Juan kitematiltijtoya nejin: “Se akin okachi ueyichiujkej ke nejua ualas amo uejkaua”. Keman Jesús kipiaya kemej 30 xiujmej, kisak Galilea uan ajsito ueyiat Jordán. Ompa Juan kinauijtoya taltikpakneminij. Jesús kinekia maj Juan no kiauiani yejua, sayoj ke Juan kiluij: “Nejua amo monekiskia nimitsauis. Tejua monekiskia tinechauis”. Jesús kinankilij: “Jiova kineki tejua xinechaui”. Yejua ika mokalakijkej itech ueyiat Jordán, uan Juan kipankalakij Jesús itech at.

Satepan ke Jesús kisak itech at, kitataujtij Jiova. Ijkuak, iluikak motapoj, uan iespíritu Dios temok kemej se uiltsin uan motalij itech. Ompa Jiova kiualpanijtoj: “Tejua tinotasojKonetsin. Tikpia notatiochiualis”.

Ijkon Jesús kiselij iespíritu Jiova, uan ijkuak, mochiuak Cristo oso Mesías. Axkan ueliskiaya kichiuas tein Jiova kinauatijka maj kichiua nikan taltikpak.

Niman ke moauij, Jesús yajki taluakyan uan ompa yetoto 40 tonalmej. Keman mokepak, kiitato Juan. Yejua kiitak ke Jesús yaya kiajsiti uan kijtoj: “Yejua nejin iIchkatsin Dios akin kijkuanis tajtakol itech taltikpak”. Kijtoj nejon porin kinekia maj taltikpakneminij kimatinij ke Jesús katka Mesías. ¿Tikmati toni kipanok Jesús keman moajsia taluakyan? Maj tikitakan.

Satepan ke Jesús moauij, yektikatsin espíritu kiyekanak maj youi taluakyan. Amo teyi kikuaj 40 tonalmej uan yejua ika tel mayanaya. Ompa, Amokuali ajsik porin kitemouaya kichiuas maj Jesús tajtako. Yekinika kiluij: “Komo yekmelauj tiikoneuj Dios, xikinilui nejin temej maj mochiuakan panes”. Sayoj ke Jesús kinankilij ika seki tajtolmej tein moajsij itech iTajtol Dios: “Ijkuiliujtok ke taltikpakneminij amo sayoj yoltoskej komo takuaj, ta no moneki kikakiskej nochi tein kijtoua Jiova”.

Amokuali kitemoj maj Jesús tajtako ika okse taman: “Komo yekmelauj tiikoneuj Dios, ximopankajkaua kampa okachi uejkapan itech templo. Ijkuiliujtok ke Dios kinualtitanis ángeles maj mitsmakixtikij”. Sayoj ke Jesús oksepa kinankilij ika seki tajtolmej tein moajsij itech iTajtol Dios: “Ijkuiliujtok ke moneki amo tikchiualtis Jiova maj kinexti tein ueli kichiua”.

Ika tamik, Satanás kinextilij nochi tekiuajyomej tein moajsij itech nochi taltikpak uan tomin tein kipiaj uan ininueyiyo, uan kiluij: “Nimitsmakas nochi nejin tekiuajyomej uan ininueyiyo komo sayoj sepa tinechueyichiua”. Sayoj ke Jesús kinankilij: “¡Xiyouj Satanás! Ijkuiliujtok ke moneki se kiueyichiuas sayoj Jiova”.

Yejua ika Amokuali yajki, uan seki ángeles ualajkej uan kitamakakej Jesús. Satepan, Jesús peuak kitematiltia tein kuali tein kichiuas iTekiuajyo Dios. Yejua nejon kinauatijka Jiova maj kichiua itech taltikpak. Taltikpakneminij kiteluelitayaj tein Jesús tamachtiaya, uan kitojtokayaj kampa yeski yaya.

Kemej itech metsti abril xiuit 30, Jesús yajki Jerusalén. Miakej taltikpakneminij no yajkej ompa porin yaya kichiuatij Pascua. Itech nejon iluit, itech templo kitemakayaj tapialmej kemej nemaktilmej. Sekin kinualkuiaj inintapialuan, sayoj ke oksekin kinkouayaj ompa Jerusalén.

Keman Jesús ajsik templo, kinitak seki taltikpakneminij akin ompa kinamakatoyaj tapialmej. ¡Motomintijtoyaj itech kali kampa kiueyichiuayaj Jiova! ¿Toni kichiuak Jesús? Kikuik seki mekat uan ika kinkixtij ichkamej uan kuakuejmej. No kintsonkepak mesas tein kikuiaj akin kipatayaj tomin, uan nochi tomin uetsito talpan. Jesús kiniluij akin kinamakatoyaj uiltsitsin: “¡Xikijkuanikan nochi nejin! ¡Amo xikchiuakan ichan noTajtsin se tanamakaloyan!”.

Akin yetoyaj itech templo kimoujkaitakej tein Jesús kichiuak. Imomachtijkauan kielnamikkej tein moijtojka ke kichiuaskia Mesías: “Semi nikpoujkaitas ichan Jiova”.

Satepan, itech xiuit 33, Jesús ika ojpa tachipauak itech templo. Amo kikauaya maj nion akin amo kipoujkaitani ichan iPopaj.

Satepan ke mochiuak Pascua, Jesús uan imomachtijkauan mokepkej Galilea. Keman ojtokatoyaj, panokej Samaria uan moseuijkej ompakauin itech xolal Sicar, itech iatekoch Jacob. Jesús ompa moseuij keman imomachtijkauan yajkej xolal kikouatoj takual.

Se siuat kikixtiko at itech atekoch, uan Jesús kiluij: “Xinechuanti tepitsin at”. Siuat kitajtanij: “¿Keyej titajtoua nouan, ta nejua nikayot Samaria? Judíos amo tajtouaj iniuan samaritanos”. Jesús kiluij: “Komo tikmatiskia niakoni, tinechtajtaniskia at, uan nejua nimitsmakaskia at tein kitemaka nemilis”. Siuat kitajtanij: “¿Toni tikijtosneki? Nion tikpia tein ika tikixtis at”. Jesús kinankilij: “Akin tayis at tein nejua nikmakas amo kemanok amikis”. Siuat kijtoj: “Xinechmaka nejon at, tejuatsin”.

