¿Keniuj uelis tikmatiskej katiyejua taneltokalis tein melauak?
Tein Biblia kijtoua
Keman Biblia kijtoua keniuj uelis tikmatiskej katiyejua taneltokalis tein melauak, kikui nejin tajtolmej: “Nankinixmatiskej ika tein kichiuaj. Se kouit tein uitsyoj amo keman kitekiliaj uvas oso higos, ¿melauj?” (Mateo 7:16). Keman tikitaj takilot, niman tikmatij katiyejua se uvajmekat uan katiyejua se kouit tein uitsyoj. No ijkon, niman tikmatij katiyejua taneltokalis tein melauak uan katiyejua amo, keman tikitaj tein kichiuaj akin pouij ompa.
Itech taneltokalis tein melauak amo kitematiltiaj tein tamachtiaj tamatinij, ta tein tamachtia Biblia, iTajtol Dios (Juan 4:24; 17:17). Tamachtiaj toni yekmelauj techpanoua keman timomikiliaj uan ke uelis tikchiaskej tinemiskej nochipaya itech se xochital nikan taltikpak (Salmo 37:29; Isaías 35:5, 6; Ezequiel 18:4). Uan kitematiltiaj takajkayaualis tein okseki taneltokalismej tamachtiaj (Mateo 15:9; 23:27, 28).
Taneltokalis tein melauak kinpaleuia miakej maj motokikan iuan Dios uan maj kiixmatikan itokay, Jehová (Salmo 83:18; Isaías 42:8; Juan 17:3, 6). Uan tamachtia ke Dios kineki maj iuan timouikakan, porin yejuatsin amo uejka yetok uan uelis tikixmatiskej (Santiago 4:8).
Taneltokalis tein melauak tamachtia ke Dios kiualtitanik Jesucristo para techmakixtikiuj (Hechos 4:10, 12). Akin ompa pouij kitakamatij itanauatiluan Jesús uan mochikauaj kichiuaskej nemiskej kemej yejua nemik (Juan 13:15; 15:14).
Taneltokalis tein melauak tamachtia ke sayoj iTaixyekanalis Dios tayektalis nikan taltikpak. Yejua ika, akin pouij itech taneltokalis tein melauak kinnojnotsaj oksekin ika nejin Taixyekanalis (Mateo 10:7; 24:14).
Itech taneltokalis tein melauak tamachtiaj maj timotasojtakan se iuan okse (Juan 13:35). Kinmachtiaj oksekin maj kintakachiuakan nochin uan maj amo kinchikoitakan akin okseko kayomej, taman tajtouaj uan taman tein momattokej kichiuaskej (Hechos 10:34, 35). Kemej akin ompa pouij kintasojtaj nochin, amo youij keman oksekin moteuitij (Miqueas 4:3; 1 Juan 3:11, 12).
Itech taneltokalis tein melauak amo kinpiaj tayekananij akin kintaxtauiaj uan akin ompa pouij amo kikuij tokaymej tein ika kinueyitaliaj (Mateo 23:8-12; 1 Pedro 5:2, 3).
Taneltokalis tein melauak amo mokalakia itech política (Juan 17:16; 18:36). Sayoj ke, akin ompa pouij kintakachiuaj uan kintakamatij tekiuanij, porin Biblia tanauatia: “Xikmakakan Tekiuaj tein iaxka Tekiuaj, sayoj ke xikmakakan Dios tein iaxka Dios” (Marcos 12:17; Romanos 13:1, 2).
Akin pouij itech taneltokalis tein melauak moneki nochipa kinextiskej ke pouij itech nejon taneltokalis, amo sayoj keman taueyichiuaj. Uan moyekanaj ika tein tamachtia Biblia (Efesios 5:3-5; 1 Juan 3:18). Yejuan kiuelitaj kitekitiliskej Dios akin yolpaki (1 Timoteo 1:11).
Amo miakej akin pouij itech taneltokalis tein melauak (Mateo 7:13, 14). Uan no, kemansa kinpinaujtiaj uan kintajyouiltiaj porin kichiuaj tein Dios kineki (Mateo 5:10-12).
“Nejua nipoui itech taneltokalis tein nejua nikuelita”
Amo kuali yeskia maj tikpiakan taneltokalis tein tejuan tikuelitaj. Biblia kijtoua ke sekin kintemoskiaj “tamachtianij akin kiniluiskej tein yejuan kinekiskej kikakiskej”, uan amo tein Biblia tamachtia (2 Timoteo 4:3). Sayoj ke Biblia techiluia maj tietokan itech taneltokalis tein “ToTajtsin Dios kiita ke [...] chipauak uan amo pitsotik”, maski oksekin amo kiuelitaskej (Santiago 1:27, nota; Juan 15:18, 19).