Tein mokui keman tikitaj Tein timomachtiaj itech nechikol Tonemilis uan toTanojnotsalis
6-12 METSTI MAYO
TAMACHTILIS TEIN KIPIA BIBLIA | 2 CORINTIOS 4-6
“Amo timosenkauaj”
w04 15/8 pág. 25 § 16, 17
Maski tisiouij, amo timosenkauaj
16 Melauak ke motelneki timochikauaskej nochipa tiktekitiliskej Jiova. Komo kuali timouikaj iuan, xa tisiouiskej komo tikchiuaj seki taman, sayoj ke amo keman tisiouiskej tikueyichiuaskej. Yejuatsin “kimaka chikaualis akin sioujtok uan ajsitok chikaualis akin amo chikauak” (Isaías 40:28, 29). Tatitanil Pablo kimatia ke nejin tajtolmej katkaj melaujkej porin kipanok seki taman. Yejua kijtoj: “Tejuan amo keman timoyolkejkepaj tech totekiu. Uan maski totakayo kuetautiu mosta mosta, pero tech totalnamikilis Dios kachi ok techchikaualismakatiu mosta mosta” (2 Corintios 4:16).
17 Tajtolmej “mosta mosta”, kijtosneki ke mojmostaj moneki tikseliskej tein Jiova techmaka. Se tokniuj siuat akin tekititoya cuarenta y tres xiujmej kemej misionera miakpa siouia uan yolkuetauia. Sayoj ke amo mosenkauak. Yejua kijtoua: “Nochipa nimeua kualkan uan niktataujtia Jiova uan nikixtajtoltia iTajtol achto ke nikchiuas okseki taman. Nejon nechpaleuiani maj nitaxiko hasta axkan”. Jiova nochipa techpaleuis komo mojmostaj tiktataujtiaj uan itech titanemiliaj ikualneskayouan uan tein motenkaua kichiuas.
it-1 pág. 70
Taxikolis
No motelneki nochipa itech titanemiliskej keman tinemiskej nochipaya uan amo tikpiaskejok tajtakol. Maski techmiktiskej akin techtauelitaj, amo akin uelis techkuilis nejon tein tikchiaj (Ro 5:4, 5; 1Te 1:3; Ap 2:10). Uan maski axkan semi titajyouiskej, semi kualtsin yeski keman mochiuas tein tikchiaj (Ro 8:18-25). Keman itech titanemiliaj ijkuak tinemiskej nochipaya, tikitaskej ke tein yeski tein tikijyouiskej axkan “niman panotikisas” (2Co 4:16-18). Komo tikelnamikij ke tajyouilis amo uejkauas uan tikelnamikij tein tikchiaj tikseliskej, techpaleuis maj amo tiyolijsiuikan uan maj amo tikauakan Jiova.
Maj tiktemokan tamachtilis ika nejmachkayot
w12 1/2 pág. 28
“Xikyolpaktikan Jiova”
David Splane, akin poui iniuan Oloch Taojtokaltianij, kitemakak nejin tanojnots (2 Corintios 4:7). ¿Toni tein kitelpia ipatiuj ika tajtojtoya? ¿Ika tajtojtoya taixmatilis oso tamatilis? Yejua kijtoj ke amo. Uan no kijtoj: “Keman tatitanil Pablo ika tajtoj teisa tein kitelpia ipatiuj kijtosnekia keman tikteixmatiltiaj tein melauak” (2 Corintios 4:1, 2, 5). Tokniuj Splane kiniluij momachtianij ke kinmachtijkaj makuil metsti porin yayaj kichiuatij se tekit tein motelneki uan ke monekia kitelpatiuitaskej.
