Itech inechikol Dios kampa tipouij amo onkakej tayekananij akin kintaxtauiaj. Ta okachi kuali, mochiua kemej kichiuayaj yekinika itatojtokakauan Cristo, kinixtaliaj tayekananij akin uelis ‘kinyolmajxitiskej in tokniuan, nekes tein toTekotsin moinaxkatilij’ (Hechos 20:28). Nejin tayekananij kipiaj kuali taixejekolis uan se kuali uikalis iuan Dios akin kinixyekanaj uan kinyekpiaj akin pouij itech nechikol, ‘ika sayoj tein kuali tanejnekilis uan amo ika ne tekiuil. Uan amo no kinyolmajxitijtinemij in taneltokanij porin kinektinemij nintomin san. Ta, tekititinemij ika nochi inintanejnekilis’ (1 Pedro 5:1-3). ¿Toni kichiuaj uan ijkon techpaleuiaj?

Techyekpiaj uan techmatampauiaj. Tayekananij kinpaleuiaj ika Biblia akin pouij itech nechikol uan kiitaj maj amo mouejkatilikan iuan Dios. Yejuan kimattokej ke Dios kinkauilij nejin tekit tein motelneki, yejua ika amo sayoj tanajnauatiaj, ta techpaleuiaj maj kuali tiyetokan uan maj tiyolpakikan (2 Corintios 1:24). Ijkon kemej se tajpixkej kinyekpia sejse iichkauan ika miak nejmachkayot, tayekananij motekipachouaj kinixmatiskej sejsemej itekitikauan Dios (Proverbios 27:23).

Techmachtiaj keniuj tikchiuaskej itanejnekilis Dios. Itech sejse semana, tayekananij kiixyekanaj tamachtilismej itech nechikolmej, tein tapaleuiaj maj tikpiakan chikauak totakuaujtamatilis (Hechos 15:32). Nejin takamej tel tekitinij no kiixyekanaj tanojnotsalis, touan tanojnotsaj uan techiluiaj keniuj uelis tataman tikchiuaskej totanojnotsalis.

Techyolchikauaj tisejsemej. Tayekananij techkalpanouaj uan no touan tajtouaj itech Kali kampa tiMosentiliaj, nejon techpaleuia maj tisejsemej tikpiakan se kuali uikalis iuan Dios porin techpaleuiaj uan techyolseuiaj ika Biblia (Santiago 5:14, 15).

Tayekananij kichiuaj miak taman itech nechikol, sayoj ke miakej no moneki kixeloskej tonal uan ijkon motekipanoskej, uan no kinpiaj ininchankauan akin moneki kinyekpiaskej. Nejin tokniuan tel chikauak tekitij, yejua ika moneki tikinpoujkaitaskej (1 Tesalonicenses 5:12, 13).

• ¿Toni tekit kichiuaj tayekananij itech nechikol?

• ¿Keniuj kinextiaj tayekananij ke toka motekipachouaj tisejsemej?

Itech Biblia motajtoua ika ome oloch takamej akin kichiuaj tekimej itech nechikol: “tayekananij uan tapaleuianij” (Filipenses 1:1, TNM). Itech miak nechikolmej moajsij sekin nejin tokniuan. ¿Keniuj techpaleuiaj tokniuan akin tekitij kemej tapaleuianij itech nechikol?

Kinpaleuiaj oloch tayekananij. Tapaleuianij kipiaj se kuali uikalis iuan Dios, uelis iniuan se takuaujtamatis uan kichiuaj inintekiuj ika miak nejmachkayot, sekin telpochmejok uan oksekin xiuejkejya. Yejuan tapaleuiaj ika tekimej tein motelnekij uan tein nochipa mochiuaj itech nechikol uan itech Kali kampa tiMosentiliaj. Ijkon, tayekananij okachi uelij tamachtiaj uan kinyolchikauaj tokniuan.

Tapaleuiaj itech miak taman tein moneki. Seki tapaleuianij tekitij kemej tayektalianij uan kinseliaj nochin akin youij nechikolmej. Oksekin kitaliaj nekuikatilmej uan kiitaj maj kuali kakisti tepos, kixejxelouaj amaixmej, kiamataliaj nochi tomin tein motekitiltia uan kiixtaliaj itech katiyejua xolalmej moneki tanojnotsaskej akin pouij itech nechikol. No ijkon, tapaleuiaj maj chipauak uan maj kuali moita Kali kampa tiMosentiliaj uan kinpaleuiaj tokniuan akin xiuejkejya ijkon kemej kinnauatiaj tayekananij. Tapaleuianij kichiuaj tein yeski tekimej tein kiniluiskej maj kichiuakan, uan nochin kinpoujkaitaj porin tekitij chikauak uan ika miak pakilis (1 Timoteo 3:13).

