Tein mokui keman tikitaj Tein timomachtiaj itech nechikol Tonemilis uan toTanojnotsalis
6-12 METSTI JULIO
TAMACHTILIS TEIN KIPIA BIBLIA | ÉXODO 6, 7
Maj tiktemokan tamachtilis ika nejmachkayot
it-2 pág. 1140 § 4, 5
Akin kipia nochi chikaualis
Jiova moteixmatiltij kemej Dios “Akin kipia nochi chikaualis” (ʼEl Schad·dái) keman kiluij Abrahán ke yoliskia Isaac. Abrahán monekia senkis takuaujtamatis ke Jiova kichiuaskia. Satepan, peuak ijkon moixmati keman moijtouaya ke Dios kintatiochiuiskia Isaac uan Jacob, akin kiseliskiaj tein Dios kiluijka Abrahán (Gé 17:1; 28:3; 35:11; 48:3).
Yejua ika, xiujmej satepan Dios kiluij Moisés: “Nejua nimonextiaya iixpan Abrahán, Isaac uan Jacob kemej Dios akin kipia nochi chikaualis [beʼÉl Schad·dái], sayoj ke ika notokay, Jiova, amo nimoteixmatiltij ininixpan” (Éx 6:3). Nejin amo kijtosneki ke yejuan amo kiixmatiaj itokay Dios, porin yejuan uan akin achto nemiaj miakpa kikuikej nejon tokayit (Gé 4:1, 26; 14:22; 27:27; 28:16). Itech amatajkuilol Génesis, kampa ininka motajtoua Abrahán, Isaac uan Jacob, tajtolmej “Akin kipia nochi chikaualis” sayoj nesi chikuasenpa, sayoj ke tokayit Jiova, moijkuiloj 172. Maski nejin takamej kimatiaj ke Dios kinamikia maj moixmati kemej “Akin kipia nochi chikaualis”, amo senkis kimatiaj tein kijtosneki itokay Dios, Jiova.
it-2 pág. 414 § 2
Moisés
Moisés amo kipoloj tekit tein kichiuaskia maski omeyolouak. Moisés omeyolouak uan kijtoj ke amo yektajtouaya. Moisés amo katka kemej achto, porin cuarenta xiujmej achto kinekia kinmakixtis israelitas. Miakpa kiluij Jiova ke amo ueliskia kichiuas tein kitajtaniaya. Maski Jiova kualanik iuan, amo kiixtopeuak, ta kinauatij iikniuj Aarón maj tajtouani itenkopa Moisés. Kemej Dios kititanik Moisés, yeskia kemej iDios Aarón, porin Aarón yejua akin tajtoskia. Keman monekia tajtos iniuan takamej israelitas akin xiuejkejya uan iuan akin tekiuajtia Egipto, Dios kiluiaya Moisés tein monekia kichiuaskej uan Moisés kiluiaya Aarón, uan Aarón yejua akin kinojnotsaya akin tekiuajtia Egipto. Nejin tekiuaj amo yejua katka akin Moisés kicholuijka cuarenta xiujmej achto (Éx 2:23; 4:10-17). Moisés katka itanauatijkauj Dios, porin yejuatsin kiixyekanaya. No ijkon, Jiova kijtoj ke Aarón mochiuak itanauatijkauj Moisés porin yejua kiixyekanaya. Jiova no kiluij Moisés ke yeskia “kemej Dios” iixpan akin tekiuajtia Egipto, porin kipiaya ichikaualis Dios uan kipiaskia tanauatil. Yejua ika, amo monekia kimouilis tekiuaj (Éx 7:1, 2).
