Kalyetouanij kampa moajsi sayoj semej tetatmej uelis yolpakiskej

1-3. ¿Keyej motelmiakilianij kalyetouanij kampa sayoj semej tetatmej moajsi, uan keniuj kinijtakouani tetatmej uan konemej?

NOYAMPA taltikpak okachi momiakilijtokej kalyetouanij kampa moajsi sayoj semej tetatmej. Okachi miakej namikuanij kitsayanaj amat ininixpan tekiuanij, mokakauaj, tetatmej kinkaujteuaj ininchankauan uan konemej yolij keman inintatuan auilnemij. Nochi nejin semi kintajyouiltiani tel miakej tetatmej uan konemej.

² Se temomaj akin iselti kiniskaltijtok ikoneuan, kijkuiloj: “Nikpia 28 xiujmej, nonamik amo nemiok uan nikinpia ome nokoneuan. Semi nitayokoya porin amo nikneki noselti nikiniskaltis. Nikmachilia ke amo akin noka motekipachoua. Nokoneuan miakpa kikakij ke nichoka, uan nejon kinijtakoua”. Tel miakej tetatmej akin ininselti amo sayoj moneki mochikauaskej moijkuaniliskej kualanyot, amo motajtakoltiskej tein panok uan amo momachiliskej ininselti, ta no moneki tekitiskej okseko uan kichiuaskej tekimej tein onkak kalijtik. Se temomaj kijtoj: “Semi ouij se iselti se kiniskaltis konemej. Satepan ke semi se mochikaua, peua ueli se kichiua miak taman tekimej. Sayoj ke niman keman peua ueli se kichiua nejon, nesij okseki yankuik tekimej”.

³ Telpochmej uan ichpochmej akin nemij sayoj iniuan semej inintatuan kipiaj ininkuejmoluan. Xa tel amo kuali momachiliaj keman semej inintatuan kinkaujteuak oso ijsiujkamikik. Miakej semi kinijtakoua maj amo iniuan moajsiok semej inintatuan.

4. ¿Keniuj tikmatij ke Jiova ininka motekipachoua kalyetouanij kampa moajsi sayoj semej tetatmej?

⁴ Ne uejkauj no onkayajya kalyetouanij kampa sayoj semej tetatmej kiniskaltiaya ikoneuan. Biblia miakpa ika tajtoua “mikakaual” uan “siuat akin amo nemiok itakauj” (Éxodo 22:22; Deuteronomio 24:19-21; Job 31:16-22). Jiova kiitaya ouijkayot tein kipanotoyaj. Semej itekitikauan kijkuiloj ke yejuatsin “ininpopaj mikakaualmej uan akin kinmatampauia siuamej akin amo nemiok inintakauj” (Salmo 68:5). Itech nejin tonalmej Jiova kisentoka ininka motekipachoua kalyetouanij kampa moajsi sayoj semej tetatmej. Uan iTajtol kipia tayolmajxitilis tein uelis kinpaleuis maj yolpakikan.

TEIN MONEKI MOCHIUAS KALIJTIK

5. ¿Toni kuejmol yekinika kipanouaj tetatmej akin ininselti?

⁵ Xiontanemili itech tekit tein moneki mochiuas kalijtik. Miakpa, siuamej akin ininselti kiniskaltiaj ininkoneuan kinekiskiaj inepaleuil se takat, kemej ijkuak kali uejueliujtok uan amo kimatij kani peuaskej kiyektaliskej. Takamej akin yankuixtok kitsayankej amat ininixpan tekiuanij oso akin yankuixtok momikilij ininnamik xa no amo kimatij keniuj kichiuaskej nochi tekit tein onkak kalijtik. Uan keman konemej kiitaj ke kalijtik amo mochiua kemej momattoyaj, amo kuali momachiliaj uan amo kimatij toni kichiuaskej.

6, 7. 1) ¿Toni techmachtia tein kichiuak “tel kuali siuat” akin ika motajtoua itech Proverbios? 2) ¿Keniuj kinpaleuia tetatmej akin ininselti komo mochikauaj kichiuaskej tekimej tein kipiaj kalijtik?