Yejua no kijtoj ke “totakayo” kemej yeskia “se sokikomit”. Satepan kijtoj ke tapalkamej tein chijchiujtokej ika oro amo semi kintekitiltiaj uan tapalkamej tein chijchiujtokej ika sokit mojmostaj kintekitiltiaj. Komo tiktaliskiaj teisa itech se tapalkat tein chijchiujtok ika oro, xa okachi tikpatiouitaskiaj tapalkat ke tein kipia. Yejua ika, tokniuj Splane kiniluij momachtianij: “Amo xikchiuakan maj namechueyitalikan. Akin tekitij kemej misioneros moneki kichiuaskej maj taltikpakneminij kiueyitalikan Jiova. Moneki yeskij yolyemankej kemej se sokikomit”.
w09 15/11 pág. 21 § 7
Maj okachi tikintasojtakan tokniuan
7 ¿Uan tejuan? ¿Keniuj uelis okachi tikintasojtaskej tokniuan? Xa okachi kuali timomachiliaj keman tiyetokej iniuan touampoyuan oso akin kayomej kampa tejuan tikayomej uan xa okachi tiyetokej iniuan akin kiuelitaj tein tejuan tikuelitaj. Sayoj ke komo nejon kichiua maj amo semi tiyetokan iniuan oksekin, moneki timochikauaskej timouikaskej iniuan. Xionmotajtani: “¿Nochipa nitanojnotsa iniuan akin okachi nimouika? ¿Ouij nechkisa nimoixpetanis iniuan okseki tokniuan? ¿Amo semi nikinnojnotsa akin peua touan monechikouaj porin niknemilia ke satepan xa uelis nouan mouikaskej? ¿Nikintajpaloua nochi tokniuan itech nechikol yeskij telpochmej oso xiuejkejya?”.
13-19 METSTI MAYO
TAMACHTILIS TEIN KIPIA BIBLIA | 2 CORINTIOS 7-10
“Tiktekitiliaj Dios keman tikinpaleuiaj oksekin”
¿Tiktayekanaltiskej iTekiuajyo Dios maski monekis tikauaskej seki taman?
Ompa África, itech se altepet kampa semi tatasojti, seki tokniuan kixelouaj sentayoual tal kampa tatokaj uan kiixtaliaj kinamakaskej tatok uan kitemakaskej tomin tein ika mochiuas itekiyo Dios. Ompa no motelnekia maj mochijchiua se yankuik kalnechikol. Tokniuan kinekiaj tapaleuiskej, sayoj ke moixtalij motekitis keman monekia tatokaskej. ¿Kintsakuilij nejon? Amo. Tonayan tapaleuiayaj kampa mochijchiujtoya kali uan youak tekitiaj inintalpan. ¡Semi kiuelitayaj tapaleuiskej! Nejin techelnamiktia tokniuan itech yekinika siglo akin nemiaj Macedonia. “Maski semi pobres” katkaj, kitataujtijkej Pablo maj kinkauani maj no kinpaleuianij oksekin tokniuan akin kipanotoyaj tatasojtilis (2 Cor. 8:1-4.) No ijkon axkan, maj tisejsemej titemakakan “ijkon kemej [tikselianij] itatiochiualis Jiova” (xikonixtajtolti Deuteronomio 16:17).
kr pág. 209 § 1
Tiktekitiliaj Dios keman tikinpaleuiaj oksekin
KEMEJ itech xiuit 46, semi amo onkak takual ompa Judea. Imomachtijkauan Cristo akin ompa nemij amo ueli kiixtauaj tepitsin takual tein onkak porin semi patiyoj. Yejua ika uelis momikiliskej. Sayoj ke, nejin itekitikauan Jiova kiitatij keniuj yejuatsin kinpaleuis kemej amo achto ijkon kichiujtoya iuan se itatojtokakauj Cristo. ¿Toni panos?