Tein moixtajtoltia itech Biblia
(Éxodo 6:1-15) Jiova kinankilij Moisés: “Axkan tikitas tein nikchiuiliti akin tekiuajti Egipto. Nomay tein chikauak kichikaujkauis maj namechkaua xikisakan uan nomay kichiuas maj namechkixti itech ital”. 2 Ompa Dios kiluij Moisés: “Nejua niJiova. 3 Nejua nimonextiaya iixpan Abrahán, Isaac uan Jacob kemej Dios akin kipia nochi chikaualis, sayoj ke ika notokay, Jiova, amo nimoteixmatiltij ininixpan. 4 No nikiniluijka ke nikinmakaskia tal tein poui Canaán, kampa nemiaj kemej tepalyetonij. 5 Nikakini inintayokol israelitas porin akin nemij Egipto semi kintekitiltiaj, uan amo nikelkaua tein nikijtojka nikchiuas. 6 ”Yejua ika xikinilui israelitas: ‘Nejua niJiova, akin namechkixtilis tamamal tein namechmakanij akin nemij Egipto uan namechmakixtis kampa semi namechtekitiltiaj, uan namechkixtis ika nomay tein chikauak uan nikintatsakuiltis. 7 Uan namechselis kemej noxolal, uan niyeski nanmoDios. Senkis nankimatiskej ke nejua Jiova nanmoDios akin namechkixtilijtok tamamal tein namechmakanij akin nemij Egipto. 8 Namechuikas itech tal tein nikiniluij Abrahán, Isaac uan Jacob ke nikinmakas; uan yeski nanmoaxka. Nejua niJiova’”. 9 Satepan, Moisés kinmatiltij israelitas, sayoj ke yejuan amo kikakkej Moisés porin amo kuali momachiliayaj uan porin semi kintekitiltiayaj. 10 Yejua ika, Jiova kiluij Moisés: 11 “Xikiluiti akin tekiuajti Egipto, maj kinkaua israelitas maj kisakan”. 12 Sayoj ke, Moisés kinankilij Jiova: Komo amo nechkakij israelitas, ¿keniuj nechkakis akin tekiuajti Egipto ta amo niyektajtoua?” 13 Maski ijkon, Jiova miakpa kiniluij Moisés uan Aarón tein monekia kiniluiskej israelitas uan akin tekiuajtia Egipto, ijkon israelitas kisaskiaj ompa Egipto. 14 Yejuan nejin tetatmej akin taixyekanayaj ininchan. Ikoneuan Rubén katkaj Hanok, Palú, Hezrón uan Carmí. Yejuan nejin ichankauan. Rubén katka ikoneuj Israel akin tayekanaya. 15 Ikoneuan Simeón katkaj Jemuel, Jamín, Ohad, Jakín, Zóhar uan Shaúl. Shaúl katka ikoneuj se siuat kayot Canaán. Yejuan nejin ichankauan Simeón.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Jesús kichiua se netataujtil ajko itech se kali
¿Toni kijtosneki se kiixmatis Dios uan iKonetsin?
¿Keniuj Jesús kinpaleuij oksekin maj kiixmatikan itokay Dios?
¿Keyej moijtoua ke Dios, iKonetsin uan akin yekmelauj kiueyichiuaj Dios kemej yeskia sayoj se?
13-19 METSTI JULIO
TAMACHTILIS TEIN KIPIA BIBLIA | ÉXODO 8, 9
Maj tiktemokan tamachtilis ika nejmachkayot
it-2 pág. § 1077
Tábano
Keman Biblia ika tajtoua naujpatika chauis tein mochiuak Egipto amo moyekmati toni taman okuiltsin katka, tein israelitas amo kinijtakoj ompa Gosén (Éx 8:21, 22, 24, 29, 31; Sl 78:45; 105:31). Tajtol ʽA·róv motajtolkepani, kemej “tábanos” (EMN, 1988; FS; NC; Mod; NM; VP), “moyomej” (ATI; Val, 1989), “okuiltsitsin” (BAS), “moyot tein kitipinia itskuinti” (LXX), “pisilmoyomej” (Val, 1989, nota [Éx 8:21]), “tataman moyomej” (Scío; no xikonita BR, TA) uan “tataman okuiltsitsin tein teijtakouaj” (HM; no xikonita DK).
