Jueces
17 Itech tepeyo tlen kajki Efraín okatka se tlakatl tlen omotokayotiaya Miqueas. 2 Ye okilui imama: “¿Tikilnamiki omitsichtekilijkej kanaj 12 kilos uan tlajko* plata? Onikkak otikijto toTajtsin Dios makitlajyouilti akin okinmichtek. Xikita, ne nikpixtok. Ne onikonanki non plata”. Ijkuak imama ijkon okikak, okijto: “Jehová makiteochiua nokone”. 3 Miqueas okikopili imama kanaj 12 kilos uan tlajko plata pero imama okilui: “Nin plata nikxelilis Jehová. Xiknejneki* para xikchiua se imagen uan se estatua ika tepostli. Axkan non plata moaxka”.
4 Ijkuak Miqueas okikopili imama non plata, imama okixelo kanaj ome kilo* plata uan okimakak akin otekipanouaya ika plata. Ikinon ye okichi se imagen uan se estatua ika tepostli, satepan okintlalijkej ikalijtik Miqueas. 5 Miqueas okipiaya se kali kanin okinueyichiuaya imágenes. Okichi se efod,* sekimej imágenes* uan okipejpenki se ikone para mayeto iteopixki. 6 Itech nonmej tonalmej israelitas amo okipiayaj intekiua uan sejse yejuan okichiuayaj tlen kuali okitayaj.
7 Ijkuakon okatka se telpochtli tlen opouiaya itech ifamilia Judá, ye ialtepe Belén tlen kajki Judá. Ye noijki okatka levita uan yimiak xiuitl ompa ochantiaya. 8 Non tlakatl okitemouaya kanin chantis, ikinon okikajte altepetl Belén ompa Judá. Ye oajsito tepeyo tlen kajki Efraín, ikalijtik Miqueas. 9 Miqueas okitlajtlani: “¿De kanin tiuits?”. Ye okinankili: “Ne nilevita uan onichantiaya Belén ompa Judá. Niktemojtinemi kanin nichantis”. 10 Miqueas okilui: “Nouan ximokaua para xiyeto noteopixki uan techiluis tlen moneki nikchiuas. Sejse xiuitl nimitsmakas kanaj 100 gramos* plata, nimitsmakas tsotsoli* tlen tiknejnekis* uan tlakuali”. Ijkuakon levita okalak itech kali. 11 Ijkon levita okiseli mokauas iuan Miqueas uan ye okitaya ken ikone. 12 Noijki Miqueas okipejpenki levita mayeto iteopixki uan ye opejki iuan chanti. 13 Ijkuakon Miqueas okijto: “Nin levita noteopixki ikinon kuali nikmati Jehová nechteochiuas”.