¿Kisentoka tapaleuia tein Biblia kijtoua?

Miakej, hasta akin kijtouaj ke kichiuaj kemej Cristo, kinemiliaj ke amo taixejekol keman Biblia kijtoua ke sayoj moneki mosentekaskej se takat uan se siuat akin monamiktijkejya. Kemej miak taman mopatani, miak taneltokalismej no kipatanij kemej achto kiitayaj seki taman uan amo tamachtiajok toni kuali yetok uan toni amo kuali yetok. ¿Kijtosneki nejin ke tein Biblia tamachtia amo tapaleuiaok? Amo. Maj tikitakan seki taman tein kinextiaj ke kisentoka tapaleuia.

Moneki maj Dios techixyekana

Para tikmatiskej toni kuali yetok uan toni amo kuali yetok, moneki maj Dios techixyekana porin yejua ijkon techchijchiuak. Biblia kijtoua ke amo akin uelis nion kinamiki iselti moixyekanas (Jeremías 10:23). Maski Jehováa techchijchiuak kemej uelis titaixpejpenaskej, amo technamiki nion tiuelij toselti tikixtaliaj toni kuali yetok uan toni amo kuali yetok. Yejua ika Dios kineki maj tiktemokan maj yejua techpaleui (Proverbios 3:5).

Itanauatiluan Dios moajsij itech Biblia. Maj tikitakan ome taman tein kinextia keyej semi moneki.

• Dios yejua akin techchijchiuak (Salmo 100:3). Yejuatsin kuali kimati toni techpaleuis maj tiyolpakikan, maj kuali tietokan uan maj kuali timomachilikan. Uan no kimati tein uelis techpanos komo amo tiktakamatij (Gálatas 6:7). Jehová kineki maj kualtsin tinemikan. Yejua ika Biblia kijtoua ke yejua ‘akin techmachtia para kuali tietoskej, akin techixyekana itech ojti kampa moneki tinejnemiskej’ (Isaías 48:17).

• Tein tiknemiliaj uelis kichiuas maj timopolokan. Miakej kinemiliaj ke para uelis kimatiskej toni kuali yetok uan toni amo kuali yetok sayoj moneki kichiuaskej tein kinejnekij uan tein kimachiliaj. Sayoj ke Biblia kijtoua ke ‘amo ueli se takuaujtamati itech se iyolo’ porin uelis techkajkayauas (Jeremías 17:9). Komo amo tiktemouaj maj Dios techpaleui uan tikchiuaj tein tejuan tiknemiliaj ke kuali yetok, satepan uelis timoyolkokoskej (Proverbios 28:26; Eclesiastés 10:2).

Akin taixyekanaj itech taneltokalismej ¿monekiskia amo tamachtiskejok tein Biblia kijtoua?

Amo, porin sayoj itech Biblia tikajsij tein melauak de Dios uan tein yejua kineki maj tikchiuakan (1 Corintios 6:9-11; Gálatas 5:19-23). Yejuatsin kineki maj nochin kiixmatikan tein melauak (1 Timoteo 2:3, 4). Yejua ika, akin taixyekanaj itech taneltokalismej moneki tamachtiskej tein kijtoua Biblia (Tito 1:7-9).

Kemej miakej amo kinekij kichiuaskej tein Biblia kijtoua, kitemouaj se taneltokalis kampa ‘kiniluiskej tein yejuan kinekij kikakiskej’ (2 Timoteo 4:3). Sayoj ke Biblia kijtoua: “Tekneltijkej tein kijtouaj ke tein kuali, amo kuali, uan tein amo kuali kiitaj ke kuali” (Isaías 5:20). Dios kintatsakuiltis akin taixyekanaj itech taneltokalismej porin amo kinmachtiaj oksekin tein Biblia kijtoua ke kuali yetok oso amo kuali yetok.

Komo peua tikchiuaj tein Biblia kijtoua ¿tiknekiskej maj oksekin no ijkon kichiuakan?

Amo, porin akin kinekij kitakamatiskej Dios, kichiuaj kemej Jesús uan tein tamachtij. Uan yejua kinnextilij imomachtijkauan maj amo kinijijtokan oksekin ta maj kintasojtakan uan maj kinpoujkaitakan nochin (Mateo 5:43, 44; 7:1).

Imomachtijkauan Jesús monekia kinextiskej ke kitakamatiaj tein Dios tanauatia. Sayoj ke no kimatiaj ke monekia kinpoujkaitaskej akin amo ijkon kichiuaskiaj (Mateo 10:14). Jesús amo tanauatij maj kikuinij política para kinchikaujkauiskej oksekin maj kitakamatikan itanauatiluan Dios (Juan 17:14, 16; 18:36).

¿Keniuj techpaleuia tiktakamatiskej tein kijtoua Biblia?

Se mochikauas se kitakamatis itanauatiluan Dios semi techpaleuia axkan uan no satepan (Salmo 19:8, 11). Maj tikitakan keniuj uelis techpaleuis:

• Okachi tiyolpakij (Proverbios 29:6)

• Kuali timouikaj iuan Dios (Proverbios 3:32)

• Dios uelis techpaleuis keman tikpanoskej ouijkayomej (Proverbios 11:8)

• Uelis tikchiaskej tinemiskej nochipaya nikan taltikpak (Salmo 37:29).