kr pág. 209, 210 § 4-6
Tiktekitiliaj Dios keman tikinpaleuiaj oksekin
4 Itech ojpatika amat tein Pablo kintitanilij tokniuan akin nemiaj Corinto, ika tajtoj tekit tein monekia kichiuaskej itatojtokakauan Cristo. Maski yejua kintajkuilouilij tokniuan taixpejpenalmej, tein kijkuiloj no moneki kichiuaskej axkan akin pouij iniuan ‘okseki ichkamej’ (Juan 10:16). Tatitanil kijtoj ke tinochin tikpiaj ome taman tekit. Yekinika, ‘tikinilijtinemij in taltikpakuanij ke Totajtsin Dios moyoltalij ya touan’, oso titanojnotsaj uan titamachtiaj (2 Cor. 5:18-20; 1 Tim. 2:3-6). Uan ojpatika, ‘tikinpaleuiaj in oksekin tokniuan’ (2 Cor. 8:4). Tajtolmej ‘tikinilijtinemij’ uan ‘tikinpaleuiaj’ ualeuaj itech tajtol griego diakonía, tein kijtosneki tekit. ¿Keyej motelneki tikmatiskej nejon?
5 Keman Pablo kikuik nejon tajtol griego keman ika tajtoj nejon ome taman tekit, kijtoj ke tokniuan itech nechikol monekia kinpaleuiskej oksekin. Achto kijtojka ke “ongakke miak tataman de keniu timotekitilitiske. Pero sayo Totekotsin [...] techtekimajmaktia. Uan no ongakke miak tataman de keniu tekititinemis in [y]ektikatsin [e]spíritu” (1 Cor. 12:4-6, 11). Yejua ika, Pablo kijtoj ke keman tikchiuaj tataman tekimej itech nechikol ‘tikmouistilijtiyouij Dios’ (Rom. 12:1, 6-8). ¡Yejua ika mochikauaya kinpaleuis “ne taneltokani”! (Rom. 15:25, 26.)
6 Pablo kinekia kinajsikamatiltis tokniuan akin nemiaj Corinto ke keman kinpaleuiayaj oksekin, kichiuayaj tekit tein Jiova kinmakaka uan kiueyichiuayaj. Yejua ika, kijtoj ke akin kichiuaj kemej Cristo tapaleuiaj keman mochiua se tetsauit porin ijkon ‘ixnesitiuj ke yejuan kitakamattinemij in Tajtoltsin de Dios tein kiualkui ne nemakixtilis’ (2 Cor. 9:13). Kemej kinekij kichiuaskej tein Cristo tamachtij, kinpaleuiaj okseki tokniuan. Ijkon, Pablo kiteajsikamatiltij ke keman akin kichiuaj kemej Cristo kinpaleuiaj okseki tokniuan kinextiaj ke “Totajtsin Dios semi kinueyiyoliknelij” (2 Cor. 9:14; 1 Ped. 4:10). Yejua ika, keman itech amaix La Atalaya 1 de junio de 1976 moijtoj ke moneki tikinpaleuiskej tokniuan akin tajyouijtokej, no moijtoj: “Amo keman moneki tikelkauaskej ke Jiova uan iKonetsin, Jesucristo, kiitaj ke motelneki nejin tekit”. Kemaj, keman tikinpaleuiaj oksekin no ika tikueyichiuaj Dios (Rom. 12:1, 7; 2 Cor. 8:7; Heb. 13:16).
kr pág. 196 § 10
Keniuj moixtaua tekit tein poui itech iTekiuajyo Dios
10 Yekinika, titapaleuiaj ika nochi toyolo porin tiktasojtaj Jiova uan tiknekij tikchiuaskej “nochi ten Yejuatsin kimonekiltia” (1 Juan 3:22). Jiova semi kiyolpaktia kiitas ke itekitikauan tapaleuiaj ika nochi ininyolo. Tatitanil Pablo kijtoj ke monekia ijkon tikchiuaskej (xikonixtajtolti 2 Corintios 9:7). Akin yekmelauj kichiua kemej Cristo amo tapaleuia porin kichikaujkauiaj, ta “kitemaka itapaleuilis ijkon keme yejua kinemilij ya”. Nejin kijtosneki ke kiita toni moneki, kinemilia keniuj tapaleuis uan tapaleuia. Jiova kiyolpaktia akin ijkon kichiua, porin “Totajtsin Dios kitasojta se tagat ten kitemaka itapaleuilis ika yolpakilis”, oso itech okse Biblia kijtoua: “Dios kitasojkamatilia akin kitemaka ika yolpakilis”.
