Tionmomachtis iniuan itaixpantijkauan Jiova mitsonpaleuiani xikonmati tamachtilis tein melauak uan xikonpia se kuali uikalis iuan Dios. Axkan tiontakuaujtamati uan tikonchia tionnemis nochipaya itech Xochital. Uan no, tikonajsikamatini ke Jiova kipia se xolal nikan taltikpak (Zac. 8:23). Uan kemej tionpoui itech nechikol, tikonselijtokya miak tatiochiualismej.

Achto ke tionmoauis, mitsonpaleuis xikonita iniuan tayekananij seki tamachtilismej tein tikneltokaj akin tikchiuaj kemej Cristo (Heb. 6:1-3). Maj Jiova kitiochiua nochi tein tikonchiua porin tikonneki tikonixmatis uan maj mitsonmaka nemilis nochipaya (Juan 17:3).

1. ¿Keyej tikonneki tionmoauis?

2. ¿Akoni Jiova?

   • “Jiova yejua Dios tein melauak itech iluikak ajko uan itech taltikpak tani. Amo moajsi okse” (Deut. 4:39).

   • “Maj taltikpakneminij kimatikan ke motokay Jiova, ke sayoj tejua okachi tiUeyichiujkej itech nochi taltikpak” (Sal. 83:18).

3. ¿Keyej semi moneki maj tikuikan itokay Dios?

   • “Namejuan moneki nankichiuaskej netataujtil ijkuin: ‘ToTajtsin akin tiyetok iluikak, maj mochipaua motokay’” (Mat. 6:9, TNM).

   • “Nochin akin kijtouaj itokay Jiova makisaskej” (Rom. 10:13, TNM).

4. ¿Ika toni tajtolmej Biblia kiteixmatiltia Jiova?

   • “Jiova, Akin kichijchiuak semanauak taltikpak, yejua se Dios akin nemi nochipaya” (Isa. 40:28).

   • “ToTajtsin akin tiyetok iluikak” (Mat. 6:9, TNM).

   • “Dios yejuatsin netasojtalis” (1 Juan 4:8, TNM).

5. ¿Toni uelis tikmakaskej Jiova?

   • “Xiktasojtakan in Toueyitekotsin to Dios ika nochi namoyolo uan ika nochi namotanejnekilis, uan ika nochi namotanemililis uan ika nochi namochikaualis” (Mar. 12:30).

   • “Xikmouistiliti Totekotsin Dios, uan sayo Yejuatsin xikmouiskatekitilijtinemi” (Luc. 4:8).

6. ¿Keyej amo keman tiknekij tikauaskej Jiova?

   • “Xitamatkej, nokonetsin, uan xinechyolpakti, uan ijkon uelis niknankilis akin nechixnamiki” (Prov. 27:11).

7. ¿Akoni tiktataujtiaj uan itechkopa akoni tikchiuaj?

   • “Porin yek melau ten namechilia ke tech ne tonal Notajtsin Dios namechmaktilis nochi ten nankitajtaniliske ika in chikaualis de notokaytsin” (Juan 16:23).

8. ¿Toni uelis titajtaniskej ijkuak timotataujtiaj?

   • “Namejuan moneki nankichiuaskej netataujtil ijkuin: ‘ToTajtsin akin tiyetok iluikak, maj mochipaua motokay. Maj uiki moTekiuajyo. Maj mochiua motanejnekilis, ne iluikak uan no nikan taltikpak; xitechtapojpolui tein titauikaj, ijkon kemej tejuan tikintapojpoluijkej akin techtauikiliayaj. Uan amo xitechkaua maj titajtakokan, ta xitechmakixti imako Amokuali’” (Mat. 6:9-13, TNM).

   • “No tikpiaj ya se ueyi yoltakuautamatilis iuan Dios porin tikmatij ya ke komo tiktajtaniliaj Dios tensa ijkon keme yejua in itanejnekilis de Yejuatsin, ijkuakon Totajtsin Dios techkakilia” (1 Juan 5:14).

9. ¿Keyej Jiova amo kikakiskia inetataujtil se taltikpaknenkej?

   • “Kinotsaskej Jiova maj kinpaleui, sayoj ke yejua amo kinnankilis [...] porin kichiuaj tein amo kuali” (Miq. 3:4).

   • “Iixtololouan Jiova kinitaj akin yolmelaujkej, uan inakasuan kinkakij keman motataujtiaj; sayoj ke Jiova kinnekepilia akin kichiuaj tein amo kuali” (1 Ped. 3:12, TNM).

10. ¿Akoni Jesucristo?

    • “Simón Pedro tanankilij ijkuin: ‘Tejuatsin tion Cristo Temakixtijkatsin, ti Yektekonetsin de Dios den yoltika’” (Mat. 16:16).

11. ¿Keyej ualaj Jesús nikan taltikpak?

    • “Nejuatsin ni Yektagatsin amo niuala para ma aksame nechtekitilikan. Ta, niuala sayo para ma nitetekitilis, uan para ma niktemakas nonemilis para nikixtauas in tajtakol, uan para nikinmakixtis nijin taltikpakuani” (Mat. 20:28).

    • “No moneki nitetapouitiuj kuali tanauatilmej ika iTekiuajyo Dios itech okseki altepemej, porin yejua ika nechualtitankej” (Luc. 4:43, TNM).