⁶ ¿Toni uelis techpaleuis? Maj tikelnamikikan tein kichiuaya “tel kuali siuat” akin ika motajtoua itech Proverbios 31:10-31. Se kimoujkaita nochi tein kichiuaya nejin siuat: takouaya, tanamakaya, tajtsomaya, takualchiuaya, kikouaya talmej, tatokaya uan kiixyekanaya se tanamakaloyan. ¿Toni kipaleuij maj kichiua nochi nejin tekit? Tel tekitikej katka, tel kualkan meuaya uan tekitia hasta tayouakya. Uan no, kiixtaliaya nochi tein kichiuaskia; seki tekimej kinkauiliaya itakeualuan uan yejua kiitaya toni kinpolouaya oksekin. Yejua ika ichankauan kiueyitaliayaj.

⁷ Komo toselti tikiniskaltijtokej tokoneuan, moneki tikyekchiuaskej tekimej tein tikpiaj kalijtik. Moneki maj techyolpakti tikchiuaskej nejon tekimej, porin ijkon semi tikinpaleuiskej tokoneuan maj yolpakikan. Sayoj ke motelneki maj achto tikixtalikan toni tikchiuaskej uan keniuj tikchiuaskej. Biblia kijtoua: “Akin ika nejmachkayot niman kiixtalia keniuj kichiuas teisa yekmelauj kuali kisas” (Proverbios 21:5). Se tepopaj akin iselti, kijtoj: “Amo itech nitanemilia toni tikuaskej hasta keman nimayanaya”. Sayoj ke komo achto se kiixtalia toni takual se kichijchiuas okachi tepaleuia uan okachi uelik ke tein se kichijchiua ika ijsiujkayot. Xa monekis timomachtiskej keniuj tikchiuaskej seki tekimej kalijtik. Se temomaj akin iselti uelis kintajtanis akin iniuan kuali mouika oso oksekin keniuj kiyektalis seki taman kalijtik oso keniuj kikouas seki taman tein moneki.

8. ¿Keniuj uelis tapaleuiskej kalijtik konemej akin nemij sayoj iniuan semej inintatuan?

⁸ ¿Taixejekol maj se kinilui konemej maj tapaleuikan? Se temomaj akin iselti, kijtoj: “Kemansa tiknekij maj konemej amo kimachilikan ke amo yetokok ininpopaj keman nochi tejuan tikinchiuiliaj”. Nejon moajsikamati, maski xa amo nochipa yejua tein okachi kinpaleuis. Ne uejkauj, telpochmej uan ichpochmej akin kimoujkatokayaj Dios kinmakayaj tekimej tein ueliskiaj kichiuaskej (Génesis 37:2; El Cantar de los Cantares 1:6). Yejua ika, maski moneki amo tikinmakaskej tel miak tekit, taixejekol komo tikinmakaj tekimej, kemej kipajpakaskej tapalkamej uan tachipauaskej kampa kochij. Uelis semi teyolpaktis komo iniuan se kichiua seki tekimej.

KEMAN MONEKI SE KIAJSIS TEIN IKA SE MOIXPANOLTIS

9. ¿Keyej siuamej akin ininselti kiniskaltiaj ininkoneuan kinouijmaka kiajsiskej tein ika moixpanoltiskej?

⁹ Tel miakej tetatmej akin ininselti, kinouijmaka kiajsiskej tein ika moixpanoltiskej, okachiok ichpochmej akin ininselti kiniskaltiaj ininkoneuan.a Itech altepemej kampa tekiuanij kitemakaj seki nepaleuilmej, uelis tajtaniskej maj kinmakakan, tein kinpaleuis hasta maj kiajsikan tekit. Biblia kinextia ke akin kichiuaj kemej Cristo uelis tajtaniskej nejon nepaleuilmej keman monekis (Romanos 13:1, 6). Siuamej akin amo nemiok inintakauj uan akin kitsayankej amat ininixpan tekiuanij no ouij moixpanoltiaj. Miakej nejin siuamej, akin moneki peuaskej tekitiskej okseko satepan ke miak xiujmej sayoj tekitikej ininchan, miakpa sayoj kiajsij tekimej kampa amo kuali kintaxtauiaj. Oksekin tepitsin moyektalia kemej nemij keman moijkuilouaj kampa kinmachtiaj keniuj kichiuaskej seki tekimej.

10. ¿Keniuj temomaj akin iselti uelis kinmelauilis ikoneuan keyej moneki kitemos tekit?