Ompa Jesús kiluij: “Xikilui monamik maj uiki”. Siuat kinankilij: “Amo nikpia nonamik”. Jesús kiluij: “Melauak, porin makuilpaya timonamiktijka uan axkan tinemi iuan se takat, sayoj ke amo iuan timonamiktij”. Siuat kinankilij: “Nikita ke titanauatijkej. Itech noxolal kinemiliaj ke uelis tikueyichiuaskej Dios itech nejin tepet, sayoj ke judíos kijtouaj ke moneki se kiueyichiuas Dios sayoj ompa Jerusalén. Niknemilia ke keman ejkos Mesías, techmachtis keniuj tikueyichiuaskej Dios”. Ompa Jesús kijtoj se taman tein amo akin kiluijtoya: “Nejua niMesías”.

Siuat tsikuinteuak hasta ixolal uan kiniluij samaritanos: “Niknemilia ke nikajsik Mesías. Kimati nochi tein nikchiuani. Xiualakan uan xikitakan”. Yejua ika yajkej iuan kampa yetoya atekoch kikakitoj tein Jesús tamachtiaya.

Samaritanos kiluijkej Jesús maj iniuan mokauani. Yejua mokauak ome tonal uan kinmachtij miak taman, uan miakej iuan takuaujtamatkej. Satepan, kiluijkej siuat: “Satepan ke tikakkej nejin takat, tikyekmatij ke yejua yekmelauj temakixtijkej”.

Tepitsin satepan ke moauij, Jesús peuak kiteixmatiltia nejin: “ITekiuajyo Dios amo uejka yetok”. Imomachtijkauan iuan yajtinemiaj itech nochi Galilea uan Judea. Keman Jesús mokepak Nazaret, kampa kayot katka, yajki sinagoga, kitapoj amat tein kijkuilojka Isaías uan kiixtajtoltij ika tajtol chikauak: “Jiova nechmakak yektikatsin espíritu maj nechpaleui maj nikteixmatilti kuali tanauatilmej”. ¿Toni kijtosnekia? Taltikpakneminij kinekiaj kiitaskej maj Jesús kichiuani uejueyi tachiualismej. Sayoj ke yejua amo kiselijka yektikatsin espíritu maj kipaleui maj sayoj kichiua nejon. Okachi monekia kiteixmatiltis iTekiuajyo Dios. Ompa, Jesús kiniluij akin kikaktoyaj: “Axkan mochiua nejin tein moijtojka”.

Satepan, Jesús yajki itech ueyiat tein poui Galilea. Ompa kinitak naui imomachtijkauan akin katkaj amichkitskianij uan kiniluij: “Xiualakan nouan uan nikchiuas xikinpaleuikan taltikpakneminij maj mochiuakan notatojtokakauan”. Nejon takamej motokaytiayaj Pedro, Andrés, Santiago uan Juan. Yejuan niman kikaujkej inintekiuj uan yajkej iuan. Itech nochi Galilea kiteixmatiltijtinemiaj iTekiuajyo Jiova. Tanojnotsayaj itech inintiopan judíos, tanamakaloyamej uan itech ojti. Miakej kintojtokayaj kampa yeski yayaj. Tein Jesús kichiuaya momatik noyampa, hasta altepet Siria, tein tel uejka moajsia.

Ompa, Jesús kinmakak chikaualis seki itatojtokakauan tein kinpaleuiskia maj kinpajtianij akin mokokouayaj uan akin kintajyouiltiayaj amokuali ejekamej. Oksekin iuan yayaj tanojnotsatij itech tataman xolalmej. No iuan yayaj seki siuamej akin kitakamatiaj Dios akin kiitayaj maj Jesús uan imomachtijkauan kipianij tein monekia. Sekin katkaj María Magdalena, Juana, Susana uan okseki siuamej.

Satepan ke kinmachtij itatojtokakauan, Jesús kintitanik maj tanojnotsatij. Keman yajtinemiaj Galilea, miakej no mochiujkej imomachtijkauan Jesús uan moauijkej. Kemej miakej kinekiaj kitojtokaskej, Jesús kijtoj ke tamatiaj kemej se tal kampa ueliskiaya se kitekis tatok. Yejua kijtoj: “Xiktataujtikan Jiova maj kinualtitani okachi tekitinij maj kiololokij tatok”. Satepan, kinixpejpenak 70 imomachtijkauan uan kintitanik ojomen maj tanojnotsatij itech nochi Judea. Ika tajtouayaj iTekiuajyo Dios iniuan nochin taltikpakneminij. Keman mokepkej, kitelnekiaj kitapouiskej Jesús nochi tein kinpanoka. Amokuali amo uelia kichiuaya nion teyi tein ika kitsakuiliskia tanojnotsalis.

Jesús kichiuak nochi tein monekia tein kinpaleuiskia imomachtijkauan maj kisentokanij kichiuanij nejin tekit tein motelneki satepan ke yejua mokepaskia iluikak. Kiniluij: “Xikteixmatiltikan iTekiuajyo Dios itech nochi taltikpak. Xikinmachtikan taltikpakneminij iTajtol Dios uan xikinauikan”.

Jesús ualaj nikan taltikpak kiteixmatiltiko tatiochiualismej tein kiualkuis iTekiuajyo Dios. Uan no, Jiova kimakak yektikatsin espíritu tein kipaleuij maj kichiua uejueyi tachiualismej uan ika kinextij tein kichiuas keman yeski Tekiuaj. Kemej neskayot, Jesús uelia kipajtiaya akin yeski. Kampa yeski yaya, akin mokokouayaj kitajtaniayaj maj kinpaleui, uan yejua nochin kinpajtiaya. Kinpajtij akin amo tachiayaj, akin amo takakiaj uan akin amo ueliaj nejnemiaj. Pajtiaj maski sayoj kimatokayaj itaken. Jesús no kinkixtiaya amokuali ejekamej. Kampa yeski yaya Jesús taltikpakneminij kitojtokayaj, uan yejua amo keman kiixtopeuak aksa, nion ijkuak kinekia iselti yetos.

Se tonal, kiualkuikej se takat akin amo uelia nejnemia itech kali kampa yetoya Jesús. Sayoj ke kemej tel miakej moajsiaj, amo uelik kalakkej, yejua ika tatapojkej kalkuako uan ompakauin kitemoltijkej hasta kampa yetoya Jesús. Ompa, Jesús kiluij takat: “Ximeua uan xinejnemi”. Keman peuak nejnemi, taltikpakneminij semi kimoujkaitakej.

Okse tonal, Jesús ajsitiyaya se xolal, uan 10 takamej akin kipiayaj lepra kiuejkatsajtsilijkej: “¡Jesús, xitechpaleui!”. Itech nejon tonalmej, akin kipiayaj lepra amo ueliaj motokiayaj iniuan okseki taltikpakneminij. Uan no, iTanauatil Jiova kijtouaya ke monekia yaskej templo satepan ke pajtiaj. Yejua ika Jesús kiniluij maj yanij ompa. Keman yajtoyaj templo, pajtikej. Keman semej kiitak ke pajtik, mokepak uan kitasojkamatilij Jesús uan kiueyichiuak Dios. Maski katkaj 10 takamej, sayoj se kitasojkamatilij Jesús.

