9. Ijkon kemej kijtoua Éxodo 12:6, ¿kemanian monekia kimiktiskej ichkat itech Pascua? (No xikonita recuadro “¿Toni hora itech tonal?”.)

⁹ Biblia de Ferrara, se uejkauj tajkuilol judío, kinextia itech Éxodo 12:6 ke ichkat monekia kimiktiskej “itech tiotakmej”. No ijkon kinextiaj okseki Biblias tein kikepaj tajtolmej “itech ome tiotak”. Biblia tein kitajtolkepak tamachtijkej Marcos Edery kikui tajtol “tapoyaujtenoj”. Okseki Biblias kikuij tajtolmej kemej “keman peua tayoua”, “keman pankalaki tonaltsin” uan “keman tayoua”. Kemej tikitaj, ichkat monekia kimiktiskej satepan ke motatiaya Tonaltsin sayoj ke ijkuak tanestoyaok, keman peuaya tonal 14 metsti nisán.

10. ¿Kemanian kinemiliayaj seki judíos ke kimiktiayaj ichkat itech Pascua, sayoj ke toni netajtanil mochiua?

¹⁰ Miak xiujmej satepan, seki judíos kinemilijkej ke xa miak horas kinuikiliaya kinmiktiskej nochin ichkamej tein monekia kiuikaskej templo. Yejua ika kinemiliayaj ke tein kijtoua Éxodo 12:6 kijtosnekia itamian tonal 14 metsti nisán, keman Tonaltsin peuaya pantemouaya (satepan ke panouaya tajkotonal) uan itamian tonal (keman pankalakia Tonaltsin). Komo yekmelauj kijtosneki nejon, ¿kemanian mochiuaya Pascua? Tamachtijkej Jonathan Klawans, akin kitelixmati inintaneltokalis judíos akin nenkej ne uejkauj kinextia: “Yankuik tonal peua keman pankalaki Tonaltsin. Yejua ika, maski tapial kimiktiaj itech tonal 14, tein melauj Pascua uan takualis peua itech tonal 15. Sayoj ke nejin fechas amo senkis moyeknextia itech amaix Éxodo”. No kiyekijtoj: “Amaixmej tein kikixtijkej tamachtianij itech nejon tonalmej [...] nion kinemilijkej ika tajtoskej keniuj mochiuaya Seder [takualis itech Pascua] achto ke ixpoliuiskia Templo” itech xiuit 70 itech totonaluan (tejuan tiktalilijkej cursivas).