19. ¿Toni kinemiliaya kichiuas Hamán, uan keniuj kitanejnektij tekiuaj?

¹⁹ Kemej Mardoqueo amo kinekia moixpilos iixpan Hamán, yejua tel kualanik uan kinemilij kitemos keniuj kimiktis yejua uan nochin akin pouiaj itech ixolal Mardoqueo. Yekinika yajki kiitato tekiuaj Asuero uan amo kuali ininka tajtoj judíos, sayoj ke amo kintokaytij. Kijtoj ke katka se xolal tein amo teyi chiujkej, “moyaujtok uan xeliujtok itech xolalmej”, uan no kijtoj ke nejon xolal katka taixnamikkej uan semi tamouilil porin ompa amo kitakamatiaj itanauatiluan tekiuaj. Satepan, kijtoj ke kitemakaskia tel miak tomin kampa moajsia itomin tekiuaj uan ijkon kiixtauaskia tein monekiskia keman kinixpoloskiaj.d ¿Toni kichiuak tekiuaj? Kimaktilij ianillo tein ika kiixtaliaya tanauatilmej uan ijkon ueliskia kiixtalis itokaykopa nejon tanauatil uan tein yeski tanauatil tein monekiskia (Est. 3:5-10).