Maj tiktemokan tamachtilis ika nejmachkayot
¿Tiktasojkamatij tein Dios toka kichiuak?
2 Pablo kimatia ke imikilis Jesús techpaleuia maj tikyekmatikan ke yekmelauj mochiuas nochi tein Dios motenkaujtok (xikonixtajtolti 2 Corintios 1:20). Nejin kijtosneki ke itech netetayokolil tein Dios techmakak moajsi inemilis Jesús tein kitemakak uan no ompa poui netasojtalis uan nochi tein kuali tein Dios techmaka. Nejin se tel ueyi netetayokolil, yejua ika amo ueli tikmelauaj ika totajtoluan. ¿Keniuj moneki timomachiliskej ika nejin netetayokolil tein kitelpia ipatiuj? ¿Uan toni moneki tikchiuaskej axkan ke ajsiti tonal keman tikelnamikiskej imikilis Cristo? Itech nejin xiuit yeski itech tonal miércoles 23 metsti marzo.
g99 8/7 pág. 20, 21
¿Kuali yetok maj se moueyineki?
Itech Escrituras Griegas Cristianas, tajtol kau·kjá·o·mai, mokepa kemej “se moueyichiuas oso se yolpakis”. Nejin tajtol mokui keman ika motajtoua tein kuali uan tein amo kuali. Kemej neskayot, Pablo kijtoua ke “semi timoyoluelitstinemij uan tikyolikachixtiyoue de ke se tonal tipouitiue ne kampa ichikaukauelilispan de Dios kampa tiksepanpixtinemiske ikualtsiyo”. Uan no kijtoua: “Komo aksa kineki mouelitstinemis, ijkuakon ma mouelitstinemi sayo porin Totekotsin kiyoliknelia” (Romanos 5:2; 2 Corintios 10:17). Nejin kijtosneki ke titelyolpakij porin Jiova yejua toDios uan porin melauak.
20-26 METSTI MAYO
TAMACHTILIS TEIN KIPIA BIBLIA | 2 CORINTIOS 11-13
“Pablo kipiaya ‘se uitsti’ itech inakayo”
w08 15/6 pág. 3 § 3
Tichikaujkej maski titajyouiaj
Tatitanil Pablo katka okse itekitikauj Dios akin nemik ne uejkauj. Yejua expa kitajtanij Jiova maj kijkuaniliani se kuejmol tein kemej yeskia kipiaskia “se uitsti” itech inakayo tein kitajyouiltiaya. Amo tikmatij toni kuejmol kipiaya. Sayoj ke, ijkon kemej se uitsti tetajyouiltia, nejon kuejmol ueliskia kichiuas maj amo yolpakini kitekitilis Dios. Jiova kinankilij: “Kuali ajsis ya noteiknelilis para nimitspaleuis. Porin moueyinextia nochikaualis kuak in tagat kiyolmachilia yolkuetauilis”. Uan ika por ne Tajtoltsin de Yejuatsin nimoyolpaktijtnemi san kuak nikyolmachilia ne kuetauilis para ijkon kachi ok motenextijtiu nopan ichikaualis de Cristo”. Maski yejuatsin amo kijkuanilij nejon kuejmol tein kemej yeskia se uitsti, Pablo monekik kixikos. Yejua kijtoj: “Kuak kachi nikyolmachilia in kuetauilis, ijkuakon kachi ok Dios nechmachililtia ichikaualitsin” (2 Cor. 12:7-10). ¿Toni kijtosnekia?
