15. ¿Keyej moijtoua ke Jesús “se tayekankatakilot”?

¹⁵ Jesús moajokuik uan yajki iluikak kemej se ángel. Yejua yekinika kiselij nejin taman neajokuilis uan tein okachi moneki (Hech. 26:23). Sayoj ke, amo sayoj Jesús ijkon moajokuiskia. Yejua motenkauak iniuan itatitaniluan ke yaskiaj iluikak uan iuan tekiuajtiskiaj (Luc. 22:28-30). Sayoj ke yejuan kiseliskiaj nejin netetayokolil satepan ke momikiliskiaj. Ompa, ijkon kemej Jesús, moajokuiskiaj uan nemiskiaj kemej ángeles. Pablo kimelauak se taman kemej nejon. Yejua kijtoj ke amo sayoj Jesús moajokuiskia, ta oksekin no moajokuiskiaj uan yaskiaj iluikak. Kijtoj: “Nochi nijin mochiuak ika kuali nejmach. Porin achto Cristo pankisak yoltok, keme yeskia se tayekankatakilot”, uan satepan akin pouij iuan Cristo “tech ne tonal kuak moualuikas” (tejuan tiktalilijkej cursivas; 1 Cor. 15:23).

16. ¿Toni tepitsin techmatiltia Biblia ika tonal keman moajokuiskiaj akin yaskej iluikak?

¹⁶ Nejin tajtolmej tepitsin techmatiltiaj kemanian moajokuiskej akin yaskej iluikak: itech iyetolis Cristo. Uejkaujya, itaixpantijkauan Jiova kinextianij ika Biblia ke iyetolis Jesús peuak itech xiuit 1914. Tinemijok itech iyetolis uan amo uejkaua ixpoliuis tein amo kuali.

17, 18. ¿Toni kinpanos seki taixpejpenalmej itech iyetolis Cristo?

¹⁷ Biblia okachi kimelaua keniuj moajokuiskej akin yaskej iluikak. Kijtoua: “Tiknekij xikmatikan toni mochiuas ika nekes taneltokani ten kochtokke tech in mikilis [...]. Uan tejuan tikneltokaj ke Jesús momikilijka ya uan oksepa pankisak yoltok [...]. Uan no ijkon tikneltokaj ke Dios kinualkuis iuan Jesús nekes taneltokani ten kochtokke tech in mikilis”. Ompa kijtoua: “Ten timokauaj ok nikan taltikpak hasta kuak moualuikas Totekotsin, tejuan amo tikinyekanatiue uan amo no tiyaske ne eluiyaktsinko achtopa uan ke ne taneltokani ten kochtokke tech in mikilis ya. Ta, kuak Totekotsin moualuikas de ne eluiyaktsinko, ijkuakon Yejuatsin tachikaukanauatis” (tejuan tiktalilijkej cursivas). Satepan kimelaua: “Ten takuautamatke iuan Cristo uan momikilijke ya, yejuan nojonkes Dios achtopa kinpankixtis yoltokke [...]. De ompa tejuan ten tiyoltinemij ok uan timokauaj ok, ijkuakon techsenolochajokuiske uan techuikaske ne ejekaixko kampa tiknamikiske Totekotsin. Uan ijkon nachipa tisenyetotiue iuan” (1 Tes. 4:13-17).

¹⁸ Ininneajokuilis akin yaskej iluikak mochiuaskia tepitsin satepan ke peuaskia iyetolis Cristo. Taixpejpenalmej akin yetoskejok nikan taltikpak keman mochiuas okachi ueyi tajyouilis ‘kinuikaskej ejekaixko’. Biblia kijtoua ke akin kinuikaskej amo momikiliskej, tein kijtosneki ke amo uejkauak moajsiskej mikemej, ta kijtoua: “Dios techtakayojpatas ika ne ijsiukayot ijkon keme kuak se tetsilijkopi [...,] kuak mokakis ne ten sayo tapitsalis den trompeta” (1 Cor. 15:51, 52; Mat. 24:31).

20. ¿Keyej uelis titakuaujtamatiskej ke ixyetos keniuj mochiuas neajokuilis?

²⁰ Biblia kijtoua ke akin yaskej iluikak ixyetok keniuj moajoktiyaskej (1 Cor. 15:23). Yejua ika, uelis titakuaujtamatiskej ke neajokuilis nikan taltikpak no ixyetos keniuj mochiujtiyas. Nejin uelis kichiuas maj timotajtanikan: “¿Kemanian moajokuiskej akin momikilijkej itech totonaluan? ¿Yeski tepitsin satepan ke peuas iTekiuajyo Cristo tein uejkauas Mil xiuit, uan ijkon uelis kinseliskej ininchankauan uan inintasojikniuan? ¿Uan takamej akin nenkej ne uejkauj akin nochipa kitakamatkej Dios uan kuali taixyekankej? ¿Pouiskej iniuan akin yekinika moajokuiskej uan ijkon uelis tapaleuiskej maj moixtali keniuj tekitiskej itekitikauan Dios? ¿Uan akin amo kitekitilijkej Jiova? ¿Kemanian uan kani moajokuiskej?”. Onkak miak taman tein uelis timotajtaniskej, sayoj ke axkan amo moneki ika timotekipachoskej. Okachi kuali maj timochiakan uan maj tikitakan. Yekmelauj techyolpaktis tikitaskej keniuj Jiova kichiuas nochi nejon.