Miakej taltikpakneminij amo youijok inintiopan oso kampa taueyichiuaj porin amo kiseliaj se kuali nepaleuil nion yolseuilis. Yejua ika, ¿keyej tejuatsin monekiskia tionyas itech nechikolmej tein kipiaj itaixpantijkauan Jiova? ¿Toni ompa uelis tikonselis?

Kuali tionmomachilis iniuan akin tetasojtanij uan kualtakamej. Akin yekinika kichiuayaj kemej Cristo pouiaj itech tataman nechikolmej uan mosentiliayaj uan kiueyichiuayaj Dios, momachtiayaj iTajtol uan moyolchikauayaj se iuan okse (Hebreos 10:24, 25). Monechikouayaj iniuan akin no kichiuayaj kemej Cristo, kampa nochin motasojtayaj uan yekmelauj kiajsiaj akin iuan kuali mouikaskej (2 Tesalonicenses 1:3; 3 Juan 14). Tejuan no ijkon tikchiuaj uan no tikmachiliaj nejon pakilis.

Tikonselis nepaleuil porin tikonmatis keniuj tikontekitiltis tein kijtoua Biblia. Ijkon kemej kijtoua Biblia ke takamej, siuamej uan konemej monechikouayaj, tejuan no timonechikouaj uan tikinkakij kuali tamachtianij akin techpaleuiaj maj tikajsikamatikan keniuj tiktekitiltiskej itech tonemilis tanauatilmej tein kitemaka Biblia (Deuteronomio 31:12; Nehemías 8:8). Nochin akin youij uelij tanankiliaj keman mochiua netajtanilmej uan ueli mokuikatiaj, ijkon kinextiaj inintakuaujtamatilis iuan Dios (Hebreos 10:23).

Uelis tikonchikauas motakuaujtamatilis iuan Dios. Tatitanil Pablo kintajkuilouilij akin pouiaj itech se nechikol itech itonaluan: “Semi nikyolnejneki namechitas [...], ijkuakon kachi ok timoyolmajxitiske ika ne totakuautamatilis. Namejuan nanmoyolmajxitiske uan nejua no nimoyolmajxititi ika notakuautamatilis” (Romanos 1:11, 12). Keman timonechikouaj iniuan tokniuan mochikaua totakuaujtamatilis uan okachi tikixtaliaj tinemiskej kemej Biblia tanauatia.

¿Tikonuelitaskia tionyas itech se nechikol uan tikonitas tejuatsin ox melauj tein moijtojya? Tel kuali timitsonseliskej. Itech nechikolmej amo motaxtaua nion motajtani tomin.

• ¿Toni neskayot tiktojtokaj keman tikchiuaj tonechikoluan?

• ¿Toni nepaleuil ueli tikseliaj keman tiyouij nechikolmej?

Maski moneki tiojtokaskej kampa tel koujtaj oso tikisaskej maski kioujtos, tiitaixpantijkauan Jiova nochipa tiyouij tonechikoluan. ¿Keyej semi timochikauaj timonechikoskej iniuan tokniuan maski tikpiaskej ouijkayomej itech tonemilis oso titelsioujtoskej porin titekitikej nejon tonal?

Techpaleuia maj tikixnamikikan ouijkayomej itech tonemilis. Keman tatitanil Pablo kijtoj ke moneki tiyaskej nechikolmej, kijkuiloj: “Ma tiktemolijtiyakan de keniu timopaleuijtiyaske se uan okse” (Hebreos 10:24). Nejin kijtosneki ke moneki timoixmatiskej keniuj tinemij tisejsemej. Ika okseki tajtolmej, techyolchikaua maj timotekipachokan ininka oksekin. Keman tikinixmatij oksekin akin pouij itech tonechikol, tikmatij ke sekin kiixnamikinij ouijkayomej kemej tein tejuan uelis tikpanotoskej uan no tikmatij ke yejuan uelis techpaleuiskej maj tikixnamikikan nejon ouijkayomej.

