Noyampa taltikpak tel chikauak tona | ¿Toni kijtoua Biblia?

Itech metsti julio xiuit 2022, itech miak altepemej semi tonani kemej amo keman mochiujtoya.

• “Ompa China kitematiltijkej ke kemej itech 70 xolalmej tel chikauak tonas ika ojpaya itech nejin metsti” (25 metsti julio xiuit 2022, servicio de noticias CNN).

• “Kemej tel chikauak tona ompa Europa miakkan itech koujtaj peuak motatikui” (17 metsti julio xiuit 2022, The Guardian).

• “Tonal domingo, itech miak xolalmej ompa Estados Unidos tel chikauak tonak kemej amo keman ijkon panotoya, porin itech costa este uan itech seki xolalmej kampa ika sur uan Medio Oeste tel tona” (24 metsti julio xiuit 2022, The New York Times).

¿Kijtosneki nejon ke satepan amo akinok uelis nemis nikan taltikpak? ¿Toni kijtoua Biblia?

¿Moijtojka itech Biblia ke tel tonaskia?

Kemaj. Nejon tein panotok mouika ika tein moijtojka itech Biblia ke panoskia itech nejin tonalmej. Kemej neskayot, Jesús kijtojka ke ‘tikitaskiaj tein techtetsaujkamoujtis’ (Lucas 21:11). Miakej momoujtiaj porin kikakij ke noyampa okachi chikauak tona uan kintekipachoua maj taltikpakneminij kitamiuejuelokan taltikpak.

¿Amo uelisok se nemis itech taltikpak?

Kemaj uelis, porin Dios kichijchiuak taltikpak para maj taltikpakneminij ompa nemikan nochipaya (Salmo 115:16; Eclesiastés 1:4). Dios amo kikauas maj taltikpakneminij kiixpolokan taltikpak, ta motenkauak ke kinixpolos “akin kiixpolojtokej taltikpak” (Apocalipsis 11:18).

Maj tikitakan ome tamanok tein Dios motenkauak kichiuas nikan taltikpak:

• “Onkas yolpakilis taluakyan uan kampa tauaktok. Onkas yolpakilis taluakyan uan taxochiouas kemej azafrán” (Isaías 35:1). Dios amo kikauas maj taltikpak mokaua taluakyan kampa amo akin uelis nemis, ta kiyektalis nochi tein uejueliuik.

• “Tejua tikyekpia taltikpak uan tikchiua maj moteltachiua uan maj tel taonka” (Salmo 65:9). Dios kichiuas maj taltikpak mochiua se xochital.

Kemej noyampa taltikpak okachi tona uan mochiua okseki taman, kinextia ke mochiujtok tein Biblia achto kijtojka. Komo tikonneki tikonmatis okachi xikonlero tamachtilis “¿Qué dice la Biblia sobre el cambio climático y nuestro futuro?”

Itech Biblia moijtoua ke Dios tayektalis nikan taltikpak. Para tikonmatis okachi xikonlero tamachtilis “¿Quién salvará el planeta?”