Amo keman tietokej toselti

1, 2. 1) ¿Keyej uelis tikijtoskej ke amo keman tietoskej toselti keman titajyouijtoskej? 2) ¿Toni tikitaskej itech nejin tamachtilis?

KOMO tikpanotokej se ouijkayot xa tikmachiliskej kemej yeskia tietokej toselti kampa koujtaj uan amo tikajsij keniuj tikisaskej. Sayoj ke amo tietokej toselti, porin toTajtsin Jehová kimati ke titajyouijtokej uan motenkaua ke nochipa techpaleuis. Jehová semi techtasojta uan techyekiluia: “Nejua nimitspaleuis” (Is. 41:10).

² Itech nejin tamachtilis tikitaskej naui taman kemej Jehová techyekpia: 1) techixyekana, 2) techmaka tein techpoloua, 3) techpaleuia uan 4) techyolseuia. Jehová motenkaua ke amo keman techsenkauas nion techelkauas maski tein yeski taman tikijyouijtoskej. Yejua ika amo keman tietoskej toselti.

JEHOVÁ TECHIXYEKANA

3, 4. ¿Keniuj techixyekana Jehová? (Salmo 48:14).

³ (Xikonlero Salmo 48:14). Jehová kimati ke amo ueli timoixyekanaj toselti, yejua ika moneki maj yejua techixyekana. ¿Uan keniuj kichiua? Ika Biblia (Sal. 119:105). Jehová kikui itajtol para techpaleuis maj tikmatikan toni tikchiuaskej para maj titanemilikan kemej yejua uan maj tikchiuakan tein yejua kichiuaskia. Keman tiktakamatij tein Biblia tamachtia okachi tiyolpakij uan no tikchiaj tinemiskej nochipaya.a Seki taman tein Jehová techmachtia yejua maj tikintapojpoluikan oksekin uan maj amo tikualantokanok, maj amo titakajkayauakan uan maj titetasojtakan ika nochi toyolo (Sal. 37:8; Heb. 13:18; 1 Ped. 1:22). Komo tikchiuaj nochi nejin okachi kuali timouikaskej iniuan tokoneuan, tosiuatsin oso takatsin uan iniuan oksekin.

⁴ Itech Biblia, Jehová no kichiuak maj moijkuilo tein kinpanok seki itekitikauan ne uejkauj akin tajyouijkej uan momachilijkej kemej tejuan (1 Cor. 10:13; Sant. 5:17). Keman tiklerouaj tein kinpanok uan tikchiuaj tein timomachtiaj, techpaleuia itech ome taman. Yekinika, tikitaj ke amo sayoj tejuan titajyouiaj, ta oksekin no tajyouianij sayoj ke taxikojkej porin Jehová kinpaleuij (1 Ped. 5:9). Uan ojpatika, timomachtiaj toni uelis techpaleuis maj titaxikokan (Rom. 15:4).

5. ¿Akonimej kinkui Jehová para techixyekanas?

⁵ Jehová no kinkui tokniuan para techixyekanas.b Tokniuan de circuito kinkalpanouaj nechikolmej uan kitemakaj tanojnotsmej tein techpaleuia maj okachi titakuaujtamatikan uan maj kuali timouikakan iniuan tokniuan (Hech. 15:​40–16:5). Tayekananij no motekipachouaj ininka sejse tokniuj itech nechikol (1 Ped. 5:​2, 3). Tetatmej no kinmachtiaj ininkoneuan maj kitasojtakan Jehová, maj kuali kinemilikan toni kichiuaskej uan no kinmachtiaj maj kilerokan Biblia, maj yakan nechikolmej uan maj tanojnotsakan (Prov. 22:6). Uan tokniuan siuamej akin kuali mouikaj iuan Jehová ika tein kichiuaj kinpaleuiaj akin okachi ichpochmejok, uan no kinyolmajxitiaj uan kinyolchikauaj (Tito 2:​3-5).

6. ¿Toni uelis tikchiuaskej para maj techpaleui tein Jehová techyolmajxitia?

⁶ Jehová techpaleuia para maj kuali tiknemilikan toni tikchiuaskej uan maj tiyolpakikan. Sayoj ke, ¿toni moneki tikchiuaskej para maj techpaleui tein techyolmajxitia? Proverbios 3:​5, 6 kijtoua: “Xitakuaujtamati iuan Jehová ika nochi moyolo, uan amo itech tein tejua tikmati”. ¿Uan toni panos komo tikchiuaj nejin? “Yejua kichiuas maj nochi kuali kisa”. Nejin kijtosneki ke techpaleuis maj okachi tiyolpakikan uan maj amo tikchiuakan tein satepan techtajyouiltis. ¡Semi tiktasojkamatiliaj Jehová porin kuali techixmati uan kemej semi techtasojta, techyolmajxitia kemej technamiki tisejsemej! (Sal. 32:8).

