Josué
17 Manasés achto ikone José uan itribu okinmakakej tlali ijkon ken okistiaya. Makir okatka se soldado yolchikauak ikinon okikajteuilijkej tlali tlen kajki Galaad uan Basán. Makir okatka achto ikone Manasés uan ye okatka ipapa Galaad. 2 Oksekimej familias tlen okatkaj ixuiuan Manasés okinmakakej tlali ijkon ken omonekiaya, ikoneuan Abí-Ézer, ikoneuan Hélec, ikoneuan Asriel, ikoneuan Siquem, ikoneuan Héfer uan ikoneuan Semidá. Nochtin ninmej tlakamej uan infamilias okatkaj ixuiuan Manasés ikone José. 3 Zelofehad okatka ikone Héfer, ikone Galaad, ikone Makir, ikone Manasés. Ye san okinpixki ichpochmej uan intoka Mahlá, Noá, Hoglá, Milcá uan Tirzá. 4 Yejuan oyajkej ixpan teopixki Eleazar, Josué ikone Nun, akinmej okinyekanayaj israelitas uan okinmiluijkej: “Jehová okinauati Moisés matechmaka seki tlali intlajkotia intlal totiojuan”. Yejuan okinmakakej tlali intlajkotia intlal ikniuan ipapa, ijkon ken Jehová otlanauati.
5 Maski Manasés yokikajteuilijkaj tlali tlen kajki Galaad uan Basán ik okse lado Jordán, noijki ok okimakakej majtlaktli pedazos tlali. 6 Porque san sekan okinkajteuilijkej tlali siuamej uan tlakamej tlen pouij itech itribu Manasés. Oksekimej ixuiuan okinkajteuilijkej tlali tlen kajki Galaad.
7 Itlal itribu Manasés okipanouiaya Aser uan oajsiaya hasta Micmetat tlen kajki iyekapan altepetl Siquem. Noijki intlal tlen okatka ik sur, oajsiaya ik kanin kajki intlal akinmej chantij En-Tapúah. 8 Itribu Manasés okimokaui tlali tlen kajki Tapúah pero ixuiuan Efraín okimokauijkej altepetl tlen kajki Tapúah, ik kanin tlami itlal itribu Manasés. 9 Itlal otlamiaya ik ibarranca Caná, ik isur barranca. Itribu Efraín okipiaya sekimej altepemej itech itlaluan itribu Manasés. Itlal itribu Manasés oajsiaya hasta ik inorte barranca uan otlamiaya kanin kajki mar. 10 Tlali tlen omokauaya ik sur iaxka itribu Efraín, tlen omokauaya ik norte iaxka itribu Manasés uan itlal otlamiaya kanin kajki mar. Itlal itribu Manasés tlen kajki ik norte oajsiaya kanin opeuaya itlal itribu Aser uan itlal tlen kajki ik kanin kisa tonaltsin oajsiaya kanin opeuaya itlal itribu Isacar.
11 Itribu Manasés okimakakej seki tlali tlen kajki itech intlal itribu Isacar uan Aser, okimakakej Bet-Seán uan altepemej tlen ik ompa katej, Ibleam uan altepemej tlen ik ompa katej, akinmej chantij Dor uan altepemej tlen ik ompa katej, akinmej chantij En-Dor uan altepemej tlen ik ompa katej, akinmej chantij Taanac uan altepemej tlen ik ompa katej, akinmej chantij Meguidó uan altepemej tlen ik ompa katej. Ninmej eyi tlalmej katej tlakpak.
12 Cananeos ok okinekiayaj chantiskej itech nonmej tlalmej ikinon ixuiuan Manasés amo ouelik okinmoaxkatijkej nonmej altepemej. 13 Ijkuak soldados israelitas omomiakilijkej, okintlalijkej cananeos chikauak matekipanokan pero amo ouelik okinkixtilijkej intlal.
14 Ixuiuan José okiluitoj Josué: “Sapanoua otimomiakilijkej porque Jehová techteochijtok, ikinon ¿tleka amo miak tlali otechmakak?”. 15 Josué okinnankili: “Ken namejuan yonanmomiakilijkej, xitlejkokan kanin kojyo uan xikchipauakan se pedazo intlal perizitas uan refaím. Porque tepeyo tlen kajki Efraín sapanoua tsikitsin para namejuan”. 16 Ixuiuan José okinankilijkej: “Tlali tlen kajki tepeyo amo techajxilis porque cananeos, akinmej katej Bet-Seán uan altepemej tlen ik ompa katej uan akinmej katej ixtlauak* Jezreel kinpiaj incarretas tlen kipiaj tepostli tlen tlateki”. 17 Ikinon ixuiuan José akinmej pouij itech itribu Efraín uan itribu Manasés, Josué okinmilui: “Namejuan sapanoua nanmiakej uan nanchikauakej, ikinon amo nankimokauiskej san tsikitsin tlali, 18 porque nochi tepeyo nankimokauiskej. Maski kojyo, nankichipauaskej uan hasta ompa tlamis namotlal. Nankinkixtiliskej intlal cananeos maski chikauakej uan kinpiaj incarretas tlen kipiaj tepostli tlen tlateki”.