Nochipa keman tejuatsin tionuelis xikonteixmatilti iTekiuajyo Dios
1. ¿Toni techmachtia tein kichiuak David?
1 Tekiuaj David amo kikauak maj tein kipanotoya kitsakuili kitekitilis Jiova. Kemej neskayot, kinekia kichijchiuas se kali kampa kiueyichiuaskiaj Jiova, sayoj ke yejuatsin amo kikauak maj kichijchiua. Yejua ika, kipatak tein kiixtalijtoya uan kichiuak tein monekia, ijkon ikonetsin Salomón ueliskia kichijchiuas nejon kali (1 Rey. 8:17-19; 1 Crón. 29:3-9). David amo motayokoltij ika tein amo uelik kichiuak, ta okachi kiitak tein kemaj uelia kichiuaya. ¿Keniuj uelis no ijkon tikchiuaskej keman tiktemoskej tikteixmatiltiskej iTekiuajyo Dios?
2. ¿Toni techpaleuis maj tikitakan ox uelis okachi titekitiskej?
2 Xikonchiua tein tionuelis. Miakej tokniuan kipatanij seki taman uan ijkon uelis kichiuaskej tekit kemej precursor auxiliar oso regular (Mat. 6:22). ¿Uelis no ijkon tikonchiuas? Xikontataujti Jiova uan xikonyekita tein tikonpanotok; xa tikonajsis ke “monextijtok miak tekit”. Komo ijkon, xikonchiua nochi tein tionuelis (1 Cor. 16:8, 9).
3. Maski tein tikpanotoskej amo techtakauilia maj tikchiuakan tekit kemej precursor, ¿toni techpaleuis maj okachi titanojnotsakan?
3 ¿Uan komo tein tikpanotokej amo techtakauilia maj tikchiuakan tekit kemej precursor? Maj tiknemilikan tein kemaj uelis tikchiuaskej. Kemej neskayot, komo kampa titekitij titajtouaj iniuan akin amo taneltokaj, ¿uelis tikinnojnotsaskej ika iTajtol Dios keman tikitaskej ke uelis? Oso, komo tionmokokoua, ¿uelis tiontajtos ika kuali tanauatilmej iniuan tapajtianij uan iniuan akin ompa tekitij? Xikonelnamiki ke akin amo uelij kisaj tanojnotsatij porin xiuejkejya oso porin semi mokokouaj, uelis kitemakaskej 15 minutos tein tanojnotsaj oso okachi. Keman tamis metsti, amo xikonelkaua tikonijkuilos tein tiontanojnotsak kampa yeski tionmoajsia, ijkon kemej amaixmej tein tikontemakak hasta sejse tratado oso amat tein ika tikinyoleuaj ijkuak moelnamiki imikilis Cristo oso keman tikpiaj ueyi nechikol tein uejkaua eyi tonal. Komo nochi tikonsentilia tein tikonchiuak xa tikonmoujkaitas.
4. ¿Toni tikixtalijkejya tikchiuaskej?
4 Tein yeski tein tikpanotoskej, maj tikteixmatiltikan kuali tanauatilmej nochipa keman tiueliskej. Ijkon tiyolpakiskej porin tikchiuaj nochi tein tiuelij maj moteixmatilti iTekiuajyo Dios (Mar. 14:8; Luc. 21:2-4).