JEHOVÁ TECHMAKA TEIN TECHPOLOUA

7. Kemej kijtoua Filipenses 4:​19, ¿keniuj techpaleuia Jehová?

⁷ (Xikonlero Filipenses 4:19). Jehová amo sayoj techixyekana para maj kuali iuan timouikakan ta no techmaka tein techpoloua kemej toni tikuaskej, toni timotaliliskej uan kani tinemiskej (Mat. 6:33; 2 Tes. 3:12). Maski kemansa uelis techtekipachos kani tikuiskej nochi nejin, Jehová amo kineki maj semi ika timotekipachokan (Mateo 6:25). ¿Keyej? Porin yejua motenkauani ke amo keman kinkauas itekitikauan (Mat. 6:8; Heb. 13:5). Uelis titakuaujtamatiskej ke yejua kichiuas tein motenkaua uan techmakas tein techpoloua.

8. ¿Keniuj Jehová kipaleuij David?

⁸ Maj tiknemilikan keniuj Jehová kipaleuij David keman cholojtinemia porin tekiuaj Saúl kinekia kimiktis. Keman tajyouijtoya itech nejon xiujmej Jehová kimakak David uan isoldados nochi tein kinpolouaya para maj kuali yetonij. Keman kielnamikik keniuj Jehová kiyekpiak itech nejon tonalmej, yejua kijkuiloj: “Nejua katka nitelpoch uan no niueuentsintiakya, sayoj ke amo akin nikitani akin yolmelauak maj kisenkauakan, nion ikoneuan maj kitemojtokan tein kikuaskej” (Sal. 37:25). Ijkon kemej David, xa no tikonitani keniuj Jehová mitsonyekpiani tejuatsin uan no tokniuan keman nankipanouanij ouijkayomej.

9. ¿Keniuj Jehová kinpaleuia itekitikauan keman kipanouaj se tetsauit itech nejin tonalmej? (No xikonita taixkopimej).

⁹ Jehová kinmaka itekitikauan tein kinpoloua keman kipanouaj se tetsauit. Ijkon kinpanok tokniuan ompa Jerusalén keman amo kipiayaj toni kikuaskej, uan tokniuan de okseki xolalmej kintitanilijkej tein kinpolouaya (Hech. 11:​27-30; Rom. 15:​25, 26). Axkan itekitikauan Dios no kinpaleuiaj oksekin tokniuan keman moneki. Keman panoua se tetsauit, Jehová kichiua maj itekitikauan kitemakakan takual, at, tasal uan pajti para akin tajyouijtokej. No moajsij tokniuan akin kinyektaliaj ininchan tokniuan uan Kalmej kampa tiMosentiliaj tein uejueliujkej. Uan niman kitemouaj keniuj kinpaleuiskej akin kipolojkej miak taman oso momikilij se ininchankauj.c

10, 11. ¿Toni technextilia tein kipanok Boris?

¹⁰ Jehová semi yolkuali uan kinmaka tein kinpoloua hasta akin ayamo kitekitiliaj. Tejuan no tikchiuaj kemej yejua uan tiktemouaj tikinpaleuiskej hasta akin amo taneltokaj kemej tejuan (Gál. 6:10). Keman ijkon tikchiuaj, tikinpaleuiaj maj okachi kiixmatikan Jehová uan no tejuan. Maj tikitakan tein kipanok Boris akin nemi Ucrania uan kiixyekanaya se escuela. Maski yejua amo katka itaixpantijkauj Jehová, nochipa yolkuali katka iniuan konemej akin katkaj itaixpantijkauan Jehová. Keman peuak neteuilis, yejua choloj uan yajki kampa amo teyi kipanoskia uan tokniuan kipaleuijkej. Satepan Boris yajka keman tikelnamikkej imikilis Jesús. Keman kielnamikik nochi tein tokniuan kichiujkej para kipaleuiskej yejua kijtoj: “Semi nikintasojkamatilia itaixpantijkauan Jehová porin yolkualmej katkaj nouan uan semi nechpaleuijkej”.

¹¹ Tejuan uelis titeikneliskej kemej Jehová uan uelis tikinpaleuiskej nochin, hasta akin amo kitekitiliaj (Luc. 6:​31, 36). Tiknekij tikinnextiliskej ke tikintasojtaj para maj kinekikan kiixmatiskej Jehová uan maj peua kitekitilikan touan (1 Ped. 2:12). Sayoj ke maski kiixtaliskej kitekitiliskej oso amo, tejuan tiyolpakiskej porin okachi se yolpaki keman se kitemaka (Hech. 20:35).