12. ¿Keniuj uelis tiknextiskej ke tiktasojkamatij maj Jesús kitemakani inemilis?

    • “Cristo momikilij para kinixpakayotis nochi in taltikpakuani [...] para ke yejuan ma amo moyolpaktijtinemikan ok. Ta, para ke yejuan ma sayo Cristo kitekitilijtinemikan. Porin sayo Yejuatsin momikilij uan oksepa pankisak yoltok para kinmakixtis nochi yejuan” (2 Cor. 5:15).

13. ¿Toni tanauatil kipia Jesús?

    • “Notajtsin Dios nechmaktilij ya nochi in tanauatil tech in eluiyaktsinko uan nikan taltikpak” (Mat. 28:18).

    • “Totajtsin Dios kimouiskatokaytij Cristo ika se tokay ten kachi ueyi chiuke inpan nochi oksekin chiuanime” (Filip. 2:9).

14. ¿Tikonneltoka ke Oloch Taojtokaltianij akin kinixyekana itaixpantijkauan Jiova yejua takeual takuaujtamach uan tamatkej akin Jesús kiixtalij?

    • “¿Akoni yekmelauj takeual takuaujtamach uan tamatkej akin iteko kiixtalij maj kinixyekana okseki takeualmej uan ijkon kintamakas keman moneki?” (Mat. 24:45, TNM).

15. ¿Toni yektikatsin espíritu?

    • “Dios kijtoj ke kuak ne takuitapan tonalme ya, ijkuakon nikinualtitanilis no Yektikatsin [e]spíritu uan ijkon nikinyolpexontis nochi tagayot. Uan namotelpokauan uan namoichpokauan, yejuan tajtotinemiske ika tanauatilme ten kiseliske ika Nejuatsin notenkopaka” (Hech. 2:17).

    • “Porin maski namejuan amo nanyolchipauke, pero no kuali nankimatij toni nankimaktiliske namopiluan tensa ten kuali uan ten uelik. Pues kachi ok Namoueyitajtsin ten yetika eluiyaktsinko, Yejuatsin namechmajmaktilis uan namechyolpepexokaltis ika in Yektikatsin [e]spíritu ten nochi namejuan ten nankitajtaniliske” (Luc. 11:13).

16. ¿Keniuj Jiova kitekitiltia iyektikatsin espíritu?

    • “Ika itajtol Jiova mochijchiuak iluikak, uan ika iespíritu tein kisa itenoj, mochiuak nochi tein ompa onkak” (Sal. 33:6).

    • “Nankiseliskej chikaualis keman namotech ejkos yektikatsin espíritu, uan nanyeskij nannotaixpantijkauan [...] hasta kampa okachi uejka itech taltikpak” (Hech. 1:8, TNM).

    • “Ne uejkautanauatiani de Dios kiselijtinenke tanauatilme imako Dios uan kinijkuilojke. [...] Uan amo aken uelis kajsikamatis in tanauatilme de Dios ika por itamachilis de yejua san. Porin ne uejkau tanauatiani amo keman tanojnotstinenke ika yejuan nintanejnekilis san. Ta, [...] tanojnotstinenke itenkopaka Totajtsin Dios porin in Yektikatsin [e]spíritu kintenyekantinemik uan kintanemililtij” (1 Ped. 1:20, 21).

17. ¿Toni iTekiuajyo Dios?

    • “Dios akin nemi iluikak kitalis se tekiuajyot tein amo keman kiixpoloskej nion panos imako okse xolal. Nejin tekiuajyot kinkuechos uan kinixpolos nochi nejon tekiuajyomej, uan sayoj yejua yetos nochipaya” (Dan. 2:44).

18. ¿Toni tatiochiualismej mitsonualkuilis iTekiuajyo Dios?

    • “Totajtsin kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya” (Apoc. 21:4).

19. ¿Keniuj tikonmati ke amo uejkaua iTekiuajyo Dios kiualkuis tatiochiualismej?

    • “Kiajsitoj imomachtijkauan uan kijtojkej: ‘Xitechilui: ¿kemanian mochiuas nejin, uan keniuj tikmatiskej ke touan tiyetok uan keman motokijtosya itamilis tein onkak itech taltikpak?’. Jesús kinnankilij ijkon: ‘[...] Porin moajokuis altepet iuan okse altepet, uan tekiuajyot iuan okse tekiuajyot, uan tasojtis takual uan talolinis miakkan. Uan nejin kuali tanauatilmej ika Tekiuajyot motetapouis semanauak taltikpak kampa nemij uan ijkon nochin kimatiskej, uan ompa ejkos tamilis’” (Mat. 24:3, 4, 7, 14 TNM).

