Jueces

15 Satepan ijkuak okololouayaj trigo, Sansón okiuikak se tentsojkonetl ijkuak okitato isiua. Okijto: “Nikneki nikalakis itech cuarto kanin kochi nosiua”. Pero ipapa non siuatl amo okikauili makalaki. 2 Ipapa non siuatl okilui: “Onikneltokaya otikkokoliaya nochpoch, ikinon onikmakak akin mouan okatka itech iluitl. Pero ¿amo mitspaktia ikni xokoyotl? Nimitstlatlaujtia iuan ximokaua”. 3 Pero Sansón okijto: “Amo uelis nechtlajtlakoltiskej filisteos ijkuak itlaj nikintoktis”.*

4 Sansón oyajki uan okinkitskito 300 astomej. Satepan okonanki seki kouitl tlen okixotlaltiayaj, okinkuitlapililpi ojome astomej uan intlajkotiaj inkuitlapil okintlalili non kouitl. 5 Satepan okixotlalti non kouitl uan okinkajkaj astomej kanin otoktoka intrigo filisteos. Okichichino* nochi tlailpili* trigo uan trigo tlen ayamo okitekiayaj, noijki uvajkojmej uan olivoskojmej.

6 Filisteos otlajtlankej: “¿Akin ijkon okichi?”. Okinnankilijkej: “Ijkon okichi Sansón, imo tlakatl tlen chanti Timná. Non tlakatl okikuili isiua Sansón uan okimakak akin iuan oyaya iluitl”. Ijkuak filisteos okimatkej, oyajkej uan okinchichinojkej* non siuatl iuan ipapa. 7 Ijkuakon Sansón okinmilui: “Ken namejuan ijkon nankichiuaj, ne amo nimoseuis hasta nimomakopas”. 8 Ikinon ye opejki sejse kinuiteki,* ijkuakon miakej omikej. Satepan Sansón otemok Etam uan omokauato ijtik se cueva tlen okatka itlajkotia se ueyi tepexitl.

9 Satepan filisteos oyajkej Judá uan ik ompa omokajkej. Yejuan onentinemiayaj ik Lehí. 10 Ijkuakon tlakamej tlen ochantiayaj Judá okintlajtlanijkej: “¿Tleka onantechixnamikikoj?”. Filisteos otlanankilijkej: “Otiualajkej otikitskikoj Sansón uan otiktoktikoj* tlen ye otechtokti”.* 11 Ikinon 3,000 tlakamej tlen ochantiayaj Judá oyajkej Etam kanin okatka se cueva itlajkotia se ueyi tepexitl uan okitlajtlanijkej Sansón: “¿Amo tikmati filisteos technauatiaj? ¿Tleka ijkon otikchi?”. Ye okinnankili: “Ne san onikintokti* tlen yejuan onechtoktijkej”.* 12 Yejuan okiluijkej: “Otiualajkej para timitskitskiskej uan timitstemaktiskej inmak filisteos”. Pero Sansón okinnankili: “Xikijtokan* namejuan amo nantechixnamikiskej”. 13 Yejuan okiluijkej: “Amo, san tiknekij timitsilpiskej uan inmak timitstemaktiskej. Pero amo timitsmiktiskej”.

Okilpijkej ika ome mekamej yankuikej uan okikixtijkej itlajkotia ueyi tepexitl uan okiuikakej. 14 Ijkuak filisteos okitakej Sansón oajsito Lehí, yejuan chikauak otsajtsikej ken ijkuak otlatlaniayaj. Ijkuakon iespíritu Jehová okimakak chikaualis Sansón. Uan mekamej tlen ika oilpitoka, okojkotonkej ken mekamej de lino ijkuak yokinchichinojkaj uan cadenas tlen okinpiaya itech imauan ouetskej ken yetoskia opatikej. 15 Ye okinmikti 1,000 tlakamej ika itenkamachal se burro tlen okajsik uan ok kuali okatka. 16 Ijkuakon Sansón okijto:

“¡Ika itenkamachal se burro onikinmikti akinmej nechkokoliaj uan onikintsotsonej!

Ika itenkamachal se burro onikinmikti 1,000 tlakamej”.

17 Ijkuak otlanki ijkon okijto, okitlamotlak itenkamachal burro uan ompa okitokayoti Ramat-Lehí.* 18 Ijkuakon opejki amiki uan okilui Jehová: “Te otikchi manitlatlani, ¿moneki axkan niamikis uan niuetsis inmak akinmej amo kinkuaximiliaj intlakayo?”.* 19 Ijkuakon toTajtsin Dios okichi mamotlapo se koyoktli tlen okatka Lehí uan opejki kisa atl. Sansón oatlik, oksepa okipixki chikaualis uan kuali omomachili. Non ameyali tlen hasta axkan kajki Lehí, okitokayoti En-Hacore.*

20 Sansón okatka injuez israelitas 20 xiuitl, ijkuak filisteos otlanauatiayaj.