¿Kanachi itaixpantijkauan Jiova tikonixmati? Tisekimej xa tinemij kampa tejuatsin tionnemi, oso titekitij kampa tejuatsin tiontekiti oso timosenmachtiaj; xa mouan titajtouanij ika Biblia. ¿Tiakonimej yekmelauj, uan keyej tikteixmatiltiaj tein tikneltokaj?

Tinemij kemej nochin taltikpakneminij. Touan pouij takamej uan siuamej akin kayomej itech tataman xolalmej uan kipiaj tataman nemilis. Tisekimej tikpiayaj se taneltokalis, oksekin amo titaneltokayaj; sayoj ke achtopa ke timochiuaskiaj tiitaixpantijkauan Jiova, tinochin tikxelojkej tepitsin totonaluan uan timomachtijkej ika nejmachkayot tein tamachtia Biblia (Hechos 17:11). Tikselijkej tein timomachtijkej uan ompa tikixtalijkej tisejsemej tikueyichiuaskej Jiova Dios.

Tikseliaj nepaleuil keman timomachtiaj Biblia. Kemej nochin taltikpakneminij, tikpiaj kuejmolmej uan seki taman tein techtapololtia; sayoj ke kemej timochikauaj nochipa timonejnemiltiskej kemej tanauatia Biblia, okachi kuali tinemij (Salmo 128:1, 2). Yejua ika, nejin se taman tein ika tikintapouiaj taltikpakneminij tein kuali timomachtianij itech Biblia.

Tiktayekanaltiaj tein Dios technauatia. Nejin tikajsij itech Biblia, uan techpaleuia maj kuali timomachilikan. Uan no, techyolchikaua maj tikinpoujkaitakan taltikpakneminij uan maj timelaujkej uan tikualtakamej. Techpaleuia maj tichipaujkej uan maj titapaleuikan kampa tinemiskej, maj timoyekuikakan iniuan tochankauan uan maj tichipaujkanemikan. Titakuaujtamatij ke “Totajtsin Dios amo [kinchichikotasojta] in tagayot”. Yejua ika, ueli tikijtouaj ke totaneltokalis techsentilia iniuan akin okseko kayomej, uan amo timoxelouaj porin titatamamej nion porin tataman tekiuajyomej techixyekanaj. Maski titamatij kemej oksekin, tipouij kemej yeskia itech se xolal, uan amo onkak okse kemej nejon (Hechos 4:13; 10:34, 35).

• ¿Toni kipiaj itaixpantijkauan Jiova ijkon kemej okseki taltikpakneminij?

• ¿Toni tamachtilismej tikselianij itech Biblia?

Miakej taltikpakneminij kinemiliaj ke tiitaixpantijkauan Jiova yankuixtok peuak totaneltokalis. Sayoj ke, panoua dos mil setecientos xiujmejya, Biblia kijtoua ke itekitikauan Dios akin melauak kintokaytij ‘itaixpantijkauan’ (Isaías 43:10-12). Achtopa itech xiuit 1931 techixmatiaj kemej Momachtianij ika Biblia. ¿Keyej tikixtalijkej timotokaytiskej itaixpantijkauan Jiova?

Porin kiixnextia akoni toDios. Itokay Dios, Jiova, ixnesi panoua siete mil itech Biblia, kemej kinextiaj tataman uejkauj tajkuilolmej. Itech miak Biblias, nejin tokayit kipatanij uan kitalianij kemej toTajtsin oso Dios. Sayoj ke Dios akin melauak moteixmatiltij iuan Moisés kemej Jiova, uan kiiluij: “Nejin yejua notokay nochipaya” (Éxodo 3:15). Ijkon monextij ke yejuatsin amo kemej okseki tiotsitsin tein amo melaujkej. Tejuan titelyolpakij timoteixmatiltiskej ika tokayit yektik tein kipia Dios.

Porin kiixnextia tekit tein tikchiuaj. Ne uejkauj, miakej taltikpakneminij kiteixmatiltijkej ke takuaujtamatiaj iuan Jiova. Peuak iuan Abel akin melaujkanemik, uan ijkon kemej panouayaj miak xiujmej, Noé, Abrahán, Sara, Moisés, David uan oksekin, no mopoujkej iniuan “uel miakke taneltokani” (Hebreos 11:4–12:1). Ijkon kemej se taltikpaknenkej kitajtouia ininixpan tekiuanij se aksa akin amo teyi tauika, tejuan no ijkon tiknekij tikteixmatiltiskej akoni yekmelauj toDios.

Porin tikchiuaj ijkon kemej Jesús. Biblia kijtoua ke Jesús se akin “tanextilijtinemi sayo ika ten melau san” (Apocalipsis [Revelación] 3:14). Yejua kijtoj ke kiteixmatiltijka akoni iTajtsin uan ke ualajka tenextiliko ‘sayoj tein melauj’ ika Dios (Juan 17:26; 18:37). Yejua ika, akin yekmelauj imomachtijkauan moneki kinextiskej ke kitekitiliaj Jiova uan kiteixmatiltiskej itokay. Yejua nejon tein tiitaixpantijkauan Jiova timochikauaj tikchiuaskej.

• ¿Keyej Momachtianij ika Biblia satepan motokaytijkej itaixpantijkauan Jiova?

• ¿Kemanian peuak Jiova kinpia itaixpantijkauan nikan taltikpak?

• ¿Akoni okachi ueyi itaixpantijkauj Jiova?

Biblia achto kijtojka ke satepan ke momikiliskia Cristo, seki yekinika imomachtijkauan tamachtiskiaj tein amo melauak uan kipataskiaj tein yekmelauj tamachtia iTajtol Dios (Hechos 20:29, 30). Uan yejua nejon tein panok. Yejuan amo tamachtijkej maj se nemi kemej Cristo tamachtij, ta kinelojkej itamachtilisuan iuan tamachtilismej tein amo melaujkej (2 Timoteo 4:3, 4). Axkan, ¿keyej titakuaujtamatij ke tikajsikamatij kemej moneki tein tamachtia Biblia?