Techpaleuia maj tikinpiakan yekmelauj totasojikniuan. Itech nechikolmej timosentiliaj, amo iniuan akin sayoj tikinixmatij, ta akin yekmelauj kuali iniuan timouikaj. Uan no, kemansa timosentiliaj uan timoixpetaniaj kemej Dios kiyolpaktia. ¿Keniuj techpaleuia nejon? Kichiua maj okachi timopoujkaitakan, uan ijkon mochikaua netasojtalis tein techsentilia. Uan keman tokniuan kipiaj ouijkayomej, ijsiujka tiktemouaj keniuj tikinpaleuiskej porin ipa kuali iniuan timouikajya (Proverbios 17:17). Keman kuali timouikaj iniuan nochin akin touan monechikouaj, tiknextiaj ke timotekipachouaj se iuan okse (1 Corintios 12:25, 26).

Timitsonyoleuaj xikonixpejpena motasojikniuan akin kichiujtokej itanejnekilis Dios. Nejon tasojiknimej tikonajsis iniuan itaixpantijkauan Jiova. Amo xikonkaua maj nion teyi mitsontsakuili touan xionmonechiko.

• ¿Keyej semi kuali maj timonechikokan iniuan akin kichiuaj kemej Cristo?

• ¿Kemanian tikonuelitaskia touan tionmonechikos?

Yekinika akin kichiuayaj kemej Cristo, keman monechikouayaj mokuikatiayaj, kichiuayaj netataujtil, uan kiixtajtoltiayaj uan momachtiayaj iTajtol Dios (1 Corintios 14:26). Keman tejuatsin tionualas tonechikoluan tikonitas ke no ijkon mochiua.

Motemakaj tamachtilismej tein mokixtiaj itech Biblia uan techpaleuia itech tonemilis. Itamiampa semana, nochin mosentiliaj itech nechikolmej uan kikakij se tanojnots tein kisa itech Biblia tein uejkaua tajko hora. Nejin kinextia keniuj iTajtol Dios kijtoua maj tinemikan uan maj tikajsikamatikan tein mochiujtok itech nejin tonalmej. Kinyoleuaj nochin tein yetokej itech nechikol maj no kiitakan tein kijtoua itech ininBiblia. Satepan mochiua Nemachtil ika amaix Tanejmachtijkej, nejin uejkaua se hora; moita se tamachtilis tein moajsi itech amaix Tanejmachtijkej uan nochin uelij tanankiliaj. Nejin techpaleuia maj tikmatikan keniuj tiktekitiltiskej itech tonemilis tayolmajxitilismej tein moajsij itech iTajtol Dios. Itech sejse nechikol tein moajsij noyampa taltikpak, tein panouaj ciento diez mil, nochin momachtiaj sayoj se taman tamachtilis.

Techpaleuia maj okachi kuali titamachtikan. No timosentiliaj se tiotak itech itajkotian semana uan tikpiaj se nechikol tein ixeyi moxejxeloua. Tein itokay Tonemilis uan toTanojnotsalis, tein mokixtia itech amaix tein kisa mejmetstika Tein timomachtiskej itech nechikol Tonemilis uan toTanojnotsalis. Yekinika taxelol, motokaytia “Tamachtilis tein kipia Biblia”, nejin techpaleuia maj kuali tikixmatikan seki taxelolmej tein kipia Biblia tein ipa achtoya tikixtajtoltijkej. Satepan, itech taxelol “Maj okachi kuali titamachtikan”, mopanoltiaj ixneskayomej tein technextiliaj keniuj uelis titajtoskej ika Biblia iniuan oksekin. Se tokniuj kiita tamachtilismej tein tikpanoltiaj uan techyolmajxitia tein uelis techpaleuis maj okachi kuali titaixtajtoltikan uan maj okachi kuali titajtokan (1 Timoteo 4:13). Uan taxelol “Tonemilis kemej itatojtokakauan Cristo”, tein ika tami nechikol, tikitaj keniuj uelis tikuiskej mojmostaj itech tonemilis tayolmajxitilismej tein kitemaka Biblia. Itech nejin taxelol, tiktemouaj kuali tikajsikamatiskej tein Biblia tamachtia ika netajtanilmej uan tanankililmej.

Keman tionyas tonechikoluan, tikonmoujkaitas nochi tel kuali tamachtilis ika Biblia tein ompa motemaka (Isaías 54:13).

