¿Keniuj nechita Jiova?
1. ¿Keyej tikijtouaj ke Biblia tamati kemej se teskat?
1 ¿Kanachpa tionmoixita itech teskat? Miakej tikchiuaj mojmostaj, porin nejon techpaleuia maj tikitakan toni moneki tikyektaliskej. Biblia moneskayotia kemej se teskat. Keman tikixtajtoltiaj techpaleuia maj tikitakan tein tikpiaj itech toyolo, kampa Jiova kiita keniuj titamatij (1 Sam. 16:7; Sant. 1:22-24). ITajtol Dios ueli “techtaminextilia kox kuali oso amo kuali nochi ten tiknemilijtinemij uan nochi ten tikyoluelitaj tikchiuaske” (Heb. 4:12). Tikixtajtoltiskej Biblia mojmostaj uan itech titanemiliskej uelis techpaleuis maj tikitakan toni uelis tikchiuaskej uan ijkon okachi kuali titanojnotsaskej. ¿Keyej tikijtouaj nejon? (Sal. 1:1-3.)
2. ¿Keniuj uelis techpaleuis Biblia maj tikitakan keniuj titamatij?
2 Xikonkui Biblia kemej se teskat. Tajkuilolmej itech Biblia tein techtapouiaj keniuj monejnemiltijkej itekitikauan Jiova akin amo kikaujkej techpaleuiaj maj tikmatikan toni kualneskayomej kiyolpaktia yejuatsin. Kemej neskayot, tekiuaj David kinextij ke senkis kitasojtaya itokay Dios (1 Sam. 17:45, 46). Tanauatijkej Isaías ika yolchikaualis kijtoj ke tanojnotsaskia kampa amo kinekiaj kikakiskej itanauatil Dios (Is. 6:8, 9). Netasojtalis tein Jesús kipialia iPopaj kichiuak maj kiita tanojnotsalis kemej se taman tein kiyolchikauaya, tein kiyolpaktiaya, uan amo kemej se tamamal (Juan 4:34). Itech yekinika siglo, itatojtokakauan Cristo tanojnotskej ika miak pakilis, takuaujtamatkej iuan Jiova uan kiixtalijkej amo mosenkauaskej (Hech. 5:41, 42; 2 Cor. 4:1; 2 Tim. 4:17). Titanemiliskej itech nejon neskayomej techpaleuia maj tikitakan toni uelis tikyektaliskej uan ijkon okachi kuali tikchiuaskej itekiyo Dios.
3. ¿Keyej niman moneki tikpataskej tein moneki?
3 Xikonyektali tein moneki. Tein melauj, amo teyi tapaleuis komo timoixitaj itech se teskat uan amo tikyektaliaj tein tikitaj ke moneki. Uelis tiktajtaniskej Jiova maj techpaleui maj tikyekitakan toni techpoloua tikchiuaskej uan maj tikpatakan tein monekis (Sal. 139:23, 24; Luc. 11:13). Kemej amo miak tonalmej mokauaok uan miakej uelis momakixtiskej, moneki timoijsiuiliskej (1 Cor. 7:29; 1 Tim. 4:16).
4. ¿Toni panoua iuan aksa akin moixita ika nejmachkayot itech iTajtol Dios uan kiyektalia tein moneki?
4 Toyolo tein kinextia kemej titamatij, tein Jiova kiita, okachi moneki ke tein moita tapani (1 Ped. 3:3, 4). ¿Toni panoua iuan aksa akin moixita ika nejmachkayot itech iTajtol Dios uan niman kiyektalia tein kiita ke amo kuali yetok? Amo mochiua kemej “se akin takaki uan talkaua, ta se akin kichiua tekit, [uan] yolpakis keman kichiuas” (Sant. 1:25, TNM). Kemaj, okachi tiyolpakiskej uan okachi kuali tikchiuaskej itekiyo Dios porin tikueyipanchiuaj Jiova keman “tiknejneuiliaj keme se teskat ten tanaltontia ika ne chikaukakualtsiyot” (2 Cor. 3:18).