Tein mokui keman tikitaj Tein timomachtiaj itech nechikol Tonemilis uan toTanojnotsalis
3-9 METSTI JUNIO
TAMACHTILIS TEIN KIPIA BIBLIA | GÁLATAS 4-6
“Se neskayot tein moneki tikixmatiskej”
it-1 pág. 65 § 1
Agar
Tatitanil Pablo kijtoj ke Agar kinixnextiaya israelitas. Yejuan katkaj iaxkauan Jiova porin motenkaujkej kitakamatiskej Tanauatil ompa tepet Sinaí. Nejon netenkaualis kinelnamiktiaya ke katkaj “takeualme”. Sayoj ke, kemej katkaj tajtakouanij, amo uelik senkis kitakamatkej tein ompa moijtouaya. Yejua ika katkaj kemej takeualmej, porin kisentokayaj kipiayaj tajtakol uan kinnamikia maj momikilikan (Jn 8:34; Ro 8:1-3). Itech itonaluan Pablo, israelitas kinixyekanayaj ompa Jerusalén. Yejua ika nejon xolal kiixnextiaya Agar, akin katka takeual iuan ikoneuan. Sayoj ke, itatojtokakauan Cristo akin kinixpejpenayaj ika yektikatsin espíritu katkaj ikoneuan “Jerusalén ten poui ne eluiyaktsinko”, tein kemej yeskia inamik Dios. Ijkon kemej Sara, nejon siuat amo katka takeual, porin Jerusalén tein moajsi ompa iluikak amo keman mochiuak takeual. Sayoj ke, ijkon kemej Ismael kitajyouiltij Isaac, ikoneuan Jerusalén akin katkaj takeualmej kintajyouiltijkej ikoneuan “Jerusalén ten poui ne eluiyaktsinko”, akin Jesús, iKonetsin Dios, kinmakixtij. Uan no, ijkon kemej Agar uan ikoneuj kinixtopeujkej, Jiova no kinixtopeuak israelitas (Gál 4:21-31; no xikonita Jn 8:31-40).
Maj senkis titakuaujtamatikan itech Tekiuajyot
11 Maski netenkaualis iuan Abrahán, yekinika mochiuak keman ikoneuan kiselijkej Tal tein Dios motenkaujka kinmakas, Biblia kinextia ke nejin netenkaualis tapaleuiskia maj mochiua se taman tein okachi ueyi (Gál. 4:22-25). Tatitanil Pablo kinextij ika ichikaualis Dios ke yekinika konetsin akin ualeua itech ichankauan Abrahán yejua Cristo uan oksekin ikoneuan siuat yejuan 144,000 tokniuan taixpejpenalmej ika espíritu (Gál. 3:16, 29; Apoc. 5:9, 10; 14:1, 4). Siuat yejua “Jerusalén ten poui ne eluiyaktsinko”, inechikol Dios ompa iluikak, tein kijtosneki, ángeles akin amo kikauaj yejuatsin (Gál. 4:26, 31). Ijkon kemej kiyeknextij netenkaualis iuan Abrahán, ikoneuan siuat kinualkuiliskiaj tatiochiualismej taltikpakneminij.
Maj tiktemokan tamachtilis ika nejmachkayot
w09 1/4 pág. 13
¿Tikonmatia?
¿Keyej Jesús kijtoj “Abba, Notajtsin” keman kitataujtij Jiova?
Tajtol arameo ʼabbáʼ uelis motajtolkepas kemej “tepopaj” oso “noPopaj”. Keman itech Biblia exkan moajsi nejin tajtol, ika motajtoua Jiova, toTajtsin akin moajsi ompa iluikak. Uan no, nejon tajtol nochipa moajsi keman mochiua se netataujtil. Sayoj ke ¿keyej Jesús kijtoj nejon tajtol?
Itech se amatajkuilol moijtoua ke itech itonaluan Jesús, tajtol ʼabbāʼ kitelkuiaj konemej keman kinotsayaj ininpopaj. Keman kijtouayaj, kinextiayaj ke kinitayaj kemej ininpopaj, ke kintasojtayaj uan ke kinpoujkaitayaj (The International Standard Bible Encyclopedia). Nejon yejua semej yekinika tajtolmej tein se konetsin peuaya kijtouaya. Jesús kijtoj nejon tajtol itech se tonal tein semi motelnekia. Tepitsin achto ke momikiliskia, yetoya itech xochital tein moajsia Getsemaní, uan keman kitataujtij Jiova kijtoj: “Abba, Notajtsin” (Marcos 14:36).
