Tlen okijkuilo Juan
16 “Ijkon onamechilui para amo keman techkauakan. 2 Ayakmo namechkauiliskej xikalakikan itech sinagoga.* Ajsis tonal akinmej namechmiktiskej, kineltokaskej kiueyichiuaj toTajtsin Dios. 3 Ijkon kichiuaskej porque amo kixmatij noTajtsin nion ne amo nechixmatij. 4 Yonamechilui non tlamantli para ijkuak ijkon panos xikilnamikikan ne ijkon yonamechiluijka”.
“Amo ijkon onamechilui achto porque namouan onikatka. 5 Pero axkan nio inauak akin onechualtitlanki, ¿uan namejuan amo nantechtlajtlaniaj kanin nio? 6 Namejuan nanmoyolkokouaj porque ijkon onamechilui. 7 Ne amo namechkajkayaua ijkuak namechiluia nias para namechpaleuis. Porque tla amo nias, espíritu santo amo namechpaleuiki pero tla nias ne namechualtitlanilis. 8 Ijkuak espíritu santo namechpaleuiki, kuali kiteititis intlajtlakol akinmej chantij tlaltikpak, kiteititis kuali tlen nikchiua uan kiteititis toTajtsin Dios tlaixkomaka. 9 Achto kiteititis intlajtlakol akinmej chantij tlaltikpak porque yejuan amo nechneltokaj. 10 Satepan kiteititis kuali tlen nikchiua porque nias inauak noTajtsin uan namejuan ayakmo nantechitaskej. 11 Satepan kiteititis toTajtsin Dios tlaixkomaka porque yokixkomakak akin tlanauatia ipan tlaltikpak”.
12 “Ok moneki namechiluis miak tlamantli, pero axkan amo uelis nankajsikamatiskej. 13 Ijkuak nankiseliskej espíritu santo tlen kiteititia tlen melauak, namechpaleuis kuali xikajsikamatikan nochi tlen melauak. Espíritu santo kiteititia tlen toTajtsin Dios kineki mamoteititi uan amo kiteititia tlen ye kineki. Ijkon nankimatiskej tlen panos satepan. 14 Espíritu santo nechueyitlalis porque kiselis tlen noaxka, uan ye namechmatiltis. 15 Nochi tlen iaxka noTajtsin noijki noaxka. Ikinon onikijto espíritu santo kiselis tlen noaxka uan ye namechmatiltis. 16 San niman ayakmo nantechitaskej pero noijki san niman oksepa nantechitaskej”.
17 Ijkuak ijkon okijto, sekimej idiscípulos okimoluijkej: “¿Tleka techiluia san niman ayakmo tikitaskej pero noijki san niman oksepa tikitaskej? ¿Tleka techiluia yas inauak iTajtsin?”. 18 Okijtojkej: “¿Tlen kijtosneki ijkuak okijto san niman? Amo tikmatij tlen kijtosneki”. 19 Jesús okimatiaya itlaj okinekiayaj kitlajtlaniskej ikinon okinmilui: “¿Nanmotlajtlaniaj tleka onikijto: ‘San niman ayakmo nantechitaskej pero noijki san niman oksepa nantechitaskej’? 20 Ne melauak namechiluia, namejuan nanmoyolkokoskej uan nanchokaskej pero oksekimej pakiskej. Nanmoyolkokoskej pero non kichiuas xipakikan. 21 Ijkuak se siuatl kipia ikone, sapanoua kikokoua porque yoajsik hora. Pero ijkuak yoneski* ikone, kilkaua okikoko uan paki porque tlaltikpak oneski* okse konetl. 22 Namejuan noijki ijkon namechpanoua. Axkan nanmoyolkokouaj pero satepan oksepa namechitas uan nanyolpakiskej. Amikaj uelis kichiuas ayakmo xipakikan. 23 Non tonal amitlaj nantechtlajtlaniskej. Ne melauak namechiluia, noTajtsin namechmakas nochi tlen nankitlajtlaniliskej ika notoka. 24 Hasta axkan amitlaj nankitlajtlanij ika notoka. Xiktlajtlanikan uan nankiseliskej. Ijkon sapanoua nanpakiskej”.
25 “Nochi nin tlamantli yonamechtlapoui ika neskayomej.* Pero ajsis tonal namechiluis tlen kichijtok noTajtsin uan ayakmo namechtlapouis ika neskayomej.* 26 Non tonal itlaj nankitlajtlaniliskej noTajtsin ika notoka. Nin amo kijtosneki namopatka niktlajtlanilis. 27 ToTajtsin Dios namechtlasojtla porque ne nantechtlasojtlaj uan nankineltokaj ipatka oniuala. 28 Oniuala nikan tlaltikpak ipatka noTajtsin. Axkan nikkauas tlaltikpak uan nimokopas inauak noTajtsin”.
29 Discípulos okiluijkej: “Axkan timitsajsikamatij porque ayakmo techtlapouia ika neskayomej.* 30 Axkan tejuan tikajsikamatij te tikmati nochi uan amo moneki ikaj itlaj mamitstlajtlani. Ikinon tikneltokaj toTajtsin Dios omitsualtitlanki”. 31 Jesús okinmilui: “¿Axkan nantlaneltokaj? 32 Xikkakikan tlen namechiluis. Ajsis hora nanmoxexeloskej uan non hora yoajsiko. Nantechkajteuaskej noselti uan nanyaskej namochan. Pero amo nika noselti porque noTajtsin nouan kajki. 33 Ijkon yonamechilui para namechpaleuis xiyetokan ika yolseuilistli. Namejuan nantlajyouiskej nikan tlaltikpak. Pero ximoyolchikauakan porque ne yonikintlanili akinmej chantij tlaltikpak”.