• ¿Toni tataman tamachtilis tikonkakis itech nechikolmej tein kipiaj itaixpantijkauan Jiova?

• ¿Itech katiyejua nechikolmej tein mochiuaj itech sejse semana mitsonpaktiskia tionyas?

¿Tikonitani taixkopimej itech nejin amaix keniuj motilmajtiaj itaixpantijkauan Jiova keman monechikouaj? ¿Keyej tikitaj ke motelneki maj kuali timotakentikan uan maj kuali timochijchiuakan?

Porin tikpoujkaitaj toDios. Melauak ke Dios amo sayoj kiita toneketsalis (1 Samuel 16:7). Sayoj ke, keman timonechikouaj uan tikueyichiuaj, yekmelauj tiknekij tiknextiskej ke tikpoujkaitaj yejuatsin uan no tokniuan. Komo monekiskia tiyaskej iixpan se tekiuaj, timochikauaskiaj kuali timotakentiskej, ijkon tiknextiskiaj ke tikpoujkaitaj porin kipia se ueyi tanauatil. No ijkon, keman timonechikouaj no timoyekchijchiuaj porin semi tikpoujkaitaj “Totayekankau”, Jiova Dios, uan kampa tikueyichiuaj (1 Timoteo 1:17).

Porin tiknextiaj ke timonejnemiltiaj ika itanauatiluan Dios. Biblia kiniluia akin kichiuaj kemej Cristo maj motakentikan “ika taixejekolis” uan “ma kuali kuatamatinemikan” (1 Timoteo 2:9, 10). Timotakentiskej “ika taixejekolis” kijtosneki ke amo tikuiskej taken tein ika tiknekij maj techitakan porin tel patiyoj, oso tein ika tikintanejnektiskej oksekin. No ijkon keman ‘kuali tikuatamattinemij’ techpaleuia maj kualtsin timotakentikan uan maj amo tiktelpanoltikan. Nejin tajtolmej kinextiaj ke ueli tikixpejpenaj miak tamanok tein ika kuali timotakentiskej. Komo kuali timotakentiaj uelis “[tikualnextiskej] in tanextililisme de Totajtsin Dios Totemakixtijkatsin” uan tikueyitaliskej (Tito 2:10; 1 Pedro 2:12). Keman kuali titakentiyouij itech tonechikoluan tapaleuia maj okseki taltikpakneminij kuali kinitakan itaixpantijkauan Jiova.

Uelis kuali timoitaskej uan tiyeskij tichipaujkej maski amo tikpiaskej tilmaj tein semi kualtsin oso tel patiyoj. Yejua ika, amo xikonkaua maj nejin mitsontsakuili, ta nochipa kuali timitsonseliskej keman tionyas itech Kali kampa tiMosentiliaj.

• ¿Keyej motelneki maj kuali timotakentikan keman tikueyichiuatij Dios?

• ¿Toni tayolmajxitilis itech Biblia techpaleuia maj tikixejekokan keniuj timotakentiskej?

Komo tejuatsin tionmomachtia Biblia iuan se itaixpantijkauj Jiova, xa achto tionmomachtia sejse tamachtilis. No ijkon moneki tikchiuaskej keman tiyaskej nechikolmej, ijkon tikseliskej okachi nepaleuil. Okachi kuali yeski komo tikonixtalia kemanian tionmomachtis.

Xikonixtali kemanian uan kani kuali tionmomachtis. ¿Kemanian ueli okachi kuali tionmomachtia? ¿Kualkan achto ke tionpeuas tiontekitis, oso tayouaya keman konemej kochitijya? Maski amo semi tionkemanti, xikonixtali tein tionuejkauas tionmomachtis uan maj amo teyi mitsontsakuili. Xikontemo kampa taseujtok uan maj amo teyi mitsontapololti, yejua ika monekis tikonseuis radio, teposixyekauil oso teléfono. Tikonchiuas netataujtil achto ke tionmomachtis mitsonpaleuis xikonelkaua netekipacholmej tein tikonpia uan okachi kuali tikonpias motanemilil itech iTajtol Dios (Filipenses 4:6, 7).