Tajtol “tábano” itech español kijtosneki tataman moyomej. Moyotenan kikoyonia ininnakayo okseki tapialmej uan ininnakayo taltikpakneminij uan kikua ininesyo. Ompa África, semi momiakiliaj. Yejua ika, moyekita ke nejon moyomej semi kintajyouiltij akin nemiaj Egipto uan inintapialuan uan sekin hasta momikilijkej.
w04 15/3 pág. 25 § 9
Tein moixtajtoltia itech amatajkuilol Éxodo
8:26, 27. ¿Keyej Moisés kijtoj ke akin nemiaj Egipto amo kiitstaniaj maj israelitas kintemakanij tapialmej? Ompa Egipto kinueyichiuayaj miak tapialmej. Nejon kipaleuij Moisés maj miakpa kijtouani maj kinkauanij maj yanij taluakyan kampa kimakaskiaj nemaktilmej Jiova.
Tein moixtajtoltia itech Biblia
(Éxodo 8:1-19) Ompa, Jiova kinauatij Moisés: “Xiyouj xikiluiti akin tekiuajti Egipto: ‘Jiova kijtoua: “Xikaua noxolal maj kisa uan maj nechueyichiua. 2 Komo amo tikinkaua maj yakan, nikchiuas maj onkakan kalamej itech moaltepeuj. 3 Itech ueyiat Nilo pexoniskej kalamej uan kisaskej itech at, kalakiskej mochan, kampa tikochi, kalakiskej ininchan motakeualuan uan yetoskej itech nochi moxolal, tikonijtik uan kampa tikmaneloua tixti. 4 Uan kalamej sentakuiskej kampa tiyetos, itech moxolal uan kampa moajsij motakeualuan”’”. 5 Satepan, Jiova kiluij Moisés: “Xikilui Aarón: ‘Ximomamelaua ika mokouj itech nochi amej, itech ueyi at Nilo uan kampa moteka at uan xikchiua maj kalamej sentakuikan nochi Egipto’”. 6 Yejua ika, Aarón momamelauak itech amej ompa Egipto, uan kalamej peuak kisaj uan momoyauaj itech altepet. 7 Tiopixkamej akin kitekitiltiayaj naualot no kichiujkej maj kisanij kalamej uan maj momoyauanij itech nochi Egipto. 8 Satepan, akin tekiuajtia Egipto kinnotsak Moisés uan Aarón uan kiniluij: “Xiktataujtikan Jiova maj techajchiuili nejin kalamej, porin axkan nikinkauasya maj yakan kimakatij nemaktilmej Jiova”. 9 Ompa, Moisés kiluij akin tekiuajtia Egipto: “Tejua xinechilui kemanian tikneki maj niktataujti Dios maj mistajchiuili kalamej, maj kinajchiuili motakeualuan, moxolal uan maj amo moajsikanok mochan. Sayoj mokauaskej itech ueyiat Nilo”. 10 Akin tekiuajtia Egipto tanankilij “Mosta”. Yejua ika, Moisés kiluij: “Mochiuas tein titajtani, ijkon tikitas ke amo moajsi okse Dios kemej toDios Jiova. 11 Mochan poliuiskej kalamej uan amo tikinpiasok, nion motakeualuan uan nion no moxolal. Sayoj mokauaskej itech ueyiat Nilo”. 12 Ompa, Moisés uan Aarón yajkej. Uan Moisés kitataujtij Jiova maj kinixpolouani kalamej tein kintitanilijka akin tekiuajtia Egipto. 13 Uan Jiova kichiuak tein Moisés kitajtanij, kalamej peuak mikij ininchan, ininkalixpan uan itech talmej. 14 Akin nemiaj Egipto miakkan kinsentilijkej. Uan peuak semi tatsojyaya. 15 Keman akin tekiuajtia Egipto kiitak ke kuali moajsiajya, yoltakuauayak uan amo kinekik kinkakis Moisés uan Aarón, ijkon kemej Jiova kijtojka. 