Josué
19 Nochtin familias tlen pouij itech itribu Simeón okinmakakej tlali ijkon ken okistiaya, ijkuak ome uelta okixexelojkej. Intlal okatka kanin kajki itlal itribu Judá. 2 Okimakakej Beer-Seba uan Seba, Moladá, 3 Hazar-Sual, Balá, Ézem, 4 Eltolad, Betul, Hormá, 5 Ziclag, Bet-Marcabot, Hazar-Susá, 6 Bet-Lebaot uan Saruhén. Okatkaj 13 altepemej uan ialtepetsitsinuan. 7 Ain, Rimón, Éter uan Asán. Okatkaj naui altepemej uan ialtepetsitsinuan. 8 Noijki altepetsitsintin tlen katej inakastlan altepemej tlen oajsiayaj hasta Baalat-Beer uan Ramá tlen kajki ik sur. Nin okinkajteuilijkej sejse infamilia tlen pouij itech itribu Simeón. 9 Intlal ixuiuan Simeón okatka itech itlal itribu Judá, porque non tlali okatka sapanoua ueyi para yejuan. Ikinon ixuiuan Simeón okiselijkej intlal kanin kajki itlal itribu Judá.
10 Nochtin familias tlen pouij itech itribu Zabulón okinmakakej tlali ijkon ken okistiaya, ijkuak eyi uelta okixexelojkej. Intlal otlamiaya hasta Sarid. 11 Intlal tlen okatka ik kanin motlatia tonaltsin okipanouiaya Mareal, Dabéset uan oajsiaya barranca tlen kajki ik iyekapan Jocneam. 12 Noijki desde Sarid oyaya ik kanin kisa tonaltsin uan oajsiaya hasta Kislot-Tabor, okipanouiaya Daberat uan otlejkouaya ompa Jafía. 13 Satepan oyaya ik kanin kisa tonaltsin hasta Gat-Hefer, Et-Cazín, okipanouiaya Rimón uan oajsiaya Neá. 14 Intlal omoyaualouaya ik norte, ik Hanatón uan otlamiaya ik ixtlauak* Iftá-El, 15 noijki okatka inmiaxka Catat, Nahalal, Simrón, Idalá uan Belén. Okatkaj 12 altepemej uan ialtepetsitsinuan. 16 Nonmej okatkaj altepemej uan ialtepetsitsinuan tlen okinkajteuilijkej sejse infamilia tlen okatkaj ixuiuan Zabulón.
17 Nochtin familias tlen okatkaj ixuiuan Isacar okinmakakej tlali ijkon ken okistiaya, ijkuak naui uelta okixexelojkej. 18 Intlal otlamiaya Jezreel, Kesulot, Sunem, 19 Hafaraim, Shion, Anaharat, 20 Rabit, Quisión, Ébez, 21 Rémet, En-Ganim, En-Hadá uan Bet-Pazez. 22 Intlal oajsiaya hasta Tabor, Sahazuma, Bet-Semes uan otlamiaya kanin kajki Jordán. Okatkaj 16 altepemej uan ialtepetsitsinuan. 23 Nonmej okatkaj altepemej uan ialtepetsitsinuan tlen okinkajteuilijkej sejse familias tlen pouij itech itribu Isacar.
24 Nochtin familias tlen pouij itech itribu Aser okinmakakej tlali ijkon ken okistiaya, ijkuak makuili uelta okixexelojkej. 25 Intlal oajsiaya Helcat, Halí, Beten, Acsaf, 26 Alamélec, Amad uan Misal. Noijki oajsiaya ompa Carmelo uan Sihor-Libnat ik kanin motlatia tonaltsin, 27 itlal oajsiaya Bet-Dagón ik kanin kisa tonaltsin, noijki kanin kajki itlal itribu Zabulón, ik inorte ixtlauak Iftá-El, Bet-Émec, Neiel uan oajsiaya inakastlan Cabul, 28 Ebrón, Rehob, Hamón, Caná uan hasta Sidón la Grande. 29 Okipanouiaya Ramá uan oajsiaya Tiro, altepetl tlen kuali otsaktoka. Oajsiaya Hosá uan otlamiaya kanin kajki mar ompa Aczib, 30 Umá, Afec uan Rehob. Okatkaj 22 altepemej uan ialtepetsitsinuan. 31 Nonmej okatkaj altepemej uan ialtepetsitsinuan tlen okinkajteuilijkej sejse familias tlen pouij itech itribu Aser.
32 Nochtin familias tlen okatkaj ixuiuan Neftalí okinmakakej tlali ijkon ken okistiaya, ijkuak chikuase uelta okixexelojkej. 33 Intlal okipanouiaya Hélef, kouitl tlen kajki Zaananim, opanouaya ik Adamí-Néqueb uan Jabneel, oajsiaya hasta Lacum uan otlamiaya kanin kajki Jordán. 34 Intlal oajsiaya ik kanin motlatia tonaltsin ompa Aznot-Tabor, otlamiaya hasta Hucoc uan oajsiaya ik sur kanin kajki itlal itribu Zabulón, ik kanin motlatia tonaltsin kanin kajki itlal itribu Aser uan ik Jordán kanin kajki itribu Judá ik kanin kisa tonaltsin. 35 Noijki altepemej tlen kuali otsaktokaj, Zidim, Zer, Hammat, Racat, Kinéret, 36 Adamá, Ramá, Hazor, 37 Quedes, Edréi, En-Hazor, 38 Yirón, Migdal-El, Horem, Bet-Anat uan Bet-Semes. Okatkaj 19 altepemej uan ialtepetsitsinuan. 39 Nonmej okatkaj altepemej uan ialtepetsitsinuan tlen okinkajteuilijkej sejse familias tlen pouij itech itribu Neftalí.
40 Nochtin familias tlen pouij itech itribu Dan okinmakakej tlali ijkon ken okistiaya, ijkuak chikome uelta okixexelojkej. 41 Tlali tlen okinkajteuilijkej kajki Zorá, Estaol, Ir-Semes, 42 Saalabín, Ayalón, Itlá, 43 Elón, Timná, Ecrón, 44 Eltequé, Guibetón, Baalat, 45 Jehúd, Bene-Berac, Gat-Rimón, 46 Me-Jarcón uan Racón. Intlal oajsiaya iyekapan Jope. 47 Pero tlali tlen okimakakej itribu Dan okatka tsikitsin. Ikinon okinmiktitoj akinmej ochantiayaj Lésem, okinkixtilijkej intlal uan okinmiktijkej ika espada. Okimokauijkej non tlali uan ompa ochantitoj. Satepan altepetl Lésem okitokayotijkej Dan porque ijkon omotokayotiaya inuejkatata. 48 Nonmej okatkaj altepemej uan ialtepetsitsinuan tlen okinkajteuilijkej sejse familias tlen pouij itech itribu Dan.
49 Ijkin okinxexelilijkej tlali uan okinmakakej. Satepan israelitas okimakakej Josué ikone Nun seki tlali intlajkotia intlal. 50 Josué okitlajtlanki altepetl Timnat-Sérah ompa tepeyo tlen kajki Efraín uan Jehová otlanauati makimakakan. Josué okiyektlali non altepetl uan opejki ompa chanti.
51 Ompa Siló ikaltempa kalnechikol, teopixki Eleazar, Josué ikone Nun uan tlakamej akinmej okinyekanayaj sejse intribu israelitas, okixexelojkej tlali ijkon ken okistiaya ixpan Jehová. Ijkon okixexelojkej nochi tlali.