¹⁰ Temomaj akin iselti moneki amo kimoujkaitas komo ikoneuan amo kinekij maj kitemo tekit, uan moneki amo motajtakoltis. Okachi kuali, moneki kinmelauilis keyej moneki tekitis, uan kinpaleuis maj kiajsikamatikan ke Jiova kinnauatia tetatmej maj kintekipanokan ininchankauan (1 Timoteo 5:8). Ijkon kemej panouaj tonalmej, miakej konemej peua kiajsikamatij tein axkan kipanotokej. Sayoj ke, moneki se mochikauas iniuan se yetos maski se kipias miak tekit. Nejin no tapaleuis maj amo semi kinijtako keman xa amo kinajsis tomin (Proverbios 15:16, 17).

AKONI MONEKI TEYEKPIAS

11, 12. ¿Toni tekimej moneki amo kipataskej tetatmej akin ininselti, uan keniuj uelis kichiuaskej?

¹¹ Taixejekol maj tetatmej akin ininselti okachi motokikan iniuan ininkoneuan, maski moneki moyekpiaskej maj amo peuakan kipatakan tekimej tein Dios kinmakatok tetatmej uan konemej. Kemej neskayot, uelis kiualkuis uejueyi ouijkayomej komo temomaj akin iselti kitemoua maj itelpoch peua kichiua tekimej tein kinamiki kichiuas se tepopaj oso kitapouia iichpoch nochi tein kipanoua. Nejin amo kuali yetok, kichiua maj konemej amo kuali momachilikan uan uelis kinpojpolos.

¹² Xikonyekilui mokoneuan ke tejuatsin, kemej tepopaj oso temomaj, tikonyekpias, uan amo ke yejuan mitsonyekpiaskej (no xikonita 2 Corintios 12:14). Kemansa xa monekis maj tetatmej akin ininselti kinyolmajxitikan oso maj tepitsin kinpaleuikan. Nejin uelis kintajtaniskej tayekananij itech nechikol oso no tokniuan siuamej akin kipiaj kuali taixejekolis, amo ininkoneuan (Tito 2:3).

TAMELAUALIS

13. ¿Toni kuejmol uelis kipias se temomaj akin iselti keman kinmelauas ikoneuan?

¹³ Takat amo semi kiouijmaka kichiuas maj ikoneuan kitakamatikan, sayoj ke siuat uelis kiouijmakas. Se temomaj akin iselti, kijtoua: “Nookichpipiluan moskaltijkejya uan tajtouaj kemej takamejya. Kemansa nechouijmaka amo niknextis ke amo nikmati toni nikchiuas oso ke amo semi nikpia chikaualis kemej yejuan”. Uan no, xa titayokoxtokejok porin momikilij tonamik, oso xa timotajtakoltiaj oso tikualantokej porin techkauak. Komo tekiuanij kiixtalijkej maj akin katka tonamik no kinyekpia tokoneuan, xa tikmouiliaj maj yejuan kinekikan okachi yaskej iuan. Nejin uelis kichiuas maj teouijmaka se kinmelauas ika taixejekolis.

14. ¿Toni kinpaleuis tetatmej akin ininselti maj kinmelauakan ininkoneuan ika taixejekolis?

¹⁴ Biblia kijtoua ke “konet akin kikauaj maj kichiua tein kineki kipinaujtia imomaj” (Proverbios 29:15). Jiova kinextia ke uelis tikixtaliskej tanauatilmej tokalijtik uan satepan tikchiuaskej maj kitakamatikan, yejua ika maj amo teyi timotajtakoltikan, maj amo techkuejmolo totanemilil nion maj timouikan (Proverbios 1:8). Maj amo keman tiknemilikan amo tikchiuaskej tein Biblia tayolmajxitia (Proverbios 13:24). Maj tiktemokan tiknextiskej taixejekolis, tamatilis uan maj amo tikpapatakan tein tikixtaliaj. Satepan, miakej konemej peua tatakamatij. Sayoj ke moneki itech titanemiliskej tein kimachiliaj. Se tepopaj akin iselti, kijtoua: “Monekia nikinmelauas ika taixejekolis porin nikajsikamatia ke tayokoxtoyaj porin ininmomaj momikilij. Nitajtoua iniuan nochipa keman ueli. Ueli tisenyetokej keman titakualchiuaj tiotak. Itech nejon hora yejuan nechtapouiaj tein kinpanoua”.

15. ¿Toni moneki amo kichiuas tetat keman ika tajtos akin katka inamik?