Se siuatsin 12 xiujmejya mokokouaya uan kinekia pajtis porin amo taxikouayaok. Yejua ika panotiyajki kampa yajtoyaj miakej hasta ajsik kampa Jesús uan kimatokak itilmaj. Siuatsin niman pajtik. Ompa, Jesús tajtanik: “¿Akoni nechmatokak?”. Siuatsin semi mouia, sayoj ke motokij uan kitapouij nochi. Jesús kiyolseuij uan kiluij: “Nokonetsin, xiyouj ika yolseuilis”.

Se taixyekankej akin monotsaya Jairo kitataujtij Jesús: “Xiuiki nochan. Nosiuapiltsin motelkokoua”. Sayoj ke achto ke ajsiskia ichan Jairo, siuapiltsin momikilij. Keman ajsik, Jesús kinitak miakej chokatoyaj iniuan ichankauan siuapiltsin. Yejua kiniluij: “Amo xichokakan, yejua sayoj kochtok”. Ompa, kimakitskij uan kiluij: “Siuapiltsin, ¡ximeua!”. Yejua niman meuak, uan Jesús kiniluij itatuan maj kitamakanij. ¡Ximonemili keniuj momachilijkej itatuan!

Keman Jesús kiuikaya kemej se xiuit uan tajko tanojnotstinemia, monekik kiixpejpenas se taman tein motelnekia. ¿Akonimej kinixpejpenaskia maj okachi iuan tekitinij uan maj taixyekananij itech nechikol kampa kichiuaj kemej Cristo? Achto ke kinixpejpenaskia, Jesús kitemoj maj Jiova kiyekana. Yejua ika, yajki itech se tepet kampa ueliskia yetos iselti uan kitataujtij Dios nochi youal. Mostika kualkan, Jesús kinsentilij seki imomachtijkauan uan kinixpejpenak 12 itatitaniluan. ¿Tikelnamiki itokay semej? Motokaytiayaj Pedro, Andrés, Santiago, Juan, Felipe, Bartolomé, Tomás, Mateo, Santiago ikoneuj Alfeo, Tadeo, Simón uan Judas Iscariote.

Nochin 12 yajtinemiaj iuan Jesús. Yejua kinmachtij keniuj tanojnotsaskej, uan satepan kintitanik maj ininselti tanojnotsatij. Uan no, Jiova kinmakak chikaualis tein kinpaleuiskia maj kinkixtianij amokuali ejekamej uan maj tapajtianij.

Jesús kinitaya 12 itatitaniluan kemej itasojikniuan, uan iniuan takuaujtamatia. Fariseos kinemiliayaj ke tatitanilmej amo teyi kimatiaj. Sayoj ke Jesús amo ijkon kinitaya. Yejua kuali kinmachtijka keniuj kichiuaskej tekit tein kinnauatijka. Yejuan yetoskiaj iuan Jesús keman kipanoskia seki taman tein motelnekia. Kemej neskayot, yetoskiaj iuan achto ke momikiliskia uan satepan ke moajokuiskia. Miakej katkaj kayomej Galilea, ijkon kemej Jesús. Uan sekin kipiayaj ininnamik.

Tatitanilmej katkaj tajtakolejkej, yejua ika mopolouayaj. Kemansa amo kinemiliayaj tein kijtouayaj uan amo kuali taixpejpenayaj. No yolijsiuiaj. Hasta motajtolteuiayaj porin kinekiaj kimatiskej akoni katka okachi ueyichiujkej. Sayoj ke katkaj yolkualmej uan kitasojtayaj Jiova. Keman Jesús amo moajsiskiaok nikan taltikpak, yejuan akin yekinika pouiskiaj itech nechikol kampa kichiuaj kemej Cristo kampa kichiuaskiaj se tekit tein motelneki.

Satepan ke kinixpejpenak 12 itatitaniluan, Jesús temok itech tepet uan kinajsito miakej taltikpakneminij. Yejuan ualeuayaj Galilea, Judea, Tiro, Sidón, Siria uan oksekopa itech ueyiat Jordán. Kinualkuikej akin mokokouayaj uan akin amokuali ejekamej kintajyouiltiayaj, uan Jesús kinpajtij nochin. Ompa, motalij uan peuak kinmachtia taltikpakneminij. Kinmelauilij toni moneki tikchiuaskej komo tiknekij kuali timouikaskej iuan Dios. No kiniluij ke moneki tikajsikamatiskej ke moneki maj Jiova techixyekana uan tiktasojtaskej, sayoj ke amo ueli tiktasojtaj komo amo tikintasojtaj taltikpakneminij. No tamachtij ke moneki tiyeskij tiyolkualmej uan timelaujkej iniuan nochin, hasta iniuan akin techtauelitaj.

Jesús kijtoj: “Amo sayoj xikintasojta motasojikniuan, ta no akin mitstauelitaj uan yekmelauj xitetapojpolui. Uan komo aksa kualani mouan, niman xikiluiti maj mitstapojpolui. Xikinchiuili oksekin tein tikuelita maj mitschiuilikan tejua”.

Jesús no kuali kinyolmajxitij keniuj monekia kiitaskej tomin uan okseki taman. Yejua kijtoj: “Okachi moneki kuali se mouikas iuan Jiova ke se kipias miak tomin. Porin se tachtekkej uelis mitskuilis tomin, sayoj ke amo akin uelis mitskuilis mokuali uikalis iuan Jiova. Yejua ika, amo ika ximotekipacho tein tikuas, tein titayis oso tein timotalilis. Xikinita tototsitsin. Dios nochipa kiita maj kipiakan tein kikuaskej. Maski timotekipachos, amo tinemis okachi tonalmej. Xikelnamiki: Jiova nochipa kimati toni mitspoloua”.

Taltikpakneminij amo keman kikaktoyaj aksa maj tajto kemej Jesús. Taixyekananij itech taneltokalis amo kinmachtijkaj nejon. ¿Keyej Jesús tel kuali tamachtiaya? Porin nochi tein tamachtiaya ualeuaya itenkopa Jiova.