Temakaj se kuali neskayot ika ininkuali uikalis iuan Dios. Tapaleuianij kinixpejpenaj porin kipiaj kualneskayomej tein kinextia ke kipiaj se kuali uikalis iuan Dios. Tamachtilismej tein kitemakaj itech nechikol kichikauaj totakuaujtamatilis. Kemej kikauaj se kuali neskayot itech tanojnotsalis, techpaleuia maj titanojnotsakan ika yolchikaualis, uan porin yejuan kuali kinpaleuiaj tayekananij kichiuaj maj onka yolpakilis uan maj kuali timouikakan (Efesios 4:16). Satepan, yejuan no uelis mochiuaskej tayekananij.

• ¿Toni kualneskayomej kipiaj tapaleuianij?

• ¿Keniuj kichiuaj tapaleuianij maj kuali motekiti itech nechikol?

Itech tajkuilolmej tein moajsij itech Escrituras Griegas Cristianas semi ika motajtoua Bernabé uan tatitanil Pablo. Nejin takamej katkaj takalpanouanij uan yayaj kinitatij nechikolmej itech nejon tonalmej. ¿Keyej ijkon kichiuayaj? Porin kinekiaj maj kuali yetokan ininikniuan akin pouiaj itech inintaneltokalis. Pablo kijtoj ke kinekia oksepa kinkalpanos uan ijkon kimatis keniuj yetoyaj. Itanejnekilis katka kinyolchikauas maski tel miak kilómetro monekia yas (Hechos 15:36). Axkan tokniuan takalpanouanij no ijkon kichiuaj.

Techyolchikauakij. Sejse tokniuj takalpanojkej itech circuito kinita kemej veinte nechikolmej uan ojpa xiuit yetok se semana itech sejse nechikol. Uelis techtelpaleuis ininneskayo nejin tokniuan uan ininnamik, komo kipiaj. Yejuan mochikauaj kinixmatiskej akin telpochmejok uan akin xiuejkejya, uan yolpakij touan tanojnotsaskej uan kinkalpanoskej taltikpakneminij akin tikinmachtijtokej ika Biblia. Nejin tokniuan takalpanouanij iniuan tayekananij itech nechikol kinyolchikauatij okseki tokniuan; uan no, techyolchikauaj keman kitemakaj tel kuali tanojnotsmej itech nechikolmej uan itech uejueyi nechikolmej (Hechos 15:35).

Ininka motekipachouaj nochin. Tokniuan takalpanouanij itech circuito motekipachouaj maj akin pouij itech nechikolmej kuali kipiakan inintakuaujtamatilis iuan Dios. Monechikouaj iniuan tayekananij uan tapaleuianij uan kiitaj kuali tekit tein mochiuak uan kinmakaj tayolmajxitilis tein kinpaleuis maj okachi kuali kichiuakan inintekiuj. Kinpaleuiaj akin kichiuaj tekit kemej precursor maj okachi kuali tekitikan, uan yolpakij kinixmatiskej taltikpakneminij akin yekin peuaj touan monechikouaj uan no porin kimatij ke kiiskaltijtokej inintakuaujtamatilis iuan Dios. Sejsemej nejin tokniuan senkis motemakaj tekititinemiskej uan ijkon techpaleuiskej (2 Corintios 8:23). Maj no titakuaujtamatikan uan maj tikueyichiuakan Dios kemej yejuan (Hebreos 13:7).

• ¿Keyej kinkalpanouaj nechikolmej tokniuan takalpanouanij itech circuito?

• ¿Keniuj uelis tejuatsin tikonselis nepaleuil keman takalpanouaj nejon tokniuan?

Keman mochiua se tetsauit, itaixpantijkauan Jiova ijsiujka tikitaj keniuj tikinpaleuiskej tokniuan akin kipanotokej nejon ouijkayot. Ika nejin tiknextiaj ke yekmelauj timotasojtaj (Juan 13:34, 35; 1 Juan 3:17, 18). ¿Keniuj titapaleuiaj?

Titapaleuiaj ika tomin. Akin kichiuayaj kemej Cristo itech altepet Antioquía kinpaleuijkej ika tomin akin no kichiuayaj kemej Cristo itech altepet Judea keman kipanokej se ueyi mayan itech nejon altepet (Hechos 11:27-30). No ijkon, keman tikmatij ke tokniuan tajyouijtokej ika se ueyi ouijkayot kansaika itech taltikpak, itech tonechikol tiktemakaj tomin uan motitani kampa moneki kiseliskej nejon tapaleuil (2 Corintios 8:13-15).

Titapaleuitij kampa mochiua tetsauit. Tayekananij akin moajsij kampa mochiuak se tetsauit kintemouaj sejsemej akin pouij itech nechikol uan kiitaj maj kuali yetokan. Tokniuan akin kiixyekanaj tekit kampa mochiua se tetsauit uelis kiitaskej maj motemaka tein kikuaskej, at tein tayiskej, tein ika motakentiskej, tapajtilis uan kani mokauaskej. Miakej itaixpantijkauan Jiova akin kimatij kichiuaskej se tekit, ika inintomin youij tapaleuitij kampa mochiuak tetsauit oso kiyekchijchiuatij ininchan tokniuan oso Kalmej kampa Mosentiliaj. Kemej kuali timouikaj uan miakpaya tisentekitinij, ueli ijsiujka titapaleuiaj keman panoua se ouijkayot. Uan maski tikinpaleuiaj sayoj “tokniuan taneltokani”, no tikinpaleuiaj oksekin keman ueli, maski kipiaskej okse taneltokalis (Gálatas 6:10).

