Achto ilibro Samuel
31 Ijkuakon filisteos okinmixnamiktokaj israelitas, tlakamej israelitas okincholilijkej filisteos uan itech tepetl Guilboa miakej okinmiktijkej. 2 Filisteos okikuitlapantokakej Saúl uan ikoneuan. Ijkuakon okimiktijkej Jonatán, Abinadab uan Malki-Súa, ikoneuan Saúl. 3 Filisteos okinekiayaj kimiktiskej Saúl. Akinmej okinejnekiayaj* arco okajsikej Saúl, okimotlakej uan fiero okikojkojkej. 4 Saúl okilui akin okinuikiliaya iteposuan: “Xikkixti moespada uan techtsoponili, porque amo nikneki akinmej amo okinkuaximilijkej intlakayo,* maualakan uan yejuan manechtsoponilikan espada nion amo nikneki manechtlajyouiltikan”. Pero akin okinuikiliaya iteposuan, omomojtiaya uan amo okitsoponili espada. Ikinon Saúl ouetski ipan iespada uan okimotsoponili. 5 Ijkuak akin okinuikiliaya iteposuan okitak Saúl omiki, noijki ye ouetski ipan iespada uan okimotsoponili uan ijkon yejuan ome omikej. 6 Non tonal omikej Saúl, akin okinuikiliaya iteposuan, eyi ikoneuan uan nochtin itlakeualuan. 7 Israelitas tlen okatkaj ixtlauak* uan tlali tlen kajki Jordán okinkajkej altepemej kanin okatkaj uan ocholojkej. Ijkon okichijkej porque okinmitakej soldados israelitas ocholojkej noijki okinmiktijkej Saúl uan ikoneuan. Satepan filisteos ompa oajsitoj uan okinmokauijkej nonmej altepemej.
8 Mostlatika ijkuak filisteos okinkixtilitoj tlen okachi inpati akinmej okinmiktijkej, itech tepetl Guilboa okajsikej icuerpo Saúl uan eyi ikoneuan. 9 Saúl okitekilijkej itsonteko uan okikixtilijkej itlaken tlen okonakiaya* ijkuak oyaya guerra. Noijki itech nochi intlal filisteos, inmialtepeuan uan templos kanin okatkaj imágenes, okichijkej mamomati tlen opanok. 10 Satepan itlaken Saúl tlen okonakiaya ijkuak oyaya guerra, okitlalijkej ijtik templo kanin okatkaj imágenes de Astoret uan icuerpo okipilojkej ipan tepamitl tlen okiyaualouaya altepetl Bet-San. 11 Akinmej ochantiayaj Jabés-Galaad, okimatkej tlen filisteos okitoktijkej* Saúl. 12 Ikinon nochtin soldados oyajkej nochi youak uan okitemouitoj icuerpo Saúl uan incuerpo ikoneuan tlen okinpilojkaj ipan tepamitl tlen okiyaualouaya altepetl Bet-San. Yejuan omokopkej Jabés uan ompa okinchichinojkej.* 13 Satepan itlampa tamariscokouitl tlen kajki Jabés, okintokakej inomiouan uan chikome tonal amo otlakuajkej.*