16 Ompa, Jiova kiluij Moisés: “Xikilui Aarón: ‘Xikui mokouj uan xikuiteki tal, uan talnex mochiuas pisilmoyomej itech nochi altepet Egipto’”. 17 Yejuan ijkon kichiujkej. Aarón momamelauak ika ikouj, kiuitekik tal uan pisilmoyomej peuak kintipiniaj taltikpakneminij uan tapialmej. Talnex mochiuak pisilmoyomej itech nochi altepet Egipto. 18 Tiopixkamej akin kitekitiltiayaj naualot no kinekiaj kinchiuaskej pisilmoyomej, sayoj ke amo uelkej. Pisilmoyomej kintipiniayaj taltikpakneminij uan tapialmej. 19 Yejua ika, tiopixkamej akin kitekitiltiayaj naualot kiluijkej akin tekiuajtia Egipto: “¡Nejin mochiua ika ichikaualis Dios!”. Maski ijkon, akin tekiuajtia Egipto, kisentokaya yoltakuauak katka uan amo kinkakik, ijkon kemej Jiova kijtojka.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Kitataujtia iTat porin semi motekipachoua
¿Kani youij Jesús uan itatitaniluan?
¿Toni kichiuaj eyi tatitanilmej keman Jesús motataujtia?
¿Keyej ineton Jesús mochiua kemej yeskia esti?
20-26 METSTI JULIO
TAMACHTILIS TEIN KIPIA BIBLIA | ÉXODO 10, 11
Maj tiktemokan tamachtilis ika nejmachkayot
w95 1/9 pág. 11 § 11
Kiitakej ke tiotsitsin amo melaujkej
11 Keman israelitas moajsiajok Egipto, Jiova kinauatij Moisés: “Xikitati akin tekiuajti Egipto porin nikauani maj yejua uan itakeualuan kisentokakan yoltakuaujkej, ijkon uelis nikchiuas miak taman iixpan. Uan no, porin nikneki xikinilui mokoneuan uan moixuiuan nochi tein nikchiuak uan keniuj nikintatsakuiltij akin nemiaj Egipto. Uan nankimatiskej ke nejua niJiova” (Éxodo 10:1, 2). Israelitas akin kichiujkej tein Jiova tanauatij, kiniluiayaj ininkoneuan tein yejuatsin kichiujka ika ichikaualis. Uan ininkoneuan no kiniluiayaj ininkoneuan, uan ijkon kisentokakej kiniluiayaj akin satepan yolkej. Ijkon amo moelkauak nochi tein Jiova kichiuak. Yejua ika, axkan tetatmej no moneki kinmachtiskej ininkoneuan (Deuteronomio 6:4-7; Proverbios 22:6).
it-1 pág. 895 § 7
Éxodo
Jiova kinextij ichikaualis ika tein kichiuak, kiueyitalij itokay uan kinmakixtij israelitas. Keman kipanauijkajya ueyiat Chichiltik uan moajsiajya atenoj, Moisés peuak mokuikatia iniuan israelitas. Uan iikniuj Míriam, akin katka tanauatijkej, kikuik se pandereta uan peuak tatsotsona iniuan okseki siuamej uan mijtotiaj, uan mokuikatijkej iniuan takamej (Éx 15:1, 20, 21). Israelitas senkis moxelojkej iniuan akin kintauelitayaj. Keman kiskej Egipto, nion se taltikpaknenkej uan nion se tapial kinchiuilij tein amo kuali, amo kinuajuij nion se itskuinti (Éx 11:7). Maski itech amatajkuilol Éxodo amo moijtoua ke akin tekiuajtia Egipto ixpoliuik iniuan itateuijkauan itech ueyiat. Itech Salmo 136:15 kiyekijtoua ke Jiova kinixpoloj akin tekiuajtia Egipto uan itateuijkauan itech ueyiat Chichiltik.