Itech nejon amatajkuilol no moijtoua ke keman taixyekanayaj griegos uan romanos, itech ininamaixuan judíos amo semi nesia tajtol ʼabbāʼ keman ika motajtouaya Dios, porin kinemiliayaj ke komo kikuiaj kinextijtoskiaj ke amo kipoujkaitayaj. Ompa no moijtoua ke keman Jesús kijtoj nejon tajtol ijkuak kitataujtij Dios kiteajsikamatiltia ke tel kuali mouikaya iuan. Itech okseki ome textos kampa nesi tajtol ʼabbáʼ itech amamej tein Pablo kijkuiloj, kinextia ke yekinika itatojtokakauan Cristo no ijkon kinotsayaj Dios (Romanos 8:15; Gálatas 4:6, TNM).
w10 1/11 pág. 15
¿Tikonmatia?
¿Keyej Pablo kijtoj: “Monextijtiuits ya tech nonakayo ke nechuitekke porin nejua niitekitikau de Totekotsin Jesucristo”? (Gálatas 6:17.)
▪ Tokniuan akin nemiaj itech yekinika siglo, tataman ueliskia kiajsikamatiskej tein Pablo kijtoj. Kemej neskayot, ne uejkauj, kinchichinouayaj ika se tepos totoktik akin kinkitskiayaj keman mochiuaya se neteuilis. No ijkon kinchiuiliayaj akin tachtekiaj itech templos uan takeualmej akin kitemouayaj choloskej. Keman nesia itech ininnakayo ke kinchichinojkaj kinextiaya ke kinpinaujtijkaj.
Sayoj ke, kemansa amo sayoj monextiaya nejon. Miakej ijkon moteixmatiltiayaj keman kinextiayaj ke pouiaj iniuan seki taltikpakneminij oso itech seki taneltokalismej. Se amatajkuilol kijtoua ke akin nemiaj Siria kinextiayaj ke motemaktiayaj iniuan tiotsitsin Hadad uan Atargatis keman mochichinouayaj ika tepos itech ininmay oso itech ininkechko. Ompa no moijtoua ke akin kiueyichiuayaj tiotsin Dionisio mochichinouayaj itech ininnakayo ika se tepos tein tamatia kemej se xiuit (Theological Dictionary of the New Testament).
Sayoj ke, miakej akin motelmachtiaj Biblia kijtouaj ke Pablo xa kijtosnekia ke nesia itech inakayo keniuj kixokolijkaj keman tanojnotstinemia (2 Corintios 11:23-27). Maski ijkon, keman Pablo kijtoj ke nesia itech inakayo ke katka itatojtokakauj Cristo, xa amo kijtosnekia ke kixokolijkaj, ta ika tajtojtoya kemej monejnemiltiaya.
10-16 METSTI JUNIO
TAMACHTILIS TEIN KIPIA BIBLIA | EFESIOS 1-3
“Jiova kiixtalij kinsentilis itekitikauan”
it-2 pág. 981 § 2
Tamachtilis tein Dios amo kitematiltijtoya
Tekiuajyot tein moajsi imako Mesías. Itech amamej tein Pablo kijkuiloj, kinextia ke tamachtilis tein Dios amo kitematiltijtoya katka tein kichiuaskia Cristo. Itech Efesios 1:9-11 moijtoua ke Dios kiteixmatiltij ‘iichtakatamachilis’. Ompa kijtoua: “Nijin itaixejekol de Dios, ma mochiuaki ka nejmach ijkon keme kimonekiltis [...] tech ne tonal ten Dios kitalij ya. Uan tech ne tonal Totajtsin Dios kisentilis nochi tanauatil imako Cristo para ma Cristo tayekantinemi ka chikaualis ipan nochi tanauatilme ten ongak nepa eluiyaktsinko. Uan no ma tayekantinemi Cristo ipan nochi tanauatilme ten ongak nikan taltikpak. Uan Totajtsin Dios techijitak desde ne achtopa ya para ma tipoutinemikan iuantsin Cristo. [...] Uan nochi nijin mochiutiu porin ijkon kimonekiltij Totajtsin Dios ten kichiutinemi keme Yejuatsin iyolpakilis uan itanejnekilis”. Itech ‘iichtakatamachilis’ Dios poui Tekiuajyot tein moajsi imako Mesías. “Tanauatilme ten ongak nepa eluiyaktsinko” tein Pablo kijtoj, yejuan akin kichiaj taixyekanaskej iuan Cristo ompa iluikak itech nejon Tekiuajyot. “Tanauatilme ten ongak nikan taltikpak” yejuan akin kinixyekanaskej nikan taltikpak. Jesús kiniluij imomachtijkauan ke itech tamachtilis tein Dios amo kitematiltijtoya pouia Tekiuajyot keman kiniluij: “Dios namechmatiltijtok ya namejuan de neichtakatamachilis” (Mr 4:11).