    • “Tech ne takuitapan [‘itamian’, TNM] tonalme topan uetsikiu ne ueyi tajyouilis. Uan nemiske in tagayot ijkuin: Motasojtatinemiske yejuan san, [...] xijxikuintinemiske ika tomin san, uan moueyichiutinemiske uan moueyinektinemiske. Uan [...] kitelchiutinemiske Totajtsin Dios, uan amo kintakamatiske ok nintatuan. Uan amo no teyi ika motasojkamachiliske [...,] amo kipiaj ok tetasojtalis nion no teiknelijtinemi. Uan yejuan sayo tepajpantinemiske san tensa [...], uan amo ueli motsakuilia ok den nintanejnekilis ten kualkui tajtakol. Uan nojonkes no kuelitaj san kintajyouiltiske aksame ika toneukayot, uan no kitauelitstinemij nochi ten kuali. [...] Amo uelis se takuautamatis iuan porin sayo takajkayauaj. [...] Uan mopoutinemij ke semi ueyi chiuanime. [...] Sayo kitemojtinemij kenin moyolpaktijtinemiske pero amo kitemojtinemij kenin para kiyolpaktijtinemiske Dios. Yejuan nojonkes mopoutinemiske no keme taneltokani [...], pero yejuan kimajpeutiyoue ne yek chikaualis den techmaktilijtinemi ya in Yektikatsin [e]spíritu. Uan [...] ximosekokaua de nijin takajkayauani” (2 Tim. 3:1-5).

20. ¿Keniuj tiknextiaj ke tiktayekanaltiaj iTekiuajyo Dios itech tonemilis?

    • “Yejua ika, xiksentokakan xiktemokan achto iTekiuajyo Dios uan imelaujkayo” (Mat. 6:33, TNM).

    • “Jesús kiniluij imomachtijkauan: ‘Komo aksa kineki nechtojtokas, maj moixtopeua yejua uan maj kikui itajyouilis kouit uan maj kisentoka nechtojtoka’” (Mat. 16:24, TNM).

21. ¿Akoni Satanás uan amokuali ejekamej?

    • “Namejuan namotat yejua ne in amokuali Satanás. [...] Uan ne amokuali Satanás ipa temiktijke desde ne tonal kuak tatsinpeuak nochi” (Juan 8:44).

    • “Kikalantamotke ne ueyi amokuali tekuani, yejua ne in kouat ten ne achtopa ipa nentiuits. Uan ne kouat kitokaytijke in amokuali, uan no kitokaytijke Satanás, ne ten kinkajkayautinemi nochi in taltikpakuani. Uan kikalantamotke ne amokuali Satanás den eluiyaktsinko uan no kinkalantamotke nochi ne itekitikaikniuan de Satanás” (Apoc. 12:9).

22. ¿Toni tein amo melauak Satanás kijtouilia Jiova uan no itekitikauan?

    • “Siuat kiluij kouat: ‘Itakilo koujmej tein moajsij itech xochital uelis tikuaskej. Sayoj ke itakilo kouit tein moajsi tatajko itech xochital, Dios kijtoj: ‘Moneki amo nankikuaskej, amo, moneki amo nankimatokaskej uan ijkon amo nanmikiskej’”. Ompa, kouat kiluij siuat: ‘Yekmelauj amo nanmikiskej. Porin Dios kimati ke itech tonal keman nankikuaskej koujtakilot, nanixtajtapouiskej uan nanmochiuaskej kemej Dios, uan nankiixmatiskej tein kuali uan tein amo kuali’” (Gén. 3:2-5).

    • “Satanás kinankilij Jiova: ‘Se taltikpaknenkej kitemakas nochi tein kipia uan ijkon momakixtis’” (Job 2:4).

23. ¿Keniuj uelis tiknextiskej ke nejon tein kijtoua Satanás amo melauak?

    • “Xiktekitili [Dios] ika moyolo ajsitok” (1 Crón. 28:9).

    • “¡Amo keman nikauas Dios hasta maj nimiki!” (Job 27:5).

24. ¿Keyej timomikiliaj?

    • “Itechkakopaka ne achtopa tagat Adán ten motajtakolmakak in tajtakol momauak ya tech nochi senmanauak. Uan [...] ongak mikilis nochi senmanauak ika por ne tajtakol de Adán. Uan no ne mikilis mosouako [...] inpan nochi in taltikpakuani porin nochi in taltikpakuani motajtakolmakakke” (Rom. 5:12).

25. ¿Keniuj moajsij mikemej?

    • “Akin yoltokej kimattokej ke momikiliskej, sayoj ke akin momikilijkejya amo teyi kimatijok” (Ecl. 9:5).

26. ¿Oksepa nemiskej akin momikilijkejya?

    • “Dios kinpankixtis yoltokke nochi in animajme [oso mikemej], amo sayo in yolkualime. Ta, no nekes ten amo yolkualime” (Hech. 24:15).

27. ¿Kanachimej yaskej ne iluikak uan tekiuajtiskej iuan Jesús?

    • “Nikitak ya Yejuatsin ten tamati keme ichkatsin [...] metsijkatok ipan ne tepetsin ten kiliaj Sión. Uan ompa iuan Yejuatsin yetoyaj se ciento uan omepoal uan naui mil taneltokani de Dios. Uan nochi yejuan ijkuiliutok tech inixkuako in tokayit de Cristo uan in tokaytsin de Dios, Yejuatsin Itajtsin de Cristo” (Apoc. 14:1).

Tamachtilis ika Biblia mitsonpaleuiani xikonmati toni kichia Jiova xikonchiua uan toni moneki tikonchiuas tein ika tikonnextis ke tikontakamati itanauatiluan tein melaujkej. No, mitsonpaleuiani xikonpata seki taman kemej tionmonejnemiltiaya uan kemej tikonitaya nemilis. Tikonixtaliani tionnemis kemej kijtoua itanauatiluan Jiova, yejua ika, ueli tikonteixmatiltia kuali tanauatilmej.