w06 15/12 pág. 24 § 17, 18
Jiova kinmaka yektikatsin espíritu akin kitajtaniaj
17 Dios kinankilij Pablo: “Kuali ajsis ya noteiknelilis para nimitspaleuis. Porin moueyinextia nochikaualis kuak in tagat kiyolmachilia yolkuetauilis”. Uan tatitanil kijtoj: “Ika por ne Tajtoltsin de Yejuatsin nimoyolpaktijtinemi san kuak nikyolmachilia ne kuetauilis para ijkon kachi ok motenextijtiu nopan ichikaualis de Cristo” (2 Corintios 12:9; Salmo 147:5). ¿Toni kijtosnekia Pablo? Ke Dios kichiujka maj Cristo kimatampauiani Pablo kemej yeskia kiyekpiaskia itech se takenkal. Axkan, Jiova no ijkon kinankilia tonetataujtiluan, porin kinyekpia itekitikauan.
18 Maski se takenkal amo kichiuas maj amo kioui nion maj taejeka, kemaj techpaleuia. No ijkon, chikaualis tein Cristo techmaka amo kitsakuilia maj tikpiakan ouijkayomej. Sayoj ke, techpaleuia maj tein onkak nikan taltikpak uan Satanás amo kijtakokan tokuali uikalis iuan Jiova (Apocalipsis 7:9, 15, 16). Yejua ika, maski tikonsentokas tikonpias nejon ouijkayot, uelis tikonyekmatis ke Jiova kimati tein tikonijyouia uan ke kikakikya monetataujtil (Isaías 30:19; 2 Corintios 1:3, 4). Pablo kijkuiloj: “Dios amo tekaua, uan amo namechkauas xikpiakan tayejyekolis tein amo uelis nankixikoskej. Ta keman nankipiaskej tayejyekolis no kitalis keniuj nankisaskej uan ijkon uelis nankixikoskej” (1 Corintios 10:13, TNM; Filipenses 4:6, 7).
“Kimaka chikaualis akin sioujtok”
8 (Xikonixtajtolti Isaías 40:30.) Xa ueli tikchiuaj miak taman, sayoj ke amo nochi ueli tikchiuaj toselti. Nejin se taman tein tinochin moneki tikajsikamatiskej. Tatitanil Pablo uelia kichiuaya miak taman, sayoj ke amo uelia kichiuaya nochi tein kinekia. Keman kiluij Dios keniuj momachiliaya, yejuatsin kinankilij: “Moueyinextia nochikaualis kuak in tagat kiyolmachilia yolkuetauilis”. Pablo kiajsikamatik nejon uan kijtoj: “Kuak kachi nikyolmachilia in kuetauilis, ijkuakon kachi ok Dios nechmachililtia [ichikaualis]” (2 Cor. 12:7-10). ¿Toni kijtosnekia?
9 Pablo kiajsikamatia ke amo uelia kichiuaya miak taman komo amo kipaleuiaya aksa akin okachi chikauak. Dios kimakaskia chikaualis ika iyektikatsin espíritu keman yolkuetauiskia. Uan amo sayoj nejon. No ika kipaleuiskia maj kichiua tein iselti amo keman ueliskia kichiuas. No ijkon techpanoua axkan. Keman Jiova techmakas iyektikatsin espíritu, tikpiaskej chikaualis.
Maj tiktemokan tamachtilis ika nejmachkayot
Tein tajtanij akin taixtajtoltiaj
“Ika eyi eluiyaktsinko” tein ika motajtoua itech 2 Corintios 12:2 xa yejua Tekiuajyot tein moajsi imako Jesucristo uan 144,000, tein kijtosneki “yankuik eluiyak” (2 Ped. 3:13).
Monotsa “ika eyi eluiyaktsinko” porin nejon Tekiuajyot yejua taixyekanalis tein okachi kuali.
“Paraíso” oso xochital kampa Dios “kiajxitito” Pablo itech se tajtachialis xa yejua: 1) Xochital tein amo uejkaua onkas nikan taltikpak, 2) yolseuilis uan kuali uikalis tein senkis onkas ijkuak, uan 3) “kampa yetika Totajtsin Dios”. Nochi nejin eyi onkas itech yankuik taltikpak.