Ajsik tonal keman Jiova kinextij tein melauak. Dios achto kijtojka ke itech tonalmej keman ejkos tamilis “motelmiakilis[kia] taixmatilis tein melauak” (Daniel 12:4). Itech xiuit 1870, seki taltikpakneminij akin kitemouayaj tein melauak kiitakej ke miak tamachtilismej tein motemakayaj itech tiopamej amo mokixtiayaj itech iTajtol Dios. Yejua ika, peujkej kitemouaj tamachtilismej tein yekinika moijkuilojkej itech Biblia, uan Jiova kinpaleuij maj kiajsikamatikan tein yekmelauj tamachtia.

Taltikpakneminij akin kipiakej kuali ininyolo momachtijkej Biblia ika nejmachkayot. Nejon Momachtianij ika Biblia, kemej moixmatiaj itaixpantijkauan Jiova achtopayan, momachtiayaj ijkon kemej axkan timomachtiaj. Yejuan momachtiayaj Biblia ika sejse tamachtilis. Keman kiajsiaj se tajkuilol tein ouij, kitemouayaj okseki tajkuilolmej tein kinpaleuiskia maj kiajsikamatikan, uan keman tein kiajsikamatiaj mouikaya iuan nochi tein kijtoua Biblia, ijkuak kiamataliayaj. Kemej kikauayaj maj Biblia kinextiani nochi, oksepa nesiko tein yekmelauj tamachtia Biblia ika itokay uan iTekiuajyo Dios, tein kineki maj kiselikan taltikpakneminij uan tein panos ika taltikpak, keniuj moajsij mikemej uan ke onkas se neajokuilis. Nochi tein momachtijkej kinpaleuij maj amo kineltokakan nion maj kichiuakan tein amo melauak (Juan 8:31, 32).

Itech xiuit 1879 kiajsikamatkej ke ajsikaya tonal keman monekia moteixmatiltis tein melauak noyampa taltikpak. Itech nejon xiuit peujkej kichiuaj amaix tein axkan tiksentokaj tikmoyauaj: Tanejmachtijkej. Kiteixmatiltijtok iTekiuajyo Jiova. Itech nejin tonalmej tikteixmatiltiaj tamachtilis tein kitemaka Biblia itech doscientos cuarenta uejueyi altepemej uan kemej itech setecientos cincuenta tataman tajtolmej. ¡Amo keman ijkon moteixmatiltijtoya tamachtilis tein melauak!

• ¿Toni mochiuak ika tein yekmelauj tamachtia Biblia satepan ke momikilij Cristo?

• ¿Keniuj oksepa nesik tein yekmelauj tamachtia iTajtol Dios?

Itech miak xiujmej, tiitaixpantijkauan Jiova tikixtijkej, tiktekitiltijkej uan tikmoyaujkej tataman Biblias. Sayoj ke, satepan tikitakej ke monekia se yankuik Biblia tein kinpaleuiskia taltikpakneminij maj okachi amo ouij ‘kiajsikamatikan in melauak Tajtoltsin de Dios’, ta Dios kineki maj nochin taltikpakneminij kipiakan nejon taixmatilis (1 Timoteo 2:3, 4). Yejua ika, itech xiuit 1950 tipeujkej tikixtiaj seki amatajkuilolmej tein kipia Biblia itech tajtol inglés uan moijkuiloj kemej axkan motajtoua, nejin yejua Traducción del Nuevo Mundo. Nejin Biblia kikepkejya, uan amo mopatak nion se tanemilil, itech panoua ciento treinta tataman tajtolmej.

Monekia se Biblia tein amo ouij moajsikamatis. Tajtolmej mopatatiyouij kemej panouaj tonalmej, uan miak Biblias kipiaj tajtolmej tein amo moajsikamatijok oso tein amo mokuijok uan ouij moajsikamati. Uan no, moajsinij seki uejkauj tajkuilolmej tein okachi ajsitok tanemililmej kipiaj, tein tapaleuia maj okachi moajsikamati tajtol hebreo, arameo uan griego kemej yekinika moijkuiloj Biblia.

Monekia se Biblia kampa amo kipatiliskiaj tein Dios kijtojka. Akin kikepaj Biblia amo ueli kipatiliaj tein Dios kijtoj maj moijkuilo; moneki kichijchiuaskej ijkon kemej yekinika moijkuiloj. Sayoj ke itech miak Biblias amo motekitiltia itokay Dios, Jiova.

Monekia se Biblia tein kiueyitalis Dios (2 Samuel 23:2). Itech Traducción del Nuevo Mundo, itokay Jiova oksepa moijkuiloj kampa ipa ixnesia itech uejkauj tajkuilolmej uan ajsi kemej siete mil, se neskayot yejua tein tatsintan ixnesi (Salmo 83:18). Kichijchiujkej ika miak nejmachkayot uan miak xiujmej motelmachtijkej uan tatemojkej keniuj kikepaskej nejin Biblia, yejua ika kualtsin temaka pakilis tikixtajtoltiskej porin kuali kijtoua tein kinemilia Dios. Komo tejuatsin tikonpia se oso amo tikonpia se itech motajtol, timitsonyoleuaj xikonixtajtolti iTajtol Jiova mojmostaj (Josué 1:8; Salmo 1:2, 3).

• ¿Keyej tikitakej ke monekia se yankuik Biblia?

• ¿Toni moneki kichiuas mojmostaj akin kineki kimatis katiyejua itanejnekilis Dios?