Jiova kinsentilia ichankauan
3 Nochi tein Jiova kichiua nochipa mouika iuan itanejnekilis. Yejua ika, itech “tonal ten Dios kitalij ya” peuak mochiua “itaixejekol”, tein kijtosneki, se taman tein tapaleuia maj mosentilikan nochin ikoneuan kemej kalyetouanij (xikonixtajtolti Efesios 1:8-10). Nejin itaixejekol Dios tapaleuia maj mochiua ome tasentililis. Yekinika kinpaleuia tokniuan taixpejpenalmej maj kichiuakan tein moneki uan ijkon uelis nemiskej ne iluikak iuan Jesucristo kemej ininTaixyekankauj. Nejin peuak itech Pentecostés xiuit 33 itech totonaluan, keman Jiova peuak kinsentilia taltikpakneminij tein tekiuajtiskiaj ne iluikak iuan Cristo (Hech. 2:1-4). Ika inemilis Jesús tein kitemakak, Dios kinita yolmelaujkej nejin taixpejpenalmej uan uelis nemiskej nochipaya. Yejua ika, kiajsikamatij ika miak pakilis ke kinselijkejya kemej ‘ikoneuan Dios’ (Rom. 3:23, 24; 5:1; 8:15-17).
4 Itech ojpatika tasentililis, Dios kinpaleuia maj kichiuakan tein moneki akin nemiskej itech Xochital nikan taltikpak tein kinixyekantos iTekiuajyo Mesías. Akin yekinika moajsij itech nejon tasentililis yejuan “uel miak tagayot” (Apo. 7:9, 13-17; 21:1-5). Keman Cristo Tekiuajtitos se mil Xiuit, tel miakej tein moajokuiskej iniuan mosentiliskej (Apo. 20:12, 13). Okachi uelis tiknextiskej ke tisenyetokej keman oksepa nemiskej tein momikilijkaj. Keman tamis mil xiuit, “ten ongak nikan taltikpak”, oso taltikpakneminij, kipiaskej se tayejyekolis tein ika tamisya, uan akin amo kikauaskej Dios, kinselis kemej “ikoneuan” tein nemiskej nikan taltikpak (Rom. 8:21, NM; Apo. 20:7, 8).
Maj tiktemokan tamachtilis ika nejmachkayot
Maj amo teyi techtsakuili maj tikselikan iueyipanchiualis Dios
15 Komo titaxikouaj keman tikchiuaj itanejnekilis Jiova, tapaleuia maj oksekin kiselikan iueyipanchiualis Dios. Tatitanil Pablo kinijkuilouilij tokniuan akin kayomej Éfeso: “Namechontatautia ok ke amo ximoyolkuejkuepakan tech namotakuautamatilis. Porin nochi nijin notajyouilisuan kichiua ke ma onka se ueyi kuali para namejuan” (Efes. 3:13). ¿Toni kijtosnekik Pablo keman kijtoj ke itajyouilisuan kichiuaya maj onka “ueyi kuali para [yejuan]”? Keman kisentokak kinpaleuij iikniuan maski kipanouaya ouijkayomej, kinnextilij ke se kitekitilis Dios yejua okachi ueyi tatiochiualis tein uelis se kipias. Komo Pablo mosenkauaskia keman kipanouaya ouijkayomej, ¿melauj ke kiteajsikamatiltiskia ke ikuali uikalis iuan Jiova, itanojnotsalis uan nechialis tein kipiaya amo motelnekia? Keman taxikoj, kinextij ke se mochiuas se imomachtijkauj Cristo yejua tein okachi kuali, maski se kipanos tajyouilis.