Tionmomachtis nejin netajtanilmej mitsonpaleuis nochipa xikonelnamiki itanauatiluan Jiova. No mitsonelnamiktis seki taman tein moneki tikonchiuas komo tikonneki tikontekitilis. Uan no, tikonitas ke moneki tionmonejnemiltis ika se tanemilil chipauak uan ijkon tikonueyichiuas Jiova ika nochi moyolo (2 Cor. 1:12; 1 Tim. 1:19; 1 Ped. 3:16, 21).

Ika nochi tein tionmomachtianiya, tikyekmatij ke tikonneki maj Jiova mitsonixyekana uan tikonneki tionpouis itech inechikol. Netajtanilmej uan textos mitsonpaleuiskej kuali xikonajsikamati ke Jiova kichia maj titatakamatikan itech nechikol, itech kalyetouanij oso iniuan taltikpaktekiuanij. Tikyekmatij ke okachi tikonpatiuitas nochi taman tein Jiova ika kinmachtia itekitikauan tein kichikaua inintakuaujtamatilis. Se taman tein ika techmachtia yejua nechikolmej kampa tikonnekis tionyas uan tiontanankilis nochi tein uelis.

Uan no, itech nejin taxelol moitas ke semi moneki se kitetapouis iTekiuajyo Dios, se kinpaleuis oksekin maj kiixmatikan Jiova uan se kiteixmatiltis tein kichiujtok ininka taltikpakneminij (Mat. 24:14; 28:19, 20). Uan no, mitsonpaleuis xikonelnamiki ke amo auil se motemaktis iuan Jiova Dios uan se moauis. Uelis senkis tiontakuaujtamatis ke Jiova kipatiuita tein tikonixtalijtok tikonchiuas porin tikonnextia ke tikontasojkamati tein mitsonmakani.

1. ¿Toni taman nenamiktilis kiyolpaktia Dios? Kemej kijtoua Biblia, ¿kemanian aksa uelis kitsayanas amat ininixpan tekiuanij?

   • “¿Xe amo keman nankileerojtinemij tech in Tajkuilolamatsin de Dios de ke Totajtsin Dios kichiuak in ome taman kuak ne tatsinpeuak nochi? Ijkuak Yejuatsin kichiuak in tagat uan in siuat. [...] Ika ya nojon in tagat ma kinkaua itatajtsin uan inanajtsin uan ma mosentali iuan isiuau. Uan in ome mokauas sanse san. Uan ijkon amo omen ok yeske. Ta, sayo se. Ika ya nojon in tagat uan in siuat ten Dios kinsentalis namikuani ya, yejuan nojonkes ma amo se tagat kinxexelos ok. [...] Uan ne tagat ten kikauas nisiuau uan monamiktis iuan okse siuat, yejua ne motajtakolmakas” (Mat. 19:4-6, 9).

2. ¿Keyej takat uan siuat akin sennemij moneki monamiktiskej ininixpan tekiuanij? Komo tejuatsin tikonpia monamik, ¿nanijkuiliujtokej ininixpan tekiuanij kemej moneki?

   • “Xikintalnamiktijtiyakan in taneltokani ke ma motemaktijtiyakan uan ma kintakamatiyakan ne uejueyi tayekanani uan tekiuani” (Tito 3:1).

   • “Xikmouiskapouakan ne nemilis ne ten senyetinemij in namikuani. Uan xikchipaukaitakan ne nemilis de namikuani den senkochtinemij uan ma amo xiauilnentinemikan. Uan ijkon tamechiliaj porin Totajtsin Dios kintatsakuiltis nochi nekes ten auilnenkanentinemij de namikuani ya, oso de ayamo namikuani ya” (Heb. 13:4).

3. ¿Toni kineki Dios maj kichiuakan sejsemej kalyetouanij?

   • “Xikaki, nokonetsin, keman mitsmelaua mopopaj, uan amo xikaua tein mitsmachtia momomaj” (Prov. 1:8).

   • “Porin teyokich ma kiyekantinemi isiuau ijkon keme Cristo kinyekantinemi itaneltokakauan. [...] Uan namejuan nanteyokichuan, moneki xikintasojtatiyakan namosiuauan ijkon keme Totekotsin Cristo kinyoltasojta itaneltokakauan” (Efes. 5:23, 25).

   • “Tetatmej, amo xikinkualantikan nanmokoneuan, ta xiksentokakan xikiniskaltikan itech itamachtilis uan itayolmajxitilis Jiova” (Efes. 6:4).

   • “Uan namejuan, nantekoneuan de nantaneltokani, moneki xikintakamatinemikan namoteiskaltijkauan tech nochi namonemilispan porin ika nijin namotatakamatilis nankiyolpaktiaj Totekotsin” (Col. 3:20).

   • “Nantesiuauan, ximotekauilikan ma namechyekanakan namoyokichuan” (1 Ped. 3:1).

4. ¿Keyej moneki tikpatiuitaskej nemilis?

