Josué
16 Tlali tlen ixuiuan José okinmakakej ijkon ken okistiaj, opeuaya desde aueyatl* Jordán tlen kajki Jericó uan hasta atl tlen kajki Jericó ik kanin kisa tonaltsin. Oajsiaya Jericó ik kanin tlauaki uan kanin katej tepemej ompa Betel. 2 Okipanouiaya Betel tlen kajki ik inakastlan Luz uan oajsiaya hasta kanin kajki intlal arkitas ompa Atarot. 3 Noijki otemouaya kanin tlami intlal jafletitas ik kanin motlatia tonaltsin hasta altepetl Bet-Horón Baja, Guézer uan otlamiaya kanin kajki mar.
4 Itribu Manasés uan itribu Efraín tlen okatkaj ixuiuan José, okiselijkej tlali tlen okinmakakej. 5 Nochtin familias tlen okatkaj ixuiuan Efraín, intlal opeuaya ik Atarot-Addar ik kanin kisa tonaltsin uan hasta altepetl Bet-Horón Alta. 6 Intlal otlamiaya hasta kanin kajki mar. Noijki ik norte kanin kajki Micmetat, otlayaualouaya Taanat-Siló ik kanin kisa tonaltsin uan oajsiaya ompa Janóah ik kanin kisa tonaltsin. 7 Intlal okipanouiaya Janóah uan oajsiaya hasta altepetl Atarot, Naará, altepetl Jericó uan otlamiaya hasta aueyatl Jordán. 8 Intlal okipanouiaya Tapúah, oyaya ik kanin motlatia tonaltsin ik kanin kajki ibarranca Caná uan otlamiaya hasta kanin kajki mar. Nochi non okinkajteuilijkej familias tlen pouij itech itribu Efraín. 9 Itribu Efraín okikajteuilijkej altepemej uan altepetsitsintin kanin noijki okikajteuilijkej tlali itribu Manasés.
10 Pero amo okinkixtijkej cananeos akinmej ochantiayaj Guézer, ikinon cananeos hasta axkan chantij inuan itribu Efraín uan okintlalijkej chikauak matekipanokan.