Xikontemo tajtolmej tein tayekantokej uan xiontanankili. Yekinika xikonixmati nochi tamachtilis. Xikonita itokay tamachtilis uan keniuj mouika iuan kemej moxejxeloua tamachtilis, xikonyekita taixkopimej uan xikonixtajtolti netajtanilmej tein ika moelnamiki tanemililmej tein tayekantokej. Satepan, xikonixtajtolti sejse párrafo uan xikontemo itanankilil netajtanil tein kipia. Xikontemo itech Biblia taxelolmej tein ompa ixnesij uan xikonita keniuj kipaleuiaj tamachtilis (Hechos 17:11). Keman tikonajsis tanankilil, xikonchajkuilo seki tajtolmej tein tayekantokej uan tein mitsonpaleuis xikonelnamiki. Ijkon, itech nechikol komo tikonneki uelis tionmomaajokuis uan tiontanankilis ika tein tikonajsikamatis.

Keman tikonitas tataman tamachtilismej tein motemakaskej sejse semana itech nechikolmej, tikonpias okseki tanemililmej uan ijkon okachi tikonixmatis Biblia (Mateo 13:51, 52).

• ¿Toni uelis tikonixtalis uan ijkon tionmomachtis tein moitas itech nechikolmej?

• ¿Keniuj uelis tionmomachtis uan ijkon tiontanankilis itech nechikol?

Ne achtopayan, Jiova ipa kiixtalij maj nochin kalyetouanij mosentilikan uan ijkon okachi kuali mouikaskej iuan Dios uan no kemej kalyetouanij (Deuteronomio 6:6, 7). Yejua ika, itaixpantijkauan Jiova kixelouaj se tonal itech semana uan ijkon sentaueyichiuaj kemej kalyetouanij, amo kemej ipa mochiuaj nechikolmej, uan kiitaj ijkon kemej monekis seki taman tein kinpaleuis keniuj okachi kuali mouikaskej iuan Dios. No akin nemij ininselti uelis kikuiskej nejon tonal uan ijkon motokiskej iuan Dios keman momachtiskej itech Biblia se taman tein yejuan kiixpejpenaskej.

Se taman tein ika okachi uelis timotokiskej iuan Jiova. “Ximotokikan iuan Dios uan Yejuatsin no motokis namouan.” (Santiago 4:8.) Okachi tikixmatij Jiova keman timomachtiaj itech iTajtol keniuj tamati uan tein kichiuani. Se taman tein amo ouij tein ika uelis nankipeualtiskej nemachtil kemej kalyetouanij yejua nankiixtajtoltiskej Biblia maj chikauak mokaki, xa uelis nankitojtokaskej tein ixyetok itech Tonemilis uan toTanojnotsalis nejon semana. Nansejsemej uelis nankiixtajtoltiskej se taxelol, ompa uelis nankijtoskej tein nankiajsikamatkej itech Biblia.

Se taman tein ika okachi kuali timouikaskej kemej kalyetouanij. Namikuanij, ijkon kemej tetatmej uan konemej, okachi kuali mouikaj keman mosenmachtiaj Biblia. Nejin moneki kinualkuilis pakilis uan yolseuilis, se tonal tein nochin kichixtoskej. Xa tetatmej kiixejekoskej momachtiskej seki taman tein moajsis itech amaix Tanejmachtijkej uan okseki amaixmej oso itech Internet, jw.org, tein kinpaleuis ininkoneuan akin tataman xiujmej kipiaskej; oso xa uelis kiitaskej se ouijkayot tein kipanotoskej itech kaltamachtiloyan uan kitemoskej keniuj kinpaleuiskej. No uelis nankiitaskej Broadcasting (tv.jw.org) uan ika nantajtoskej kemej kalyetouanij.

Nejin tonal tein semi motelneki uan ika tikueyichiuaj Jiova itech sejse semana kinpaleuis nochin kalyetouanij maj kiuelitakan momachtiskej iTajtol Dios, uan komo timochikauaj tikchiuaj, yejuatsin techtatiochiuis (Salmo 1:1-3).

• ¿Keyej tikxelouaj se tonal itech semana tein ika tikueyichiuaj Dios kemej kalyetouanij?

• ¿Toni uelis kichiuaskej tetatmej maj nochin kalyetouanij yolpakikan keman taueyichiuaj?

