Josué
11 Ijkuak Jabín akin otlanauatiaya Hazor okimatki tlen opanok, otlanauati makiluitij Jobab akin otlanauatiaya Madón, noijki akin otlanauatiaya Simrón uan akin otlanauatiaya Acsaf. 2 Noijki akinmej otlanauatiayaj ik norte kanin tepeyo, akinmej okatkaj Arabá ik isur Kinéret,* akinmej okatkaj Sefelá, akinmej okatkaj itech tlalmej tlen ixtemotokej* ompa Dor tlen kajki ik kanin motlatia tonaltsin. 3 Noijki cananeos tlen okatkaj ik kanin kisa tonaltsin uan ik kanin motlatia tonaltsin, amorreos, hititas, perizitas, jebuseos tlen okatkaj tepeyo uan heveos tlen okatkaj ikxitlan tepetl Hermón ompa Mizpá. 4 Nochtin yejuan oyajkej inuan insoldados tlen okatkaj sapanoua miakej ken xali tlen kajki itempa mar. Noijki ijkuak oyajkej guerra okinuikakej sapanoua miakej caballos uan carretas. 5 Nochtin nonmej tekiuajkej okijtojkej san sekan monechikoskej, ikinon oyajkej uan omokajkej ik kanin meya atl ompa altepetl Merom para kinmiktiskej israelitas.
6 Ijkuakon Jehová okilui Josué: “Amo mamitsmomojtikan porque mostla kanaj nin hora namechinmaktilis uan nankinmiktiskej. Tikinkoxotilis incaballos uan tikinchichinos* incarretas”. 7 Josué iuan isoldados san ichtaka oajsitoj ik kanin meya atl ompa Merom, kanin okatkaj akinmej okinkokoliayaj uan ompa okinmiktijkej. 8 Jehová okinmaktili israelitas akinmej okinkokoliayaj. Okintlanilijkej uan okinkuitlapantokakej hasta altepetl Sidón la Grande, ik Misrefot-Maim uan ixtlauak* Mizpé tlen kajki ik kanin kisa tonaltsin. Nochtin okinmiktijkej. 9 Josué okichi ijkon ken Jehová okinauatijka, okinkoxotili incaballos uan okinchichino* incarretas.
10 Satepan Josué omokopki, okimoaxkati altepetl Hazor uan okimikti ika espada akin ompa otlanauatiaya. Porque altepetl Hazor okinyekanaya okseki altepemej. 11 Nochtin akinmej ompa ochantiayaj okinmiktijkej ika espada. Satepan Josué okichichino* altepetl Hazor uan nochtin okinmiktijkej. 12 Josué okintlanili ika espada nochtin ninmej tekiuajkej uan okimoaxkati altepemej kanin yejuan otlanauatiayaj uan nochtin okinmikti. Okichi ijkon ken okinauatijka Moisés itekipanojka Jehová. 13 Josué san okichichino altepetl Hazor tlen tlakpak okatka pero israelitas amo okinchichinojkej* okseki altepemej tlen tlakpak okatkaj. 14 Israelitas okinmokauijkej yolkamej uan nochi tlen kuali okitlankej ijkuak otemiktitoj itech nonmej altepemej. Amikaj okikajkej mayolto, nochtin akinmej ompa ochantiayaj okinmiktijkej. 15 Yejuan okichijkej tlen Jehová okinauatijka itekipanojka Moisés. Moisés noijki ijkon okinauati Josué uan Josué okichi nochi tlen okinauatijkaj. Josué okichi nochi tlen Jehová okiluijka Moisés.
16 Josué okimoaxkati nochi tlali tlen kajki tepeyo, Négueb, tlali tlen kajki Gosén, Sefelá, Arabá, intepeyo israelitas uan tepemej tlen ik ompa katej, 17 desde tepetl Halac, inakastlan Seír uan hasta Baal-Gad tlen kajki ixtlauak Líbano, ikxitlan tepetl Hermón. Noijki akinmej ompa otlanauatiayaj okinkitski, okintlanili uan okinmikti. 18 Ouejka guerra tlen Josué okipixki inuan ninmej tekiuajkej. 19 San heveos tlen ochantiayaj Gabaón okinmiluijkej israelitas amitlaj makintoktikan.* Pero okseki altepemej amo ijkon okichijkej. Israelitas okinmoaxkatijkej ninmej altepemej uan okinmiktijkej akinmej ompa ochantiayaj. 20 Jehová okika yejuan mayoltlakuauakan para mamomijmiktitij inuan israelitas, ijkon ye amo okinmiknomatki uan okinmikti. Omonekiaya kinmiktiskej, ijkon ken Jehová okinauatijka Moisés.
21 Ijkuakon Josué okinmikti anaquim tlen okatkaj tepeyo, tlen okatkaj Hebrón, tlen okatkaj Debir uan tlen okatkaj Anab. Noijki tlen okatkaj tepeyo ompa Judá uan intepeyo israelitas. Josué nochtin okinmikti uan noijki okipojpolo kanin ochantiayaj. 22 Sekimej anaquim omokajkej ompa Gaza, Gat uan altepetl Asdod pero nion se omoka kanin ochantiayaj israelitas. 23 Ijkon ken Jehová okiluijka Moisés, Josué okimoaxkati nochi tlali. Satepan Josué okinmakak tlali israelitas uan okinxexelili sejse tribus ijkon ken omonekiaya. Ompa ik kanin okatkaj ayakmo omochi guerra.