Achto ilibro Samuel
16 Satepan Jehová okilui Samuel: “¿Hasta keman timoyolkokojtos por Saúl? ¿Amo tikmati ne ayakmo nikneki mayeto intekiua israelitas? Xiktemiti kuakouitl ika aceite uan xio. Nikneki xikitati Jesé akin betlemita porque ne yonikpejpenki se ikone mayeto tekiua”. 2 Pero Samuel okilui: “¿Ken nimixeuis ompa nias? Saúl nechmiktis tla kimatis”. Jehová okilui: “Xikuika se torojkonetl uan xikijto: ‘Oniuala para nikmakas se tetliokolil Jehová’. 3 Xikilui Jesé mouan mauia ijkuak tiktemakas tetliokolil uan ijkuakon ne nimitsiluis tlen tikchiuas. Moneki tikkuatlalilis aceite akin ne nimitsiluis”.
4 Samuel okichi tlen Jehová okilui. Ijkuak oajsito altepetl Belén, tlayekankej tlen ompa okatkaj okitakej uan opejki uiuiokaj porque omomojtiayaj uan okitlajtlanijkej: “¿Itlaj opanok?”. 5 Samuel otlanankili: “Amitlaj opanok. Ne oniuala para nikmakas Jehová se tetliokolil. Ximoyektlalikan* uan nouan xiualakan ijkuak niktemakas tetliokolil”. Satepan ijkuak okiyektlali* Jesé uan ikoneuan, okinnechiko para kitemakaskia tetliokolil. 6 Ijkuak oajsitoj, Samuel okitak Eliab uan okijto: “Ye nin akin Jehová okipejpenki”. 7 Pero Jehová okilui Samuel: “Amo san xikita ken mota nion ken uejkapantik* porque amo ye onikpejpenki. Dios amo kita itlaj ken tlakatl kita. Porque tlakatl kita tlen kajki ixpan pero Jehová kita tlen ikaj kipia iyolipan”.* 8 Satepan Jesé okinotski Abinadab uan okiuikak ixpan Samuel pero ye okijto: “Jehová noijki amo okipejpenki”. 9 Satepan Jesé okinotski Samá pero Samuel okijto: “Jehová noijki amo okipejpenki”. 10 Ixpan Samuel, Jesé okinuikak chikome ikoneuan pero ye okilui Jesé: “Jehová nion se okipejpenki”.
11 Ijkuakon Samuel okitlajtlani Jesé: “¿Yejuan nochtin mokoneuan?”. Ye okinankili: “Ok poliui xokoyotl, ye okinmaluito ichkamej”.* Samuel okilui Jesé: “Ikaj xiktitlani makinotsati uan titlakuaskej hasta maajsiki”. 12 Ye otlanauati makitemotij uan okiualikakej. Ye okatka ok telpochtli, okinpiaya kuajkualtsitsintin ixtololouan uan kualtsin omotaya. Ijkuakon Jehová okijto: “¡Ye nin akin onikpejpenki! Ximoketsa uan xikkuatlalili aceite”. 13 Samuel okonanki kuakouitl tlen okipiaya aceite uan okikuatlalili David inmixpan ikniuan. Desde non tonal Jehová ika iespíritu okimakak chikaualis David. Satepan Samuel oyajki Ramá.
14 Ijkuakon Jehová ayakmo okipaleuiaya Saúl ika iespíritu uan Jehová okitekauili Saúl makimomojti tlen amo kuali omokuayejyekouaya.* 15 Itlakeualuan Saúl okiluijkej: “Yomotak toTajtsin Dios kitekauilia mamitsmomojti tlen amo kuali timokuayejyekoua.* 16 Toteko, timitstlatlaujtiaj xikilui se motlakeual tlen nikan kajki, makitemoti se tlakatl tlen kuali kitsotsona arpa. Ijkon ye kitsotsonas arpa para kuali ximomachili ijkuak mitsmomojtis tlen amo kuali timokuayejyekos”.* 17 Saúl okinnankili itlakeualuan: “Namechtlatlaujtia xiktemokan se tlakatl tlen kuali tlatsotsona uan techualikilikan”.
18 Se akin okipaleuiaya Saúl okijto: “Yonikmatki Jesé akin betlemita, kipia se ikone tlen kuali tlatsotsona ye se soldado chikauak uan yolchikauak. Noijki kimati kuali tlajtos, kualtsin mota uan Jehová kipaleuijtok”. 19 Ijkuakon Saúl okintitlanki sekimej tlakamej makiluitij Jesé: “Techualtitlanili mokone David tlen kinmaluijtok yolkamej”. 20 Jesé okitlali ipan se burro seki pan, kuetlaxtekonmej tlen okipiayaj vino uan se tentsojkonetl, nochi non okiuikak David para Saúl. 21 Ijkuakon David oyajki kanin okatka Saúl uan opejki kitekichiuilia. Saúl opejki kitlasojtla uan David opejki kinuikilia iteposuan. 22 Satepan Saúl otlanauati ijkin makiluitij Jesé: “Nimitstlatlaujtia xikkauili mokone David ok manechpaleuijto, porque kuali tlen kichiua”. 23 David okonanaya arpa uan okitsotsonaya ijkuak Saúl okimomojtiaya tlen amo kuali omokuayejyekouaya.* Ijkuakon Saúl omoyolseuiaya uan kuali omomachiliaya uan ayakmo okimomojtiaya tlen amo kuali omokuayejyekouaya.*