Jueces
18 Itech nonmej tonalmej israelitas amo okipiayaj intekiua. Ijkuakon intribu danitas okitemojtinemiayaj kanin chantiskiaj, porque ayamo okimoaxkatiayaj tlali tlen okinkajteuilijkej ijkon ken oksekimej intribus israelitas.
2 Danitas okintitlankej makuili tlakamej tlen pouij itech intribu makichtakaitatij tlali. Nonmej tlakamej nochi kuali okichiuayaj uan ochantiayaj altepetl Zorá uan altepetl Estaol. Okinmiluijkej: “Xiakan, xikitatij tlali”. Ijkuak yejuan oajsitoj tepeyo tlen kajki Efraín, omokajkej non youak ikalijtik Miqueas. 3 Ijkuak yoajsitiayaj ikalijtik Miqueas, yejuan okitenkakej levita, ikinon oyajkej uan okitlajtlanitoj: “¿Akin omitsualikak? ¿Tlen tikchiua nika? ¿Tleka otimoka?”. 4 Levita okinmilui tlen Miqueas okichi ipatka uan noijki okijto: “Ye onechtlake maniyeto teopixki”. 5 Nonmej tlakamej okiluijkej: “Timitstlatlaujtiaj, xiktlajtlani toTajtsin Dios kox kuali kisas tlen tiknekij tikchiuaskej kanin tiauij”. 6 Teopixki okinmilui: “Xiakan, amo ximotekipachokan. Jehová namouan yetos kanin nanyauij”.
7 Satepan makuili tlakamej oyajkej uan oajsitoj altepetl Lais. Ijkuak ompa oajsitoj, okitakej akinmej ompa ochantiayaj amo omonekiaya okse altepetl makinpaleui ijkon ken sidonios. Yejuan omoyolseuijtokaj, amitlaj okintekipachouaya uan amikaj tlen ik ompa ochantiaya uelis kinmixnamikiskia. Sidonios uejka okatkaj uan nion se altepetl okinpaleuiaya.
8 Ijkuak omokopkej altepetl Zorá uan Estaol, inmikniuan okintlajtlanijkej: “¿Itlaj onankajsikej?”. 9 Yejuan otlanankilijkej: “Matikinmijmiktitij akinmej ompa chantij, porque yotikitakej kuali intlal. Amo xiuejkauakan, san niman xiakan uan xikmoaxkatikan non tlali. 10 Ijkuak nanmajsitiuij nankitaskej akinmej ompa chantij, amitlaj kintekipachoua uan kipiaj miak tlali. ToTajtsin Dios yonamechmaktili non tlali tlen nochi kipia”.
11 Satepan 600 tlakamej tlen pouij itech infamilias danitas, okikajtejkej altepetl Zorá uan altepetl Estaol. Yejuan okiuikayaj tlen ika temiktiskej. 12 Otlejkokej Judá, omokajkej Quiryat-Jearim uan ompa ik kanin motlatia tonaltsin okitokayotijkej Mahané-Dan uan hasta axkan ijkon itoka. 13 Satepan oyajkej tepeyo tlen kajki Efraín uan oajsitoj ikalijtik Miqueas.
14 Ijkuakon makuili tlakamej tlen oichtakatlachiatoj Lais okinmiluijkej inmikniuan: “Onankimatiayaj itech ninmej kalmej kajki se imagen, se estatua de tepostli, se efod* uan imágenes.* Xikpejpenakan tlen nankichiuaskej”. 15 Yejuan ompa omoketskej uan makuili tlakamej oyajkej ikalijtik levita tlen okatka inakastlan ikal Miqueas uan okitlajtlanijkej ken okatka. 16 Pero 600 tlakamej danitas tlen okiuikayaj tlen ika temiktiskej, omokajkej kaltempa. 17 Nonmej makuili tlakamej okalakej para kiuikaskiaj imagen, estatua de tepostli, efod uan imágenes. (Teopixki omoketoka kaltempa inuan 600 tlakamej tlen okiuikayaj tlen ika temiktiskej). 18 Ijkuakon makuili tlakamej okalakej uan okiuikakej non imagen, estatua de tepostli, efod uan imágenes. Teopixki okintlajtlani: “¿Tleka ijkon nankichiuaj?”. 19 Yejuan okinankilijkej: “¡Ximokamatsakua! Amitlaj xikijto, touan xiuiki tiyetos toteopixki uan noijki techiluis tlen moneki tikchiuaskej. ¿Tikneki tiyetos iteopixki san se tlakatl? Noso ¿tikneki tiyetos iteopixki se tribu kanin pouij miakej familias israelitas?”. 20 Teopixki kuali okitak tlen okiluijkej ikinon inuan oyajki uan okinuikak imágenes, efod uan imagen.
21 Satepan oksepa opejki nejnemij uan okintlayekanaltijkej konemej, toros, vacas uan nochi tlamantli miak ipati tlen okiuikayaj. 22 Ijkuak danitas yiuejka oyayaj, akinmej ochantiayaj ik kanin okatka ikalijtik Miqueas, omonechikojkej, okinkuitlapantokakej uan okinmajsitoj. 23 Satepan chikauak okintsajtsilijkej danitas, yejuan otlachixkej tlakuitlapan uan okitlajtlanijkej Miqueas: “¿Tlen mitspanoua? ¿Tleka otikinualikak nochtin yejuan?”. 24 Ye okinnankili: “Namejuan onantechkuilijkej noteopixki uan dioses tlen onikinchi. Ayakmo itlaj nikpia uan ok nantechtlajtlaniaj: ‘¿Tlen mitspanoua?’”. 25 Danitas okiluijkej: “Amo chikauak technankili, porque xamo sekimej tlakamej tlen kualantokej uelis mitsixnamikiskej te uan noijki akinmej mouan chantij uan uelis namechmiktiskej”. 26 Ijkuakon danitas oksepa opejki nejnemij. Uan ijkuak Miqueas okitak yejuan okatkaj okachi chikauakej, omokopki uan oyajki ikalijtik.
27 Ijkuak okiuikakej iteopixki Miqueas uan dioses tlen okinchi, oyajkej Lais. Akinmej ompa ochantiayaj omoyolseuijtokaj uan amitlaj okintekipachouaya. Danitas okinmiktijkej ika espada akinmej ompa ochantiayaj uan okichichinojkej* altepetl. 28 Amikaj okinpaleui akinmej ompa ochantiayaj porque okatkaj tlamaniktli Bet-Rehob uan uejka okatka altepetl Sidón, noijki yejuan amo omouikayaj inuan okseki altepemej. Satepan danitas oksepa okiyektlalijkej altepetl uan ompa omochantijkej. 29 Maski nin altepetl omotokayotiaya Lais, yejuan okitokayotijkej Dan ijkon ken omotokayotiaya inpapa, ikone Israel. 30 Satepan danitas ompa okitlalijkej imagen. Jonatán ikone Guersom, ikone Moisés uan ixuiuan okintlalijkej ken teopixkej para itribu Dan. Hasta ijkuak oksekan okinuikakej akinmej ompa ochantiayaj. 31 Yejuan ompa okitlalijkej imagen tlen Miqueas okichi. Non imagen ompa okatka hasta ijkuak okatka kali kanin okiueyichiuayaj akin melauak toTajtsin Dios, ompa Siló.