Fariseos nochipa kitemouayaj maj taltikpakneminij kinmoujkaitanij. Komo kichiuayaj teisa tein kuali, kitemouayaj maj kinueyitalianij. Kemej neskayot, kitataujtiayaj Dios kampa miakej panouayaj porin kinekiaj maj nochin kinitanij. Momamachtiayaj uejueyi netataujtilmej uan kijtouayaj itech inintiopan judíos uan itech ojmej porin kinekiaj maj kinkakinij. Yejua ika taltikpakneminij kimoujkakakkej Jesús keman kijtoj: “Amo xikchiua netataujtil kemej fariseos. Yejuan kinemiliaj ke Dios kinmoujkakakis komo kikuij miak tajtolmej, sayoj ke nejon amo melauak. Netataujtil kijtosneki ke sayoj tejua titajtoua iuan Jiova. Amo nochipa xikijto sayoj se taman. Jiova kineki xikilui keniuj yekmelauj timomachilia”.

Jesús kisentokak kijtoj keniuj kichiuaskej netataujtil: “ToTajtsin akin tiyetok iluikak, maj moueyitali motokay. Maj uiki moTekiuajyo. Maj mochiua motanejnekilis, kemej iluikak, no ijkon nikan taltikpak”. Ompa kiniluij ke monekia kitajtaniskej Dios tein kikuaskej mojmostaj, maj kintapojpolui inintajtakoluan, uan okseki taman tein kinpoloskia.

Uan no, Jesús kijtoj: “Nochipa xikchiua netataujtil. Xiksentoka xiktajtani tein kuali moTajtsin, Jiova. Nochin tetatmej kinekij kinmakaskej ininkoneuan tein kuali. Komo mokonetsin mitstajtania se pantsin, ¿tikmakas se tet? Uan komo mitstajtania se amichij, ¿tikmakas se kouat?”.

Ompa Jesús kiniluij toni kijtosnekia: “Komo tikinmaka mokoneuan tein kuali, ¡okachiok moTajtsin, Jiova, mitsmakas yektikatsin espíritu! Sayoj moneki tiktajtanis”. ¿Tikchiua tein kijtoj Jesús? ¿Toni tiktajtania Jiova keman tikchiua netataujtil?

Tepitsin achto ke mochiuaskia Pascua itech xiuit 32, tatitanilmej mokepkej satepan ke miakkan tanojnotsatoj. Kemej sioujtoyaj, Jesús kinuikak itech se barco hasta Betsaida kampa ueliskiaj moseuiskej. Sayoj ke keman ajsitiyayaj atenoj, Jesús kiitak ke miakej taltikpakneminij ajsikajya ompa. Maski kinekia yetos sayoj iniuan itatitaniluan, kuali kinselij taltikpakneminij. Kinpajtij akin mokokouayaj uan peuak kinmachtia miak taman. Ika kinnojnotsak iTekiuajyo Dios nochi tonal. Tiotakpa, tatitanilmej kiluijkej: “Taltikpakneminij xa mayanajya. Xikinilui maj yakanya uan maj kitemotij tein kikuaskej”.

Sayoj ke Jesús kinnankilij: “Amo moneki yaskej. Namejuan xikintamakakan”. Tatitanilmej kitajtanijkej: “¿Tikneki maj tikinkouilitij pantsin?”. Felipe, semej tatitanilmej, kijtoj: “Maski tikpiaskiaj miak tomin, amo ueliskia tikouaskej pantsin tein kinajsis”.

Jesús kintajtanij: “¿Kanachi pantsin nankipiaj?”. Andrés kinankilij: “Tikpiaj makuil pantsin uan ome amichimej. Sayoj ke amo ajsis”. Jesús kijtoj: “Xinechualkuilikan pantsin uan amichimej”. Satepan kijtoj maj moolochtalianij 50 uan 100 taltikpakneminij. Ompa kikuik pantsin uan amichimej, ajkotachiak uan kichiuak se netataujtil. Satepan kinmakak tatitanilmej maj kixejxelouanij. Nochin 5,000 takamej, uan no siuamej uan konemej, takuajkej hasta ixuikej. Satepan, tatitanilmej kiololojkej tein mokaujka uan ijkon amo teyi moauiloskia. ¡Kisentilijkej 12 chikiujmej! ¿Melauj ke se kimoujkaita nejin ueyi tachiualis?

Nochin semi kimoujkaitakej nejon uan hasta kinekiaj maj Jesús mochiuani inintekiuaj. Sayoj ke Jesús kimatia ke Jiova ayamo kinekia maj mochiua tekiuaj. Yejua ika monauatij iniuan taltikpakneminij uan kiniluij itatitaniluan maj yanij oksekopa itech ueyiat tein poui Galilea. Yejuan yajkej itech barco, uan Jesús pankisak iselti itech se tepet. ¿Keyej? Porin kinekia tajtos iuan iTajtsin. Jesús nochipa kitemouaya kichiuas netataujtil maski kipiaskia miak tekit.

Jesús uelia kinpajtiaya akin mokokouayaj uan kinajokuia akin momikiliayaj. Uan no, uelia kitamatiliaya ejekat uan kiouit. Satepan ke kichiuak netataujtil itech tepet, Jesús pantachiak itech ueyiat tein poui Galilea uan kiitak ke chikauak taejekatoya. Itatitaniluan mochikaujtoyaj kinejnemiltiskej barco. Yejua ika Jesús temok uan peuak nejnemi aixko kinajsiti. Keman tatitanilmej kiitakej ke aksa nejnentoya aixko, motelmoujtijkej. Sayoj ke Jesús kiniluij: “Amo ximouikan, ta nejua”.

Pedro kijtoj: “NoTekotsin, komo tejua, xinechilui maj nimitsajsiti”. Jesús kiluij: “¡Xiuiki!”. Yejua ika Pedro temok uan peuak nejnemi aixko kiajsiti Jesús maski tel chikauak taejekatoya. Sayoj ke keman Pedro kiajsitoyaya Jesús, kiitak chikaujkaejekat, uan mouik. Kimachilij ke peuaya pankalakia uan kitsajtsilij: “¡NoTekotsin, xinechmakixti!”. Jesús kimakitskij uan kiluij: “¿Keyej timouik? ¿Amo titakuaujtamati?”.

Jesús uan Pedro tejkokej itech barco, uan chikaujkaejekat niman motamatilij. ¿Tiknemilia keniuj momachilijkej tatitanilmej? Kijtojkej: “Yekmelauj tiiKonetsin Dios”.