Tikinyolseuiaj ika iTajtol Dios uan tikinpaleuiaj maj kuali momachilikan. Akin kipanokej se tetsauit okachi kinekij maj kinyolseuikan. Ijkuak, Jiova, “Dios akin temaka nochi yolseuilis”, kinyolchikaua (2 Corintios 1:3, 4, TNM). Yejua ika, akin tajyouijtokej tikinnextiliaj Biblia kampa kijtoua tein mochiuas satepan, tein kinextiaj ke amo uejkaua iTekiuajyo Dios kiixpolos nochi tataman tetsaujmej tein kichiua maj onka tekokojkayot uan tajyouilis (Apocalipsis 21:4).

• ¿Keyej tiitaixpantijkauan Jiova ueli ijsiujka titapaleuiaj keman mochiua se tetsauit?

• ¿Keniuj tikinyolseuiaj ika Biblia akin kipanokej se tetsauit?

Tepitsin achtopa ijkuak momikiliskia, Jesús monojnotstoya sayoj iniuan naui itatitaniluan: Pedro, Santiago, Juan uan Andrés. Keman ika tajtoj tein kinextiskia iyetolis itech itamian tonalmej, kijtoj se taman tein motelneki: “Uan axkan namechtapouiti de se takeual ten yolkuali uan ten kuatamatke [takeual takuaujtamach uan tamatkej, TNM]. Uan nipatrón de ne takeual den tatekitiltijke den oksekin takeualme, uan ma yejua tanauati ma kintamakakan kuak ne hora de takualis” (Mateo 24:3, 45; Marcos 13:3, 4). Ika nejin tajtolmej, Jesús amo tajtojtoya ika takual tein se kikua, ta yejua kineskayotij nepaleuil tein ika kiixmatiskiaj Dios kemej takual. Kiyekijtoj ke kemej se teko, kinixpejpenaskia akin kitemakatoskiaj nepaleuil tein ika itatojtokakauan kiixmatiskiaj Dios itech tonalmej keman ejkos tamilis. ¿Akonimej pouij ompa?

Amo ueyi oloch taixpejpenalmej akin kitojtokaj Jesús. Itech “takeual” pouij Oloch Taojtokaltianij akin kinixyekanaj iTaixpantijkauan Jiova. Yejuan kitemakaj nepaleuil keman moneki tein ika kiixmatiskej Dios akin no kiueyichiuaj Jiova. Tejuan tikchiaj ininnepaleuil nejin oloch taltikpakneminij melaujkej “ma [techtamakakan] kuak ne monekis hora de takualis” (Lucas 12:42).

Taixyekanaj itech inechikol Dios (1 Timoteo 3:15). Jesús kinkauilij nejin oloch taltikpakneminij se ueyi tekit. Monekia taixyekanaskej itech inechikol Jiova nikan taltikpak, kemej kiyekpiaskej nochi tein iaxka, kiixyekanaskej tanojnotsalis uan techmachtiskej itech nechikolmej. Yejua ika, kemej moneki techmakas tein moneki uan keman moneki, “takeual takuaujtamach uan tamatkej” kitemaka nepaleuil tein ika uelis tikixmatiskej Dios ika amaixmej tein tiktekitiltiaj itech tanojnotsalis uan tamachtilismej tein motemakaj itech tonechikoluan uan itech uejueyi nechikolmej.

Nejin “takeual” takuaujtamach porin amo kipata tein tamachtia Biblia uan kiteixmatiltia kuali tanauatilmej, uan tamatkej porin kiixyekana ika tamatilis nochi tein Cristo kikauilij maj kiyekpia nikan taltikpak (Hechos 10:42). Jiova kitiochiujtok tekit uan kichiua maj momiakilikan itaixpantijkauan uan maj no tel onka miak nepaleuil tein ika kiixmatiskej yejuatsin (Isaías 60:22; 65:13).

• ¿Akoni kiixtalij Jesús maj kinmaka imomachtijkauan nepaleuil tein ika kiixmatiskej Dios?

• ¿Keyej moijtoua ke takuaujtamach uan tamatkej nejin “takeual”?

Itech inintonaluan yekinika itatojtokakauan Cristo, seki amo ueyi oloch taltikpakneminij kampa pouiaj “tatitanilme de Cristo uan inuan [...] ueuentsitsin” akin yetoyaj Jerusalén kichiuayaj tekit kemej taixyekananij, yejuan kiixejekouayaj seki taman tein motelnekia uan tein kinpaleuiskia nochin taixpejpenalmej akin kichiuayaj kemej Cristo (Hechos 15:2). Yejuan kitemouayaj tein kijtoua iTajtol Dios uan kikauayaj maj iespíritu kinixyekana, ijkon ueliaj kisepanixejekouayaj uan moyektenkauayaj ika tein momachtiayaj (Hechos 15:25). Itech totonaluan no ijkon kichiuaj Oloch Taojtokaltianij.

