Okse ilibro Samuel
20 Ijkuakon okatka se tlakatl tlen san otlakuejsojtinemiaya,* ye omotokayotiaya Seba ikone Bicrí akin benjaminita. Okipitski kuakouitl uan okijto: “Tejuan amo tipouij itech ifamilia David, ikone Jesé amitlaj techmakas tlen okikajteuilijkej. ¡Namejuan israelitas ximokopakan kanin katej namodioses!”.* 2 Ijkuakon tlakamej israelitas ayakmo okipaleuijkej David uan opejki kipaleuiaj Seba ikone Bicrí. Pero tlakamej tlen pouij itech itribu Judá tlen katej desde aueyatl* Jordán hasta Jerusalén amo okikajkej tekiua.
3 Ijkuak David oajsito Jerusalén kanin okatka ipalacio, otlanauati makinkalakikan ijtik se kali uan makinmaluikan majtlaktli oksekimej isiuauan tlen okinkajtejka makimaluilikan ipalacio. Tekiua David okinmakaya tlen kikuaskiaj pero ayakmo inuan omotekak. Maski inamik oyoltoka, yejuan okatkaj ken yetoskia yomiki inamik uan ompa omokajkej hasta ijkuak omikej.
4 Satepan tekiua okilui Amasá: “Xikinnotsa tlakamej tlen pouij itech itribu Judá uan xikinmilui uiptla nikan maualakan uan te noijki xiuiki”. 5 Amasá okinnechikoto akinmej pouij itech itribu Judá pero ye ouejkauato miak. 6 Ijkuakon David okilui Abisái: “Seba ikone Bicrí, uelis okachi techtlajyouiltis amo ken Absalón. Xikinuika notlakeualuan uan xikkuitlapantoka, tlamo ye cholos uan ajsiti itech altepemej tlen kuali tsajtsaktokej”. 7 Itlakeualuan Joab, keretitas, peletitas uan nochtin tlakamej chijchikauakej oyajkej iuan Joab, okiskej Jerusalén uan okikuitlapantokakej Seba ikone Bicrí. 8 Ijkuak oajsitoj Gabaón kanin okatka ueyi tetl,* Amasá okinamikito Joab. Ijkuakon Joab okonakijtiaya* itlaken tlen okiuikaya guerra uan noijki okiuikaya iespada. Pero ijkuak inauak omotoki, iespada okiski ijtik ikuetlaxo uan ouetski.
9 Joab okilui Amasá: “¿Nokni, kuali tika?”. Ijkuakon Joab ika iyekma okikitskili itentsojmio Amasá ken yetoskia kipipitsoskia.* 10 Pero Amasá amo okitak Joab okikitskijtoka iespada, ijkuakon Joab okijtitsoponili uan hasta okiski ikuetlaxkol* uan ouetski tlalpan. Amo omonek okse uelta kijtitsoponilis porque san ika se uelta okimikti. Satepan Joab uan Abisái okikuitlapantokakej Seba ikone Bicrí.
11 Se itlakeual Joab omoketsato kanin okatka icuerpo Amasá uan okijtouaya: “¡Akin kipaleuis Joab uan David, makitoka Joab!”. 12 Amasá ouetoka itlajkotia ojtli ipan ieso. Ijkuak non tlakatl okitak nochtin akinmej ik ompa opanouayaj omoketsayaj, okikauato icuerpo Amasá tlala. Noijki okipacho* ika se tsotsoli* porque okitak akinmej ik ompa opanouayaj ompa omoketsayaj. 13 Ijkuak oksekan okitlali icuerpo Amasá, nochtin tlakamej oyajkej iuan Joab para kikuitlapantokaskiaj Seba ikone Bicrí.
14 Seba okinpanoui nochtin itribus israelitas uan oajsito altepetl Abel de Bet-Maacá, noijki omonechikojkej bicrítas, okalakej altepetl uan okikuitlapantokakej Seba.
15 Joab uan itlakeualuan oajsitoj uan okiyaualojkej altepetl Abel de Bet-Maacá, otlaltemitijkej inakastlan tepamitl para kipojpoloskiaj altepetl porque non altepetl kuali otsajtsaktoka. Itlakeualuan Joab opejki tlachkuaj itlampa tepamitl para kixixiniskiaj. 16 Se siuatl ixtlamatki tlen okatka altepetl Abel de Bet-Maacá opejki chikauak kijtoua: “¡Techkakikan, techkakikan! Namechtlatlaujtia xikiluikan Joab nikan mauiki, nikneki iuan nimotlapouis”. 17 Ijkuak Joab ik ompa oyajki, siuatl okitlajtlani: “¿Te tiJoab?”. Ye okinankili: “Kema, ne niJoab”. Siuatl okilui: “Xikkaki tlen nimitsiluis”. Joab okilui: “Nimitskaktok”. 18 Non siuatl ok okijto: “Yiuejkika ijkuak ikaj okinekiaya itlaj kiyektlalis, nochipa okijtouayaj: ‘Xitlajtlanikan ompa altepetl Abel’. 19 Ne oniuala inpatka israelitas tlen yolkualmej uan kiteititiaj yolseuilis. Te tikneki tikpojpolos nin altepetl tlen kajki ken inmama israelitas. ¿Tleka tikneki tikpojpolos tlen Jehová okimakak ialtepe?”. 20 Joab okinankili: “Ne amo keman onimokuayejyeko* nikpojpolos. 21 Tejuan amo tiknekij ijkon tikchiuaskej. Pero se tlakatl tlen chanti itepeyo Efraín tlen motokayotia Seba ikone Bicrí okixnamik tekiua David. San techmaktilikan non tlakatl uan nias”. Ijkuakon siuatl okilui Joab: “Ikpak* tepamitl timitstlamochiliskej itsonteko”.
22 San niman siuatl ixtlamatki omotlapouito inuan akinmej ompa ochantiayaj uan yejuan okikechtsontekej Seba ikone Bicrí uan itsonteko okiualtlamochilijkej Joab. Ijkuakon ye okipitski kuakouitl uan itlakeualuan okikajkej non altepetl uan oyajkej inkalijtik. Satepan Joab omokopki Jerusalén kanin okatka tekiua.
23 Joab okinyekanaya nochtin soldados israelitas. Benaya ikone Jehoiadá okinyekanaya keretitas uan peletitas. 24 Adoram okinyekanaya akinmej okinchiualtiayaj matekipanokan. Jehosafat ikone Ahilud okijkuilouaya tlen opanouaya itech non tekiuajkayotl. 25 Sevá otlajkuilouaya. Sadoc uan Abiatar okatkaj teopixkej. 26 Irá akin jairita noijki omochi iteopixki David.