cl pág. 299 § 21
“Xikyekajsikamatikan [...] ne tetasojtalis de Cristo”
21 Tajtol griego tein mokepa kemej “xikyekajsikamatikan” kijtosneki se kimatis teisa ika tein se kipanoua. Keman tikintasojtaj oksekin kemej kichiuak Cristo tikinpaleuiaj ika nochi toyolo porin tikinikneliaj uan senkis tikintapojpoluiaj. Keman ijkon tikchiuaj, ueli tikajsikamatij tein Jesús kimachiliaya. Ijkon, ueli ‘tikyekajsikamatij uan tikyolmachiliaj ne tetasojtalis de Cristo maski melauj amo keman uelis tikyekmatiskej hasta kani tantok ne tetasojtalis’. Maj amo keman tikelkauakan ke keman okachi tikchiuaj kemej Jesús, okachi timotokiaj iuan toDios akin tetasojta, Jiova, akin Jesús senkis kichiuak kemej yejuatsin.
17-23 METSTI JUNIO
TAMACHTILIS TEIN KIPIA BIBLIA | EFESIOS 4-6
“Maj tikuikan ‘manamikme’ tein Dios techmaka”
Telpochmej, xikixnamikikan Amokuali
TATITANIL Pablo kijtoj ke akin kichiua kemej Cristo tamati kemej se tateuijkej. Sayoj ke amo timoteuijtokej iuan se taltikpaknenkej, ta iniuan Satanás uan iamokuali ejekauan. Maski amo ueli tikinitaj, yekmelauj nemij. Yejuan tel miak xiujmejya tateuijtokej uan tel kuali tateuiaj. Xa nesis ke amo uelis tikintaniskej, okachiok komo titelpochmej oso tiichpochmej. Sayoj ke ¿melauak nejon? ¿Uelis telpochmej kintaniskej nejon amokuali ejekamej? Kemaj, uan sekin kintantokejya. ¿Toni kinpaleuia? “Chikaukauelilis” tein kinmaka Jiova. Uan no, kemej kuali tateuianij, motalilianij “nochi ne manamikme” tein Dios temaka (xikixtajtolti Efesios 6:10-12).
Telpochmej, xikixnamikikan Amokuali
4 No ijkon, tein melauak tein timomachtiaj itech iTajtol Dios techpaleuia maj amo tikneltokakan tamachtilis tein amo melauak (Juan 8:31, 32; 1 Juan 4:1). Komo se tateuijkej kuali tajkoilpitoya, okachi amo ouij kikisaya kiuikas “tepos camisa ten monotsa coraza, tenika mopaleuia[ya] kampa nielpan”. No ijkon, komo tikpatiuitaj tamachtilis tein melauak, okachi amo ouij techkisas tiktakamatiskej itanauatiluan Dios (Sal. 111:7, 8; 1 Juan 5:3). Uan no, komo kuali tikajsikamatij nejin tamachtilis tein melauak, okachi kuali uelis tikinmelauiliskej taixnamikinij (1 Ped. 3:15).
7 Coraza kuali kiixnextia keniuj itanauatiluan Jiova tein melaujkej kiyekpiaj toyolo (Prov. 4:23). Ijkon kemej se tateuijkej amo kipataskia se coraza tein chijchiujtoya ika kuali tepos ika okse tein amo yekchijchiujtoya, tejuan no amo tikpataskej itanauatiluan Dios ika tein tejuan tiknemiliaj. Tejuan amo semi tikpiaj tamatilis tein techpaleuis maj tikyekpiakan toyolo (Prov. 3:5, 6). Yejua ika motelneki maj nochipa tikitakan maj coraza tein Jiova techmaka kisentoka kiyekpia toyolo.