Maj tikixnamikikan ouijkayomej ika yolchikaualis
7 Axkan maj tikitakan tein kipanok tatitanil Pablo. Yejua ‘kinekiaj kimiktiskej kampa pueblo uan kampa taiujkan uan kuak yaya tech barco’. Uan no, ‘miakpa mayanaya uan amikia’, uan ‘mosektijtinemia uan tajyouiaya porin amo kipiaya kuali ikoton’. No kijtoj ke ‘mokauak apanian ajkuitinemia se youal uan se tonal’, nejin xa semej tonalmej keman pankalakik barco (2 Cor. 11:23-27). Sayoj ke nochipa kinextij se kuali tanemilil, kemej kinextia tein kijtoj se tonal keman kinemiliaya ke xa mikiskia porin kitekitiliaya Dios: “Nijin mochiuak sayo para ke Dios techyekajsikamatiltis de ke ma ti[...]takuautamatiyakan iuan Yejuatsin uan amo tejuan san ma timoyekantiyakan san. Porin Yejuatsin kipixtinemi ueyi chikaualis para kinpankixtis yoltokke nekes ten momikilijke. Uan Totajtsin Dios techmakixtij ya [...] [uan] techmakixtijtiyas ok” (2 Cor. 1:8-10). Amo miakej kipanouanij tel uejueyi ouijkayomej kemej Pablo. Sayoj ke uelis no timomachiliskej kemej yejua uan techyolchikauas komo tikitaj yolchikaualis tein kinextij.
27 METSTI MAYO HASTA 2 METSTI JUNIO
TAMACHTILIS TEIN KIPIA BIBLIA | GÁLATAS 1-3
“Nikyekixilij ke amo kualtia ten yejua kichiuaya”
¿Tikitaj melaujkayot kemej Jiova kiita?
16 (Xikonixtajtolti Gálatas 2:11-14.) Pedro kimouilij tein oksekin ueliskiaj kinemiliskej (Prov. 29:25). Maski kimatia keniuj Jiova kinitaya akin amo judíos, kimouilij tein kinemiliskiaj tokniuan judíos kayomej Jerusalén akin moneskayotijkaj itech ininnakayo. Pedro mouia maj amo kuali kiitanij porin mosentiliaya iniuan akin amo katkaj judíos. Tatitanil Pablo kiluij Pedro ke “tamachtijtinemia ika taixkajkayaualis”. ¿Keyej kiluij nejon? Porin Pablo kikakik keman kintajtouij akin amo katkaj judíos itech nechikol tein mochiuak Jerusalén itech xiuit 49 (Hech. 15:12). ¿Toni kichiuaskiaj tokniuan akin amo katkaj judíos akin Pedro kinyolxokolij? ¿Kikauaskiaj maj nejon kinuejkatiliani iuan Jiova? ¿Kipoloskia Pedro tekimej tein kipiaya porin mopoloj?
Amo teyi kinuetsiltis akin kitasojtaj Jiova
12 Pedro kimouiliaya tein oksekin ueliskiaj kichiuiliskej, uan maski amo keman kikauak Jesús uan Jiova, kemansa kipiak nepololmej. Kemej neskayot, expa kijtoj ininixpan miakej ke amo kiixmatia iTamachtijkauj (Luc. 22:54-62). Satepan amo monejnemiltij kemej se itatojtokakauj Cristo, porin okachi kuali kinitaya tokniuan akin katkaj judíos ke tein amo judíos. Sayoj ke tatitanil Pablo kimatia ke itech nechikol amo monekia xejxeliujtoskej oso kinitaskej ke sekin okachi chiuanimej ke oksekin. Pedro mopolojtoya. Yejua ika, achto ke itanemilil kinijtakoskia nochin tokniuan, Pablo kiyolmajxitij ika chikaujkayot uan kiixiluij (Gál. 2:11-14). ¿Kualanik Pedro uan amo kisentokakok motaloj kampa kiajsiskia nemilis? Amo, ta yejua kinemilij tein Pablo kiyolmajxitij, kipatak itanemilil uan kisentokak motaloj.