¿Tikonita itech ininixko nejin taltikpakneminij keniuj yolpakij? Yejuan yetokej itech se ueyi nechikol. Ijkon kemej itekitikauan Dios ne achtopayan akin kinnauatijkaj ke monekia monechikoskej expa xiuit, tejuan no titelyolpakij timosentiliskej itech uejueyi nechikolmej (Deuteronomio 16:16). Xijxiujtika tikpiaj eyi uejueyi nechikolmej: ojpa mochiua se ueyi nechikol tein uejkaua se tonal, uan se ueyi nechikol tein uejkaua eyi tonal. ¿Keniuj techpaleuiaj?

Kichiuaj maj kuali timouikakan iniuan tokniuan. Israelitas tel yolpakiaj kiueyichiuaskej Jiova ‘kampa miakej monechikouayaj’, uan tejuan no ijkon titelyolpakij tikueyichiuaskej itech uejueyi nechikolmej iniuan tokniuan (Salmo 26:12, nota; 111:1). Nejon nechikolmej kichiuaj maj timosentilikan iniuan okseki itaixpantijkauan Jiova akin ompakauin kayomej uan hasta akin kayomej okseki altepemej. Nepantaj tisentakuaj kampa timonechikouaj. Nejin kichiua maj tikinpiakan okachi totasojikniuan (Hechos 2:42, TNM). Ompa tikitaj netasojtalis tein kinsentilia “nochi in tokniuan” noyampa taltikpak (1 Pedro 2:17).

Kichiua maj okachi kuali timouikakan iuan Dios. Israelitas kiseliayaj nepaleuil keman “[kiajsikamatiaj] tajtolmej” itech iTajtol Dios tein kinmachtiayaj (Nehemías 8:8, 12). Tejuan no semi tikitaj ke motelneki tamachtilis tein tikseliaj itech uejueyi nechikolmej. Sejse ueyi nechikol motajtoua ika se tamachtilis tein mokixtia itech Biblia. Ika tel kuali tanojnotsmej uan ixneskayomej techmachtiaj keniuj tikchiuaskej itanejnekilis Dios. No ijkon techyolchikaua tikinkakiskej akin kiixnamikinij ouijkayomej tein kipianij porin kichiuaj kemej Cristo itech nejin tonalmej ouijkej. Itech uejueyi nechikolmej tein uejkauaj eyi tonal monextiaj seki tamouisolmej kampa motakentiaj kemej ne uejkauj, nejon kichiua maj okachi amo ouij tikajsikamatikan tein kijtoua Biblia uan techmachtiaj keniuj tiktekitiltiskej itech tonemilis. Itech nochi uejueyi nechikolmej, moauiaj akin kinekij kinextiskej ke motemaktijkejya iuan Dios.

• ¿Keyej itech uejueyi nechikolmej onkak miak yolpakilis?

• ¿Keniuj mitsonpaleuiskia tionyas itech se ueyi nechikol tein tikpiaj?

Tepitsin achto ke momikiliskia, Jesús tanauatij: “Uan kuak motamitetapouis ya tech nochi senmanauak nijin yankuik Tajtoltsin de ke Dios momasoutok ika iueyichikaualis, uan no kuak kintaminejmachtiske ya nochi in taltikpakuani, ijkuakon xikmatikan ke ejkotiuits ya in tamilis” (Mateo 24:14). ¿Keniuj mochiuaskia nejin tanojnotsalis noyampa taltikpak? Keman tiktojtokaskej ineskayo Jesús tein kikauak keman nemia nikan taltikpak (Lucas 8:1).

Tikinkalpanouaj taltikpakneminij ininchan. Jesús kinmachtij itatojtokakauan maj tanojnotsakan ika kuali tanauatilmej kajkalpan (Mateo 10:11-13; Hechos 5:42; 20:20). Nejon yekinika tanojnotsanij kiniluijkaj itech katiyejua xolalmej sayoj monekia tanojnotsaskej (Mateo 10:5, 6). No ijkon axkan kuali titanojnotsaj, uan itech sejse nechikol ixyetokya itech toni xolalmej moneki motanojnotsas. Ijkon ueli tiktakamatij tein tanauatij Jesús keman kijtoj ke moneki “ma titanojnotstinemikan ika in Tajtoltsin de Dios tech nochi in pueblojuani” (Hechos 10:42).