10 Tateuianij romanos motaliliayaj nejin tekakmej keman yayaj neteuilis, sayoj ke tiitekitikauan Dios timotaliliaj se tein kemej yeskia tekak tein techpaleuia maj tikteixmatiltikan “Tajtoltsin de Dios ten kualkui ne yolseuilis” (Is. 52:7; Rom. 10:15). Maski ijkon, kemansa moneki tikpiaskej yolchikaualis tein techpaleuis maj titanojnotsakan. Bo, se telpoch akin kipia 20 xiujmej, kijtoua: “Achto, nimouia nikinnojnotsas akin iniuan nimomachtiaya. Niknemilia ke porin nipinauaya. Tein melauj, amo nikmatia keyej ijkon nimomachiliaya. Axkan, nechtelyolpaktia nikinnojnotsas nouampoyuan”.
w18.05 págs. 29-31 § 13, 16, 20
Telpochmej, xikixnamikikan Amokuali
13 ¿Toni “kuejmololis tenika in Satanás kineki [mits]yolxokolis”? Uelis kitemos xikneltoka ke Jiova amo moka motekipachoua uan ke amo mitstasojta. Ida, se ichpoch akin kipia 19 xiujmej, kijtoua: “Miakpa, nikmachilia ke Jiova uejka yetok, ke amo kineki yeski noTasojikniuj”. ¿Keniuj moijkuanilia nejon tein kimachilia? Yejua kijtoua: “Nechikolmej tamatij kemej se pajti tein kichikaua notakuaujtamatilis. Achto, sayoj nimotaliaya uan amo keman nimomaajokuia. Niknemiliaya ke amo akin kinekia kikakis tein nitanankiliskia. Sayoj ke axkan nimomachtia achto ke niyas nechikolmej uan nimochikaua nitanankilis ojpa oso expa. Tepitsin nechouijmaka, sayoj ke keman nikchiua okachi kuali nimomachilia. Uan no, tokniuan nechtelyolchikauaj. Nochipa keman nikisa itech nechikolmej nikmati ke Jiova nechtasojta”.
16 Ijkon kemej “teposkuatsakuiloni” kiyekpiaya itsontekon tateuijkej, nemakixtilis tein tikchiaj kiyekpia totanemilil (Prov. 3:21; 1 Tes. 5:8). Nejon nechialis techpaleuia maj amo tikelkauakan tein Dios motenkauak uan maj amo timosenkauakan keman tikpiaj kuejmolmej (Sal. 27:1, 14; Hech. 24:15). Sayoj ke, teposkuatsakuiloni tein Jiova techmaka techpaleuis komo tikuikaj itech totsontekon, amo tomako. Nejin kijtosneki ke moneki tikneltokaskej ke yekmelauj tikseliskej tein tikchiaj.
20 Pablo kijtoj ke iTajtol Dios tamati kemej se espada tein Jiova techmakak. Sayoj ke, moneki kuali tiktekitiltiskej keman tikmelauaj tein tikneltokaj oso tiktemouaj tikpataskej kemej titanemiliaj (2 Cor. 10:4, 5; 2 Tim. 2:15). ¿Toni mitspaleuis okachi kuali xiktekitilti? Sebastian, akin kipia 21 xiujmej, kijtoua: “Keman nikixtajtoltia Biblia, nikijkuiloua se versículo keman nikixtajtoltia se capítulo. Nikijkuilojtok tajkuilolmej tein okachi nikuelita”. Nejin kipaleuia maj okachi kuali kiajsikamati keniuj tanemilia Jiova. Daniel, akin ika titajtojkej itech párrafo 8, kijtoua: “Keman nikixtajtoltia Biblia, nikixpejpena tajkuilolmej tein uelis kinpaleuis taltikpakneminij itech tanojnotsalis. Nikitani ke kuali tanankiliaj keman kiitaj ke mitsyolpaktia nochi tein kijtoua Biblia uan ke timochikaua tikinpaleuis”.
