Jueces
3 Ninmej altepemej tlen Jehová ik ompa okinkajte para makinyejyekokan israelitas tlen amo keman ouiaj guerra inuan akinmej ochantiayaj altepetl Canaán, yejuan ninmej 2 (ijkon israelitas tlen yikin nesiskiaj* uan amo keman ouiaj guerra kimatiskiaj ken temiktiskej): 3 makuili intekiuajkej filisteos, nochtin cananeos, sidonios uan heveos tlen ochantiayaj itech tepetl Líbano. Desde tepetl Baal-Hermón hasta Lebó-Hamat. 4 Yejuan okinyejyekojkej israelitas para motaskia kox kitlakamatiskiaj* itlanauatiluan Jehová tlen okinmakak inuejkatatajuan ika Moisés. 5 Ikinon israelitas ochantikej intlajkotia cananeos, hititas, amorreos, perizitas, heveos uan jebuseos. 6 Ichpochmej tlen okatkaj itech nonmej altepemej inuan omonamiktiayaj uan inmichpochuan okinnamiktiayaj inuan intelpochuan, ikinon opejki kintekichiuiliaj indioses.
7 Israelitas otlajtlakolchijkej ixpan Jehová. Okilkajkej Jehová inDios uan opejki kinueyichiuaj Baales uan kojmej tlen okinueyichiuayaj.* 8 Israelitas sapanoua okikualanijkej Jehová uan ye okinka imak Cusán-Risataim akin otlanauatiaya Mesopotamia.* Israelitas chikueyi xiuitl okitekichiuilijkej tekiua Cusán-Risataim. 9 Ijkuak israelitas okitlatlaujtijkej Jehová makinpaleui, Jehová okintitlanili Otniel ikone Quenaz, ikni Caleb non xokoyotl para kinmakixtis. 10 Jehová okimakak iespíritu Otniel uan ye omochi injuez israelitas. Ijkuak Otniel okixnamikito tekiua Cusán-Risataim akin otlanauatiaya Mesopotamia,* Jehová okimaktili uan ijkon okitlanili. 11 Amo omochi guerra uan kuali okatkaj 40 xiuitl kanin ochantiayaj. Satepan omiki Otniel ikone Quenaz.
12 Israelitas oksepa opejki kichiuaj tlen amo kuali ixpan Jehová. Ikinon Jehová okikauili tekiua Eglón akin otlanauatiaya Moab, makintlanili israelitas porque yejuan okichijtokaj tlen amo kuali ixpan Jehová. 13 Tekiua Eglón omosetili inuan ammonitas uan amalequitas, okinmixnamikej israelitas uan okimoaxkatijkej altepetl Jericó.* 14 Israelitas okitekichiuilijkej 18 xiuitl tekiua Eglón akin otlanauatiaya Moab. 15 Israelitas oksepa okitlatlaujtijkej Jehová makinpaleui uan para kinmakixtis Jehová okinmakak Ehúd ikone Guerá tlen okatka benjaminita. Ehúd nochi okichiuaya ika iopochma.* Satepan israelitas okititlankej Ehúd makitlaxtlauiti tekiua Eglón akin otlanauatiaya Moab. 16 Ehúd okichi se espada tlen okipiaya kanaj 40 centímetros* uan ojka otlatekiaya. Satepan okilpi ipan imets* itlampa itlaken. 17 Ijkuakon okitlaxtlaui tekiua Eglón akin otlanauatiaya Moab, ye okatka sapanoua tomauak.
18 Ijkuak Ehúd yotlatlaxtla, okinmilui mayakan akinmej iuan otlauikayaj. 19 Ijkuak oajsitoj Guilgal kanin okatkaj imágenes tlen ochijtokaj ika tetl,* Ehúd omokopki kanin okatka tekiua uan okilui: “Tekiua, nikneki itlaj nimitsiluis tlen moneki san te tikmatis”. Tekiua okijto: “¡Toselti techkauakan!”.* Ijkuakon nochtin akinmej okitekichiuiliayaj oyajkej. 20 Tekiua okatka iselti itech cuarto kanin tlaseseya ikpak* ikal, ye okatka* ipan itrono, ijkuakon Ehúd inauak omotoki uan okilui: “Dios onechilui itlaj manimitsilui”. Ijkuak tekiua okikak non, omoketski. 21 Ehúd okikixti ika iopochma espada tlen oilpitoka ipan imets tlen okatka iyekma uan okijtitsoponili Eglón. 22 Ijkuakon ijtik tekiua okikalakili nochi espada, Ehúd ayakmo okikixti uan ichiauak tekiua okajsik nochi espada hasta okuitlakiski. 23 Ehúd okiski itech ventana uan okintsak ika llave puertas tlen katej itech cuarto tlen kajki ikpak kali. 24 Satepan ijkuak Ehúd okiski, akinmej okitekichiuiliayaj tekiua omokopkej uan okitakej puertas otsaktokaj ika llave. Ikinon okijtojkej: “Xamo oyajki baño ijtik cuarto kanin tlaseseya”. 25 Ouejka omochixtokaj uan amo okimatiayaj tlen kichiuaskej. Pero ijkuak okitakej tekiua amo otlatlapouaya, yejuan otlatlapojkej ika llave. ¡Uan okajsitoj inteko tlalpan uan yomiki!
26 Ijkuak akinmej okitekichiuiliayaj tekiua omochixtokaj, Ehúd ocholo, opanok ik kanin okatkaj imágenes tlen ochijtokaj ika tetl. Amitlaj okipanok uan oajsito Seirá. 27 Ijkuak oajsito tepeyo tlen kajki Efraín, okichi makipitsakan kuakouitl. Ye uan israelitas okatkaj itech tepeyo, otemokej uan ye okinyekantiaya. 28 Ijkuakon okinmilui: “Nouan xiakan porque Jehová onamechinmaktili moabitas tlen namechkokoliaj”. Yejuan iuan oyajkej uan okinchixkej moabitas kanin okipanouiayaj Jordán para amo macholokan uan amo okitekauilijkej ikaj mapano. 29 Ijkuakon okinmiktijkej kanaj 10,000* tlakamej moabitas tlen okatkaj chikauakej uan amo omomojtiayaj. Nion se ocholo. 30 Non tonal israelitas opejki kinauatiaj moabitas. Amo omochi guerra uan kuali okatkaj 80 xiuitl kanin ochantiayaj.
31 Ijkuak Ehúd ayakmo okatka, Samgar ikone Anat okinmakixti israelitas ijkuak okinmikti 600 filisteos ika se tlakotl yakauitstik tlen ika okinpeuayaj toros uan vacas.