Rut
3 Noemí okilui Rut: “Nochpoch, moneki nimitstemolis akin iuan timonamiktis para kuali tiyetos. 2 Boaz tofamiliar uan siuamej tlen inuan otikatka itlakeualuan. Nin youak ye kejekanis* cebada. 3 Ximalti* uan xikmotlalili aceite ajuiak. Noijki xikmotlalili motlaken tlen okachi kuali tikpia uan xitemo kanin tlaejekaniaj.* Pero amo xikkauili Boaz mamitsita hasta ijkuak tlamis tlakuas uan itlaj konis. 4 Ijkuak yikochiti xikita kanin motekas, xikajsiti, xikinxipetsili ikxiuan uan ompa ximoteka. Ye mitsiluis tlen moneki tikchiuas”.
5 Rut okinankili: “Nikchiuas nochi tlen techiluijtok”. 6 Ye otemok kanin otlaejekaniayaj* uan okichi nochi tlen okinauati imonna. 7 Boaz otlakua, itlaj okonik uan oyolpaktoka. Satepan ye oyajki kanin okitlalijkej semilla tlen okololojkej uan inakastlan omotekak. Satepan Rut yolik omotoki inauak, okinxipetsili ikxiuan uan ompa omotekak. 8 Tlajkoyouak Boaz opejki uiuioka, ikinon oijsak uan okitak ikxitlan okatka se siuatl. 9 Boaz okitlajtlani: “¿Akin te?”. Ye okinankili: “Ne niRut, motlakeual, techmalui porque te moneki tikpaleuis nofamilia”. 10 Boaz okilui: “Jehová mamitsteochiua nokone. Axkan okachi tikteititijtok titetlasojtla uan amo titekaua, porque amo otikmotemoli se telpochtli tlen kipia tomin noso se telpochtli tlen amo kipia tomin. 11 Amo ximomojti nokone, nikchiuas nochi tlen otechilui porque nochtin akinmej chantij noaltepe, kimatokej te melauak tiyolkuali. 12 Ne uelis namechpaleuis, pero kajki okse ifamiliar Elimélec tlen okachi kinamiki namechpaleuis. 13 Nikan ximokaua nin youak, tla mostla ye kinekis mitspaleuis, ijkon makichiua. Pero tla ye amo kinekis ijkon kichiuas, ijkon ken Jehová melauak yoltok, ne nimitsiluia melauak nimitspaleuis. Nikan ximokaua hasta ijkuak tlanesis”.
14 Rut ikxitlan omoka uan omejki ijkuak ayamo otlanesiaya para amikaj makixmati. Boaz amo okinekiaya makimatikan ouia se siuatl kanin otlaejekaniayaj. 15 Ye okilui Rut: “Xikualika mopayo, xiktlapo uan xikitskijto”. Ijkuak ye okikitskijtoka, Boaz ipan okitlali kanaj 25 kilos* cebada, okajkokuik uan okimakak Rut. Satepan Boaz oyajki Belén.
16 Ijkuak Rut omokopki ikalijtik, imonna okitlajtlani: “Nochpoch, ¿tlen omitsilui Boaz?”. Rut okilui nochi tlen okichi Boaz para kipaleuis 17 uan okilui: “Onechmakak kanaj 25 kilos cebada uan okijto amo san ijkon manimokopa mokalijtik”. 18 Noemí okilui: “Nochpoch, ximochia para tikitas tlen panos, porque axkan ye amo moseuis hasta kiyektlalis tlen omitsilui”.