Semi techpaleuia kuali timouikaskej iniuan tokniuan

1, 2. ¿Toni kiita Jehová ke okachi moneki, uan toni kineki maj tikchiuakan?

JEHOVÁ kiita ke semi moneki maj kuali tikinitakan oksekin. Jesús tamachtij ke moneki tikintasojtaskej oksekin ijkon kemej tejuan timotasojtaj (Mat. 22:​37-39). No moneki maj tiyolkualmej hasta iniuan akin amo kitekitiliaj Jehová. Ijkon tikchiuaj kemej toTajtsin Jehová akin “kichiua maj kisa tonaltsin para akin amo yolkualmej uan akin yolkualmej, uan kichiua maj kioui para akin yolmelaujkej uan akin amo yolmelaujkej” (Mat. 5:45).

² Jehová kintasojta nochin, sayoj ke okachi kintasojta akin kitakamatij (Juan 14:21). Dios kineki maj no tikchiuakan kemej yejua, yejua ika techiluia maj tikinnextilikan tokniuan ke semi tikintasojtaj (1 Ped. 4:8; Rom. 12:10). Moneki maj tikintasojtakan ijkon kemej tiktasojtaj se tochankauj oso se akin kuali iuan timouikaj.

3. ¿Toni moneki tikchiuaskej para okachi titetasojtaskej?

³ Se kintasojtas oksekin tamati kemej se xochit, keman se kitoka moneki se kiatekis uan se kiyekpias para maj moskalti, no ijkon keman peua tikintasojtaj oksekin moneki tikchiuaskej seki taman tein techpaleuis maj okachi tikintasojtakan. Tatitanil Pablo kiniluij tokniuan: “Xiksentokakan ximotasojtakan kemej yeskia naniknimej” (Heb. 13:1). Jehová kineki maj tiksentokakan tikintasojtakan oksekin. Yejua ika, itech nejin tamachtilis tikitaskej keyej moneki okachi kuali timouikaskej iniuan tokniuan uan keniuj uelis tiksentokaskej ijkon tikchiuaskej.

KEYEJ MONEKI OKACHI KUALI TIMOUIKASKEJ INIUAN TOKNIUAN

4. Kemej kijtoua Salmo 133:​1, ¿toni techpaleuis maj tiksentokakan kuali timouikakan iniuan tokniuan? (No xikonita taixkopimej).

⁴ (Xikonlero Salmo 133:1). Ijkon kemej salmista, tejuan no tikijtouaj “semi kuali uan semi teyolpaktij” maj kuali timouikakan iniuan akin kitasojtaj Jehová. Sayoj ke, moneki timoyekpiaskej para maj tejuan amo techpano kemej kipanoua aksa akin nochipa kiita se tel ueyi kouit uan amo kimojkaitaok. Tejuan no ueliskia peuas amo tikitaskejok keniuj tel kualtsin timouikaj iniuan tokniuan. Kemej nochipa tikinitaj, xa mojmostaj oso miakpa itech semana, ¿toni uelis techpaleuis maj tiksentokakan tikintasojtakan? Semi techpaleuis komo tiknemiliaj keniuj sejse tokniuj tapaleuia itech nechikol uan no keniuj techpaleuia tejuan.

5. ¿Keniuj oksekin kinpaleuiani kiitaskej ke semi timotasojtaj?

⁵ Keman aksa yekinika youi itech se nechikol semi kimojkaita keniuj tiknextiaj ke timotasojtaj uan kiita ke tejuan yekmelauj tiktojtokaj Cristo. Jesús kijtoj: “Ijkon nochin kimatiskej ke namejuan nannomomachtijkauan: komo namotasojtaj se iuan okse” (Juan 13:35). Maj tikitakan tein kipanok se ichpoch akin monotsa Chaithra, akin peuak momachtia Biblia. Kemej kiyoleujkej itech se ueyi nechikol yejua yajki, uan keman tamik yekinika tonal yejua kiluij tokniuj akin kimachtiaya: “Notatuan amo keman nechnauanij. ¡Sayoj ke nejin tonal de moueyi nechikol mokniuan nechnauajkejya 52 viajes! Ika nochi tein kichiujkej itekitikauan Jehová nikmachilij ke yejua nechtasojta. No nikuelitaskia maj mochiuakan nochankauan”. Chaithra kisentokak momachtij uan moauij itech xiuit 2024. Keman aksa akin peua momachtia Biblia kiita keniuj tiknextiaj ke timotasojtaj, nejon kipaleuia maj no kineki kitekitilis Jehová (Mat. 5:16).

6. ¿Keniuj no techpaleuis komo okachi tietokej iniuan tokniuan?

⁶ Komo okachi tietokej iniuan tokniuan yejuan techyolchikauaj uan nejon techpaleuia maj amo tikauakan Jehová. Pablo kiniluij tokniuan: “Xiksentokakan mojmostaj ximoyolchikauakan se iuan okse […] para maj tajtakol amo namechkajkayaua porin nejon uelis namechyoltakuaualtis” (Heb. 3:13). Komo tikmachiliaj ke amo tiuelijok tiksentokaj tikchiuaj tein kuali, Jehová uelis kichiuas maj se tokniuj kiita tein panotok uan maj techpaleui (Sal. 73:​2, 17, 23). ¡Semi kuali maj tokniuan techpaleuikan!