JEHOVÁ TECHPALEUIA

12. ¿Keniuj motenkaua Jehová ke kinsenpaleuis itekitikauan? (Salmo 91:​1, 2, 14).

¹² (Xikonlero Salmo 91:​1, 2, 14). Jehová motenkaua ke kinsenpaleuis itekitikauan para maj nochipa kuali iuan mouikakan. Satanás amo keman uelis kichiuas maj amo tikueyichiuakanok Dios kemej moneki, porin Jehová amo kikauas (Juan 17:15). Uan keman peuas “tetsaujkatajyouilis”, tikmatij ke Jehová kichiuas tein motenkaujtok de kinsenpaleuis itekitikauan maj kisentokakan iuan takuaujtamatikan uan kinmakixtis (Apoc. 7:​9, 14).

13. ¿Keniuj Jehová kinpaleuia sejse itekitikauan?

¹³ ¿Uan keniuj Jehová kinyekpia sejse itekitikauan? Yejua techmakatok Biblia para maj tikmatikan toni kuali yetok uan toni amo (Heb. 5:14). Keman tikchiuaj tein timomachtiaj itech Biblia, techpaleuia maj kuali timouikakan iuan Jehová uan no maj tikixtalikan tikchiuaskej tein techpaleuis maj okachi tiyolpakikan uan maj kuali tietokan (Sal. 91:4). Jehová no techmaka nechikol tein techpaleuia maj tiksentokakan tiktekitilikan (Is. 32:​1, 2). Tokniuan itech nechikol kitasojtaj Jehová uan kitakamatij, yejua ika komo tietokej iniuan itech nechikolmej, keman titanojnotsaj uan keman timoixpetaniaj, techyolchikauaskej uan techpaleuiskej maj amo tikchiuakan tein amo kuali (Prov. 13:20).

14. 1) ¿Keyej Jehová amo nochipa kiajchiua kuejmolmej tein tikpiaj? 2) ¿Toni techelnamiktia Salmo 9:10? (No xikonita nota).

¹⁴ Ne uejkauj kemansa Jehová kinpaleuij itekitikauan para maj amo kinxokolikan oso maj amo kinmiktikan, sayoj ke amo nochipa ijkon kichiuak. Biblia kijtoua ke tinochin uelis tikpiaskej ouijkayomej maski amo tikchiayaj (Ecl. 9:11). Uan no ne uejkauj uan axkan Jehová kemansa kinkauani maj itekitikauan kintajyouiltikan oso hasta kinmiktikan. ¿Keyej? Para kinextis ke Satanás takajkayaua (Job 2:​4-6; Mat. 23:34). Jehová amo nochipa kiajchiuas kuejmolmej tein tikpiaj, sayoj ke no tikyekmatij ke amo keman kinkauas akin kitasojtaj (Sal. 9:10).d

JEHOVÁ TECHYOLSEUIA

15. ¿Keniuj techyolseuia Jehová keman timotataujtiaj, ika Biblia uan tokniuan? (2 Corintios 1:​3, 4).

¹⁵ (Xikonlero 2 Corintios 1:​3, 4). Tinochin kemansa titayokoyaj, timotekipachouaj oso timoyolkokouaj. Xa axkan semi timotekipachojtokej uan tikmachiliaj ke tietokej toselti. Maski tiknemiliskej ke amo akin kimati tein tikijyouijtokej, Jehová kemaj kimati. Uan no hasta “techyolseuia itech nochi tataman ouijkayomej tein tikpiaj”. ¿Keniuj kichiua nejin? Keman timotataujtiaj, ika Biblia uan tokniuan. Keman timotataujtiaj yejua technankilia uan techyolseuia “kemej amo akin ueli kiajsikamati” (Filip. 4:​6, 7). No semi techyolchikaua keman tiklerouaj Biblia, porin tikitaj keniuj Jehová semi techtasojta, techmachtia maj timochiuakan titamatinij uan techyolseuia porin tikchiaj tikseliskej tein kuali. Uan no, techpaleuia tietoskej itech nechikolmej porin tein techmachtiaj de Biblia techyolchikaua uan no porin ompa tietokej iniuan tokniuan akin techtasojtaj.

16. ¿Toni technextilia tein kinpanok Nathan uan Priscilla?