Jesús amo sayoj ijkuak kitsakuilij chikaualis tein kipia itachijchiualis Dios. Okse tonal, keman yejua uan itatitaniluan kipanauijtoyaj ueyiat itech barco, Jesús kochtiyaj takuitapan. Keman kochtoya, peuak chikaujkaejeka. At kiuiuitekia barco, uan peuak akalaki. Tatitanilmej kijxitijkej Jesús uan kiluijkej chikauak: “¡Tamachtijkej, timikitij! ¡Xitechpaleui!”. Jesús meuak uan kiluij ueyiat: “¡Ximotamatili!”. Ejekat uan ueyiat niman motamatilijkej. Ompa Jesús kintajtanij tatitanilmej: “¿Xe amo nantakuaujtamatij?”. Uan yejuan moiluijkej: “¡Hasta ejekat uan ueyiat kitakamatij!”. Tatitanilmej kimatkej ke komo senkis takuaujtamatiaj iuan Jesús, monekia amo teyi kimouiliskej.

Fariseos kitauelitayaj Jesús uan kitemouayaj toni kipantiskej tein ika ueliskia kikitskiskej. Kijtouayaj ke Jesús monekia amo tapajtis itech tonal sábado, porin ijkuak moseuiayaj. Se sábado, Jesús kiitak se takat akin amo tachiaya tajtantoya tomin itech ojti. Nejon takat ipa ijkon yolka. Yejua ika Jesús kiniluij imomachtijkauan: “Xikitakan keniuj ichikaualis Dios kipaleuiti nejin takat”. Ompa kimaneloj ichijchi ika tal uan kichijchiuak sokit. Satepan kitalij tepitsin sokit itech iixtololouan takat uan kiluij: “Xiyouj uan ximoixpajpaka kampa kisentiliaj at tein moajsi Siloam”. Takat moixpajpakato, uan peuak tachia.

Taltikpakneminij kitelmoujkaitakej uan kijtojkej: “Nejin yejua takat akin tajtania tomin, ¿melauj? ¿Oso okse akin ijkon ixtamati?”. Takat kiniluij: “Nejua nejon takat”. Taltikpakneminij kitajtanijkej: “¿Uan keyej ueli titachiaya?”. Keman kintapouij tein kipanoka, kiuikakej ininixpan fariseos.

Takat kintapouij fariseos: “Jesús nechtalilij sokit itech noixtololouan uan nechiluij maj nimoixpajpaka. Nimoixpajpakak uan axkan ueli nitachiaya”. Fariseos kijtojkej: “Komo Jesús tapajtia itech tonal sábado, amo Dios kimakatok chikaualis”. Sayoj ke oksekin kijtouayaj: “Komo amo Dios kimakatok chikaualis, ¿keyej ueli tapajtia?”.

Fariseos kintatitauijkej itatuan takat uan kintajtanijkej: “¿Keyej ueli tachiaya nanmokoneuj?”. Tetatmej mouiaj porin fariseos kijtojkaj ke kikalankixtiskiaj itech inintiopan judíos akin takuaujtamatiskia iuan Jesús. Yejua ika tanankilijkej: “Amo tikmatij. Namejuan xiktajtanikan”. Fariseos kichiuilijkej okachi netajtanilmej, uan yejua kinnankilij: “Namechiluijya nochi tein nikmati. ¿Keyej nankisentokaj nanechtajtaniaj miak tamanok?”. Fariseos kualankej uan kitokakej.

Satepan, Jesús kiitato takat uan kitajtanij: “¿Titakuaujtamati iuan Mesías?”. Takat kinankilij: “Komo nikmatiskia akoni, iuan nitakuaujtamatiskia”. Jesús kiluij: “Nejua niMesías”. ¿Melauj ke Jesús kinextilij kualtakayot nejon takat? Kipajtij uan no kipaleuij maj takuaujtamati.

Jesús kipiaya eyi itasojikniuan akin nemiaj Betania. Motokaytiayaj Lázaro, María uan Marta, akin katkaj iknimej. Se tonal, Jesús yetoya oksekopa itech ueyiat Jordán, uan María uan Marta kitanauatilijkej: “Lázaro motelkokoua. Ika kualtakayot, niman xiuiki”. Sayoj ke Jesús amo niman yajki. Mochiak ome tonal uan satepan kiniluij imomachtijkauan: “Tiyouij Betania. Lázaro kochtok, uan niyouj nikijxititi”. Tatitanilmej kiluijkej: “Komo Lázaro kochtok, pajtis”. Yejua ika Jesús kinyekiluij: “Lázaro momikilij”.

Keman Jesús ajsik Betania, naui tonal achtoya kitalijkaj Lázaro itech tekoyok. Miakej kinyolseuitoj Marta uan María. Marta kimatik ke Jesús ajsik uan ijsiujka kinamikito. Yejua kiluij: “NoTekotsin, komo nikan tiyetoskia, nokniuj amo momikiliskia”. Jesús kinankilij: “Mokniuj oksepa nemis. ¿Tinechneltokilia, Marta?”. Yejua kinankilij: “Nejua nikneltoka ke oksepa nemis keman moajokuiskej mikemej”. Ompa Jesús kiluij: “Nejua nikinajokui mikemej uan nitemaka nemilis”.

Ompa Marta kiluito María: “Jesús nikan yetok”. María ijsiujka kiajsito, uan taltikpakneminij kitojtokakej. Keman kiajsito, María motankuaketsak uan tel chokaya. Yejua kiluij: “NoTekotsin, komo nikan tiyetoskia, nokniuj yoltoskiaok”. Jesús kiitak ke tel tayokoxtoya uan no peuak choka. Keman akin ompa yetoyaj kiitakej ke chokatoya, kijtojkej: “Jesús yekmelauj kiteltasojtaya Lázaro”. Sayoj ke sekin motajtaniayaj: “¿Keyej amo kipaleuij itasojikniuj?”. ¿Toni kichiuaskia Jesús axkan?

Jesús yajki itech tekoyok kampa kitalijkaj Lázaro, tein kitsakkaj ika se ueyi tet. Jesús tanauatij: “Xikijkuanikan tet”. Marta kijtoj: “Xa tsojyakya porin panokya naui tonal”. Maski ijkon, kijkuanijkej tet, uan Jesús kitataujtij Dios: “NoTajtsin, nimitstasojkamatilia porin tinechkaki. Nejua nikmati ke nochipa tinechkaki, sayoj ke nitajtoua chikauak porin nikneki maj nejin taltikpakneminij kineltokakan ke tejua tinechualtitanik”. Ompa chikauak kijtoj: “¡Lázaro, xikisa!”. Niman mochiuak se taman tein kimoujkaitakej: Lázaro kisak, uan tetsiliujtoya ika tilmaj. Jesús kijtoj: “Xiktojtomakan uan xikauakan maj youi”.

