¿Keniuj kinitaj itaixpantijkauan Jehová akin amo pouijok itech inintaneltokalis?
Tejuan tiktemouaj titetasojtaskej uan titepoujkaitaskej. Komo se itaixpantijkauj Jehová amo youiok nechikolmej, amo tanojnotsaok uan amo no kiueyichiuaok Jehová, tejuan tiktemouaj iuan titajtoskeja, tikiluiaj ke tiktasojtaj uan tikpaleuiaj maj motoki iuan Dios (Lucas 15:4-7).
Kemansa, se aksa uelis kichiuas teisa uan yejua ika monekis kikalankixtiskej de nechikol (1 Corintios 5:13). Semi tikintasojtaj tokniuan, yejua ika achto tikpaleuiaj maj moyolpata para maj amo moneki kikalankixtiskej de nechikol. Uan komo kemaj ijkon panoua, tiksentokaj tiknextiliaj ke tiktasojtaj uan tikpoujkaitaj ijkon kemej Biblia techiluia maj tikchiuakan (Marcos 12:31; 1 Pedro 2:17).
¿Keyej aksa uelis kikalankixtiskej de nechikol?
Biblia kiyekijtoua ke komo aksa tajtakolchiua uan amo moyolpata, moneki kikalankixtiskej de nechikolb (1 Corintios 5:11-13). Biblia kijtoua ke akin kichiuaj seki tajtakolmej, moneki kikalankixtiskej de nechikol. Seki tajtakolmej yejua nejin: akin auilnemij, akin tauanaj, akin temiktiaj uan tateuiaj, uan akin tachtekij (1 Corintios 6:9, 10; Gálatas 5:19-21; 1 Timoteo 1:9, 10).
Sayoj ke amo niman kikalankixtiaj akin tajtakolchiuak, achto tokniuan tayekananijc kipaleuiaj maj kiita ke amo kuali tein kichiuak uan maj amo oksepa kichiuaok (Romanos 2:4). Uan ika netasojtalis kitemouaj kiyololiniskej maj amo kichiuaok tein amo kuali (Gálatas 6:1). Ijkon uelis kipaleuiskej maj kiita ke amo kuali tein kichiuak uan maj moyolpata (2 Timoteo 2:24-26). Sayoj ke komo kisentoka kichiua tein amo kuali uan amo moyolpata maski tayekananij kipaleuijkej, moneki kikalankixtiskej de nechikol. Uan tayekananij tanauatiaj itech nechikol ke amo itaixpantijkaujok Jehová.
Tayekananij kinextiliaj ke kitasojtaj uan amo yolijsiuij keman mochikauaj kipaleuiskej akin tajtakoj.
¿Keniuj tapaleuia maj kikalankixtikan de nechikol aksa akin kisentoka tajtakolchiua? Amo kinchiualtia akin pouij itech nechikol maj no tajtakolchiuakan uan ueli kisentokaj kitakamatij itanauatiluan Jehová (1 Corintios 5:6; 15:33; 1 Pedro 1:16). Uan no, akin kikalankixtijkej uelis kipaleuis maj kikaua tajtakol uan maj mopata (Hebreos 12:11).
¿Keniuj mouikaj itaixpantijkauan Jehová iniuan akin kinkalankixtijkej de nechikol?
Biblia kijtoua ke akin kichiuaj kemej Cristo amo moneki mouikaskej iniuan akin kinkalankixtijkej de nechikol, uan hasta nion no iniuan tamajseuaskej (1 Corintios 5:11). Yejua ika amo iniuan timouikaj. Sayoj ke nejon amo kijtosneki ke amo kuali tikinitajok, ta tikinpoujkaitaj. Akin kikalankixtijkej uelis yas itech nechikolmej uan akin ompa yetoskej uelis kitajpaloskej.d No uelis kintajtanis tayekananij maj kipaleuikan maj oksepa kuali mouika iuan Jehová.
