujtiliskej maj moueyitali itokay Jiova uan maj mochiua itanejnekilis. No uelis tiktajtaniskej maj techmaka tein ika tiixpanotoskej, maj techtapojpolui totajtakoluan uan maj techpaleui tikixtopeuaskej tanemililmej tel amo kuali tein techejko (Mateo 6:9-13). Keman timotatataujtiliskej maj amo tejuasaj timotatajtanilikan. Moneki titajtaniskej sayoj tein mouika iuan itanejnekilis Jiova (1 Juan 5:14).
5. Nochipa uelis tikchiuas netataujtilis, keman moyolo mitsolinis tiktasojkamatilis Jiova oso keman tiknekis tikueyichiuas (1 Crónicas 29:10-13). Nochipa ximotatataujtili keman tikpias nekuejmololmej uan motakuaujtamatilis moajsis itech tayejyekolis (Salmo 120:1; 1 Pedro 5:7). No kuali maj se kichiua netataujtilis keman titakuatij (Mateo 14:19). Jiova techyoleua maj tikchiuakan netataujtilis “youalintonal” (Efesios 6:18).
6. Komo tiueyitajtakouaj, motelneki timotatataujtiliskej iuan Jiova uan tiktataujtiskej maj techikneli uan maj techtapojpolui. Dios “niman techtapojpoluia” komo iuan timotempeyauaj uan timochikauaj amo sepaok tikchiuaskej (Salmo 86:5, NM; Proverbios 28:13, NM).
7. Jiova sayoj kikaki imin netataujtiluan tein yolmelaujkej. Dios uelis mitskakilis monetataujtiluan komo timochikaua tinemi kemej kijtoua itanauatiluan (Proverbios 15:29; 1 Pedro 3:12). Keman timotatataujtilis, moneki tikchiuas ika yolyemanilis (Lucas 18:9-14). Moneki tikchiuas ijkon kemej titajtani itech netataujtilis. Ijkon tiknextis ika tikpia takuaujtamatilis uan timotatataujtilia ika nochi moyolo. Sayoj ijkon mitsnankilis Jiova monetataujtiluan (Hebreos 11:6).