¿Keyej amo youij itech neteuilis?
Tiitaixpantijkauan Jiova amo tiyouij itech neteuilis porin:
Se tanauatil tein kitemakak Dios. Biblia achto kijtojka ke itekitikauan Dios “imin espadas kichiuaskej tameualonimej” uan amo momachtiskejok neteuilis (Isaías 2:4).
Se tanauatil tein kitemakak Jesús. Tatitanil Pedro kiselij nejin tanauatil tein kimakak Jesús: “Xikyektali momachete kampa tikieua. Porin nochi naken moteuis ika machete, yejua ne no ika machete mikis” (Mateo 26:52). Ika nejin tajtolmej, Jesús kiyekijtoj ke itatojtokakauan amo pouiskiaj itech neteuilis.
Cristo no kijtoj ke imomachtijkauan “amo no poutinemij nikan taltikpak”. Yejua ika, senkis amo mokalakiaj itech política (Juan 17:16). Nion no mokalakiaj iniuan tateuianij uan amo kintsakuiliaj maj oksekin tapaleuikan itech neteuilis.
Akin kichiuaj kemej Cristo moneki kintasojtaskej oksekin. Jesús kiniluij itatojtokakauan: “Namechmaka se yankuik tanauatil [...], ke moneki ximoyolsepantasojtakan se uan oksé” (Juan 13:34, 35). Akin kichiuaj kemej Cristo mouikaj kemej iknimej maski seseko kayomej uan amo keman kikuiskiaj teposmej uan ika moteuiskiaj (1 Juan 3:10-12).
Yekinika itatojtokakauan Cristo amo yayaj itech neteuilis. Se tajkuilol kijtoua ke “yekinika itatojtokakauan Cristo amo tapaleuiayaj itech neteuilis nion momachtiayaj tateuiskej”, porin kimatiaj ke nejon “amo mouikaya ika netasojtalis tein ika tamachtij Jesús uan keman tanauatij ke monekia kintasojtaskej akin kintauelitayaj” (Encyclopedia of Religion and War). Uan se tajkuilojkej Británico akin itokay Edward Gibbon kijtoj itech itajkuilol Historia de la decadencia y caída del Imperio romano: “Akin kichiuayaj kemej Cristo amo ueliskiaj mochiuaskej tateuianij [...] uan kisentokaskiaj itech inintaneltokalis”.
Titapaleuiaj maj onka yekyetolis
Tiitaixpantijkauan Jiova titapaleuiaj maj kuali moajsikan oksekin uan amo tikchiuaj nion teyi tein uelis kiualkuis ouijkayomej itech altepet kampa tinemij. Tein melauj, tikinpoujkaitaj tekiuanij, porin tiktakamatij nejin tanauatilmej tein Dios techmaka.
“Xikintakamatiyakan nochi nojon tekiuani ten kintalia in gobierno.” (Romanos 13:1.)
“Xikmaktilikan in rey César ten kinamiki xikmaktikan César, uan xikmaktilikan Dios ten kinamiki xikmaktikan Dios.” (Mateo 22:21.)
Yejua ika, tiktakamatij tanauatilmej, titaxtauaj impuestos uan tiktakamatij tein kiixtaliaj tekiuanij tein ika kitemouaj maj onka yekyetolis kampa tinemij.