   • “[Dios] techmakatok tonemilis nikan taltikpak, uan no Yejuatsin techmaka toijiyo. Uan nochi ten tikpiaj tomako ya, Yejuatsin techmakatok. [...] Ika iuelilis de Totajtsin Dios nochi tejuan tinentinemij uan tinejnentinemij uan tiyoltinemij” (Hech. 17:25, 28).

5. ¿Keyej moneki amo akin tikmiktiskej, nion no se konetsin akin ayamo yoli?

   • “Komo seki takamej moteuiaj uan yekmelauj kikokouaj se siuat akin kokoxkayetok uan [...] komo semej momikilia, moneki motemakas nemilis ika nemilis” (Éx. 21:22, 23).

   • “Moixtololouan nechitakej keman nikatka se embrión, uan nochi tein kipia itech moamaix ijkuiliujtoya, hasta ijkuiliujtoya tonalmej keman mochijchiujtiyaskiaj, achto ke nion semej onkaskia” (Sal. 139:16).

   • “Jiova kitauelita [...] taltikpaknenkej tein kitoyaua iesyo akin amo kichiujtok tein amo kuali” (Prov. 6:16, 17).

6. ¿Toni tanauatia Jiova ika esti?

   • “Amo xikuakan [...] esti; uan amo no xikuakan nakat de ne tapialme ten kuaestemitokke” (Hech. 15:29).

7. ¿Keyej moneki tikintasojtaskej tokniuan itech nechikol?

   • “Namechmaka se yankuik tanauatil [...] ke moneki ximoyolsepantasojtakan se uan okse [...] ijkon keme Nejuatsin namechyoltasojtatiuits ya [...]. Uan [...] nochi in taltikpakuani kajsikamatiske ke melau nannomomachtijkauan” (Juan 13:34, 35).

8. Komo aksa kipia se kokolis tein temaua uan tein ika uelis se momikilis: 1) ¿Keyej moneki maj amo kinkanpitso oso kintenamiki oso maj kinnaua oksekin? 2) ¿Keyej moneki maj amo mokuejmolo komo oksekin amo kiyoleuaj ininchan? 3) Komo aksa achto kichiuak seki taman tein uelis kiualkuilis se kokolis tein temaua, ¿keyej moneki yas iniuan tapajtianij maj kiitakan itech iesyo ox kipia nejon kokolis, achto ke peuas kiixmatis aksa akin iuan monamiktis? 4) Komo aksa kipia se kokolis tein temaua, ¿keyej moneki kiluis tokniuj akin kinixyekana oloch tayekananij achto ke moauis?

   • “Amo xitauikatinemikan iuan aksame. Ta, sayo moneki ximosepantasojtatiyakan se uan okse. [...] ‘Xiktasojtatinemi moikniu ijkon keme tejua timoyoltasojtatinemi’. Uan nekes ten tetasojtatinemij, yejuan nojonkes amo kitajyouiltijtinemij inikniu” (Rom. 13:8-10).

   • “Amo xiktemojtinemikan de keniu nanmopaleuijtinemiske namejuan san. Ta, kachi ok xiktemojtinemikan de keniu xikinpaleuijtiyakan oksekin tokniuan taneltokani” (Filip. 2:4).

9. ¿Keyej kichia Jiova maj tikintapojpoluikan oksekin?

   • “Xiksentokakan ximoxikojtiyakan se iuan okse uan ximotapojpoluikan ika pakilis se iuan okse komo aksa kiyolxokolijkej. Kemej Jiova ika miak pakilis namechtapojpoluij namejuan, no ijkon xikchiuakan namejuan” (Col. 3:13, TNM).

10. ¿Toni moneki tikchiuaskej komo se tokniuj techtakajkayauilia oso techtominkuilia?

    • “Takan se mokniu mitschiuilia tensa ten amo kuali, ijkuakon nimantsin xiyo xiknojnotsati uan xikajsikamatiltiti moselti. Uan komo mitskakilia ten tikiluiti ne mokniu, ijkon yejua kiselia nemakixtilis. Uan komo amo mitskakilia ten tikiluiti, ijkuakon tejua xikinnotsa se ome eyi taka taneltokani ma yakan namouan [...]. Uan takan nion no mokniu mitskakilia ten tikiluiti iuan ne testigos, ijkuakon xikinilui [...] ne tokniuan [‘itech nechikol’, TNM] [...]. Uan takan nion no ijkon in mokniu kinkakilia in tokniuan, ijkuakon xikpouakan ne mokniu keme se analte[koka]yot naken amo poui iuan Dios” (Mat. 18:15-17).

11. ¿Keniuj kiita Jiova nejin tajtakolmej?

    • ▪ Auilnemilis

    • ▪ Maj aksa kinueyichiua tiotsitsin

    • ▪ Maj se takat moteka iuan okse takat oso se siuat iuan okse siuat

    • ▪ Tachtekilis

    • ▪ Neauiltilis ika tomin

    • ▪ Tauanalis

    • “Amo ximopojpolokan. Nion akin mosentekaj akin amo namikuanij, nion akin kinueyichiuaj tiotsitsin, nion namikuanij akin auilnemij, nion takat akin mochiua kemej siuat, nion takat akin moteka iuan itakaikniuj, nion tachtekinij, nion xijxikuimej, nion tauananij, nion tauijuikaltianij uan nion akin kitekuiliaj teisa ika temojmoujtilis amo yetoskej itech itekiuajyo Dios” (1 Cor. 6:9, 10, TNM).

