Josué
18 Satepan israelitas omonechikojkej Siló porque non tlali yokatka inmiaxka uan ompa okitlalijkej kalnechikol. 2 Pero chikome intribus israelitas ayamo okinmakayaj intlal. 3 Ikinon Josué okinmilui israelitas: “¿Keman nankimoaxkatiskej tlali tlen onamechmakak Jehová inDios namouejkatatajuan? 4 Xikinpejpenakan eyi tlakamej itech sejse tribu. Nikintitlanis makitatij tlali uan makinchiuakan mapas itech tlali tlen kimokauiskej. Ijkuak mokopatiuij manechitakij. 5 Moneki nankixexeloskej tlali chikome pedazos uan nankimoxexeliliskej. Itribu Judá kimokauis tlali tlen kajki ik sur uan ixuiuan José kimokauiskej tlali tlen kajki ik norte. 6 Namejuan xikxexelokan chikome pedazos tlali, xikchiuakan mapas, techinualikilikan uan ixpan Jehová toDios namechmakas tlali ijkon ken kistias. 7 Pero levitas amo kiseliskej seki tlali ijkon ken namejuan, porque Jehová okinpejpenki para makitekichiuilikan ken teopixkej. Moisés itekipanojka Jehová okikajteuili itribu Gad, itribu Rubén uan tlajko itribu Manasés, tlali ik Jordán ik kanin kisa tonaltsin”.
8 Achto yaskiaj tlakamej, omoyektlalijkej uan Josué okinnauati akinmej kinchiuaskiaj mapas: “Xiakan, xikitatij tlali, xikchiuakan mapas uan techitakij ijkuak nanmokopatiuij. Nikan Siló, ixpan Jehová namechmakas tlali ijkon ken kistias”. 9 Tlakamej oyajkej, okitatoj tlali, okixexelojkej chikome pedazos tlali ijkon ken altepemej tlen ompa okatkaj, okinchijkej mapas uan non okijkuilojkej itech se libro. Satepan oksepa oyajkej kanin okatka Josué kanin omokajtokaj ompa Siló. 10 Ixpan Jehová ompa Siló, Josué okinxexelili tlali ijkon ken okistiaya. Ompa Josué okinxexelili tlali israelitas ijkon ken omonekiaya.
11 Nochtin familias tlen pouij itech itribu Benjamín okinmakakej tlali ijkon ken okistiaj uan intlal tlen okinmakakej okatka ik kanin okatka intlal ixuiuan Judá uan ixuiuan José. 12 Intlal opeuaya Jordán ik norte uan oajsiaya ik ixtemolistli* Jericó, tlen kajki ik norte. Noijki otlejkouaya ik tepetl tlen kajki ik kanin motlatia tonaltsin uan oajsiaya kanin tlauaki ompa Bet-Aven. 13 Intlal opanouaya ik Luz, ik isur ixtemolistli Luz noso Betel. Otemouaya Atarot-Addar ik tepetl tlen kajki ik isur Bet-Horón Baja. 14 Intlal oajsiaya ik kanin motlatia tonaltsin uan okiyaualouaya tepetl tlen kajki iyekapan Bet-Horón ik sur uan intlal otlamiaya Quiryat-Baal noso Quiryat-Jearim. Non altepetl okatka iaxka itribu Judá. Ompa otlamiaya intlal tlen kajki ik kanin motlatia tonaltsin.
15 Intlal opeuaya ik sur ik kanin kajki Quiryat-Jearim uan oajsiaya hasta kanin motlatia tonaltsin. Noijki oajsiaya kanin meya atl ompa Neftóah. 16 Intlal otemouaya inakastlan tepetl tlen kajki iyekapan ixtlauak* tlen itoka iKone Hinón. Tlen kajki ik inorte ixtlauak Refaim. Otemouaya ixtlauak Hinón ik ixtemolistli kanin ochantiayaj jebuseos ik sur uan En-Roguel. 17 Intlal tlen kajki ik norte oajsiaya hasta En-Semes, oajsiaya hasta Guelilot tlen kajki iyekapan Adumim uan otemouaya kanin kajki tetl* Bohán tlen okitlali ikone Rubén. 18 Uan ik norte oajsiaya ik ixtemolistli tlen kajki iyekapan Arabá uan otemouaya ompa Arabá. 19 Intlal okipanouiaya ixtemolistli Bet-Hoglá ik norte uan otlamiaya itempa mar Salado,* tlen kajki ik norte kanin otlamiaya Jordán ik sur. Ompa otlamiaya intlal tlen kajki ik sur. 20 Intlal tlen kajki ik kanin kisa tonaltsin otlamiaya ompa Jordán. Non tlali okinkajteuilijkej sejse familias tlen okatkaj ixuiuan Benjamín, ijkon ken tlalmej tlen ik ompa otlamiayaj.
21 Altepemej tlen okinkajteuilijkej familias tlen pouij itech itribu Benjamín okatka: Jericó, Bet-Hoglá, Émec-Queziz, 22 Bet-Arabá, Zemaraim, Betel, 23 Avim, Pará, Ofrá, 24 Kefar-Amoní, Ofní uan Gueba. Okatkaj 12 altepemej uan ialtepetsitsinuan.
25 Gabaón, Ramá, Beerot, 26 Mizpé, Kefirá, Mozá, 27 Réquem, Irpeel, Taralá, 28 Zelá, Ha-Élef, Jebusí noso Jerusalén, Guibeá uan Quiryat. Okatkaj 14 altepemej uan ialtepetsitsinuan.
Nochi non tlali okinkajteuilijkej sejse familias tlen okatkaj ixuiuan Benjamín.