Okse ilibro Samuel
24 Israelitas oksepa okikualanijkej Jehová ijkuak ikaj okilui David ijkin makichiua: “Xio uan xikinpoua israelitas uan akinmej pouij itech itribu Judá”. 2 Joab akin okinyekanaya isoldados David iuan okatka uan David ijkin okilui: “Nimitstlatlaujtia, xio ik kanin katej nochtin intribus israelitas desde Dan hasta Beer-Seba, xikinmijkuilo akinmej chantij altepetl para nikmatis keski katej”. 3 Joab okilui tekiua David: “Noteko uan notekiua, Jehová moDios makimiakili 100 veces moaltepe uan te tikitas ijkuak ijkon panos. Pero noteko, ¿tleka tikneki makinpouakan israelitas?”.
4 Pero David amo okinkakili tlen okijtojkej Joab uan akinmej okinyekanayaj soldados. Ikinon Joab uan akinmej okinyekanayaj soldados okikajtejkej tekiua uan oyajkej okinpouatoj israelitas. 5 Yejuan okipanouijkej aueyatl* Jordán uan omokauatoj ik altepetl Aroer, inakastlan se altepetl tlen kajki itlajkotia barranca. Satepan oyajkej ik intlal gaditas uan altepetl Jazer. 6 Satepan oyajkej Galaad uan tlalmej tlen okatkaj Tahtim-Hodsí, okipanouijkej Dan-Jaán uan oyajkej ik Sidón. 7 Satepan okipanouijkej altepetl Tiro tlen kuali otsaktoka, inmialtepeuan heveos, cananeos uan oajsitoj Négueb tlen kajki Judá ompa Beer-Seba. 8 Ijkon onentinenkej itech nochi altepetl Israel, ouejkajkej chiknaui metstli uan veinte tonalmej, ijkuakon oajsitoj Jerusalén. 9 Satepan Joab okilui tekiua keski okinmijkuilo. Altepetl Israel okinpiaya 800,000* soldados tlen okinpiayaj inmiespadas uan itribu Judá okinpiaya 500,000* tlakamej.
10 Pero ijkuak otlanki okinpojkej, iyolo David opejki kitlajtlakoltia uan okilui Jehová: “Onitlajtlakolchi ika tlen onikchi, Jehová nimitstlatlaujtia techtlapojpolui porque onikchi ken akin xoxo”.* 11 Ijkuak David san kualkan* omejki, Jehová itlaj okimatilti profeta Gad akin itlaj okinextiliayaj para kiluis David. Ye ijkin okiluijkej: 12 “Xio uan xikilui David: ‘Nin tlen kijtoua Jehová: “Nimitsiluis eyi tlamantli uan xikpejpena tlen tikneki manimitstokti”’”.* 13 Satepan profeta Gad okitato David uan okilui: “¿Tlen tikpejpenas? ¿Matlaapisti chikome xiuitl itech altepetl? ¿Tikincholilijtinemis eyi metstli akinmej mitskokoliaj? Noso ¿eyi tonal fiero mamokokokan akinmej chantij itech altepetl? Kuali ximokuayejyeko* uan techilui tlen nikiluis akin onechtitlanki”. 14 David okinankili profeta Gad: “Nin sapanoua oui, nimitstlatlaujtia amo xikkauili se tlakatl manechtlajyouilti, okachi kuali Jehová matechtlajyouilti porque ye sapanoua teiknomati”.
15 Ijkuakon Jehová okichi fiero mamokokokan akinmej ochantiayaj Israel desde kualkan hasta oajsik tonal tlen okijtojka. Desde Dan hasta Beer-Seba omikej 70,000* israelitas. 16 Ijkuak ángel omaso ik Jerusalén para kipojpoloskia, Jehová omoyolkoko miak ijkuak okitak miakej omokokojtokaj ikinon okilui ángel tlen okipojpolojtoka altepetl: “¡Ayakmo ijkon xikchiua! Xiktemoui moma”. Iángel Jehová okatka kanin tlaejekaniaj* tlen iaxka Arauna akin jebuseo.
17 Ijkuak David okitak ángel tlen okitlajyouiltijtoka altepetl, okilui Jehová: “Ne onitlajtlakolchi, ne akin onimotlapololti. Pero nin altepetl,* ¿kox itlaj okichi? Nimitstlatlaujtia san ne uan ifamilia nopapa techtlajyouilti”.
18 Non tonal profeta Gad okitato David uan okilui: “Xitlejko kanin tlaejekaniaj tlen iaxka Arauna akin jebuseo uan ompa xikchiua se altar para Jehová”. 19 David oyajki kanin Gad okilui uan okichi ijkon ken Jehová okinauatijka. 20 Ijkuak Arauna otlachixki tlakxitlan okinmitak tekiua uan itlakeualuan otlejkotiayaj. Ye san niman okinamikito tekiua, oyajki uan ixpan omoixtlapacho. 21 Arauna okitlajtlani: “Noteko uan notekiua, ¿tleka otechitako ne akin nimotlakeual?”. David okilui: “Onimitskouiliko nikan kanin titlaejekania* para nikchiuilis se ialtar Jehová uan ijkon ayakmo mokokoskej akinmej chantij itech nochi altepetl”. 22 Pero Arauna okilui David: “Noteko uan notekiua, xikmokaui uan xiktemaka tlen te tiknekis. Nikan katej toros para xikintemaka ken tetliokolil tlen mochichinoua,* noijki nikan katej tablas tlen ika kichipauaj semilla uan noijki nikan kajki kouitl tlen kinkechtlaliliaj ome toros, nochi non uelis ika titlatlatis. 23 Notekiua nochi non nimitsmaka”. Arauna noijki okilui: “Jehová moDios mamitsteochiua”.
24 Pero tekiua David okilui Arauna: “Ne amo uelis nikmakas Jehová noDios tetliokolilmej tlen mochichinouaj* tla amo onikinko. Ikinon ne moneki nochi non nimitstlaxtlauilis”. Ijkuakon David okinko toros uan kanin tlaejekaniaj, ye okitlaxtlauili Arauna kanaj tlajko kilo* plata. 25 Satepan David ompa okichiuili Jehová se altar uan okinmakak tetliokolilmej tlen mochichinouaj uan tetliokolilmej tlen tesetiliaj. Ijkuakon Jehová okinkak akinmej omotlatlaujtiayaj ipatka altepetl uan israelitas ayakmo omokokojkej.