Kuali tikinseliaj itech nechikolmej akin kinkalankixtijkej de nechikol.
¿Toni panoua keman aksa kikalankixtiaj de nechikol, sayoj ke isiuauj uan ikoneuan pouijok kemej itaixpantijkauan Jehová? Maski amo kiueyichiuaok Jehová iniuan, kisentoka yejua ichankauan. Kemej nemij ichan, kisentoka mouika iniuan uan kintasojta isiuauj uan ikoneuan.
Akin kikalankixtijkej de nechikol uelis kintajtanis tokniuan tayekananij maj kikalpanokan ichan uan yejuan kiyolchikauaskej uan kipaleuiskej ika Biblia maj moyolpata uan maj oksepa kuali mouika iuan Dios (Zacarías 1:3). Komo yejua amo tajtakolchiuaok uan kinextia ke yekmelauj kineki kitakamatis itanauatiluan Dios, uelis mokepas itech nechikol. Tokniuan kitapojpoluiskej uan kiyolseuiskej ijkon kemej kichiujkej tokniuan de Corinto keman se akin tajtakolchiuak mopatak (2 Corintios 2:6-8).
¿Keniuj momachiliaj axkan akin achto kinkalankixtijkaj de nechikol?
Xikonita tein kijtouaj seki itaixpantijkauan Jehová akin kinkalankixtijkej uan kiixtalijkej oksepa mokepaskej itech inechikol Dios.
“Keman nikixtalij nimokepas, niknemilij ke tayekananij nechtajtaniskiaj maj nikinilui nochi tein nikchiujka keman amo nietoya itech inechikol Dios. Sayoj ke amo ijkon panok, yejuan sayoj nechiluijkej: ‘Tiknekij sayoj xiknemili tein tikchiuas axkan para taixpan’. Nejon kichiuak maj kuali nimomachili...” (María, Estados Unidos).
“Tokniuan itech nechikol kinektoyaj maj nimokepa. Nikmachilij ke semi nechtasojtayaj. Yejuan nechpaleuijkej maj nikita ke Jehová uan yejuan nechtapojpoluijkajya uan nejon nechpaleuij maj amo nimotayokoltijtook ika tein nikchiujka. Tayekananij nochipa nechkakiaj uan nechpaleuijkej maj oksepa kuali nimouika iuan Jehová” (Malcom, Sierra Leona).
“Niyolpaki nikitas ke Jehová semi kintasojta itekitikauan uan kinpaleuia maj kitakamatikan itanauatiluan. Maski oksekin kinemiliskej ke amo kuali keman kinkalankixtiaj, tein melauj, yejua se taman tein moneki uan ijkon Jehová technextilia ke techtasojta. ¡Semi niktasojkamati maj toTajtsin Dios semi techtasojta uan maj techtapojpolui!” (Sandi, Estados Unidos).
a Maski itech nejin tamachtilis tikuikej tajtol para takamej, tein kijtoua nikan no para siuamej.
b Achto keman aksa tajtakouaya uan amo moyolpataya, tikijtouayaj ke katka expulsado. Axkan tikuij tajtol tein nesi itech Biblia uan sayoj tikijtouaj ke aksa kikalankixtijkej de nechikol.
c Seki takamej akin itaixpantijkauan Jehová uan tamachtiaj ika Biblia, moixmatij kemej tayekananij. Yejuan kinyekpiaj, kinyolchikauaj uan kinpaleuiaj akin pouij itech se nechikol. Uan amo kintaxtauiaj (1 Pedro 5:1-3).
d Kemansa, xa se aksa kikaua inechikol Dios para kinijtakos akin pouij itech nechikol oso kitemoua kinchiualtis maj no ijkon monejnemiltikan kemej yejua. Keman ijkon panoua, tikchiuaj tein Biblia technauatia uan hasta amo tiktajpalouaj akin ijkon kichiua (2 Juan 9-11).