Tein moixtajtoltia itech Biblia
(Éxodo 10:1-15) Jiova kiluij Moisés: “Xikitati akin tekiuajti Egipto porin nikauani maj yejua uan itakeualuan kisentokakan yoltakuaujkej, ijkon iixpan uelis nikchiuas miak taman. 2 Uan no, porin nikneki xikinilui mokoneuan uan moixuiuan nochi tein nikchiuak uan keniuj nikintatsakuiltij akin nemiaj Egipto. Uan namejuan nankimatiskej ke nejua niJiova”. 3 Yejua ika, Moisés uan Aarón kiitatoj akin tekiuajti Egipto uan kiluijkej: “Jiova ininDios hebreos kijtoua: ‘¿Hasta kemanian tinechkakis? Xikaua noxolal maj kisa uan maj nechueyichiuati. 4 Komo amo tikinkaua maj kisakan, mosta nikchiuas maj onkakan chapolimej itech altepet. 5 Sentakuiskej talpan uan nion nesis tal. Kitamiskej tein mokauak keman tejsiuik uan kikuaskej nochi koujmej tein moskaltijtokej. 6 Pexoniskej mochan, ininchan motakeualuan uan ininchan nochin akin nemij itech altepet Egipto. Mochiuas tein amo keman moitani, nion tein motatuan nion tein moueyitatuan kiitanij’”. Ompa, Moisés mokepteuak uan yajki. 7 Satepan, itakeualuan akin tekiuajtia Egipto kiluijkej: “¿Hasta kemanian kisentokas kitemos maj techpano tein amo kuali? Xikinkaua maj kisakan maj kiueyichiuatij Jiova, ininDios. ¿Amo tikita ke Egipto ixpoliuiti?”. 8 Yejua ika, oksepa kintatitauijkej Moisés uan Aarón iixpan tekiuaj. Yejua kiniluij: “Xiyakan xikueyichiuatij nanmoDios Jiova. Sayoj ke, ¿akonimej yaskej namouan?”. 9 Moisés kiluij: “Kemej tikiluichiuitij Jiova, tiyatij iniuan totelpochuan, akin xiuejkejya, tokoneuan, toichpochuan, toborregos uan tokuakuejuan”. 10 Akin tekiuajtia Egipto kinnankilij: “¿Uan nankinemiliaj ke namechkauas xikisakan iniuan nanmokoneuan? Komo ijkon panoskia, ¡senkis nesiskia ke Jiova namouan yetok! Nankichiuasnekij tein amo kuali. 11 ¡Amo namechkauas nannochin! Sayoj takamej uelis kiueyichiuatiuij Jiova porin achto ijkon nankijtojkaj”. Ompa, kinkixtijkej keman yetoyaj iuan tekiuaj. 12 Yejua ika, Jiova kiluij Moisés: “Ximomamelaua itech nochi altepet Egipto, uan maj sentakuikan chapolimej uan maj kikuakan xiuit tein mokauak keman tejsiuik”. 13 Moisés niman momamelauak ika ikouj itech nochi altepet Egipto. Jiova kichiuak maj ejeka itech altepet nochi tonal uan nochi youal. Mostika kualkan, ejekat kinualkuik chapolimej. 14 Uan chapolimej sentakuikej itech nochi altepet Egipto. Semi amo kualtsin katka. Amo keman onkayaj semi miakej chapolimej uan amo keman oksepa ijkon mochiuaskia. 15 Sentakuikej itech nochi altepet uan talpan hasta tatileuik ika chapolimej. Kitamijkej xiuit tein onkaya uan nochi takilomej tein mokaujka keman tejsiuik. Amo kikaujkej nion teyi itech koujmej uan kitamijkej nochi xiuit tein onkaya itech altepet Egipto.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Kikitskiaj Jesús porin Judas kitemaktia
¿Keyej Judas kitemoti Jesús itech xochital tein moajsi Getsemaní?