Maj tiktemokan tamachtilis ika nejmachkayot
it-2 pág. 938 § 5
Yektik
Iyektikatsin espíritu. Jiova kiixyekana iyektikatsin espíritu oso ichikaualis. Yejua ika, yektikatsin espíritu kichiua tein Jiova kineki. Yektikatsin espíritu amo kipia tein amo kuali, chipauak, yektik uan Dios sayoj kitekitiltia kemej ika kichiuas teisa tein tapaleuis. Yejua ika moijtoua ke iyektikatsin espíritu “yektik” uan kipia “chipaukauelilis” (Sl 51:11; Lu 11:13; Ro 1:4; Ef 1:13). Yektikatsin espíritu kipaleuia aksa maj kichiua tein yektik oso tein chipauak. Keman aksa kichiua teisa tein amo chipauak oso tein amo taixejekol, kiixnamiki oso ‘kitayokoltia’ nejon espíritu (Ef 4:30). Maski nejon sayoj se chikaualis, aksa uelis ‘kitayokoltis’ porin yejua Dios akin ika kinextia tein kineki maj mochiua. Komo aksa kichiua tein amo kuali ‘kitsajtsakuilia in tekit de [y]ektikatsin [e]spíritu’ (1Te 5:19), uan komo kisentoka kichiua, iyektikatsin espíritu Dios ‘motayokoltia’. Nejon kichiua maj Dios kiita kemej itaixnamikkauj (Isa 63:10). Akin kitayokoltis yektikatsin espíritu hasta uelis kinextis ke kiuijuikaltia, uan Jesús kijtoj ke akin ijkon tajtakoua amo keman kitapojpoluiskej nion axkan nion satepan (Mt 12:31, 32; Mr 3:28-30; no xikonita ESPÍRITU).
it-1 pág. 255 § 5
Xijxikuiyot
Se kinextia ika tein se kichiua. Aksa nesi ke xijxikui porin senkis kinextia ke kinejneki se taman. Santiago kijtoj ke keman aksa kitelneki kichiuas tein amo kuali, kichiua maj tajtako (Snt 1:14, 15). Yejua ika, akin xijxikui niman moteixmatiltia ika tein kichiua. Tatitanil Pablo kijtoj ke akin xijxikui no kichiua kemej akin kinueyichiua tiotsitsin (Ef 5:5). Akin xijxikui kiita kemej se dios nejon tein kinejneki, uan amo kitayekanaltiaok kitekitilis Dios nion kiueyichiuas (Ro 1:24, 25).
24-30 METSTI JUNIO
TAMACHTILIS TEIN KIPIA BIBLIA | FILIPENSES 1-4
“Amo teyika ximoyolkuejmolokan”
Yolseuilis tein Dios temaka amo ueli se kiajsikamati
10 ¿Toni uelis techpaleuis maj amo timotekipachokan uan maj tikpiakan yolseuilis tein Dios temaka? Tein Pablo kiniluij tokniuan akin nemiaj Filipos techmachtia ke techyolseuis netataujtil. Yejua ika maj tikchiuakan netataujtil nochipa keman timotekipachojtoskej (xikonixtajtolti 1 Pedro 5:6, 7). Uan keman tiktataujtiskej Jiova, maj tiknextikan ke senkis titakuaujtamatij ke toka motekipachoua. No maj tiktasojkamatilikan tatiochiualismej tein techmaka. Uan maj amo keman tikelkauakan ke yejuatsin “kipixtinemi ne chikaukauelilis para ika kichiuas [...] kachi ok ne ten tejuan ayamo tiknemiliaj tikontajtaniliske” (Efes. 3:20).
Yolseuilis tein Dios temaka amo ueli se kiajsikamati
7 ¿Toni kinemilijkej tokniuan akin nemiaj Filipos keman kiixtajtoltijkej amat tein Pablo kintitanilij? Yejuan xa kielnamikkej tein Pablo uan Silas kinpanok, uan keniuj Jiova kinpaleuij kemej amo kichiayaj. ¿Toni kinekia kinmachtis Pablo? Ke monekia amo motekipachoskej uan ke Dios kinmakaskia yolseuilis komo kitataujtiayaj. Sayoj ke maj tikitakan ke Pablo kiniluij ke yolseuilis tein Dios temaka “kachi kuika uelilis hasta amo uelis se kajsikamatis”. ¿Toni kijtosneki nejin? Itech seki biblias nejin tajtolmej kikepaj kemej “kipanauia nochi tein ueli se kinemilia”. Nejin kinextia ke Pablo kiteajsikamatiltijtoya ke yolseuilis tein Dios temaka okachi ueyi ke tein ueli tiknemiliaj. ¿Toni techmachtia nejin? Ke maski kemansa amo tikmatiskej keniuj tikyektaliskej tokuejmoluan, Jiova kemaj kimati. Uan yejuatsin uelis kichiuas miak taman tein tikmoujkaitaskej (xikonixtajtolti 2 Pedro 2:9, TNM).