Ika nejin Dios kichiua itanejnekilis. Tokniuan taixpejpenalmej akin pouij itech Oloch Taojtokaltianij kitelpoujkaitaj iTajtol Dios uan kitelmatij keniuj kiixyekanaskej tekit uan tamachtiskej. Monechikouaj sejse semana uan kiitaj keniuj okachi uelis kinpaleuiskej tokniuan semanauak taltikpak. Ijkon kemej mochiuaya itech inintonaluan yekinika itatojtokakauan Cristo, kitemakaj tanauatilmej tein mokixtiaj itech Biblia, uelis ika amat oso iniuan tokniuan takalpanouanij uan okseki tokniuan. Nejin tapaleuia maj nochin kipiakan sayoj se tanemilil uan maj sentekitikan itech ixolal Dios (Hechos 16:4, 5). No ijkon, kiixyekanaj nochi tamachtilis tein tikseliaj, kinyolchikauaj nochin maj kitayekanaltikan tanojnotsalis uan kiitaj keman kinixtaliaj tokniuan maj kichiuakan tataman tekimej itech inechikol Dios.

Mokauaj maj kinixyekana Dios ika iespíritu. Oloch Taojtokaltianij kitemouaj inepaleuil okachi Ueyi Taixyekankej itech iluikak uan taltikpak, Jiova, uan akin taixyekana itech nechikol, Jesús (1 Corintios 11:3; Efesios 5:23). Nejon tokniuan ika miak pakilis taixyekanaj itech ixolal Dios, sayoj ke amo kitemouaj moueyichiuaskej. Kemej kichiuaj taixpejpenalmej, ‘kitoktiliaj Cristo tein tamati kemej ichkatsin uan kiseuikaj kampa yeski yas’ (Apocalipsis 14:4). Oloch Taojtokaltianij kiteltasojkamatij keman tiktajtaniaj Dios maj kinpaleui uan maj kitiochiua tekit tein kiixyekanaj.

• Itech inintonaluan yekinika itatojtokakauan Cristo, ¿akonimej taixyekanayaj?

• ¿Keniuj Oloch Taojtokaltianij axkan mokauaj maj Dios kinixyekana?

Betel se tokayit itech tajtol hebreo tein kijtosneki “IChan Dios” (Génesis 28:17, 19, nota). Nejin se tokayit tein kuali kinamiki kipiaskej kalmej tein kichijchiuanij itaixpantijkauan Jiova noyampa taltikpak uan kampa motemaka nepaleuil uan moixyekana tanojnotsalis. Oloch Taojtokaltianij, moajsij itech Betel tein yetok itech altepet Nueva York (Estados Unidos), uan ompa kiixyekanaj nochi tekimej tein mochiua itech okseki kalmej Betel tein moajsij itech miak tataman altepemej. Nochin akin tekitij itech nejon kalmej moixmatij kemej kalyetouanij Betel. Ijkon kemej okseki kalyetouanij, sentakuaj, sennemij, sentekitij uan mosenmachtiaj iTajtol Dios (Salmo 133:1).

Se kali kampa nochin akin ompa nemij tekitij ika nochi ininyolo. Itech sejse Betel moajsij takamej uan siuamej akin kipiaj se kuali uikalis iuan Dios uan mojmostaj kitayekanaltiaj kichiuaskej itanejnekilis uan tapaleuiaj maj mochiua itekiyo Jiova (Mateo 6:33). Amo akin kiselia taxtauil, tein kemaj kinmakaj kani mokauaskej uan tein kikuaskej, uan no tepitsin tomin tein ika uelis mopaleuiskej. Nochin kipiaj se tekit tein ika tapaleuiaj: seki itech oficina, kampa takualchiuaj oso kampa kintamakaj; oksekin kampa mochijchiua miak tataman amaixmej; uan oksekin itech tachipaualis, kampa tapakaj, kampa kiitaj maj kuali yeto kali uan okseki tamanok.

Kampa mochiua miak tekit tein tapaleuia maj motanojnotsa ika iTekiuajyo Dios. Tein okachi tayekantok itech sejse Betel yejua maj nochin taltikpakneminij tein uelis maj kiixmatikan tein tamachtia Biblia. Nejin amaix kinextia nejon. Moijkuiloj ika inintaixyekanalis Oloch Taojtokaltianij, kititankej ika computadora noyampa taltikpak kampa tokniuan kikepaj amaixmej itech okse tajtol, mokixtij itech amat ika teposmej tein ijsiujka tekitij itech tataman kalmej Betel uan kititankej itech panoua ciento diez mil nechikolmej. Itech nochi nejin tataman tekimej, nochin kalyetouanij Betel kuali tapaleuiaj maj mochiua tekit tein okachi motelneki: maj moteixmatilti kuali tanauatilmej (Marcos 13:10).

• ¿Akonimej tapaleuiaj itech kali Betel, uan toni nepaleuil kinmakaj?

