5 Kuali ximonojnotsakan

¿TONI KIJTOSNEKI?

Keman tetatmej kuali monojnotsaj iniuan ininkoneuan, kimatij tein kinemiliaj uan kinekij.

¿KEYEJ SEMI MONEKI?

Uelis yeski ouij se tajtos iuan se ikoneuj akin telpoch. Amatajkuilol Tú no me escuchas, yo no te entiendo kijtoua keniuj uelis momachilis se tepopaj. “Keman mokoneuan katkaj pilimejok mitsontapouiayaj nochi tein kinpanouaya, sayoj ke keman okachi telpochmejya amo semi tajtouajok namouan, yejua ika tetatmej amo kimatij tein kinemiliaj uan tein kinekij ininkoneuan”. Sayoj ke ijkuak keman okachi moneki tajtos mouan.

¿TONI UELIS TIKONCHIUAS?

Xikontemo tiontajtos iuan mokoneuj. Xikonchiua maski kemansa youakya yeski.

“Kemansa se kineki se kijtos: ‘¡Nochin tonal tikpiayaj miak tiempo uan ¿axkan tikneki maj timonojnotsakan?!’. Sayoj ke, ¿keyej tikajuas? Ta mokoneuj kineki mitstapouis tein kinemilia. Nochin tetatmej yejua nejon tein tiknekij” (Lisa).

“Nikuelita kualkan nikochis, sayoj ke, kemansa tajko youak ijkuak keman okachi kuali nimonojnotsani iniuan nokoneuan telpochmej” (Herbert).

BIBLIA KIJTOUA: “Maj amo akin kitemo sayoj tein yejua kipaleuis, ta tein kinpaleuis oksekin” (1 Corintios 10:24).

Kuali xiontakaki. Se tepopaj kijtoua: “Keman nokoneuan nechnojnotstokej, kemansa peua nitanemilia itech okseki taman uan yejuan kiitaj nejon”.

Komo no ijkon mitsonpanoua xikonseui televisión, xikonkaua mocelular uan kuali xikonkaki tein mitsontapouis mokoneuj, ijkon tikonnextilis ke no mitsontekipachouaj kuejmolmej tein yejua kipanoua maski amo uejueykej.

“Tokoneuan moneki kimatiskej ke techtekipachoua tein kinemiliaj. Komo amo ijkon tikchiuaj amo techtapouiskejok uan kitemoskej nepaleuil okseko” (Maranda).

“Amo niman xionkualani nion keman mokoneuj kijtos teisa tein amo tikonuelitas” (Anthony).

BIBLIA KIJTOUA: “Kuali xitakakikan” (Lucas 8:18).

Nochipa keman tiuelis ximonojnotsa iuan. Miakpa telpochmej, kiniluiaj itatuan tein kinemiliaj keman moajsij kampa kuali momachiliaj.

“Tejuan timonojnotsaj keman tiouij tinemitij. Nikitani ke keman nokoneuj youi nonakastan okachi kuali timonojnotsaj” (Nicole).

Keman tisentakuaj no uelis kuali timonojnotsaskej.

“Tiotak keman tisentakuaj nochin tikijtouaj tein techpanok itech tonal. Kemej nochipa tiksenchiuaj nejin, techpaleuiani maj timosenpaleuikan keman tikpanouaj ouijkayomej” (Robin).

BIBLIA KIJTOUA: “Nochin moneki niman nantekakiskej, amo niman nantajtoskej” (Santiago 1:19).