Isobrino Pablo katka yolchikauak

Nimitstapouiti tein kichiuak se telpoch akin kimakixtij tatitanil Pablo. Amo tikmatij keniuj monotsaya, sayoj ke kemaj tikmatij ke katka isobrino Pablo. Katka se telpoch semi yolchikauak. ¿Tikneki maj nimitstapoui tein kichiuak?...

Pablo tsaktoya Jerusalén. Kitsakkaj porin kiteixmatiltiaya Jesús. Sayoj ke moajsiaj seki takamej akin amo yolkualmej akin kitauelitayaj Pablo. Yejuan kiixejekojkej kichiuaskej se taman tein tel amo kuali. Kinekiaj yaskej uan kiluiskej akin kinixyekanaya tateuianij: “Xikinnauati motateuijkauan maj kiuikakan Pablo iuan tekiuaj”. Kiixejekojkej motatiskej itech ojti uan keman Pablo panoskia ompakauin, ¡kimiktiskiaj!

Isobrino Pablo kimatik tein yayaj kichiuilitij. ¿Toni kichiuaskia? Yajki kampa tsaktoya Pablo uan kiluij tein kiixtaliayaj kichiuiliskej. Ompa, Pablo kiluij: “Xikiluiti niman akin kinixyekana tateuianij tein kiixtaliaj kichiuaskej nejon takamej”. Nejon semi ouij katka, porin akin kinixyekanaya tateuianij katka ueyichiujkej. ¿Yaskia isobrino Pablo iuan tajtotiuj?... Kemaj, yejua katka yolchikauak uan nochi kitapouito.

Akin kinixyekanaya tateuianij kikakik ika miak nejmachkayot. Kemej kinekia kipaleuis Pablo, kititanik itech okse altepet tein itokay Cesarea. Uan no, kinnauatij ajsitoyaya 500 tateuianij maj iuan yakan Pablo. Kiniluij: “Xikuikakan nejin youak”. ¿Momakixtij Pablo, oso kimiktijkej? ¿Toni tiknemilia?... ¡Kemaj, momakixtij! Nejon takamej akin amo yolkualmej amo uelkej kiteuijkej.

¿Tikuelitak nejin tamachtilis?... ¿Tikitak keniuj isobrino Pablo kinextij ke katka yolchikauak? ¡Tejua no uelis tiknextis ke tiyolchikauak ijkon kemej yejua! Moneki tiknextiskej ke tiyolchikaujkej keman tikteixmatiltiaj Jiova. ¿Tiknextis ke tiyolchikauak uan tiksentokas tikteixmatiltis Jiova?... Semi moneki ika titajtoskej Dios. Ijkon miakej uelis momakixtiskej.