Tikinnojnotsaj taltikpakneminij kampa yeski yetoskej. Jesús no techkauilij neskayot keman tanojnotsaya senteixtenoj, kemej ueyiatenoj oso itech se ameyal kampa nochin yayaj atakuitij (Marcos 4:1; Juan 4:5-15). Tejuan no tikinnojnotsaj taltikpakneminij ika Biblia kampa yeski tiueliskej: itech ojti, ika teléfono, kampa motanamaka uan kampa miakej moixpetaniaj. No tikinnojnotsaj taltikpakneminij akin chanchiuaj kampa ika tinemij, totekitikaikniuan, tomomachtijkaikniuan uan tochankauan keman tikitaj ke ueli. Nejon tapaleuiani maj tel miakej taltikpakneminij semanauak taltikpak kikakikan “in yankuik Tajtoltsin de Dios ten kualkui ne nemakixtilis” (Romanos 1:16).

Xikonnemili akoni tikonnekiskia tikonnojnotsas ika iTekiuajyo Dios uan keniuj kipaleuis nejin kuali tanauatilmej itech inemilis. Xikonteixmatilti nejin tanojnotsalis niman keman tionuelis.

• ¿Toni “yankuik Tajtoltsin” moneki moteixmatiltis?

• ¿Keniuj no tikchiuaj tiitaixpantijkauan Jiova kemej kichiuaya Jesús itech tanojnotsalis?

Tajtol precursor itech español, kijtosneki se taltikpaknenkej akin kitapoua se ojti kampa amo akin nemi, uan ijkon akin kitojtokaj uelis ompa ojtokaskej. Uelis tikijtoskej ke Jesús katka se precursor, ta Dios kiualtitanik nikan taltikpak maj kichiuaki se tekit tein kiualkui nemilis uan ijkon kemej yeskia kitapoj se ojti tein ika taltikpakneminij ueliskiaj momakixtiskej (Mateo 20:28). Axkan tiktojtokaj ineskayo Jesús uan timochikauaj miak tonalmej uan ijkon tikinpaleuiaj taltikpakneminij maj mochiuakan imomachtijkauan (Mateo 28:19, 20). Sekin peuanij kichiuaj tein tiktokaytiaj tekit kemej precursor.

Tanojnotsa nochi tonalmej. Nochin tiitaixpantijkauan Jiova titanojnotsaj ika kuali tanauatilmej. Sayoj ke sekin kiyektalianij ininnemilis uan ijkon kiixtaliaj kichiuaskej tekit kemej precursor regular uan tekitiskej setenta horas itech tanojnotsalis sejse metsti. Yejua ika miakej tekitij sayoj tajko tonal. Oksekin kinixpejpenaj maj kichiuakan tekit kemej precursor especial uan kintitanij kampa okachi monekij tanojnotsanij; yejuan tanojnotsaj ciento treinta horas oso okachi itech sejse metsti. Akin kichiuaj tekit kemej precursor amo kitemouaj kipiaskej miak tomin uan takuaujtamatij ke Jiova kinmakas tein okachi moneki (Mateo 6:31-33; 1 Timoteo 6:6-8). Akin amo ueli kichiuaj tekit kemej precursor regular oso precursor especial, uelis kichiuaskej tekit kemej precursor auxiliar keman ueliskej, uan yejuan tanojnotsaj treinta oso cincuenta horas itech se metsti.

Kiolinia inetasojtalis tein kipialia Dios uan taltikpakneminij. Ijkon kemej Jesús, tikitaj ke taltikpakneminij motelneki maj kiixmatikan Dios uan tein kiixtalijtok kichiuas (Marcos 6:34). Sayoj ke tikpiaj taixmatilis tein axkan uelis kinpaleuis maj kipiakan se nechialis ika tein mochiuas satepan. Netasojtalis tein kinpialia taltikpakneminij kiolinia se precursor maj kikui itonaluan uan ichikaualis uan ijkon kinpaleuis maj kiixmatikan kuali tanauatilmej (Mateo 22:39; 1 Tesalonicenses 2:8). Nejin kichikaua itakuaujtamatilis uan ikuali uikalis iuan Dios, tein kichiua maj semi yolpaki (Hechos 20:35).