• ¿Toni tekit tein motelneki tapaleuiaj ika tein mochiua itech sejse kali Betel?

Akin pouij iniuan kalyetouanij Betel kichiuaj tataman tekimej uan ijkon tapaleuiaj maj motanojnotsa itech se oso miak uejueyi altepemej; uelis kampa kikepaj amaixmej itech okse tajtol, kampa kikixtiaj itech amat, kampa kiitaj maj nochipa onka amaixmej oso kampa kichijchiuaj ika audio uan video, uan okseki tamanok.

Taixyekananij itech Sucursal kiixyekanaj tekit. Oloch Taojtokaltianij kinixpejpenaj eyi tayekananij oso okachi akin takuaujtamachmej maj taixyekanakan itech se kali Betel. Nejin tokniuan kinnauatiaj Oloch Taojtokaltianij nochi kuali tekit tein mochiujtok itech altepemej kampa taixyekanaj uan kuejmolmej tein mochiuaj, ijkon ueli kimatij toni tamachtilis kiualkuis itech amaixmej tein kisas satepan, ijkon kemej tamachtilis tein motemakas itech nechikolmej uan uejueyi nechikolmej. Oloch Taojtokaltianij kititanij se tokniuj akin tajtoua inintenkopa, maj takalpano itech kalmej Betel uan maj kinpaleui Taixyekananij itech Sucursal maj kuali kichiuakan inintekiuj (Proverbios 11:14). Keman kinkalpanoua mochiua se nechikol uan kitemaka se tanojnots tein ika kinyolchikaua tokniuan akin pouij itech altepemej kampa motaixyekana itech kali Betel.

Temakaj nepaleuil itech nechikolmej. Itech kali Betel kijtouaj uan kiamataliaj keman mochiua se yankuik nechikol. No ijkon, kinixyekanaj akin kichiuaj tekit kemej precursor, akin kichiuaj tekit kemej misionero uan tokniuan takalpanouanij itech circuito. Kiixtaliaj kani uan kemanian mochiuaskej uejueyi nechikolmej, kiixyekanaj tachijchiualis ika Kalmej kampa tiMosentiliaj uan kititanij amaixmej itech nechikolmej. Nochi tein mochiua itech se kali Betel tapaleuia maj okachi kuali motanojnotsa (1 Corintios 14:33, 40).

• ¿Keniuj Taixyekananij itech Sucursal kinpaleuiaj Oloch Taojtokaltianij?

• ¿Toni tekimej mochiua uan moixyekana itech se kali Betel?

Tikchijchiuaj amaixmej kemej itech setecientos cincuenta tataman tajtolmej, nejon tapaleuia maj tikteixmatiltikan “Tajtoltsin de Dios [itech] nochi paísme” uan kampa moajsij “nochi tataman tagayot uan [...] nochi tataman pueblojuani uan [...] nochi tataman tagayot ten tajtoaj ika tataman tajtolis” (Apocalipsis 14:6). ¿Keniuj tikchiuaj nejin tel ueyi tekit? Ika ininnepaleuil seki tokniuan tajkuilouanij itech nochi taltikpak uan tel miakej tajtolkepanij kikepaj amaixmej itech okse tajtol; nochin yejuan itaixpantijkauan Jiova.

Yekinika tajkuilol mochijchiua itech tajtol inglés. Oloch Taojtokaltianij kiixyekanaj tekit tein kichiuaj Kampa moijkuilouaj Tamachtilismej. Ompa tokniuan kiixyekanaj tekit tein kichiuaj tajkuilouanij akin ompa tekitij uan itech okseki kalmej Betel. Kemej tokniuan akin ompa tapaleuiaj kayomej itech tataman altepemej, tapaleuia maj moijkuilo tein uelis kinpaleuis tataman taltikpakneminij, uan no maj kinekikan kiixtajtoltiskej itech nochi taltikpak.

Tein moijkuilojya kintitaniliaj akin kikepaj amaixmej itech okse tajtol. Keman motamichijchiua se tajkuilol, kintitaniliaj itech computadora tokniuan akin kikepaj amaixmej itech okse tajtol noyampa taltikpak. Yejuan mochikauaj kiixpejpenaskej tajtolmej tein moneki uan ijkon tapaleuia maj tanemilil tein ijkuiliujtok itech tajtol inglés mopanolti itech inintajtol (Eclesiastés 12:10).

Computadora tapaleuia maj okachi ijsiujka mochiua tekit. Se computadora amo uelis kichiuas tein kichiua se tajkuilojkej oso se akin kikepa amaixmej itech okse tajtol. Sayoj ke, okachi ijsiujka uelis mochiuas nejon tekit keman motekitiltia computadora uan okseki taman tein ika momachtiaj. Itaixpantijkauan Jiova kichijchiujkej se nepaleuil tein itokay Sistema Electrónico de Edición Plurilingüe (MEPS, kemej moijkuiloua itech inglés). Ika nejin ueli motajkuiloua ika computadora itech miak ciento tataman tajtolmej, mosentilia tajkuilol iuan taixkopimej uan mochijchiua maj kuali mokixti kemej amaix.

