TAMACHTILIS 10
¿Keniuj mitsonpaleuis komo tionmosentilia iniuan itaixpantijkauan Jehová?
¿Tionyania kampa mosentiliaj itaixpantijkauan Jehová? Komo amo, xa tionmouis keman yekinika tionyas. Yejua ika xa tionmotajtania: “¿Toni kichiuaj keman mosentiliaj? ¿Keyej kiitaj ke moneki mosentiliskej? ¿No moneki maj iniuan nimosentili?”. Itech nejin tamachtilis tikonitas ke semi mitsonpaleuis komo iniuan tionmosentilia, uan kichiuas okachi kuali xionmouika iuan Dios.
1. ¿Keyej mosentiliaj itaixpantijkauan Jehová?
Se akin kijkuiloj Biblia kijtoj keyej semi moneki timosentiliskej: “Kampa miakej monechikojtokej nikueyichiuas Jehová” (Salmo 26:12). Itech nejin tonalmej, itaixpantijkauan Jehová no mosentiliaj uan nejon kichiua maj semi yolpakikan. Itech nochi taltikpak sejse semana mosentiliaj porin kiueyichiuaj Dios, kantarouaj uan kichiuaj netataujtil. Uan xijxiujtika okachi miakej mosentiliaj kampa taueyika.
2. ¿Toni tionmomachtis itech tonechikoluan?
Itech nechikolmej momelaua iTajtol Dios (xikonita Nehemías 8:8). Komo no tionmosentilia okachi tikonixmatis Jehová. Keman tikonmatis ke yejuatsin semi mitsontasojta, okachi tikonnekis kuali tionmouikas iuan. No tikonmatis keniuj yejuatsin mitsonpaleuia xionyolpaki (Isaías 48:17, 18).
3. ¿Keniuj uelis mitsonpaleuiskej akin ompa mosentiliaj?
Jehová kineki “maj inintech titanemilikan oksekin uan ijkon okachi timotasojtaskej se iuan okse uan tikchiuaskej tein kuali, uan maj amo tiksenkauakan tonechikoluan” (Hebreos 10:24, 25). Itech tonechikoluan tikonixmatis akin semi motasojtaj, uan akin kinekij okachi kiixmatiskej Dios ijkon kemej tejuatsin. No tikonkakis ke nochi tein ompa kijtouaj semi teyolchikaua (xikonita Romanos 1:11, 12). No tikonixmatis akin ininselti uan akin monamiktijkejya, uan maski kipiaj kuejmolmej semi yolpakij. Uan yejua ika Jehová kineki maj timosentilikan.
MAJ OKACHI TIMOMACHTIKAN
Maj tikitakan keniuj kichiuaj ininnechikoluan itaixpantijkauan Jehová, uan keyej semi moneki maj timosentilikan maski ouij techkisas.
4. Nechikolmej tein kipiaj itaixpantijkauan Jehová
Itech yekinika siglo, imomachtijkauan Jesús mosentiliayaj porin kiueyichiuayaj Jehová (Romanos 16:3-5). Xikitakan Colosenses 3:16 uan ika xitajtokan nejin:
¿Keniuj kiueyichiuayaj Jehová imomachtijkauan Jesús?
Axkan itaixpantijkauan Jehová no miakpa mosentiliaj kampa taueyichiuaj. Para tikonmatis keniuj mochiuaj ininnechikoluan, xikitakan VIDEO. Satepan xikitakan taixkopin kampa mochiujtok se nechikol uan ika xitajtokan nejin:
¿Toni tein moijtoua itech Colosenses 3:16 no mochiua itech Kali kampa tiMosentiliaj?
Keman tikonitak taixkopin oso video, ¿toni tikonuelitak tein mochiuaj itech nechikolmej?
Xikitakan 2 Corintios 9:7 uan ika xitajtokan nejin:
¿Keyej amo motajtani tomin keman mosentiliaj itaixpantijkauan Jehová?
Xiksenitakan tein timomachtiskej itech nechikol nejin semana.
¿Toni tikonuelitak oso toni uelis mitsonpaleuis?
¿Tikonmatia?
Itech jw.org tikonitas kani uan kemanian mochiuaj nechikolmej itech nochi taltikpak.
Itech tonechikoluan motemakaj tanojnotsmej, momachtiaj keniuj tanojnotsaskej uan tamachtiskej, no monextiaj videos. Keman peua uan keman tami kantarouaj uan mochiua netataujtil.
Itech nechikol no ixyetok keman uelis tanankiliskej akin takaktokej.
Nochin uelis yaskej: takamej, siuamej, akin xiuejkejya, telpochmej uan konemej.
Amo moixtauaj nechikolmej tein kipiaj itaixpantijkauan Jehová. Amo motajtani tomin nion se taxtaua keman se kalaki.
5. Maj se mosentili maski ouij techkisas
Maj ika titanemilikan ichankauan Jesús. Yejuan nemiaj Nazaret uan xijxiujtika keman yayaj templo ompa Jerusalén, monekia nejnemiskej kemej eyi tonal uan kinpanauiskej tepemej. Xikitakan Lucas 2:39-42 uan ika xitajtokan nejin:
¿Ouij kinkisaya yaskej hasta Jerusalén?
Uan tejuatsin, ¿kemej toni ueliskia mitsontsakuilis xionmosentili?
¿Keyej amo nenkaj komo tionmosentilia maski yeski ouij?
Biblia kijtoua ke semi moneki timosentiliskej uan tikueyichiuaskej Jehová. Xikitakan Hebreos 10:24, 25 uan ika xitajtokan nejin:
¿Keyej moneki nochipa timosentiliskej?
TEIN SEKIN KIJTOUAJ: “Amo moneki timosentiliskej iniuan oksekin. Tochan uelis timomachtiskej toselti”.
¿Toni tein Biblia ika tajtoua oso katiyejua texto kinextia tein Jehová kineki maj tikchiuakan?
TEIN TIKITAKEJ
Komo tionyoui nechikolmej okachi tikonixmatis Jehová, okachi kuali iuan tionmouikas uan tikonueyichiuas iniuan oksekin.
Maj tikelnamikikan
¿Keyej Jehová techiluia maj timosentilikan?
¿Toni tionmomachtis itech nechikolmej tein kipiaj itaixpantijkauan Jehová?
¿Keniuj tikonnemilia ke no uelis mitsonpaleuis nechikolmej?
NO XIKONITA NEJIN
¿Tionpinaua tionyas nechikolmej? Xikonita keyej se takat peuak kiuelita mosentilis maski achto pinauaya.
Xikonita tein kichiuak se telpoch porin semi kiuelitaya nechikolmej uan amo kinekia tapolos.
Xikonita keniuj sekin kiitaj monechikoskej.
“¿Por qué estaría bien ir a las reuniones en el Salón del Reino?” (Artículo de jw.org)
Xikonita keniuj se akin tateuiaya uan kichiuaya tein amo kuali iniuan oksekin, mopatak keman peuak youi nechikolmej.
“No iba a ningún lado sin mi arma” (La Atalaya, 1 de julio de 2014)