Maj tiktemokan tamachtilis ika nejmachkayot
Maj nochipa tiktekitilikan Dios maski tikpanoskej “miak tajyouilis”
20 ¿Uan toni uelis tikchiuaskej ika taixnamikilis tein amo moita? Kemej neskayot, komo tikmachiliaj ke tiyolkuetauij, ¿toni techpaleuis maj tikixnamikikan nejon? Se taman tein techpaleuis uan tein okachi kuali, komo titanemiliaj itech inemilis Jesús tein kitemakak. Yejua nejon kichiuak Pablo. Kemansa, tel amo kuali momachiliaya porin tajtakojkej katka, sayoj ke kimatia ke Cristo amo ininka momikilij akin amo kipiaj tajtakol, ta akin tajtakouanij ijkon kemej Pablo. Tein melauj, yejua kijkuiloj: “Ninemi porin nitakuaujtamati iuan iKonetsin Dios, akin nechtasojtak uan noka momikilij” (Gál. 2:20, TNM). Pablo kiselij inemilis Jesús tein kitemakak uan kineltokaya ke yejua kimakixtiaya.
21 Komo tikitaj inemilis Jesús tein kitemakak kemej se netetayokolil tein Jiova techmakak tisejsemej, uelis techtelpaleuis. Sayoj ke nejon amo kijtosneki ke niman tikmachiliskej ke amo tiyolkuetauijok. Tisekimej xa monekis tikixnamikiskej nejon tayejyekolis tein amo moita hasta keman moajsis yankuik taltikpak. Sayoj ke, ¡amo xionmosenkaua! Xikonelnamiki ke akin taxikoskej hasta keman ejkos tamilis, kiseliskej netetayokolil. Mojmostaj okachi motokia tonal keman iTekiuajyo Dios kiualkuis yolseuilis uan kinpaleuis nochin akin amo kikauaskej Jiova maj amo kipiakanok tajtakol. Xikonixtali tionkalakis itech nejon tekiuajyot maski monekis tikonpanos miak tajyouilis.
it-1 pág. 984
Amatajkuilol Gálatas
Keman Pablo kijtoj: “Nantaka de Gálatas, semi nanyolmijmikilome”, amo kinextia ke sayoj ininka tajtojtoya sekin akin nemiaj ompa Galacia kampa ika norte (Gál 3:1). Tein melauj, Pablo kinmelaujtoya seki taltikpakneminij akin pouiaj itech nechikolmej tein ompa moajsiaj porin peuayaj tanemiliayaj kemej seki judíos tein ompa mosentiliayaj. Nejon judíos kinekiaj kisentokaskej kitakamatiskej Tanauatil tein kiselij Moisés uan amo moyekanaskej ika yankuik netenkaualis (2:15–3:14; 4:9, 10). Itech nechikolmej tein moajsiaj ompa Galacia (1:2), akin Pablo kintajkuilouilij, pouiaj judíos uan akin amo judíos. Akin amo katkaj judíos yejuan akin kiselijkaj inintaneltokalis judíos uan moneskayotijkaj itech ininnakayo. Uan no, pouiaj akin amo katkaj judíos uan amo moneskayotijkaj itech ininnakayo. Sekin yejuan ualeuayaj kampa ika mokalakia Tonaltsin (Hch 13:14, 43; 16:1; Gál 5:2). Nochin yejuan kintokaytiayaj tokniuan gálatas porin nemiaj Galacia. Tein okachi ika tajtoua nejin amat kichiua maj se kinemili ke Pablo ininka tajtojtoya tokniuan akin nemiaj kampa ika sur, tein pouia Roma, porin kinixmatia. Yejua ika, Pablo amo ininka tajtojtoya akin nemiaj kampa ika norte, porin amo kinixmatia nion amo keman takalpanoj ompa.