¹⁵ Komo tiktsayankej amat ininixpan tekiuanij, amo teyi tiktaniskej komo tiktemouaj maj tokoneuan amo kipoujkaitakan akin katka tonamik. Keman tetatmej nochipa motajtolteuiaj kinijtakoua konemej uan kichiua maj satepan yejuan amo kinpoujkaitakanok nochin omen. Yejua ika maj amo tikiniluikan tajtolmej tein teyolxokoliaj kemej: “¡Titamati kemej mopopaj!”. Maski xa semi techyolxokolij, yejua ininpopaj tokoneuan, akin moneki maj omen inintatuan kintasojtakan, kinyekpiakan uan kinmelauakan.b

16. ¿Toni moneki nochipa kichiuaskej kalyetouanij kampa moajsi sayoj semej tetatmej?

¹⁶ Kemej moijtojya itech seki tamachtilis tein achto tikitakej, amo sayoj moneki se kinmelauas konemej, ta nejin moneki kinmachtis teisa. Komo kuali se kiixtalia keniuj se momachtis iTajtol Dios uelis techpaleuis maj amo tikpiakan miak kuejmolmej (Filipenses 3:16). Motelneki maj nochipa tiyakan nechikolmej (Hebreos 10:24, 25). No motelneki timomachtiskej Biblia kemej kalyetouanij nochi semanas, maski techouijmakas. Se temomaj kijtoua: “Satepan ke nitekiti nochi tonal, sayoj nikneki nimoseuis. Sayoj ke niktalia itech notanemilil ke moneki nimomachtis iuan nosiuapil, porin nikmati ke nejon motelneki. Yejua semi kiyolpaktia maj timosenmachtikan”.

17. ¿Toni uelis techmachtis ijkon kemej kiiskaltijkej Timoteo?

¹⁷ Imomaj uan iueyinan Timoteo, akin iuan yajtinemia Pablo itech tanojnotsalis, kinextilijkej tein Biblia tamachtia, uan nesi ke ipopaj amo kinpaleuij. Maski ijkon, Timoteo mochiuak se tel kuali itekitikauj Dios (Hechos 16:1, 2, TNM; 2 Timoteo 1:5; 3:14, 15). Uelis tikchiaskej maj no pano nejon iniuan tokoneuan keman tikiniskaltijtoskej komo timochikauaj ‘kuali tikinmachtijtiyaskej uan tikinmelaujtiyaskej’ ijkon kemej tamachtia Jiova (Efesios 6:4).

TONI TECHPALEUIS MAJ AMO TOSELTI TIMOMACHILIKAN

18, 19. 1) ¿Keniuj uelis kijtakos aksa akin amo iuan yetokok inamik komo momachilia iselti? 2) ¿Toni tayolmajxitilis uelis tapaleuis maj se moijkuanili amo kuali tanejnekilis?

¹⁸ Se temomaj akin iselti, kitayokolijtoj: “Keman niajsi kalijtik uan nikita ke noselti niyetok, okachiok keman nokoneuan moseuitij, notelselti nimomachilia”. Kemaj, kuejmol tein okachi kipiaj tetatmej akin ininnamik amo iniuan yetokok yejua ke inintelselti momachiliaj. Totech moajsi maj tiknejnekikan tiyetoskej iuan tonamik uan maj technextili netasojtalis. Sayoj ke ¿uelis aksa kichiuas tein yeski uan ijkon uelis kiyektalis nejon kuejmol? Itech itonaluan Pablo, seki siuamej akin ichpochmejok katkaj uan amo nemiaok inintakauj ‘ika inintanejnekilis mosekokaujkej de Cristo’ (1 Timoteo 5:11, 12). Semi timoijtakoskej komo tiktayekanaltiaj totanejnekilis uan amo tokuali uikalis iuan Dios (1 Timoteo 5:6).

¹⁹ Se takat akin itaixpantijkauj Jiova kijtoj: “Kemansa se kitelneki se motekas iuan aksa, sayoj ke ueli se motsakuilia. Keman itech se itsontekon ejko se tanemilil, moneki amo itech se tatanemilijtos. Moneki niman se moijkuanilis. No tapaleuia maj se tanemili itech se ikoneuan”. ITajtol Dios tayolmajxitia: “Xiktajtamikan nijinkes tataman chiualisme: Ma amo xiauilnentinemikan” (Colosenses 3:5). ‘Tiktajtamiskej’ oso timoijkuaniliskej tanemilil tein uelis techuikas maj tiauilnemikan kijtosneki ke senkis amo tikitaskej auilnemilis oso amo iniuan timouikaskej akin nochipa ika tajtojtokej.