Miakej kiitakej tein panok uan takuaujtamatkej iuan Jesús, sayoj ke sekin kintapouitoj fariseos. Itech nejon tonal, fariseos peuak kitemouaj keniuj kinmiktiskej Lázaro uan Jesús. Semej 12 tatitanilmej, Judas Iscariote, ichtaka kintajtanito fariseos: “¿Kanachi nanechtaxtauiskej komo namechpaleuia xikitskikan Jesús?”. Kiluijkej ke kimakaskej 30 platajtomin, uan Judas peuak kitemoua keniuj kinmaktilis Jesús.

Judíos kichiuayaj Pascua nochi xiujmej itech tonal 14 metsti nisán. Ijkon kielnamikiaj ke Jiova kinkixtijka Egipto kampa kinteltekitiltiayaj uan kinuikaka itech Tal tein motenkaujka kinmakas. Itech xiuit 33, Jesús uan itatitaniluan kichiujkej Pascua ajko itech se kali tein moajsia Jerusalén. Keman tamitakuajkej, Jesús kijtoj: “Nansemej nechtemaktiti”. Tatitanilmej kimoujkakakkej uan kitajtanijkej: “¿Akoni?”. Jesús kinnankilij: “Yejua takat akin nikmaka nejin pantsin”. Uan kimakak sentakoton pantsin Judas Iscariote. Ompa, Judas niman moketsak uan yajki.

Satepan Jesús kichiuak se netataujtil, kitapanak se pantsin uan kinxejxelouilij tatitanilmej akin mokaujkej iuan. Kiniluij: “Xikuakan nejin pantsin. Kiixnextia nonakayo, tein namoka niktemakati”. Satepan, kichiuak se netataujtil achto ke kipanoltiskia vino, kinpanoltilij tatitanilmej uan kiniluij: “Xitayikan nejin vino. Kiixnextia noesyo, tein niktemakati maj ika namechtapojpoluikan nanmotajtakoluan. Nimotenkaua ke namejuan nantekiuajtiskej nouan ne iluikak. Xikchiuakan nejin nochi xiujmej uan ika xinechelnamikikan”. Itatojtokakauan Jesús kisentokaj mosentiliaj nochi xiujmej itech nejon tonal keman tapoyaui. Nejon nechikol kitokaytiaj iTakualis toTekotsin.

Satepan ke takuajkej, tatitanilmej peujkej motajtolteuiaj porin kinekiaj kimatiskej akoni katka okachi ueyichiujkej. Sayoj ke Jesús kiniluij: “Akin okachi ueyichiujkej moneki monejnemiltis kemej akin okachi amo ueyichiujkej”.

Jesús no kiniluij: “Namejuan nannotasojikniuan. Yejua ika namechiluia nochi tein noTajtsin kineki maj namechilui. Amo uejkaua nimokepati iluikak, kampa yetok noTajtsin. Sayoj ke namejuan nanmokauatij nikan, uan taltikpakneminij kimatiskej ke nannomomachtijkauan komo nanmotasojtaj. Moneki nanmotasojtaskej kemej nejua namechtasojtak”.

Ompa, Jesús kitataujtij Jiova maj kinyekpiani nochin imomachtijkauan uan maj kinpaleuiani maj sentekitinij uan maj kuali mouikanij. No tajtanik maj itokay Jiova moueyitali. Satepan, Jesús uan itatitaniluan kiueyichiujkej Jiova ika nekuikatilmej uan yajkej. Amo uejkaua yaya kikitskitijya Jesús.

Jesús uan tatitanilmej kipanauijkej atauit Cedrón uan ajsikej itech tepet tein itokay Olivos. Panouayaya tajkoyouan uan metstonatoya. Keman ajsikej xochital tein moajsia Getsemaní, Jesús kiniluij: “Nikan ximokauakan uan xiijsatokan”. Ompa, yajki okachi nepakaok uan motankuaketsak. Semi motekipachojtoya uan kitataujtij Jiova: “Maj mochiua motanejnekilis”. Yejua ika Jiova kititanik se ángel maj kiyolchikauati. Satepan, Jesús mokepak kampa yetoyaj itatitaniluan uan kinajsik kochtokej. Yejua ika kiniluij: “¡Xiijsakan! Axkan amo hora nankochtoskej. Ejkokya hora keman nechtemaktitijya ininmako akin nechtauelitaj”.

Ompa, ajsik Judas iniuan miakej takamej akin kiuikayaj espadas uan koujmej. Kimatia kani kiajsis Jesús porin miakpa iuan yajka ompa uan iniuan tatitanilmej. Judas kiniluijka tateuianij ke yejua kinnextiliskia akoni katka Jesús. Yajki kampa yetoya Jesús uan kiluij: “Tamachtijkej”, uan kipitsoj oso kitennamikik. Jesús kiluij: “Judas, ¿tinechpitsoua uan ijkon tinechtemaktia?”.

Jesús panok taixpan uan kintajtanij takamej: “¿Akoni nankitemouaj?”. Yejuan kiluijkej: “Jesús akin kayot Nazaret”. Yejua kinnankilij: “Nejua nejon takat”. Yejuan tsinkiskej uan uetsitoj talpan. Jesús oksepa kintajtanij: “¿Akoni nankitemouaj?”. Uan yejuan oksepa kinankilijkej: “Jesús akin kayot Nazaret”. Jesús kinnankilij: “Namechiluijya ke nejua. Komo ijkon, xikinkauakan nejin takamej maj yakan”.

Keman Pedro kiitak tein panotoya, kikixtij se espada uan kinakaskotonak Malco, akin katka itakeual akin kinixyekanaya tiopixkamej. Sayoj ke Jesús kinakasmatokak uan kipajtij. Ompa kiluij Pedro: “Xikalaki moespada. Porin komo titateuia ika espada, timikis ika espada”. Tateuianij kikitskijkej Jesús uan kimailpijkej, uan tatitanilmej cholojkej. Satepan, taltikpakneminij kiuikakej Jesús iixpan Anás, se tiopixkat akin ueyichiujkej. Yejua kichiuilij netajtanilmej Jesús uan kititanik ichan Caifás, akin kinixyekanaya tiopixkamej. Sayoj ke ¿toni panok iniuan tatitanilmej?

Keman Jesús yetoyaok iniuan itatitaniluan itech kali kampa kichiujkej Pascua, kiniluij: “Nannochin nanechkaujteuatij nejin youak”. Pedro kiluij: “Nejua amo. Maski oksekin mitskaujteuaskej, nejua amo keman nimitskauas”. Sayoj ke Jesús kinankilij: “Achto ke tsajtsis se pio, expa tikijtos ke amo tinechixmati”.

