Taxtaujkej panoua 2 billones de dólares para ininsoldados uan tein ika tateuitij | ¿Toni kijtoua Biblia?

Itech xiuit 2022, tekiuanij taxtaujkej panoua 2,24 billones de dólares para ininsoldados uan teposmej tein ika tateuitij. Okachi miak taxtaujkej porin Rusia kalakik Ucrania para kiteuis. Itech abril de 2023, akin pouij itech SIPRI, Stockholm International Peace Research Institute (Instituto Internacional de Estudios para la Paz de Estocolmo), kitematiltijkej seki taman tein panok itech xiuit 2022. Kijtojkej:

• Nejon xiuit ompa Europa, taxtaujkej para ininsoldados uan teposmej tein ika tateuitij kemej 13% okachi ke tein taxtaujtoyaj xijxiujtika desde xiuit 1991 keman mochiuak ueyi neteuilis.

• “Moixejekoua ke ompa Rusia pankisak kemej 9,2% tein taxtaujkej para ininsoldados uan teposmej tein ika tateuitij”. Achto katka makuiltika altepet tein okachi taxtauaya. Sayoj ke axkan yejua expatika itech nochi taltikpak.

• Kemej ipa ompa Estados Unidos kisentokaj okachi miak taxtauaj para ininsoldados uan teposmej tein ika tateuitij: “39% de tomin tein taxtauaj itech nochi taltikpak”.

“Kemej nejin xiujmej tekiuanij taxtauaj okachi miak para ininsoldados uan teposmej tein ika tateuitij, kinextia ke axkan tonalmej okachi moixnamikij nikan taltikpak”, ijkon kijtoj taixmatkej Nan Tian, coautor del informe del SIPRI.

Biblia kijtojka ke uejueyi tekiuanij kipiaskiaj kuejmolmej uan moixnamikiskiaj de se altepet iuan okse altepet. No techiluia akoni sayoj uelis kichiuas maj yekmelauj tiyolseujkanemikan.

Moijtojka ke okachi moteuiskiaj de se altepet iuan okse altepet

• Biblia kijtoua ke tinentokej “itech tonalmej keman tatamitiya” (Daniel 8:19).

• Amatajkuilol Daniel kijtojka ke itech nejon tonalmej seki uejueyi tekiuanij itech taltikpak moixnamikiskiaj. Yejuan motataniskiaj para kinextiskej ke okachi chikaujkej. Uan keman kichiuaskiaj nejon, semi miak tein taxtauaskiaj (Daniel 11:40, 42, 43).

Para tikonmatis okachi keniuj mochiua tein Biblia kijtojka ke panoskia, xikonita video Keniuj mochiujtok tein moijtoj itech Daniel 11.

Keniuj tamis neteuilis

• Biblia kijtoua ke Dios kinixpatas tekiuanij akin nemij nikan taltikpak. ToTajtsin “kiixtalis se taixyekanalis tein amo keman ixpoliuis nion panos imako okse xolal. Nejin taixyekanalis kinkuechos uan kinixpolos nochi nejon akin taixyekanaj, uan sayoj yejua yetos nochipaya” (Daniel 2:44).

• Jehováa amo uejkaua kichiuas maj amo onkaok neteuilis, se taman tein amo ueli kichiuaj tekiuanij de nikan taltikpak. ¿Keniuj kichiuas? Ika iTaixyekanalis Dios tein yetok ne iluikak, kichiuas maj amo onkaok neteuilis uan maj nochin yolseujkanemikan (Salmo 46:8, 9).

Komo tikonneki tikonmatis toni kichiuas iTaixyekanalis, xikonlero tamachtilis “ITekiuajyo Dios kichiuas maj tinemikan ika yolseuilis”.