¿Toni Oloch Taojtokaltianij akin kinixyekanaj iTaixpantijkauan Jehová?

Nejin Oloch Taojtokaltianij yejuan takamej akin semi kuali taixejekouaj uan takuaujtamatij iuan Dios uan kinixyekanaj itaixpantijkauan Jehová de nochi taltikpak. Yejuan kichiuaj ome tekit:

• Yejuan kiitaj nochi tamachtilis de Biblia tein kisas itech toamaixuan uan tein timomachtiskej keman timosentiliskej uan tein mokuis itech escuelas tein kipiaj itaixpantijkauan Jehová (Lucas 12:42).

• Kiixyekanaj tekit tein kichiuaj itaixpantijkauan Jehová noyampa taltikpak. Nejin kijtosneki ke kiixyekanaj tanojnotsalis uan kiitaj keniuj kuali mokuis tomin tein miakej kitemakaj para ika mochiuas tekit.

Oloch Taojtokaltianij kichiuaj ijkon kemej kichiujkej “tatitanilmej uan tayekananij” akin moajsiaj itech yekinika siglo. Yejuan kiixejekouayaj toni kinamikia mochiuas itech nechikolmej (Hechos 15:2). Oloch Taojtokaltianij amo momachiliaj ke yejuan taixyekananij de tonechikol, ijkon kemej amo no kichiujkej nejon itekitikauan Dios ne uejkauj. Yejuan nochipa kitemouaj maj Biblia kinixyekana keman kiixtaliskej toni mochiuas uan kimatij ke Jehová kiixtalij Jesucristo maj kiixyekana nechikol (1 Corintios 11:3; Efesios 5:23).

¿Akoni axkan Oloch Taojtokaltianij?

Axkan Oloch Taojtokaltianij yejuan Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane uan Jeffrey Winder. Nochin tekitij itech ueyi kali kampa kinixyekanaj itaixpantijkauan Jehová ompa Warwick (Nueva York).

¿Keniuj tekitij Oloch Taojtokaltianij?

Oloch Taojtokaltianij moxejxelouilianij tekit itech chikuasen comités. Sejsemej Oloch Taojtokaltianij tekitij itech se oso ome comités.

• Tokniuan Taixyekananij. Kiitaj maj nochi mochiua kemej kijtoua inintanauatil tekiuanij uan kiitaj keniuj motapaleuis keman mochiua se tetsauit, keman kintsakuilisnekij itaixpantijkauan Jehová maj amo kiueyichiuakan Dios oso keman kinpanoua okseki taman kemej nejon.

• Tokniuan akin kinitaj akin tapaleuiaj Betel. Kiitaj nochi tein moneki para akin tekitij Betel oso sucursales de itaixpantijkauan Jehová.

• Tokniuan akin kiixyekanaj tein moamakixtia. Kiitaj nochi tein moneki para mochijchiuas amaixmej uan kitaniskej itech nechikolmej, uan no kiitaj tein moneki para mochijchiuas kalmej kampa timosentiliaj, kalmej kampa kitajtolkepaj amaixmej uan sucursales.

• Tokniuan akin kiixyekanaj tanojnotsalis. Kiitaj keniuj mosentokas motetapouis “kuali tanauatilmej” de itaixyekanalis Dios (Mateo 24:14).

• Tokniuan akin kiixyekanaj tein motamachtia. Yejuan kiitaj maj tikpiakan tein timomachtiskej itech nechikolmej, itech tataman escuelas tein tikpiaj uan tataman audio uan video.

• Tokniuan akin kiixyekanaj tein moijkuiloua. Kijkuilouaj tamachtilis de Biblia tein kisas itech amatajkuilolmej uan itech internet kampa timoteixmatiltiaj, uan kiitaj tekit tein kichiuaj akin kitajtolkepaj amaixmej.

Tokniuan Oloch Taojtokaltianij amo sayoj kichiuaj nejin tekit itech tataman comités, ta no mosentiliaj cada chikueyi para kiitaskej toni moneki mochiuas itech organización. Keman mosentiliaj, kiitaj toni kijtoua Biblia, kikauaj maj kinixyekana ichikaualis Dios uan maj sejsemej yetokan de acuerdo tein kisenixejekouaj (Hechos 15:25).

Akin kinpaleuiaj Oloch Taojtokaltianij

Itech sejse comité moajsij seki tokniuan akin kuali taixejekouaj uan kuali kiixmatij tekit tein mochiua itech comité kampa kintaliaj maj tapaleuikan (1 Corintios 4:2). Nejin tapaleuianij mosentiliaj cada chikueyi kemej comité kampa pouij. Maski yejuan amo kiixtaliaj toni mochiuas, kemaj kijtouaj keniuj ueliskia mochiuas se taman tein kiitstokej oso kitematiltiaj tein tapaleuis maj moixejeko teisa. No kichiuaj tein comité kiixtalij uan kiitstiouij keniuj tapaleuia tein moixtalij oso keniuj mochiujtiuj tein moixtalij. Oloch Taojtokaltianij no uelis kiniluiskej nejon tokniuan maj kinkalpanotij tokniuan de okseki altepemej oso maj tapaleuikan itech nechikol tein mochiua xijxiujtika oso itech graduación de Escuela de Galaad uan oksekiok nechikolmej tein moixtalia mochiuas.