Yolseuilis tein Dios temaka amo ueli se kiajsikamati
16 ¿Toni panos keman Dios techmakas “yolseuilis ten kachi kuika uelilis hasta amo uelis se kajsikamatis”? Biblia kijtoua: “Kinyekantinemis namoyolojuan uan namotamachilisuan” (Filip. 4:7). Itech tajtol tein ika moijkuiloj Biblia, tajtol tein mokepa kemej “kinyekantinemis” katka se tajtol tein ne uejkauj kitekitiltiayaj keman ininka tajtouayaj tateuianij akin tayekpiayaj itech se xolal. Yejua nejon panouaya itech xolal Filipos. Akin ompa nemiaj amo teyi kintekipachouaya keman kochiaj porin kimatiaj ke itech xolal amo teyi panoskia porin tateuianij tajpixtoyaj. No ijkon, keman tikpiaj yolseuilis tein Dios temaka, amo teyi techtekipachoua uan tiyolseujtokej. Tikyekmatij ke Jiova techyekpia uan kineki maj tinemikan ika yolpakilis (1 Ped. 5:10). Tikmatiskej nejon techpaleuia maj amo timoteltekipachokan nion maj timouikan.
Maj tiktemokan tamachtilis ika nejmachkayot
it-2 pág. 525 § 9
Nemaktilmej
Tein se kitoyaua. Keman mochiuayaj seki nemaktilmej, no motemakayaj nemaktilmej kampa se kitoyauaya teisa. Israelitas peuak okachi ijkon kichiuaj satepan ke kalakkej itech Tal tein Dios motenkaujka kinmakas (Nú 15:2, 5, 8-10). Nejon nemaktil mochiuaya keman kitoyauayaj vino (“tayil tein teuintij”) itech altar (Nú 28:7, 14; no xikonita Éx 30:9; Nú 15:10). Tatitanil Pablo kiniluij tokniuan akin nemiaj Filipos: “Nomikilis mochiuakiu keme se kualtsin nemaktil para Totajtsin Dios. Uan ika por nomikilis uan ika por namotajyouilis momajxitis ne namonemaktil ten namejuan nankitemaktiaj iixpantsinko Dios. Uan komo nechmiktiske, ijkuakon nimoyolpaktis”. Pablo ika tajtoj nejon nemaktil porin kinekia kinextis ke semi kiyolpaktiaya motemakas kinpaleuis tokniuan (Flp 2:17). Achto ke momikiliskia, yejua kijkuilouilij Timoteo: “Nimotemaktiaya iuan Dios porin kuali nikmatok ya ke ejkotok ya in tonal kuak nechmiktiske” (2Ti 4:6).
w07 1/1 pág. 26 § 5
Peuakya “neajokuilis tein achto mochiuas”
5 Satepan, taixpejpenalmej, akin pouij itech “Israel tein iaxka Dios”, moneki mosentiliskej iuan toTekotsin Jesucristo ompa iluikak, kampa yetoskej iuan nochipaya (Gálatas 6:16, TNM; 1 Tesalonicenses 4:17). Nejon motokaytia “neajokuilis tein achto mochiuas” oso “achtopa panti ten Dios kinpankixtis ma oksepa yoltinemikan” (Filipenses 3:10, 11, TNM; Apocalipsis 20:6). Satepan ke kinajokuiskej nochin taixpejpenalmej, peuas kinajokuiskej millones taltikpakneminij nikan taltikpak uan uelis kichiaskej nemiskej nochipaya itech Xochital. Yejua ika, semi moneki tikixmatiskej “neajokuilis tein achto mochiuas” maski tikchiaskej tinemiskej ompa iluikak oso nikan taltikpak. Sayoj ke, ¿keniuj uan kemanian mochiuas?