NETAJTANIL 5

¿Toni nikchiuas komo nechkuejmolouaj kampa nimomachtia?

KEYEJ MOTELNEKI

Tein tikchiuas uelis kichiuas maj amo mitskuejmolokanok oso maj okachi mitskuejmolokan.

¿TEJUA TONI TIKCHIUASKIA?

Xiknemili nejin: Thomas axkan amo kineki yas momachtitiuj. Nion mosta. Nion kemanok. Nochi peuak eyi metsti achtoya, keman sekin akin iniuan momachtia kitakajkayauilijkej. Ompa peuak kiauiltokaytiaj. Kemansa, semej kinemiliaya kinamikitiuj uan iuan moixtelos Thomas uan kitamotiliaya iamauan uan kichiuaya kemej yeskia amo kiitaya. Okseki tonalmej, aksa kiikantopeuaya uan keman yejua mokepaya, nochin kichiuayaj kemej yeskia amo teyi kiitakej. Yalua okachi amo kuali tein kipanok: kitajkuilouilijkej itech Internet kampa kiluiayaj ke kiteuiskiaj mostika.

Komo tejua tiyeskia tiThomas, ¿toni tikchiuaskia?

XIMOTSAKUILI UAN XITANEMILI

Onkak teisa tein uelis tikchiuas. Uelis timopaleuis uan amo monekis titateuis. ¿Keniuj?

AMO XIKINKAKI. Biblia kijtoua: “Akin amo tamati kikixtia nochi tein kimachilia, sayoj ke akin tamattok kimati kitsakuilis” (Proverbios 29:11). Komo timochikaua tiyolseujtos nochi tein tiuelis, oso maski sayoj maj moita, xa akin mitskuejmolouaj siouiskej uan mitskauaskej.
AMO XIMOMAKEPA. Biblia kijtoua: “[Komo] aksame namechchiuiliaj tensa ten amo kuali, ijkuakon namejuan amo no ijkon xikinixnamikikan” (Romanos 12:17). Komo timomakepa sayoj tikchiuas maj okachi mitskuejmolokan.
XIKTAYOUALUI KUEJMOL. Biblia kijtoua: “Akin tamattok kiita ouijkayot uan motatia” (Proverbios 22:3). Nochipa keman uelis, xikintayoualui akin uelis mitskuejmoloskej uan amo xipano kampa ika yetokej.
XIKINNANKILI KEMEJ AMO KICHIAJ. Biblia kijtoua: “Tanankilil tein motemaka ika yolseuilis kijkuania kualanyot” (Proverbios 15:1). Hasta uelis tiktemos tikinuetskitis. Kemej neskayot, komo semej mitsiluia ke titomauak, uelis tikajokuis moajkoluan uan tiknankilis: “Kemaj, xa monekis nimopitsauas tepitsin”.
XIKINKAUJTEUA. Nora, akin kipia 19 xiujmej, kijtoua: “Komo tikinkaujteua uan amo teyi tikinnankilia kinextia ke titamattok, ke tiyolchikauak uan ke ueli timotsakuilia, uan nejon amo kipiaj akin tekuejmolouaj” (2 Timoteo 2:24).
XIKTEMO OKACHI KUALI TIMOMACHILIS. Akin tekuejmolouaj kiitaj akoni omeyoloua ika tein ueli kichiua uan xa amo mopaleuis. Sayoj ke, miakej mitskauaskej komo kiitaj ke amo tikaua maj mitskuejmolokan.
XIKTAPOUI AKSA. Se siuat akin achto katka tamachtijkej kijtoua: “Nejua nikyolchikaua akin kikuejmolouaj maj moteiluili. Yejua nejin tein moneki mochiuas, uan nejin se taman tein tapaleuis maj amo akinok kikuejmolokan”.

Se okichpil amo kimouilia akin kikuejmoloua — Komo amo tiomeyoloua ika tein ueli tikchiua mitsmakas chikaualis tein amo kipia akin mitskuejmoloua

**¿KENIUJ TITANANKILISKIA?**
¿MELAUAK OSO AMO MELAUAK?	TANANKILILMEJ
1 Uejkaujya onkakej teikamauiltianij.	1 Melauak. Kemej neskayot, Biblia ininka tajtoua sekin akin moixmatkej kemej nefilim, tokayit tein kijtosneki “teuetsiltianij” oso “akin kinuetsiltiaj oksekin” (Génesis 6:4).
2 Amo teyi panoua komo se tekuejmoloua.	2 Amo melauak. Miakej telpochmej momiktianij porin kintelkuejmolouaj.
3 Amo tekuejmoloskejok komo se kinteuia.	3 Amo melauak. Miakpa, akin tekuejmolouaj okachi chikaujkej uan uejueykej; amo teyi tapaleuis maj se moteui iniuan.
4 Komo tikita ke kikuejmolouaj aksa, okachi kuali amo teyi xikijto.	4 Amo melauak. Komo amo teyi tikijtoua, kemej yeskia no titapaleuijtoskia maj kikuejmolokan aksa. Titapaleuis maj kisentoka kuejmol uan amo maj moyektali.
5 Miakpa, akin tekuejmolouaj kichiuaj maj se kinita ke yolchikaujkej uan ijkon kitatiaj ininmoujkayo.	5 Melauak. Maski sekin akin tekuejmolouaj moueyinekij, miakej omeyolouaj ika tein ueli kichiuaj uan okachi kuali momachiliaj sayoj komo kinpijpinaujtiaj oksekin.
6 Teikamauiltianij ueli mopataj.	6 Melauak. Ika ininnepaleuil oksekin, akin tekuejmolouaj ueli kipataj kemej tanemiliaj uan tein kichiuaj.