Martes 30 metsti septiembre
Dios nochipa kichiua tein kijtoua, uan yejua amo namechkauas xikixnamikikan nejon kuejmol kemej amo uelis nankixikoskej, ta keman namechyoltilanas teisa para ximotajtakolmakakan, yejua namechpaleuis xitaxikokan (1 Cor. 10:13).
Komo itech titanemiliaj ke timotenkaujkej tikchiuaskej tein Jehová kineki, techpaleuis maj tikixtopeuakan tein amo kuali. Maj tiknemilikan nejin: ¿tiknextiskiaj ke tikueuelitaj akin amo tonamik? ¡Amo! Tejuan timotenkaujkejya iuan Jehová, yejua ika nion tiknemiliaj tikchiuaskej nejon. Komo amo tikixualtiaj nejon amo kuali tanejnekilis, satepan amo monekis tiktemoskej timokixtiliskej nejon taman. Nion tepitsin tiknekij tikchiuaskej tein kichiuaj “akin amo yolkualmej” (Prov. 4:14, 15). Tein kichiuak Jesús uelis techpaleuis. Yejua kinekia kiyolpaktis iTajtsin, uan tejuan no niman tikixtopeuaskej tein tikmatij ke amo kiyolpaktia Dios akin iuan timotemaktijkej (Mat. 4:10; Juan 8:29). Komo titaxikouaj keman tikpiaj ouijkayomej uan tikixtopeuaj tajtakol, kinextia ke tikixtalijkejya tiksentokaskej tiktojtokaskej Jesús. Uan tikmatij ke Jehová techpaleuis maj ijkon tikchiuakan. w24.03 9, 10 § 8-10
Miércoles 1 metsti octubre
Akin kipia itamatilis Dios [...], niman tatakamati (Sant. 3:17).
¿Kemansa ouij mitsonkisa tiontatakamatis ijkon kemej kipanouaya David? Yejua hasta kitajtanij Dios: “Xikchiua maj nikneki nimitstakamatis” (Sal. 51:12). Maski David kitasojtaya Jehová kemansa ouij kikisaya kitakamatis, uan tejuan no ijkon techpanoua. ¿Keyej? Yekinika, porin touejkaujtatuan amo tatakamatkej uan tejuan no ijkon tikchiuaj. Ojpatika, porin Satanás nochipa kitemoua maj amo titatakamatikan kemej yejua kichiuak (2 Cor. 11:3). Uan expatika, porin miakej taixnamikij uan kipiaj “tanemilil tein kinyekana akin amo tatakamatij” (Efes. 2:2). Yejua ika, para uelis tiktakamatiskej Jehová uan akin kinkaujtok maj taixyekanakan semi moneki timochikauaskej amo tikchiuaskej tein amo kuali, amo tikchiuaskej kemej akin amo tatakamatij uan amo timokauaskej maj techkajkayaua Satanás. w23.10 6 § 1
Jueves 2 metsti octubre
Sayoj ke tejua tikixtij vino tein kuali hasta axkan (Juan 2:10).
¿Toni techmachtia milagro tein kichiuak Jesús? Ke moneki maj tiyolyemankej. Jesús amo moueyimatik keman kichiuak maj at mokepani vino. Uan nion keman moueyimatia ika tein kichiuaya, ta katka yolyemanik uan nochipa kiueyitaliaya iTajtsin (Juan 5:19, 30; 8:28). Komo tikchiuaj kemej Jesús, tiyeskij tiyolyemankej uan amo timoueyimatiskej ika tein ueli tikchiuaj. Maj amo ika timoueyimatikan, ta maj tikueyitalikan Dios, akin tikpiaj tatiochiualis tiktekitiliskej (Jer. 9:23, 24). Maj tikueyitalikan Jehová kemej kinamiki, porin komo amo techpaleuiskia amo teyi ueliskia tikchiuaskej (1 Cor. 1:26-31). Akin yolyemanik amo kitemoua maj kiueyitalikan keman kinpaleuia oksekin. Yolpaki porin kimati ke Jehová kiita uan kipatiuita tein kichiua (no xikonita Mateo 6:2-4; Heb. 13:16). Jehová semi yolpaki keman kiita ke tiknekij tiyeskij tiyolyemankej kemej Jesús (1 Ped. 5:6). w23.04 4 § 9; 5 § 11, 12