7. ¿Keniuj techpaleuia komo timochikauaj titetasojtaskej? (Colosenses 3:​13, 14).

⁷ Tipouij iniuan akin mochikauaj motasojtaskej, yejua ika Dios semi techtatiochiuia (1 Juan 4:11). Kemej timotasojtaj, techpaleuia maj timoxikokan se iuan okse, uan nejon kichiua maj kuali timouikakan uan maj amo tixexeliujtokan (Efes. 4:​2-6; xikonlero Colosenses 3:​13, 14). Yejua ika, kampa timonechikouaj tel tiyolpakij iniuan tokniuan, uan nejin techpanoua sayoj akin tiktekitiliaj Jehová.

MAJ TIKINTAKACHIUAKAN OKSEKIN

8. ¿Keniuj techpaleuiani Jehová maj kuali timouikakan?

⁸ Maski titajtakolejkej ueli kualtsin timouikaj iniuan tokniuan noyampa taltikpak porin Jehová techpaleuia maj ijkon tikchiuakan (1 Cor. 12:25). Biblia kijtoua: “Dios namechmachtijtok ximotasojtakan se iuan okse” (1 Tes. 4:9). ¿Keniuj kichiua? Itech itajtol techiluia toni moneki tikchiuaskej para okachi kuali timouikaskej iniuan tokniuan. Uan tejuan timokauaj maj Jehová techmachti keman timomachtiaj itajtol uan tikchiuaj tein yejua techiluia (Heb. 4:12; Sant. 1:25). Yejua nejon tein timochikauaj tikchiuaskej akin tiktekitiliaj Jehová.

9. Romanos 12:​9-13 kijtoua ke maj titetakachiuakan, ¿keniuj uelis tiknextiskej nejin?

⁹ ¿Keniuj uelis itajtol Dios techpaleuis maj okachi kuali timouikakan iniuan tokniuan? Maj tikitakan tein kijtoj Pablo itech Romanos 12:​9-13 (xikonlero). Yejua kijtoj: “Namejuan achto xiknextikan ke nantetakachiuaj” oso nantepoujkaitaj. ¿Toni kijtosneki nejin? Ke moneki tiktemoskej keniuj tiknextiskej ke yekmelauj titetasojtaj, seki taman kemej uelis tiknextiskej yejua keman tikintapojpoluiaj oksekin, tikinmakaj tein tikpiaj uan kuali tikinseliaj (Efes. 4:32). Amo moneki tikchiaskej maj oksekin peuakan kichiuakan. Ta maj achto tejuan tikchiuakan uan ijkon tikitaskej keniuj mochiua tein Jesús kijtoj: “Okachi se yolpaki keman se kitemaka ke ijkuak temakaj” (Hech. 20:35).

10. ¿Keniuj uelis tiknextiskej ke tiknekij tikinpaleuiskej oksekin? (No xikonita taixkopin).

¹⁰ Satepan ke Pablo kijtoj ke moneki maj achto tejuan tiknextikan ke titetakachiuaj, no techiluij: “Xitekitinij, amo xitatsiuinij”. Keman aksa akin kiuelita tekitis kimakaj se tekit, mochikaua kuali kichiuas. Proverbios 3:​27, 28 kijtoua: “Amo xikijto ke amo uelis tikpaleuis aksa, komo kemaj ueli tikpaleuia”. Yejua ika komo tikitaj ke aksa moneki maj tikpaleuikan, maj niman tikchiuakan. Maj amo tikijtokan ke tikchiuaskej satepan, nion no maj tiknemilikan ke aksa ipa kipaleuis (1 Juan 3:​17, 18).

11. ¿Toni techpaleuis maj okachi kuali timouikakan iniuan tokniuan?

¹¹ No tiknextiaj ke tikintakachiuaj oksekin komo niman tikintapojpoluiaj keman techyolxokoliaj. Efesios 4:26 kijtoua: “Amo xikualantokan nochin tonal”. ¿Keyej? Porin kemej kijtoua versículo 27, para maj ‘nion tepitsin tiktakauilikan Amokuali’. Itech itajtol, Jehová miakpa techelnamiktia ke moneki tikintapojpoluiskej oksekin. Colosenses 3:13 techiluia maj ‘tiksentokakan […] timotapojpoluijtokan ika nochi toyolo’. Okachi kuali timouikaj iniuan tokniuan komo tikintapojpoluiaj, ijkon amo tixexeliujtokej (Efes. 4:3). Keman titetapojpoluiaj titapaleuiaj para maj tinochin akin tipouij itech inechikol Jehová kuali timouikakan uan maj tiyolseujtokan.

12. ¿Keniuj techpaleuia Jehová maj ueli tikintapojpoluikan oksekin?