20. 1) ¿Toni uelis panos komo tiknemiliaj timonamiktiskej iuan aksa akin amo kitekitilia Jiova? 2) ¿Toni kinpaleuij maj amo momachilianij ininselti akin itech yekinika siglo amo yetoyajok iuan ininnamik uan toni tapaleuiani itech nejin tonalmej?

²⁰ Seki itaixpantijkauan Jiova kinemiliaj monamiktiskej iuan aksa akin amo kitekitilia Dios (1 Corintios 7:39). ¿Kinpaleuiani nejon maj amo momachilikanok ininselti? Amo. Se tokniuj siuat akin kitsayanak amat ininixpan tekiuanij tanejmachtij: “Onkak se taman tein okachi amo kuali ke se yetos se iselti. Yejua se nemis iuan aksa akin amo monekia iuan se monamiktis”. Siuamej akin amo nemiaok inintakauj itech yekinika siglo kemansa momachilijkej ininselti, sayoj ke akin kipiayaj kuali taixejekolis “kinselia[yaj] aken yeski ikalpanojkauan” uan “kinpaleuia[yaj] in tokniuan taneltokani” uan akin tajyouijtoyaj (1 Timoteo 5:10). Tokniuan siuamej itech nejin tonalmej akin miak xiujmejya kichianij kiajsiskej se ininnamik akin kimoujkatoka Dios no kichiujtokej miak tekit. Se siuat akin amo nemiok itakauj uan kipia 68 xiujmej peuak kinkalpanoua okseki siuamej akin no amo nemiok inintakauj keman momachiliaya iselti. Yejua kijtoj: “Nikita ke ijkuak nikinkalpanoua oksekin uan nikchiua tekimej tein nikpia kalijtik uan nikchikaua nokuali uikalis iuan Dios, nechpaleuia maj amo nimomachiliok noselti”. Se kintapouis oksekin tein kichiuati iTekiuajyo Dios yejua se tekit tein semi tapaleuia (Mateo 28:19, 20).

21. ¿Keniuj netataujtil uan akin iniuan timouikaj uelis techpaleuiskej maj amo toselti timomachilikan?

²¹ Amo onkak nion se pajti tein uelis kichiuas maj amo se momachili se iselti. Sayoj ke uelis se kixikos ika chikaualis tein Jiova temaka. Itekitikauan kiseliaj nejon chikaualis keman kisentokaj kichiuaj “tatatautilis youalitonal” (1 Timoteo 5:5). Kemaj, se akin kichiua kemej Cristo moneki kitataujtis Dios maj kipaleui, xa hasta kitsajtsilis uan chokas (no xikonita Hebreos 5:7). Uelis semi techpaleuis komo tiktapouiaj Jiova ‘youalintonal’ tein tikmachiliaj itech toyolo, uan no komo iniuan timouikaj akin kuali monejnemiltiaj. Yejuan uelis techmakaskej “kuali tajtol” tein teyolchikaua tein ika motajtoua itech Proverbios 12:25.

22. ¿Toni uelis techpaleuis komo kemansa toselti timomachiliaj?

²² Komo kemansa timomachiliaj toselti, kemej xa uelis panos, maj tikelnamikikan ke amo akin kipia nochi tein kiuelitaskia. Tein melauj, nochin tokniuan kijyouijtokej teisa (1 Pedro 5:9). Maj amo semi itech titanemilikan keniuj tinemiaj achto (Eclesiastés 7:10). Maj tikitakan toni tein kuali tikpiaj axkan. Uan okachiok, maj tikixtalikan timelaujkanemiskej uan tikyolpaktiskej Jiova (Proverbios 27:11).

KENIUJ UELIS TAPALEUISKEJ OKSEKIN

23. ¿Toni moneki kichiuaskej akin kichiuaj kemej Cristo iniuan tetatmej akin ininselti?

