Achto ilibro Samuel
1 Ompa Ramataim-Zofim tlen kajki itepeyo Efraín, okatka se efraimita tlen omotokayotiaya Elcaná. Elcaná ikone Jeroham, Jeroham ikone Elihú, Elihú ikone Tohu, Tohu ikone Zuf. 2 Elcaná okinpiaya ome isiuauan, se omotokayotiaya Ana uan okse Peniná. Ana amo okinpiaya ikoneuan pero Peniná kema okinpiaya ikoneuan. 3 Sejse xiuitl Elcaná okisaya Ramataim-Zofim uan otlejkouaya Siló para kiueyichiuaskia Jehová akin kinnauatia nochtin ángeles uan kinmakaskia tetliokolilmej. Noijki ompa Siló, ome ikoneuan Elí tlen omotokayotiayaj Hofní uan Finehás okitekichiuiliayaj Jehová ken iteopixkauan.
4 Se tonal, Elcaná okitemakak tetliokolil uan tepitsin de non tetliokolil okinmakak Peniná, itelpochuan uan ichpochuan. 5 Pero Elcaná okachi okitlasojtlaya Ana ikinon okimakak tlen okachi kuali. Ijkuakon Jehová ayamo okinmakaya ikoneuan. 6 Okse isiua Elcaná nochipa okipinauiaya Ana porque Jehová amo okinmakaya ikoneuan. 7 Peniná noijki sapanoua okipinauiaya Ana ijkuak sejse xiuitl oyayaj itabernáculo* Jehová. Ikinon Ana ochokaya uan amo otlakuaya. 8 Pero Elcaná okitlajtlaniaya: “Ana, ¿tleka tichoka? ¿Tleka amo titlakua? Amo ximoyolkoko, ne nikan nika ¿noso okachi kuali majtlaktli konemej?”.
9 Ana omoketski uan oyajki ijkuak otlankej otlakuajkej uan itlaj okonikej ompa Siló. Ijkuakon teopixki Elí oyetoka kanin ye omotlaliaya ik ikaltempa itemplo* Jehová. 10 Ana sapanoua omotekipachouaya uan san ochokaya ikinon opejki kitlatlaujtia Jehová. 11 Ana okijto ijkin kichiuaskia: “¡Jehová akin kinnauatia nochtin ángeles! Xikita ken san nitlajyouia. Ne nimotlakeual techilnamiki uan amo techilkaua, techmaka se nokone chokotsin. Jehová tla ijkon tikchiuas, ne nimitsmaktilis para nochipa mamitstekichiuili uan amo keman kitsonkaltekiskej”.
12 Ana ouejka ompa okitlatlaujtijtoka Jehová, ijkuakon Elí okitoka ken Ana okoliniaya ikamak. 13 Ana okimoluiaya tlen okipiaya iyolipan,* okamauiuiokaya pero amo omokakiaya tlen okijtouaya. Ikinon Elí omokuayejyeko* Ana otlauanki. 14 Uan okilui: “Ayakmo xikoni vino uan ayakmo xitlauana”. 15 Ana okinankili: “¡Amo noteko! Amo onikonik vino nion okseki tlamantli tlen teuintia. Sapanoua nitlajyouijtok ikinon nikiluia Jehová nochi tlen nikpia noyolipan.* 16 Nikan yoniuejka ijkon nitlajtojtok porque sapanoua nimoyolkokoua uan san nitlajyouijtok, ikinon amo techita ken amitlaj nopati”. 17 Ijkuakon Elí okilui: “Xio uan amo ximotekipacho, inDios israelitas mamitsmaka tlen otiktlajtlanili”. 18 Ana okinankili: “Noteko nochipa techyekseli”. Satepan ye oyajki, otlakua uan itech ixko ayakmo omotaya omoyolkokouaya.
19 San kualkan* omejkej, omotolojkej* ixpan Jehová uan omokopkej inkalijtik ompa Ramá. Satepan Elcaná omotekak iuan Ana uan Jehová okilnamik. 20 Ijtik Ana opejki moskaltia ikonetsin uan ijkuak ayamo oajsiaya se xiuitl oneski* ichokotsin. Ye okitokayoti Samuel* porque okijtouaya: “Ye Jehová akin oniktlajtlanili”.
21 Satepan Elcaná iuan nochtin akinmej iuan ochantiayaj okimakato tetliokolil Jehová ijkon ken okichiuaya sejse xiuitl uan okitemakak tetliokolil porque okijto itlaj kichiuaskia. 22 Pero Ana amo oyajki uan okilui inamik: “Ijkuak ayakmo nikchichitis nochokotsin, nikuikas ixpan Jehová uan ompa mokauas”. 23 Elcaná okinankili: “Xikchiua tlen kuali tikita. Nikan ximokaua hasta ijkuak ayakmo tikchichitis uan Jehová makichiua tlen otikilui”. Ijkuakon ye omoka ikalijtik, okichichiti ikone hasta ijkuak ayakmo omonekiaya kichichitis.
24 Ijkuak ayakmo okichichitiaya, okiuikak Siló. Noijki okiuikak se toro tlen okipiaya eyi xiuitl, kanaj once kilos* harina uan ijtik se ueyi komitl okiuikaya vino. Ana uan ichokotsin oajsitoj ikalijtik Jehová ompa Siló. 25 Satepan okimiktijkej toro uan chokotsin okiuikilijkej Elí. 26 Ijkuakon Ana okijto: “¡Noteko techtlapojpolui! Ne nimitsiluia, ne akin oniktlatlaujtijtoka Jehová nikan monakastlan. 27 Oniktlatlaujti Jehová para niktlajtlanilis nin chokotsin uan tlen oniktlajtlanili ye onechmakak. 28 Uan axkan ne nikmaktilia Jehová. Nochi tonal ijkuak ye yoltos yetos iaxka Jehová”.