¹² Xa semi ouij se kitapojpoluis aksa akin techchiuilij tein amo kuali. Sayoj ke Dios uelis techpaleuis ika ichikaualis maj ueli tiktapojpoluikan. Satepan ke Biblia techyolmajxitia maj yekmelauj titetasojtakan uan maj titekitinij no techiluia: “Xikauakan maj Dios ika ichikaualis namechixyekana para nankichiuaskej tein kuali”. Nejin kijtosneki ke sayoj komo techixyekana ichikaualis Dios uelis yekmelauj titetasojtaskej uan titetapojpoluiskej ika nochi toyolo uan tikchiuaskej okseki taman tein kuali (Romanos 12:11). Yejua ika tiktataujtiaj Jehová maj techpaleui (Luc. 11:13).

“AMO XIXEXELIUJTOKAN”

13. ¿Toni ueliskia kichiuas maj timoxexelokan?

¹³ Nochin akin tipouij itech nechikol titatamamej (1 Tim. 2:​3, 4). Yejua ika tataman tein uelis tikixtaliskej tikchiuaskej kemej keniuj timotakentiskej, keniuj timopajtiskej uan toni ika timoixpetaniskej. Sayoj ke komo amo timoyekpiaj, nochi nejin uelis kichiuas maj timoxexelokan (Rom. 14:4; 1 Cor. 1:10). Sayoj ke Dios technextiliani keniuj timotasojtaskej, yejua ika amo tikijtouaj ke tein tikixtaliaj tikchiuaskej yejua tein okachi kuali (Filip. 2:3).

14. ¿Toni moneki timochikauaskej tikchiuaskej, uan keyej?

¹⁴ Komo timochikauaj tikinyolchikauaskej oksekin no tapaleuis maj amo tixexeliujtokan itech nechikol (1 Tes. 5:11). Itech nejin tonalmej, miakej akin amo kitekitiliayajok Jehová oso kinkalankixtijkaj de nechikol mokeptokej. Uan tejuan tel kualtsin tikinseliaj (2 Cor. 2:8). Maj tikitakan tein kipanok se tokniuj siuat akin 10 xiujmejya amo kitekitiliayaok Jehová uan keman mokepak itech nechikol kijtoj: “Nochin kualtsin nechtajpalouayaj uan nechuetskiliayaj” (Hech. 3:19). ¿Keniuj momachilij keman kiitak ke kualtsin kiselijkej? Yejua kijtoua: “Nikitak keniuj Jehová nechpaleuijtoya maj oksepa niyolpaki”. Komo timochikauaj tikinyolchikauaskej oksekin, Jesús uelis kichiuas maj tikinpaleuikan akin kemej yeskia tamamajtokej (Mat. 11:​28, 29).

15. ¿Toni no tapaleuis maj kuali timouikakan iniuan tokniuan? (No xikonita taixkopin).

¹⁵ No tein tikijtoskej tapaleuis maj kuali timouikakan iniuan tokniuan. Job 12:11 kijtoua: “Tonakas tikuij para tikakiskej ox teisa kuali yetok oso amo ijkon kemej tonenepil tikuij para tikyekoskej ox uelik tapalol”. Se akin kuali takualchiua nochipa kiyekoua itapalol ox uelik achto ke kinmakas oksekin. No ijkon keman tikijtoskej teisa, maj achto kuali tiknemilikan toni tikijtotij porin tiknekij maj kinpaleui uan maj kinyolchikaua oksekin (Sal. 141:3; Efes. 4:29).

16. ¿Akonimej okachi moneki tayolchikauaskej ika tein kijtoskej?

¹⁶ Takamej akin monamiktijkejya, tenamej uan tetatmej yejuan okachi moneki mochikauaskej maj tayolchikaua tein kijtoskej (Col. 3:​19, 21; Tito 2:4). Tayekananij no kinyolchikauaj uan kinyolseuiaj tokniuan akin iaxkauan Jehová (Is. 32:​1, 2; Gál. 6:1). Itech Biblia, amatajkuilol Proverbios kijtoua: “¡Uan keman moijtoua se tajtol keman monektok semi tapaleuia!” (Prov. 15:23).

MAJ TITETASOJTAKAN IKA NOCHI TOYOLO

17. ¿Keniuj uelis tiknextiskej ke yekmelauj tikintasojtaj tokniuan?

¹⁷ Tatitanil Juan kijtoj: “Maj amo sayoj tikijtokan ke titetasojtaj, ta maj tiknextikan ika tein tikchiuaj uan maj yekmelauj titetasojtakan” (1 Juan 3:18). ¿Toni techpaleuis maj ijkon tikchiuakan? Maj okachi tietokan iniuan tokniuan, ijkon okachi kuali iniuan timouikaskej uan okachi tikintasojtaskej. Maj tiktemokan keniuj okachi iniuan tietoskej itech nechikolmej uan keman titanojnotsaskej. No, moneki maj timochikauakan tikinkalpanoskej. Keman tikchiuaskej nochi nejin tiknextiskej ke ‘Dios techmachtijtok maj timotasojtakan se iuan okse’ (1 Tes. 4:9). Ijkon tikitaskej ke “semi kuali uan semi teyolpaktij maj tokniuan kualtsin sennemikan” (Sal. 133:1).