12. ¿Toni tikonixtaliani tikonchiuas ika nochi taman auilnemilis?

    • “Xikcholouilikan de ne auilnemilis” (1 Cor. 6:18).

13. Komo tapajtijkej amo techmaka kemej pajti, ¿keyej moneki amo tikuiskej drogas, marihuana uan okseki taman tein kijtakos totanemilil oso tein amo uelis tikauaskejok komo tikuij?

    • “Ximotemaktijtiyakan iuan Dios [...] ijkon keme nanitetayokoliluan [...] para ijkon xikmouistilijtiyakan Dios. Uan no xichipaukanemikan uan xikyolpaktijtinemikan Dios. Uan nochi nijin taman chipaukanemilis, yejua nojon monekis xikchiutiyakan [...]. Uan amo xinentinemikan ijkon keme in taltikpakuani namechnajnauatia. Ta, ximotekauilikan iuan Dios para ma Yejuatsin namechtamachilispatatiu para ijkon namechyankuikatilijtiyas ika yankuik tamachilis. [...] Uan nankajsikamatiske ten kuali; uan [...] keniu nankiyolpaktijtiyaske Dios; uan [...] keniu nankiyekajsikachiuaske ne tekit ten Dios kimonekiltia xikchiuakan” (Rom. 12:1, 2).

    • “Xiktasojta moueyitekotsin Totajtsin Dios [...] ika nochi motanemililis” (Mat. 22:37).

14. ¿Katiyejua tachiualismej tein mochiua ika ininchikaualis amokuali ejekamej techiluia Dios maj tikixtopeuakan?

    • “Amo moneki moajsis mouan se aksa akin [...] momachtia kiixejekos toni mochiuas satepan, akin ika naualot kijtoua maj mochiua teisa, nion akin momachtia kitemos teisa tein kinextis tein mochiuas satepan, nion aksa akin tenaualuijkej, nion akin techiualtia tein kineki ika naualot, nion akin kiitati aksa akin tajtoua iniuan espíritus oso akin ueli kijtoua tein amo akin kimati, nion aksa akin kintatajtania mikemej” (Deut. 18:10, 11).

15. Komo aksa ueyi tajtakoua uan oksepa kineki kuali mouikas iuan Jiova, ¿toni moneki niman kichiuas?

    • “Nimitsmatiltij notajtakol, uan amo niktatij. Nikijtoj: ‘Nikiluis Jiova notajtakoluan’” (Sal. 32:5).

    • “¿Moajsi namouan aksa akin mokokoua? Maj kinnotsa tayekananij itech nechikol, uan maj yejuan kitatataujtilikan, uan maj kiojxilikan aceite itech itokay Jiova. Uan netataujtil ika takuaujtamatilis kipajtis akin mokokoua uan Jiova kiajokuis. Uan no, komo kichiuak tajtakolmej, kitapojpoluis” (Sant. 5:14, 15, TNM).

16. Komo tikmatij ke se tokniuj kichiuak se ueyi tajtakol, ¿toni moneki tikchiuaskej?

    • “Komo se aksa tajtakoua porin tauijuikaltia ininixpan miakej uan yejua kikakik uan iixpantik, kiitak oso kimatik nejon, komo amo kitematiltia, itech yetos nepolol” (Lev. 5:1).

17. Komo motanauatia itech nechikol ke aksa amook itaixpantijkauj Jiova, ¿uelis tiksentokaskej timouikaskej iuan?

    • “Amo iuan ximouikatinemikan se taneltokke komo yejua auilkanemi ika siuame oso xijxikuintanemilijtinemi; oso yejua kinmouistilia tatadiosme; oso yejua taijitojtinemi; oso yejua tajtoleerojtinemi; oso yejua tauantijtinemi; oso yejua tachtektinemi. Uan komo se aksa mopoua keme taneltokke uan no kichiutinemi nijin tataman pitsotik nemilis, pues amo no iuan xitakuakan” (1 Cor. 5:11).

    • “Uan komo aksame namechkalpanokij uan amo kualkuij in tamachtilis de Cristo, ijkuakon namejuan amo xikinselikan tech namokalijtik kampa nanmosentiliaj para nankimouistiliske Dios, uan nion no xikintajpalokan” (2 Juan 10).

18. ¿Keyej moneki tikontemos kemej motasojikniuan sayoj akin kitasojtaj Jiova?

    • “Akin nentinemi iniuan akin tamatinij mochiuas tamatkej, sayoj ke akin mouika iniuan akin amo tamatij kipias ouijkayot” (Prov. 13:20).

    • “Amo ximokajkayauakan. Amo kuali tasojiknimej amo techpaleuiaj maj tiksentokakan tikchiuakan tein kuali” (1 Cor. 15:33, TNM).

19. ¿Keyej itaixpantijkauan Jiova amo mokalakiaj itech política?

    • “Keme Nejuatsin [Jesús] amo nipoutinemi nikan taltikpak, no ijkon nomomachtijkauan yejuan amo no poutinemij nikan taltikpak” (Juan 17:16).

20. ¿Keyej moneki tikintakamatiskej tekiuanij?