¿Keyej tikchiuaj tel miak tekit, maski kansaika sayoj seki miles taltikpakneminij tajtouaj se taman tajtol? Porin Jiova kineki maj “nochi in taltikpakuani [...] makisakan de nintajtakoluan para ma ijkon kajsikamatikij in melauak Tajtoltsin de Dios” (1 Timoteo 2:3, 4).

• ¿Toni tekit mochiua keman moijkuilouaj toamaixuan?

• ¿Keyej tikepaj amaixmej itech tel miak tataman tajtolmej?

Nochi xiujmej, tiitaixpantijkauan Jiova tikchijchiuaj uan tikmoyauaj Biblias miak millones uan okseki amaixmej, uan amo tikinnamakaj. Tikchijchiuaj Kalmej kampa tiMosentiliaj uan kalmej Betel uan tikitaj maj kuali yetokan; tikinmakaj tepitsin tapaleuil ika tomin akin tekitij Betel uan akin kichiuaj tekit kemej misionero, uan tiktitanij nepaleuil kampa mochiua se tetsauit. ¿Kani mokixtia tomin tein motekitiltia itech nochi nejin?

Amo titajtantinemij tomin. Maski moneki miak tomin tein ika uelis mochiuas tanojnotsalis, amo tikintajtaniaj tomin taltikpakneminij. Panoua cien xiujmejya, itech ojpatika amaix Tanejmachtijkej itech tajtol inglés moijtoj ke tikneltokaj ke Jiova techpaleuijtok uan ke tonechikol “amo keman tajtantinemis tomin nion kintataujtis taltikpakneminij maj tapaleuikan”. Uan melauak amo keman mochiuani (Mateo 10:8).

Moixtaua ika tomin tein taltikpakneminij kitemakaj ika nochi ininyolo. Miakej taltikpakneminij kitasojkamatij tekit tein tikchiuaj ijkuak titamachtiaj ika Biblia, nejon kinolinia maj tapaleuikan ika tomin tein kitemakaj ika nochi ininyolo. Tejuan akin tiitaixpantijkauan no tiktemakaj totonal, tochikaualis, totomin uan okseki taman tein tikpiaj uan ijkon tikchiuaj itanejnekilis Dios semanauak taltikpak (1 Crónicas 29:9). Itech Kali kampa tiMosentiliaj uan itech uejueyi nechikolmej, moajsij seki kaxontsitsin kampa nochin akin kinekiskej uelis kitemakaskej se tapaleuil ika tomin. No uelis kitemakaskej itech Internet jw.org. Miakpa nejin tomin kitemakaj taltikpakneminij akin amo kipiaj miak, ijkon kemej siuat akin amo nemiaok inamik uan akin Jesús tel kuali ika tajtoj porin kipantalij ome tomintsin itech kaxontsin tein moajsia itech templo (Lucas 21:1-4). Akin yeski uelis ‘kixelos seki tomin’ uan kitemakas “ijkon keme yejua kinemilij ya ke kitemakas” (1 Corintios 16:2; 2 Corintios 9:7).

Senkis tikmatij ke Jiova kisentokas kinolinis akin kinekij kiueyitaliskej ika nochi tein kipiaj uan ijkon tapaleuiskej itech tanojnotsalis uan maj mochiua itanejnekilis yejuatsin (Proverbios 3:9).

• ¿Keniuj tonechikol amo kemej okseki taneltokalismej?

• ¿Keniuj motekitiltia tomin tein taltikpakneminij kitemakaj ika nochi ininyolo?

Itech Kalmej kampa tiMosentiliaj tikseliaj tamachtilis ika Biblia tein ika tajtoua iTekiuajyo Dios, tein Jesús nochipa ika tajtoj keman nemia nikan taltikpak (Lucas 8:1, TNM).

Ompa tikueyichiuaj Dios itech toxolal. Itech nejon kali moixyekana tanojnotsalis ika kuali tanauatilmej (Mateo 24:14). Kalmej kampa tiMosentiliaj tataman chijchiujtokej, sayoj ke nochin kualtsitsin uan amo tel uejueykej; miakkan ompa mosentiliaj miak nechikolmej. Itech nejin xiujmej tikchijchiuanij tel miak (kemej makuil itech se tonal), ijkon uelis mosentiliskej nochin tokniuan akin momiakilijtokej itech nochi nechikolmej. ¿Keniuj ueli mochiua nejin? (Mateo 19:26.)

Mochijchiuaj ika tomin tein mosentilia tein taltikpakneminij kitemakaj ika nochi ininyolo. Tomin tein mosentilia motitani itech kali Betel uan uelis mokuis keman tokniuan itech se nechikol monekis kichijchiuaskej se yankuik kali oso kiyekchijchiuaskej tein kipiajya.