¿Toni kichiua Pedro porin kineki kipaleuis Jesús, uan toni kichiua Jesús?
¿Keniuj Jesús kinextia ke kineki kichiuas tein Dios kineki?
¿Akoni mokaua keman tatitanilmej cholouaj, uan toni kipanoua?
27 METSTI JULIO HASTA 2 METSTI AGOSTO
TAMACHTILIS TEIN KIPIA BIBLIA | ÉXODO 12
Maj tiktemokan tamachtilis ika nejmachkayot
it-2 601 § 5
Pascua
Ompa Egipto, Jiova kintatsakuiltij tiotsitsin ika majtakti chauismej. Sayoj ke, okachiok ika majtakti chauis keman mikkej konemej akin tayekanayaj (Éx 12:12). Yejuan kiitayaj ke borregojueuet yektik porin kiueyichiuayaj tiotsin Ra, yejua ika, keman kikuijkuiltiskiaj kaltenkouit ika iesyo borrego itech pascua, akin nemiaj Egipto kiitaskiaj ke kinuijuikaltijkej. No kiitayaj ke kuakouej yektik, yejua ika keman momikiliskiaj konemej akin tayekanayaj semi kiyolkokoskiaj tiotsin Osiris. Uan akin tekiuajtia Egipto, kiueyichiuayaj kemej ikoneuj tiotsin Ra, yejua ika keman momikiliskia ikoneuj akin tayekanaya, moitaskia ke tiotsin Ra uan tekiuaj nion tepitsin kipiayaj chikaualis.
it-1 § 548
Nechikol
Itech ‘nechikolmej kampa kiueyichiuayaj Dios’ monekia amo tekitiskej, kemej itech yekinika uan chikometika tonal keman kikuayaj pantsin tein amo kixokoltiayaj. Yejua ika, Jiova tanauatij: “Amo moneki nantekitiskej itech nejon tonalmej. Sayoj uelis nankichijchiuaskej tein nankikuaskej” (Éx 12:15, 16). Sayoj ke, itech ‘nechikolmej kampa kiueyichiuayaj Dios’ tiopixkamej kimakayaj Jiova nemaktilmej (Le 23:37, 38). Tein kichiuayaj amo kitapanauiliaya tanauatil tein kijtouaya ke monekia amo tekitiskej. Itech nejon tonalmej amo moixpetaniayaj, ta momachtiayaj. Tonal sábado mosentiliayaj uan kiueyichiuayaj Dios, ompa no kiseliayaj tamachtilis. Kinyolchikauaya keman kikakiaj uan kinmelauiliayaj iTajtol Dios, tein xiujmej satepan mochiuak itech sinagogas (Hch 15:21). Yejua ika, maski amo tekitiaj itech tonal sábado uan keman kipiayaj ‘nechikolmej kampa kiueyichiuayaj Dios’, kemaj motataujtiayaj uan itech tanemiliayaj ininTachijchiujkauj uan tein kiixtalijtok kichiuas (no xikonita ASAMBLEA).