    • “Nochi namejuan moneki xikintakamatiyakan nochi nojon tekiuani ten kintalia in gobierno. Porin ma xikmatikan ke amo se tekiua ongak ke ma amo Dios itenkopaka tekititok. Uan nochi tataman tekiuani Dios ijkon kintalij ya” (Rom. 13:1).

21. Komo tekiuanij technauatiaj maj tikchiuakan teisa tein kitapanauilia itanauatil Dios, ¿toni moneki tikchiuaskej?

    • “Moneki tiktakamatiskej Dios kemej tekiuaj uan amo taltikpakneminij” (Hech. 5:29, TNM).

22. ¿Katiyejua textos tein kipia Biblia mitsonpaleuiskej xikonixpejpena se tekit tein kiyolpaktis Dios?

    • “Amo moteuisok se altepet iuan okse altepet, nion momachtiskejok neteuilis” (Miq. 4:3).

    • “Namejuan nannopueblojkauan ten nantaneltokaj nouantsin, namechilia xikisakan de ne pueblo Babilonia para amo ximotajtakolmakatinemikan ijkon keme yejuan motajtakolmakakke ya, para amo no namopan uetsis nochi ne chiauis ten Dios kinualpantoyauilis” (Apoc. 18:4).

23. ¿Toni taman neixpetanilis tikonixpejpenas uan katiyejua tikonixtopeuas?

    • “Jiova [...] senkis kitauelita akin kitasojta tateuilis” (Sal. 11:5).

    • “Xiktauelitstiyakan nochi tataman chiualisme den amokuali. Uan xiksentokakan xikchiutinemikan ne chiualisme ten kuali” (Rom. 12:9).

    • “Xitanemilijtinemikan sayo ika ten tamelaua uan sayo ika ten kuika mouisyot. Uan [...] ika ne yek nemilis uan sayo ika ten chipauak. Uan [...] ten kinamiki ma xiktasojtakan. Uan no xikuikan ne taman tamachilis ten kinamiki ma tikpialikan mouisyot. Uan no [...] ika nochi ten kuali ten kualkui chipaukanemilis. Uan [...] de ne chiualisme ten kinamiki ma tikinmouiskapouakan. Uan [...] ika sayo nijin chipauke uelilisme ten moneki tikinmouiskatejteneuaj” (Filip. 4:8).

24. ¿Keyej tiitaixpantijkauan Jiova amo titaueyichiuaj iniuan okseki taneltokalismej?

    • “Amo uelis nanyetoskej itech “imesa Jiova” uan itech ininmesa amokuali ejekamej” (1 Cor. 10:21, TNM).

    • “Totekotsin kilia ijkuin: ‘Xikisakan uan ximosekokauan de nekes ten amo taneltokani. Uan amo ximokalakijtinemikan ok tech ninpitsotiknemilis. Uan komo ijkon nankichiutiyoue, ijkuakon Nejuatsin namechchiua ke nannoaxkauan ya’” (2 Cor. 6:17).

25. ¿Katiyejua tayolmajxitilismej tein kipia Biblia mitsonpaleuis xikonixejeko ox uelis tionyas itech iluimej tein motelixmatij kampa tionnemi?

    • “Mosentilijkej iniuan akin nemiaj itech okseki altepemej, uan kichiujkej tein yejuan kichiuayaj. Uan kisentokakej kintekitiliaj inintiotsitsin, uan yejuan mochiujkej kemej mekat tein ika uetskej” (Sal. 106:35, 36).

    • “Akin momikilijkejya amo teyi kimatijok” (Ecl. 9:5).

    • “Keme Nejuatsin amo nipoutinemi nikan taltikpak, no ijkon nomomachtijkauan yejuan amo no poutinemij nikan taltikpak” (Juan 17:16).

    • “Amo xikchiutinemikan ok ijkon keme nankichiutiualajke kuak nannentinemiaj tech in tajtakolojpan keme nekes ten amo kixmatij Dios. Uan tech nojon tonalme nankichiutinemiaj ijkuin: Nanauilnentinemiaj uan nankichiutinemiaj ijkon keme namotanejnekilis ten kuika tajtakol. Uan nanmouintijtiualayaj uan nantatakuajtiualayaj ika eliuisyot uan nanmosenuintijtiualayaj. Uan nankinmouistilijtiualayaj miak tataman tatadiosme ten Dios ipa namechtakaualtijka ya” (1 Ped. 4:3).

26. ¿Keniuj mitsonpaleuiaj neskayomej tein kipia Biblia xikonixejeko ox tioniluichiuas ijkuak aksa xiuajsi?

    • “Eyi tonal satepan kiiluichiuilijkej faraón keman xiuajsik. Yejua ika, faraón kinchijchiuilij se takualis itekitikauan uan tanauatij maj kinotsatij akin kitekaya tayil uan akin kinixyekanaya panchiuanij. Ompa oksepa kimakak tekit tein kipiaya akin kitekaya tayil [...]. Sayoj kichiuak maj kipilokan akin kinixyekanaya panchiuanij” (Gén. 40:20-22).