Kichijchiuaj tapaleuianij akin kimatij kichiuaskej tataman tekimej uan amo kintaxtauiaj. Itech miak altepemej kinixtalijkej Oloch Tokniuan akin Kichijchiuaj Kalmej kampa tiMosentiliaj. Nejin tokniuan akin nochipa tapaleuiaj uan sekin sayoj seki tonalmej, youij kampa moajsij tataman nechikolmej itech ininueyi altepeuj, maski tel uejuejka, uan kinpaleuitij tokniuan keman kichijchiuaj Kali kampa Mosentiliaj. Itech okseki uejueyi altepemej, kinixtaliaj seki tokniuan maj kiixyekanakan tekit keman mochijchiua oso moyekchijchiua se Kali kampa tiMosentiliaj itech xolalmej kampa kinixtalijtokej. Maski miakej akin kimatij kichiuaskej miak taman tekit tapaleuiaj keman mochijchiua se kalnechikoloyan uan amo kitanij tomin, akin okachi miak tekit kichiuaj keman mochijchiua se Kali kampa tiMosentiliaj, yejuan akin ompa monechikoskej. Nejin ueli mochiua ika iespíritu Jiova uan nepaleuil tein itekitikauan kitemakaj ika nochi ininyolo (Salmo 127:1; Colosenses 3:23).

• ¿Keniuj ueli tikchijchiuaj Kalmej kampa tiMosentiliaj noyampa taltikpak?

Sejse Kali kampa Mosentiliaj iTaixpantijkauan Jiova kiixnextia iyektik tokayit Dios, yejua ika moneki tikpiaskej chipauak, maj kuali moita uan maj amo teyi kipolo. Tikitaj kemej se tatiochiualis, ta nejin se taman tein motelneki tein ika tikueyichiuaj Dios, uan tinochin uelis titapaleuiskej.

Maj titapaleuikan itech tachipaualis keman tami tonechikol. Satepan keman tami sejse nechikol, nochin tokniuan ika miak pakilis tapaleuiaj maj motachipaua sayoj kampa moneki; miakpa itech xiuit motachipaua okachi ika nejmachkayot. Se tayekankej oso se tapaleuijkej kiixyekanaj nejin tekit, uelis kitojtokas tein kijtoua itech se amat tein moneki mochiuas: tachpanaskej; kichipauaskej piso; kichipauaskej uan kinyektaliskej ikpalmej; kinchipauaskej nekalauiloyamej; kichipauaskej teskamej; kitamotaskej tajsol, uan tachipauaskej uan tayektaliskej kalixpan. Sepa itech xiuit moixtalia okachi kuali motachipauas kalijtik uan kalampa. Keman tikinmakaj seki tekimej akin konemejok, tikinnextiliaj maj kipoujkaitakan kali kampa tikueyichiuaj Dios (Eclesiastés 5:1).

Maj titapaleuikan keman moyektalis tein monekis. Nochi xiujmej moita toni kipoloua taijtik uan kalampa kampa timosentiliaj, ijkon moita toni uelis moyektalis uan ijkon maj kuali yeto uan satepan amo monekis okachi tomin (2 Crónicas 24:13; 34:10). Se Kali kampa tiMosentiliaj uan tein kuali moita yekmelauj kinamiki maj ompa tikueyichiuakan toTajtsin Dios. Komo titapaleuiaj maj kuali moita, tiknextiskej ke tikpoujkaitaj uan ke tiktasojtaj Jiova (Salmo 122:1). No ijkon uelis toka kuali tajtoskej okseki taltikpakneminij (2 Corintios 6:3).

• ¿Keyej amo uelis tiksenkauaskej kali kampa tikueyichiuaj Dios?

• ¿Toni tekimej tikchiuaj uan ijkon moita chipauak Kali kampa tiMosentiliaj?

¿Tikonuelitaskia okachi tikonixmatis tein tamachtia Biblia? ¿Tikonnekiskia okachi tikonixmatis se tajkuilol, oso se aksa oso teisa tein mochiuak tein ika tajtoua iTajtol Dios? ¿Tionmotajtaniani ox iTajtol Dios uelis mitsonpaleuis keman tikonpias se kuejmol? Komo ijkon, uelis tikontekitiltis amaixmej tein moajsij itech Kali kampa tiMosentiliaj.

Ompa tikajsiskej miak taman tein ika uelis timomachtiskej. Uelis tejuatsin amo tikonpias nochi amaixmej tein kitekitiltiaj itaixpantijkauan Jiova itech motajtol; sayoj ke, itech Kali kampa tiMosentiliaj moajsij miak amaixmej tein yankuixtok kiskej. Xa no ompa uelis moajsiskej okseki tataman Biblias, uan okseki taman amaixmej tein techpaleuiskej tikajsiskej miak taman. Uelis tikontekitiltis nejon amaixmej achto ke peuas uan satepan keman tamis tonechikoluan. Uan komo onkak se computadora, xa uelis kipias Watchtower Library, tein kipia miak amaixmej uan amo ouij se kitekitiltia, uan ijkon se kitemoua se tamachtilis, tajtolmej oso se tajkuilol tein mokixtia itech Biblia.