Tein moixtajtoltia itech Biblia
(Éxodo 12:1-20) Ompa Egipto, Jiova kiniluij Moisés uan Aarón: 2 “Itech nejin metsti peuas mochiuas se taman tein semi moneki, yeski yekinika metsti itech xiuit. 3 Xikinnotsakan israelitas uan xikiniluikan: ‘Itech tonal 10 itech nejin metsti moneki nankikuaskej se borrego iniuan nanmochankauan. 4 Sayoj ke, komo nanmochankauan amo miakej uan amo nankitamiaj se borrego, moneki nankikuaskej iniuan akin nemij kampa ika nannemij. Moneki nankixeloskej kemej namechajsis uan kemej nankikuaskej nannochin. 5 Moneki yeski se borregojueuet tein kipia se xiuit. Uelis yeski se borrego oso se chivo. 6 Moneki nankiyekpiaskej hasta maj ajsi tonal 14 itech nejin metsti, uan nochin israelitas moneki kimiktiskej nejon youak. 7 Satepan, moneki nankikuijkuiltiskej iesyo tapial itech kaltenkouit, opochmakopa, yekmakopa uan ajkokopa. Moneki nankichiuaskej itech kali kampa nankikuaskej tapial. 8 “‘Nejon youak moneki nankikuaskej nakat, nankitipauatsaskej uan nankikuaskej ika pantsin tein amo kipia tein taxokoltia uan kilit tein chichik. 9 Amo xikuakan nion tsikitsin nakat xoxouik nion tein tamanal. Nochi xiktipauatsakan, itsontekon, imetsuan uan iijtik. 10 Amo xikeuakan nakat. Komo mokaua tepitsin nakat tein nankikuaskiaj mostika, moneki nankichichinoskej. 11 Keman nantakuaskej moneki nantajkoilpitoskejya, nankipiaskejya nanmotekakuan uan nanmaktoskejya nanmotopil. Uan no, moneki ijsiujka nantakuaskej. Nejin iPascua Jiova. 12 Nejon youak nipanos itech nochi altepet Egipto uan nikinmiktis ininkoneuan taltikpakneminij akin tayekanaj uan inintapialuan. Nikintatsakuiltis nochin tiotsitsin itech altepet Egipto. Nejua niJiova. 13 Esti kinextis kampa nanyetoskej. Keman nikitas esti nikixpanauis kali. Uan amo nanmikiskej keman panos chauis tein ika nikintatsakuiltis akin nemij itech altepet Egipto. 14 “‘Nejin tonal moneki nankielnamikiskej uan nankiiluichiuiskej Jiova uan moneki nankinnextiliskej nanmokoneuan. Nejin tanauatil nochipa moneki nankitakamatiskej. 15 Itech chikomej tonalmej moneki nankikuaskej pantsin tein amo kipia tein taxokoltia. Yejua ika, itech yekinika tonal moneki nankikixtiskej nochi tixti tein taxokoltil tein nankipiaj nanmochan. Porin akin kikuas teisa tein kipia tein taxokoltia itech yekinika tonal hasta chikometika tonal, moneki mikis. 16 Itech yekinika tonal mochiuas se nechikol kampa nankiueyichiuaskej Dios, uan itech chikometika tonal mochiuas okse nechikol kampa nankiueyichiuaskej Dios. Amo moneki nantekitiskej itech nejon tonalmej. Sayoj uelis nankichijchiuaskej tein nankikuaskej. 17 “‘Iluit keman kikuayaj Pantsin tein amo Kixokoltiayaj moneki nankielnamikiskej, porin itech nejon tonal namechkixtis nannochin itech altepet Egipto. Moneki nankielnamikiskej nejin tonal uan nankinnextiliskej nanmokoneuan. Nejin tanauatil nochipa moneki nankitakamatiskej. 18 Itech yekinika metsti, itech tiotak 14 hasta okse tiotak 21 moneki nankikuaskej pantsin tein amo kipia tein taxokoltia. 19 Itech chikome tonalmej amo moneki nankipiaskej nanmochan tixti tein taxokoltil. Komo se analtekojkayot, oso se akin kayot itech altepet kikua teisa tein kipia tein taxokoltia moneki mikis. 20 Amo xikuakan nion teyi tein kipia tein taxokoltia. Kampa yeski nanmoajsiskej moneki nankikuaskej pantsin tein amo kipia tein taxokoltia’”.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Kiuikaj iixpan Anás uan satepan iixpan Caifás
¿Kani yekinika kiuikaj Jesús, uan toni panoua ompa?
¿Kani kiuikaj Jesús satepan, uan keniuj Caifás kitemoua maj akin kiixnextiaj Sanedrín kiixtalikan maj kimiktikan Jesús?
¿Keniuj kitajyouiltiaj Jesús keman kitatsakuiltiaj?