Keman tateuianij kiuikakej Jesús ichan Caifás, miakej tatitanilmej ipa cholojkajya. Sayoj ke omen kintojtokakej takamej akin kiuikakej Jesús. Semej katka Pedro. Yejua kalakik ikalixpan Caifás uan motokij kampa taxotatoya porin kinekia mototonis. Kemej taxotatoya, se siuat akin ompa tekitia kiixitak Pedro uan kiluij: “¡Nejua nimitsixmattok! ¡Tejua tiyetoya iuan Jesús!”.

Pedro tanankilij: “Amo. Amo melauak. Amo nikmati toni ika titajtojtok”, uan yajki kaltenoj. Ompa okse siuat kiitak uan kiniluij oksekin: “¡Nejin takat nentinemia iuan Jesús!”. Pedro tanankilij: “¡Nion nikmati akoni Jesús!”. Se takat no kijtoj: “Tejua no iniuan tipoui. Mokaki porin titajtoua kemej akin kayomej Galilea, ijkon kemej Jesús”. Sayoj ke Pedro kijtoj: “¡Amo nikixmati!”.

Ijkuak, tsajtsik se pio. Pedro kiitak ke Jesús kiitstoya uan kielnamikik tein kiluijka. Yejua ika kalankisak uan tel chokak.

Keman mochiujtoya nejon, akin pouiaj itech Sanedrín mosentilijkaj ichan Caifás kampa kiixejekoskiaj toni kichiuiliskiaj Jesús. Itech Sanedrín pouiaj taixyekananij itech taneltokalis akin tamelauayaj. Yejuan kiixtalijkajya kimiktiskej uan kitemojtoyaj toni kipantiskej. Sayoj ke amo kiajsiaj toni. Satepan, Caifás kitajtanij Jesús: “¿Tejua tiiKoneuj Dios?”. Jesús kinankilij: “Kemaj”. Ompa Caifás kijtoj: “Amo moneki tikmatiskej okachiok. ¡Kiuijuikaltijtok Dios!”. Tamelauanij no ijkon tanemiliayaj uan kijtojkej: “Nejin takat moneki mikis”. Kikantajtatsinijkej, kichijchakej, kiixtsakkej, kimaakej uan kiluijkej: “¡Komo titanauatijkej, xitechilui akoni mitsmaak!”.

Keman tanesik, kiuikakej Jesús ininixpan akin pouiaj itech Sanedrín uan oksepa kitajtanijkej: “¿Tejua tiiKoneuj Dios?”. Jesús kinnankilij: “Kemaj. Namejuan nankijtojtokej nejon”. Yejua ika kipantijkej ke kiuijuikaltiaya Dios uan kiuikakej ichan tekiuaj romano Poncio Pilato. ¿Toni panok satepan? Maj tikitakan.

Tiopixkamej akin taixyekanayaj kiuikakej Jesús ichan tekiuaj. Ompa Pilato kintajtanij: “¿Toni nankipantiaj nejin takat?”. Yejuan kinankilijkej: “¡Yejua kijtoua ke tekiuaj!”. Pilato kitajtanij Jesús: “¿Tejua tiinintekiuaj judíos?”. Jesús kinankilij: “NoTekiuajyo amo poui nikan taltikpak”.

Satepan Pilato kititanik Jesús kampa Herodes, akin tekiuajtia Galilea, maj kiitani ox yejua kiajsia se taman tein kipantis. Herodes kiitak ke Jesús amo teyi kichiujka uan oksepa kititanik kampa Pilato. Ompa, Pilato kiniluij taltikpakneminij: “Nion Herodes nion nejua tikitaj ke nejin takat kinamiki se kitatsakuiltis. Nikauati maj youi”. Sayoj ke taltikpakneminij tsajtsiaj: “¡Xikmikti! ¡Xikmikti!”. Tateuianij kikuetaxuijkej, kichijchakej uan kimaakej. Kikuatalilijkej se corona tein kichijchiujkej ika uitsti uan kikejkelojkej ijkon: “¡Tanesik, inintekiuaj judíos!”. Pilato oksepa kiniluij taltikpakneminij: “Nejua amo nikita ke nejin takat kichiuak teisa tein amo kuali”. Sayoj ke yejuan tsajtsiaj: “¡Xikoujpampilo!”. Yejua ika Pilato kitemaktij Jesús maj kimiktikan.

Ompa, tateuianij kiuikakej Jesús kampa motatokaytiaya Gólgota. Kisokej itech se kouit uan ompa kikaujkej maj pilkato. Jesús kitataujtij Jiova: “NoTajtsin, xikintapojpolui porin amo kimatij toni kichiujtokej”. Taltikpakneminij kikejkelouayaj ijkon: “¡Komo tiiKoneuj Dios, xitemo uan ximopaleui!”.

Semej tachtekinij akin pilkatoya inakastan Jesús, kiluij: “Xinechelnamiki keman tikselis moTekiuajyo”. Jesús motenkauak iuan: “Nouan tiyetos itech Xochital”. Tiotakpa, tatayouayantiak eyi hora. Seki imomachtijkauan Jesús ijkatoyaj kampa kipilojkaj, teuan María, imomaj Jesús. Yejua kiluij Juan maj kiyekpiani María kemej yeskia yejua imomaj.

Ompa, Jesús kijtoj: “¡Mochiuakya!”. Moixpiloj uan ijyokotonik. Ijkuak, tel chikauak talolinik. Ueyi tilmaj tein kitajkoxelouaya Yektik iuan Okachi Yektik tajkotsayanik. Ompa, se tateuijkej kijtoj: “Nejin takat yekmelauj katka iKonetsin Dios”.

Satepan ke Jesús momikilij, se takat tominpixkej akin motokaytiaya José kitajtanij Pilato maj kikauani maj kitemoui Jesús. José kipijpikik Jesús ika lino tein okachi kuali, kiajuiyalij, uan kitalij itech se tekoyok tein yankuik. Ompa tanauatij maj kitalianij se ueyi tet ikalakyan tekoyok. Tiopixkamej akin taixyekanayaj kiluijkej Pilato: “Techtekipachoua maj imomachtijkauan Jesús kiichtekikan uan maj kijtokan ke oksepa yoltok”. Yejua ika Pilato kiniluij: “Xiyektatsakuakan uan xikintalikan tajpianij”.

Eyi tonal satepan, seki siuamej kualkampa yajkej kampa kitalijkaj Jesús uan kiitakej ke aksa kijkuanijka tet. Taijtik moajsia se ángel, uan yejua kiniluij: “Amo ximouikan. Jesús oksepa yoltok. Xikiniluikan imomachtijkauan maj yakan Galilea uan ompa kiitaskej”.