¹⁶ Maj tikitakan tein kinpanok Nathan uan Priscilla akin nemij Estados Unidos, ijkon tikitaskej keniuj Jehová techyolseuia uan techyolchikaua ika itajtol. Seki xiujmej achto yejuan kiixtalijkej tapaleuitiuij okseko. Nathan kijtoua: “Tikmatiaj ke Jehová techtatiochiuiskia”. Sayoj ke keman ompa ajsikej yejuan kokolispeujkej uan amo kiajsiaj tekit para ika moixpanoltiskej. Yejua ika mokepkej ininchan, sayoj ke kisentokayaj amo kipiayaj tomin. Nathan kijtoua: “Nimotajtaniaya keyej Jehová amo techtatiochiuiaya kemej tiknemiliayaj. Hasta niknemiliaya ke nikchiujka teisa tein amo kuali”. Sayoj ke satepan Nathan uan Priscilla kiitakej ke Dios amo kinsenkaujka. Nathan kijtoua: “Keman nikpanotoya nejon ouijkayomej Biblia semi nechpaleuij, porin keman niklerouaya nikmachiliaya ke nechnojnotstoya aksa akin kuali iuan nimouika akin nechyolchikauaya uan kuali nechyolmajxitiaya. Tikitakej ke amo semi monekia titanemiliskej itech tein tikpanotoyaj, ta keniuj Jehová techpaleuijtoya maj titaxikokan. Nejon techpaleuij maj tikneltokakan ke Jehová nochipa techpaleuis keman tikpiaskej ouijkayomej”.

17. ¿Keniuj kiyolseuijkej se tokniuj akin monotsa Helga? (No xikonita taixkopimej).

¹⁷ Jehová no kichiua maj tokniuan techyolseuikan. Ueli tikitaj nejin itech tein kipanok Helga, se tokniuj siuat akin nemi Hungría. Yejua miak xiujmej tajyouij, yejua ika amo kuali momachiliaya uan kinemiliaya ke amo teyi chiujkej katka. Sayoj ke axkan keman itech tanemilia tein kipanok, kiita keniuj Jehová kichiuak maj tokniuan itech nechikol kiyolseuianij. Yejua kijtoua: “Jehová nochipa nechpaleuij keman kiitaya ke amo niueliaok noselti porin monekia nitekitis, nikyekpias nokoneuj akin mokokouaya uan no nikpiaya okseki ouijkayomej. Itech nejin 30 xiujmej tein panouani, nochipa nikitani keniuj Jehová nechyolseuiani ijkon kemej motenkauani. Amo nechkauani noselti nion se tonal. Jehová miakpa nechyolchikauani keman kichiua maj tokniuan kuali nechnojnotsakan uan maj nechnextilikan ke nechtasojtaj. Tokniuan nechyolchikauanij keman nechtajkuilouiliaj, nechtitaniliaj se tarjeta oso nechiluiaj ke kuali nikchiuak se taman, uan nejin kichiuanij keman okachi moneki maj nechpaleuikan”.

18. ¿Keniuj uelis tikinyolseuiskej oksekin?

¹⁸ Tejuan no ueli tikchiuaj kemej Dios keman tikinyolseuiaj oksekin. ¿Keniuj tikchiuaj nejin? Keman kuali tikinkakij, tikiniluiaj tein kinyolchikauas uan tikchiuaj teisa tein ika uelis tikinpaleuiskej (Prov. 3:27). Uan nejin amo sayoj tikchiuaj iniuan tokniuan, ta no tikinpaleuiaj hasta akin ayamo kitekitiliaj Jehová uan tajyouijtokej. Komo kipanotokej se ouijkayot, mokokouaj oso momikilij aksa akin kitasojtayaj tikinkalpanouaj, tikinkakij uan tikinyolchikauaj ika Biblia. Keman tikchiuaj kemej “Dios akin nochipa teyolseuia”, ueli tikinpaleuiaj tokniuan maj kixikokan ouijkayomej uan no tikinpaleuiaj akin amo kitekitiliaj Jehová maj kinekikan kiixmatiskej (Mat. 5:16).

JEHOVÁ NOCHIPA TECHPALEUIS

19. ¿Keniuj techpaleuia Jehová uan keniuj uelis tikchiuaskej kemej yejua?

¹⁹ Jehová semi motekipachoua por tinochin akin tiktasojtaj uan amo keman techsenkaua keman titajyouijtokej. Techtasojta uan techyekpia ijkon kemej se tetat kichiua iuan ikonetsin. Jehová techixyekana, techmaka tein techpoloua, techpaleuia uan techyolseuia. Uan tejuan no ueli tikchiuaj kemej Jehová keman tikinpaleuiaj uan tikinyolchikauaj akin no tajyouijtokej. Itech nejin tonalmej xa tikpiaskej ouijkayomej uan timotayokoltiskej, sayoj ke tikneltokaj ke Jehová nochipa touan yetos porin yejua motenkaua nejin: “Amo ximoui, porin nejua nietok mouan” (Is. 41:10). Nejin tein Jehová motenkaua techelnamiktia ke amo keman tietoskej toselti.