²³ Semi kipia ipatiuj nepaleuil tein temakaj tokniuan itech nechikol. Santiago 1:27 kijtoua: “Se kipia de ne taneltokalis ten chipauak uan ne taneltokalis ten amo teyi ma tsojkuiltik iixpantsinko Totajtsin Dios [...] kuak se kinpaleuijtinemi in mikkakaualme uan kuak se kinpaleuijtinemi in siuakaualme ijkon keme yejuan tajyouiaj”. Kemaj, akin kichiuaj kemej Cristo moneki kinpaleuiskej kalyetouanij kampa sayoj semej tetatmej kiniskaltijtok ikoneuan. ¿Keniuj uelis kichiuaskej?

24. ¿Keniuj uelis se kinpaleuis kalyetouanij kampa moajsi sayoj semej tetatmej?

²⁴ Uelis se kinpaleuis ika tomin oso okseki taman. Biblia kijtoua: “Sekin tokniuan kipiaj miak tenika motekipanoske nikan taltikpak. Uan takan yejuan kitaske se tokniu ten amo teyi kipia, uan komo amo kipaleuiaj, yejuan nojonkes amo kipiaske tech ninyolijtik ne tetasojtalis de Dios” (1 Juan 3:17). Nejin kinextia ke akin kichiua kemej Cristo akin yolkualtakat yekinika moneki kuali kimatis tein kipanotokej uan tein kinpoloua kalyetouanij. Xa kinpoloua tomin. Kemansa, xa moneki maj kinpaleuikan maj kiyektalikan ininchan. Oso xa kitasojkamatiskej komo kinyoleuaj maj takuatij oso maj mosenixpetanitij itech se tatakualis.

25. ¿Keniuj okseki tokniuan uelis kinextiskej ke kinikneliaj tetatmej akin ininselti?

²⁵ Itech 1 Pedro 3:8 no moijtoua: “Nochi namejuan xikpiakan se tanemilil san [...] uan ximosepantasojtatiyakan. Uan no ximoyoliknelijtiyakan”. Se temomaj akin iselti kiniskaltia chikuasen ikoneuan kijtoj: “Semi ouij, uan kemansa nikmachilia ke amo niueliok. Sayoj ke, kemansa se tokniuj nechiluia: ‘Joan, tel kuali tein tikchiujtok. Amo nenkaj yeski’. Keman nikmati ke oksekin noka tanemiliaj uan ke noka motekipachouaj semi nechpaleuia”. Tokniuan siuamej akin xiuejkejya uelis kinpaleuiskej ichpochmej akin ininselti kiniskaltijtokej ininkoneuan keman kinkakij ijkuak kipiaj kuejmolmej tein mopinaujmatij kitapouiskej se takat.

26. ¿Keniuj tokniuan takamej akin kipiaj kuali taixejekolis uelis kipaleuiskej akin amo kipia semej itatuan?

²⁶ Tokniuan takamej uelis tapaleuiskej ika okseki taman. Job, se takat yolmelauak, kijtoj: “Nejua nikmakixtiaya [...] konet akin amo nemiok ipopaj uan akin yeski akin amo kipiaya tapaleuijkej” (Job 29:12). No ijkon, axkan seki tokniuan takamej ika nochi ininyolo ininka motekipachouaj akin amo kipiaj semej inintatuan uan kinnextiliaj “ne yek tetasojtalis ten ualeua de yolchipaualis” (1 Timoteo 1:5). Kemansa uelis yaskej kiteixmatiltitiuij iTekiuajyo Dios iniuan nejin telpochmej, sayoj ke amo kinsenkauaskej ininchankauan, uan no uelis kinyoleuaskej keman mosenmachtiaj kemej kalyetouanij oso maj moixpetanitij iniuan. Nejin xa uelis kipaleuis se telpoch akin amo kipia semej itatuan maj amo peua taixnamiki.

27. ¿Toni nepaleuil kipiaj tetatmej akin ininselti?

²⁷ Yejua tepopaj oso temomaj akin iselti “moneki kichiutinemis in tekit ijkon keme Dios kimaktilij” (Gálatas 6:5). Sayoj ke, uelis yolpakiskej ika netasojtalis tein kinnextiliaj tokniuan uan Jiova. Biblia kijtoua ke Dios “kipaleuia mikakaual uan siuat akin amo nemiok itakauj” (Salmo 146:9). Ika nepaleuil tein Jiova kinmaka ika netasojtalis, kalyetouanij kampa moajsi sayoj semej tetatmej uelis yolpakiskej.