    • “Se tonal kuak xiumajsik in rey Herodes, ijkuakon ne isuatakpakoneu peuak mijtotia ninixpan in Herodes uan in okseki ueyi chiuanime. Uan itakpakoneu yejua isiuapil de Herodías, uan semi kiyolpaktij nijin Herodes de ne imijtotilis. lka ya nojon in rey Herodes moyektenkauak iuan isuatakpakoneu uan kiteneuak ijkuin: ‘Yek melau [...] nimitsmakas nochi ten tinechtajtanilis’. Uan in isuatakpakoneu ipa achtopa ya moichtakanojnotsak ya iuan inan. lka ya nojon isuatakpakoneu kilij in rey Herodes ijkuin: ‘Nechmaka itech se plato itsontekon ne Juan Taauijke’. Ijkuakon kinchikaukanauatij ma kikechtekikan in Juan tech ne cárcel” (Mat. 14:6-8, 10).

27. ¿Keyej tikonneki tikontakamatis tein tayolmajxitiskej tayekananij?

    • “Xikintakamatiyakan namotayekankauan [...] uan ximotekauilikan ma namechyekanakan, porin yejuan [...] kiyekpixtinemij namotalnamikilis. Uan yejuan kuali kimatij ke se tonal kipiaj de kitemakatitiue cuenta iuan Dios. Uan xikinpaleuijtiyakan namotayekankauan para ke yejuan uelis tekititinemiske ka yolpakilis uan amo ka ne yolkuejmololis. Porin komo namejuan nankinyolkuejmolojtinemij namotayekankauan, ijkuakon namejuan amo teyi nanmoseliltiaj ten kuali” (Heb. 13:17).

28. ¿Keyej moneki tikxeloskej tiempo tejuan uan tokalyetouanij uan ijkon tikixtajtoltiskej uan timomachtiskej Biblia?

    • “Iyolpakilis yetok itech itanauatil Jiova, uan kiixtajtoltia Itanauatil ika tajtol amo chikauak youal uan tonal. Uan yejua mochiuas kemej se kouit tein toktok kampa motalojtok at, tein kitemaka itakilo keman ajsi tonal, tein imaxiujyo amo kuetaui, uan nochi tein kichiuas kuali kisas” (Sal. 1:2, 3).

29. ¿Keyej techyolpaktia tiyaskej nechikolmej uan titanankiliskej?

    • “Motokay nikinixmatiltis nokniuan; tatajko itech nechikol nimitsueyitalis” (Sal. 22:22).

    • “Ma tiktemolijtiyakan de keniu timopaleuijtiyaske se uan okse uan de keniu timotasojtatiyaske se uan okse uan de keniu tikchiutiyaske in kuali tachiualisme. Uan sekin tokniuan amo mosentilijtinemij para kimouistiliske Dios pero ma amo ijkon ma tikchiutinemikan tejuan. Ta, ma timosenpanyolmajxitijtiyakan se uan okse uan kachi ok ma timopaleuijtiyakan se uan okse ika ne yolmajxitilis porin tikitaj ke kachi motokijtiuits ya ne tonal” (Heb. 10:24, 25).

30. ¿Katiyejua tekit tein okachi moneki technauatij Jesús maj tikchiuakan?

    • “Xiyakan uan xikinchiuakan nomomachtijkauan, xikinauikan [...] xikinmachtikan maj kitakamatikan nochi tein namechnauatij namejuan” (Mat. 28:19, 20, TNM).

31. ¿Keniuj kineki Jiova maj tiktemakakan tonepaleuil ika tomin tein ika mochiua itekiyo Dios oso keman tikinpaleuiskej tokniuan?

    • “Xikueyitali Jiova ika tein tikpia tein kipia ipatiuj” (Prov. 3:9).

    • “Cada senme taneltokani ma kitemaka itapaleuilis ijkon keme yejua kinemilij ya [...], ma amo kitemaka itapaleuilis ika ne yolkokolis. Uan amo no ma kitemaka tapaleuilis porin kimachilia ke Dios kifuerzajuia ma kitemaka. Porin Totajtsin Dios kitasojta se tagat ten kitemaka itapaleuilis ika yolpakilis” (2 Cor. 9:7).

32. ¿Toni ouijkayomej tikchiaj tikixnamikiskej akin tikchiuaj kemej Cristo?

    • “Tatiochiualme de Dios ne taneltokani ten tajyouiaj porin aksame kinkejkeloaj de ninchipaukanemilis. Porin komo ijkon kichiuaj, ijkuakon [...] [iTekiuajyo Dios ininaxkatis, TNM]. Nantatiochiualme namejuan kuak namechuijuikaltiske uan kuak namechtajyouiltiske uan kuak namechijtouiliske miak xolopijyot porin nantakuautamatij itech Nejuatsin notokay. Ijkuakon ximoyolpaktikan uan ximouelitakan porin se tonal nankiseliske se ueyi ne tetayokolil nepa eluiyaktsinko. Uan ijkon keme namechtauelitaj axkan, no ijkon kintauelitatiualajke nitanauatijkauan de Dios ten nemikoj ne achtopa ya ke namejuan” (Mat. 5:10-12).

33. ¿Keyej se tatiochiualis se moauis kemej semej itaixpantijkauan Jiova?

    • “Motajtol notech mochiuak se ueyi pakilis uan kiyolpaktij noyolo, porin nikuika motokay, Jiova Dios” (Jer. 15:16).