María Magdalena ijsiujka kintemoto Pedro uan Juan. Kiniluij: “Aksa kiuikak Jesús”. Pedro uan Juan tsikuinteujkej kampa tekoyok. Keman kiitakej ke amo ompa yetoyaok, mokepkej ininchan.

Satepan, María oksepa yajki kampa kitalijkaj Jesús. Taijtik kinitak ome ángeles uan kiniluij: “Amo nikmati kani kiuikakej noTekotsin”. Ompa, kiitak se takat uan kinemilij ke katka takat akin ompa tekitia. Kitajtanij: “Tejuatsin, ika kualtakayot, xinechilui kani tiktalij”. Keman takat kijtoj: “¡María!”, yejua kiitak ke katka Jesús. María kijtoj: “¡Tamachtijkej!”, uan kinauaj. Jesús kiluij: “Xikinilui nokniuan ke tinechitak”. María niman tsikuinteuak uan kintapouito imomachtijkauan Jesús ke kiitaka.

Nejon tiotak, ome imomachtijkauan Jesús kiskej Jerusalén uan yajtoyaj Emaús. Se takat peuak iniuan ojtoka uan kintajtanij toni ika tajtojtoyaj. Yejuan kiluijkej: “¿Amo tikmatik? Youipta, tiopixkamej tanauatijkej maj kimiktikan Jesús. Axkan seki siuamej kijtojtokej ke Jesús yoltok”. Takat kintajtanij: “¿Amo nankineltokaj tein kijkuilojkej tanauatianij? Yejuan kijtojkej ke Cristo mikiskia uan satepan moajokuiskia”. Satepan yejua kisentokak kinmelauilij okachi miak taman tein kijtouaya iTajtol Dios. Keman ajsikej Emaús, yejuan kiluijkej takat maj iniuan mokauani. Nejon youak keman takuajtoyaj, takat kichiuak se netataujtil kampa kitasojkamatik pantsin, uan yejuan kimatkej ke nejon takat katka Jesús. Ompa amo kiitakejok.

Nejin ome imomachtijkauan Jesús ijsiujka mokepkej Jerusalén. Ajsikej itech kali kampa mosentilijkaj tatitanilmej uan kintapouijkej tein panoka. Keman yetoyaj kalijtik, Jesús monextij. Yekinika, tatitanilmej amo ueliaj kineltokayaj ke katka Jesús. Sayoj ke yejua kiniluij: “Xikitakan nomauan, xinechmatokakan. Ijkuiliujtoya ke Cristo moajokuiskia”.

Satepan ke Jesús monextij ininixpan tatitanilmej, Pedro amichkitskito itech ueyiat tein pouia Galilea. Tomás, Santiago, Juan uan okseki imomachtijkauan Jesús iuan yajkej. Nochi youal tatemojtoyaj, sayoj ke amo teyi kiajsikej.

Mostika tel kualkan, kiitakej se takat ijkatoya atenoj. Yejua kinuejkatajtanij: “¿Nankinajsikej amichimej?”. Yejuan kinankilijkej: “Amo”. Takat kiniluij: “Xiktamotakan nanmomatauj nanmoyekmakopa”. Keman kitamotkej, kinkitskijkej tel miak amichimej uan amo ueliajok kipankixtiayaj matat. Ompa, Juan kimatik ke nejon takat katka Jesús uan kijtoj: “¡Yejua toTekotsin!”. Pedro niman moatamotak uan yajki hasta atenoj. Oksekin kitojtokakej itech barco.

Keman ajsikej atenoj, kiitakej ke taxotatoya. Jesús kipiaya pantsin uan kiteuatstoya amichij. Kiniluij maj kiualkuinij seki amichimej tein kinkitskijkaj uan no kinteuatsaskia. Uan ompa kiniluij: “Xialmasalokij”.

Keman tamialmasalojkej, Jesús kitajtanij Pedro: “¿Okachi tinechtasojta ke nejin amichimej?”. Pedro kinankilij: “Kemaj, noTekotsin, tejua tikmati ke nimitstasojta”. Jesús kiluij: “Komo ijkon, xikintamaka noichkauan”. Jesús oksepa kitajtanij: “Pedro, ¿tinechtasojta?”. Pedro kinankilij: “NoTekotsin, tejua tikmati ke nimitstasojta”. Jesús kiluij: “Xikinyekpia noichkatsitsin”. Jesús ika expa kitajtanij nejon. Pedro moteltayokoltij uan kinankilij: “NoTekotsin, tejua tikmati nochi. Tikmati ke nimitstasojta”. Jesús kiluij: “Xikintamaka noichkatsitsin”. Uan ompa kiluij: “Xiksentoka xinechtojtoka”.

Jesús mosentilij iniuan imomachtijkauan ompa Galilea. Kinnauatij se taman tein motelneki: “Xiyakan uan noyampa xikinpaleuikan taltikpakneminij maj no mochiuakan nomomachtijkauan. Xikinmachtikan nochi tein namechmachtij uan xikinauikan”. Satepan motenkauak: “Xikelnamikikan, nejua nochipa niyetos namouan”.

Satepan ke moajokuik, Jesús monextij 40 tonalmej ininixpan miakej imomachtijkauan ompa Galilea uan Jerusalén. Kinmachtij miak taman tein motelneki uan kichiuak miak uejueyi tachiualismej. Satepan, mosentilij iniuan itatitaniluan itech tepet tein itokay Olivos. Jesús kiniluij: “Ximokauakan Jerusalén. Xiksentokakan xikchiakan tein noTajtsin motenkauak”.

Itatitaniluan amo kiajsikamatkej tein kijtosnekik Jesús, yejua ika kitajtanijkej: “¿Timochiuatiya titekiuaj itech xolal Israel?”. Jesús kinnankilij: “Jiova ayamo kiixtalia maj nipeua nitekiuajti. Sayoj ke amo uejkaua nankiseliskej yektikatsin espíritu tein namechpaleuis xikpiakan chikaualis, uan nanyeskij nannotaixpantijkauan. Yejua ika xitanojnotsatij Jerusalén, Judea, Samaria uan hasta kampa okachi uejka”.

Ompa, Jesús pankisak iluikak, uan se mixti kiixtsakuak. Imomachtijkauan ajkotachixtoyaj, sayoj ke amo kiitakejok.

Imomachtijkauan temokej itech tepet uan mokepkej Jerusalén. Ajko itech se kali mosentiliayaj uan kitataujtiayaj Dios. Kichiayaj maj Jesús kinmatiltiani okachi taman tein kichiuaskiaj.