• ¿Toni tekit kichiua se precursor?

• ¿Toni kinolinia sekin maj kichiuakan tekit kemej precursor?

Itaixpantijkauan Jiova nochipa kiselianij tamachtilis ika Biblia. Akin senkis kitayekanaltiaj itekiyo Dios kiseliaj se tamachtilis tein kinpaleuia maj okachi uelikan kiyekchiuakan inintanojnotsalis (2 Timoteo 4:5).

Tamachtilis tein kiselia akin Tekiti kemej Precursor. Keman aksa kiajxitia se xiuit itech nejin tekit, kiselia se tamachtilis tein uejkaua chikuasen tonal uan uelis mochiuas itech se Kali kampa tiMosentiliaj tein amo uejka moajsis. Nejin tamachtilis kipaleuis maj okachi motoki iuan Jiova, maj okachi kuali kichiua itekiyo Dios uan maj kisentoka itech nejon tekit.

Tamachtilis tein kiseliaj akin kiteixmatiltiaj iTekiuajyo Dios. Nejin tamachtilis tein uejkaua ome metsti, kiixtalijkej maj kinpaleui akin kichiuaj tekit kemej precursor uan kiuikajya seki xiujmej itech nejon tekit, akin ika miak pakilis uelis yaskej itech okse xolal uan tapaleuiskej kampa okachi monekis. Tein melauj, yejuan kijtouaj: “¡Nikan niyetok nejua! Xinechtitani nejua”, ijkon kemej Jesucristo, akin moixmatik kemej okachi ueyi tanojnotskej nikan taltikpak (Isaías 6:8; Juan 7:29). Ijkuak yaskej tapaleuitiuij uejka, kemansa monekis amo kipiaskej miak taman. Xolal kampa ajsiskej uelis yeski taman kemej nemij, xa tel tonas oso taseseyas uan takual amo kemej yejuan momattoyaj kikuaskej. Xa hasta monekis momachtiskej se yankuik tajtol. Nejin tamachtilis kinpaleuia tokniuan siuamej uan takamej akin ininselti ijkon kemej tokniuan namikuanij, tein kipiaj 23 hasta 65 xiujmej, maj kinextikan kualneskayomej tein kinpaleuis kampa kintitaniskej maj tapaleuitij uan no maj uelikan kichiuakan tekimej tein kinpaleuis maj okachi kuali kitekitilikan Jiova uan inechikol.

Galaad—Tamachtilis ika Biblia tein kitemakaj iTaixpantijkauan Jiova. Galaad itech tajtol hebreo kijtosneki “tenepan tein kiteixmatiltia teisa”. Peuak itech xiuit 1943, uan panoua ocho mil kintitaninij maj kichiuakan tekit kemej misionero itech “nochi senmanauak” taltikpak uan kuali kisani nejon tekit (Hechos 13:47). Keman akin yekinika kichiuayaj tekit kemej misionero ajsikej itech altepet Perú, amo onkaya nion se nechikol; axkan moajsijya panoua mil nechikolmej. Keman oksekin ajsikej itech altepet Japón, amo ajsiaj nion majtakti itaixpantijkauan Jiova; axkan panoua doscientos mil. Tamachtilis tein motemaka Galaad tein uejkaua makuil metsti kinpaleuia momachtianij maj kiajsikamatikan ika nejmachkayot iTajtol Dios. Akin kichiuaj tekit kemej precursor especial, akin tapaleuijtokej itech okse altepet kemej misioneros, akin tekitij itech kalmej Betel oso kemej takalpanouanij, uelis kinyoleuaskej maj kiselikan nejin tamachtilis tein kinpaleuis maj tapaleuikan maj okachi kuali motanojnotsa semanauak taltikpak.

• ¿Keniuj tapaleuia Tamachtilis tein kiseliaj akin kichiuaj Tekit kemej Precursor?

• ¿Akonimej uelis yaskej itech Tamachtilis tein kiseliaj akin kiteixmatiltiaj iTekiuajyo Dios?