Semi kinpaleuia momachtianij itech nechikol Tonemilis uan toTanojnotsalis. Komo tejuatsin tionijkuiliujtok itech nejin nemachtil, uelis tikontekitiltis amaixmej tein moajsij itech Kali kampa tiMosentiliaj uan tionmomachtis tein tikonpanoltis itech nechikol. Akin kiixyekana nejin nemachtil yejua akin kiyekpia, uan akin kiita maj onka amaixmej tein yankuixtok kiskej uan maj yetokan kemej niman uelis se kinajsis. Nejin tokniuj oso akin mitsonmachtia, mitsonnextilis keniuj uelis tikonajsis se taman tein tikonneki. Sayoj xikonelnamiki ke amo uelis tikixtiskej amaixmej tein moajsij itech Kali kampa tiMosentiliaj; uan no, moneki tiktekitiltiskej ika nejmachkayot uan amo uelis tiktsojkuiloskej.

Biblia kijtoua ke uelis tikajsiskej “taixmatilis tein Dios kitemaka”, sayoj ke moneki tiktemoskej kemej yeskia teisa tein eujtok uan kitelpia ipatiuj (Proverbios 2:1-5). Itech amaixmej tein moajsij itech Kali kampa tiMosentiliaj uelis tipeuaskej tiktemoskej nejon.

• ¿Toni nepaleuilmej tein ika uelis timomachtiskej moajsij itech Kali kampa tiMosentiliaj?

• ¿Akoni uelis mitsonpaleuis kuali xikontekitilti nejon amaixmej?

Jesucristo kiniluij imomachtijkauan: “Xikintanextilikan nijin taltikpakuani ika namochipaukanemilis. Uan kuak yejuan kitaske ya den namokualitachiualisuan; ijkuakon yejuan no kimouistiliske Namoueyitajtsin ten yetika ne eluiyaktsinko” (Mateo 5:16). Yejua ika, kuali tiktekitiltiaj tein kichijchiuaj tamatinij, kemej Internet. Uan itech jw.org/ncj ompa sayoj moteixmatiltia tein kineltokaj uan tein kichiuaj itaixpantijkauan Jiova. ¿Toni kipia?

Monankiliaj ika Biblia netajtanilmej tein okachi mochiuaj. Uelis tikonajsis itanankililuan netajtanilmej tein okachi motelnekij tein motajtanianij taltikpakneminij. Kemej neskayot, tratados ¿Ejkos tonal keman tamis tajyouilis? uan ¿Uelis oksepa nemiskej akin momikilijkejya? uelis tikontemouis itech Internet kampa timoteixmatiltiaj uan itech panoua seiscientos tataman tajtolmej. No uelis tikonajsis Traducción del Nuevo Mundo itech panoua ciento treinta tataman tajtolmej; miak nepaleuilmej tein ika uelis timomachtiskej Biblia, kemej amaix ¿Toni yekmelauj tamachtia Biblia?, uan amaixmej Tanejmachtijkej uan ¡Despertad! tein yankuixtok kiskej. Miak amaixmej ueli se kiixtajtoltia oso se kikaki itech Internet, oso no ueli se kitemoltia tein satepan uelis se kikakis, uan no itech MP3, PDF oso EPUB. Komo tikonneki, uelis tikonkixtis itech amat seki páginas uan tikonnextilis aksa akin kineki kimatis okachi itech itajtol. No moajsij ika video itech miak tataman tajtolmej ika señas, uan ueli se kitemoltia taixtajtoltilis kampa mokaki kemej yeskia monojnotsaj taltikpakneminij, tamouisolmej tein mokixtiaj itech Biblia uan kualtsitsin nekuikatilmej tein uelis tikakiskej keman tiueliskej.

Moteixmatiltia tein kichiuaj itaixpantijkauan Jiova. Ompa moajsij yankuik tanauatilmej uan seki video tein ika tajtoua tekit tein tikchiuaj semanauak taltikpak, tekimej tein ika tikinpaleuiaj taltikpakneminij keman mochiua se tetsauit uan tein panoua uan kinpaleuia oso kinijtakoua itaixpantijkauan Jiova. Uan no, moijtoua katiyejua uejueyi nechikolmej amo uejkaua mochiuaskej uan kemanian, uan no keniuj uelis titanotsaskej itech tataman kalmej Betel.

Ika nochi nejin, tikchiuaj tamachtilis tein melauak tein moneskayotia kemej tanex maj taui itech nochi taltikpak, hasta kampa okachi uejka uan ijkon nochin taltikpakneminij kiseliskej nepaleuil, kemej itech Antártida kampa tel taseseya uan tel uejka moajsi. Tikchiuaj netataujtil uan ijkon maj “moijsiukamoyaua in Tajtoltsin de Totekotsin” noyampa taltikpak uan ika nejon maj moueyitali yejuatsin (2 Tesalonicenses 3:1).

• ¿Keniuj tapaleuia jw.org/ncj maj okachi miakej taltikpakneminij kiixmatikan tein tamachtia Biblia?

• ¿Toni tikonuelitaskia tikontemos kampa timoteixmatiltiaj itech Internet?